Te mau vahine mātāmua o te fa’aho’i-fa’ahou-ra’a mai

Te ti’aturira’a i te Fatu

Nā Brent M. Rogers

Tuha’a fa’atere nō te ’ā’amu o te ’Ēkālesia

Nō te mea ’ua ’ite ’oia i te Fatu nā roto i te mau pāpa’ira’a mo’a, ’ua fa’ahau noa te fa’aro’o rahi o Mary Ann Young iāna « nā roto i te mau vero ato’a ra ».¹

Fa’ahōho’ara’a nā Toni Oka

’Ua fāna’o ’o Mary Ann Angell i te pa’arira’a i roto i te hō’ē ’utuāfare tei tu’u nā mua roa i te tai’ora’a pāpa’ira’a mo’a. E mea au ta’a ’ē nāna te mau ha’api’ira’a a te Fa’aora.² ’Ua ha’api’i ’oi’oi ’oia i roto i tōna orara’a ē, e nehenehe tāna e fa’aro’o i te reo o te Fatu nā roto i te mau pāpa’ira’a mo’a ma te ’ite i te tāmāhanahanara’a i roto i tāna mau ha’api’ira’a.

’Ua fa’aro’o ’oia i te porora’ahia te ’evanelia a Iesu Mesia tei fa’aho’i-fa’ahou-hia mai i Rhode Island, i te Fenua Marite, i te matahiti 1831, ’e i muri a’e i te tai’ora’a i te Buka a Moromona, ’ua fa’afāriuhia ’o Mary Ann i te ’evanelia.

’Ua haere atu ’oia i Kirtland, i Ohio, i te matahiti 1833, i reira tōna fārereira’a ia Brigham Young, ’o tāna i fa’aipoipo atu i te ’ōmuara’a matahiti 1834. I roto i nā matahiti 48 i muri mai, nā roto i te mau tauiuira’a fare ’e te mau tāmatara’a, ’ua tāmau noa ’o Mary Ann Angell i te fa’aro’o i te Fatu nā roto i te mau pāpa’ira’a mo’a ’e i te tu’u i tōna ti’aturi ’āueue ’ore i ni’a iāna.

’Ei hi’ora’a, ’ua haere tāna tāne fa’aipoipo i te misiōni i te fenua Peretāne i te matahiti 1839, 10 mahana noa i muri a’e i tōna fānaura’a i tā rāua tamāhine ia Alice. Nō nā ’āva’e 20 i muri mai, ’ua fifihia ’o Mary Ann ’e tā rāua nā tamari’i e ono. ’Ua ro’ohia rātou i te ma’i ’e ’ua ora noa rātou maoti te tahi faraoa tō popa’ā, te ū, ’e te tahi mā’a tupu nō te ’āua.³ ’Ua roa’a ia Mary Ann i te hō’ē ’ohipa iti nō te fa’aora i tōna ’utuāfare ’e nō te aupuru iāna iho ’e tāna mau tamari’i ma’ima’i. Terā rā ’ua tauturu te Fatu ia rātou i roto i teie mau tāmatara’a. « E mea fa’ahiahia mau te reira », ’ua pāpa’i ’oia i tāna tāne fa’aipoipo, « te ti’aturira’a i te Fatu ».⁴

Ma te tūru’i i ni’a i tōna ’ite o te mau pāpa’ira’a mo’a, e au ra ē ’ua māramaramahia Mary Ann i te hō’ē ’itera’a hōhonu ē tei pīha’i iho noa te Fatu iāna, ’ua here ’oia iāna, ’e ’ua ’ite ’oia iāna, i roto iho ā rā i tāna mau tāmatara’a e rave rahi. « ’Ia arata’i mai te Fatu ia tātou i roto i te mau mea ato’a ’e ’ia parau tāmāhanahana noa i roto i te mau taime poiri roa a’e ’e te mau hora tāmatara’a » ’o tāna ïa pure.⁵

Fa’ata’ara’a

1. Rata nā Mary Ann Angell Young ia Brigham Young, 30 nō Tiunu 1844, Brigham Young Office Files, 1832–1878, Vaira’a buka ’ā’amu a te ’Ēkālesia, Roto Miti (CHL).

2. Hi’o « Biography of Mrs. Mary Ann Young », Woman’s Exponent, Sept. 1, 1887, 53–54; Emmeline B. Wells, “In Memoriam,” Woman’s Exponent, 15 nō Tiurai 1882, 28–29.

3. Hi’o Matthew C. Godfrey, « ‘You Had Better Let Mrs Young Have Any Thing She Wants’: What a Joseph Smith Pay Order Teaches about the Plight of Missionary Wives in the Early Church », BYU Studies, vol. 58, no. 2 (2019), 63–64.

4. Rata nā Mary Ann Angell Young ia Brigham Young, 15 nō ’Ēperēra 1841, Brigham Young Office Files, 1832–1878, CHL.

5. Rata nā Mary Ann Angell Young ia Brigham Young, 21 nō Māti 1840, George W. Thatcher Blair Collection, 1837–1988, CHL.