Welcome Niini nga Isyu

Kita Adunay mga Butang nga Komon uban sa Miaging mga Santos sa Ulahing mga Adlaw

Isip usa ka tigsaysay [historian] sa Joseph Smith Papers Project, ganahan ko sa paghatag og mga pakigpulong sa debosyonal ug makig-istorya sa mga miyembro sa Simbahan kabahin sa kasaysayan sa Simbahan. Samtang ako kining gihimo, akong namatikdan nga ang ubang mga tawo maglisod sa pagkakita og mga butang nga komon kanato sa mga Santos sa nangagi. Ang mga paghulagway niini nga mga indibidwal kanunay nagtutok sa ilang bayanihon nga mga kinaiya, naghimo niini nga daw wala gayod sila nanglimbasog sa pagduha-duha, sakit, o kawalay paglaom.

Apan ang mga miyembro sa Simbahan nga nagpuyo niadtong mga 1800 dili usab hingpit sama kaninyo ug kanako karon. Nakasinati sila og kasadya ug kalipay, kasakit ug pag-antos—ug sa kanunay ordinaryo, normal lamang nga mga adlaw. Nakakat-on ako og daghan gikan sa ilang mga kasinatian mahitungod kon unsaon nga magmalamposon latas sa tanang pagsulay sa atong kinabuhi.

Nanghinaot ako nga ang inyong pagtuon sa Doktrina ug mga Pakigsaad niining tuiga nagtabang kaninyo nga makakat-on mahitungod sa paagi nga ang mga Santos sa nangagi miatubang sa mga hagit sa kinabuhi. Nanghinaot usab ako nga ang akong artikulo kon giunsa ni Joseph Smith nga nagmalamposon sa mga pagsulay makapalig-on sa inyong pagtuo ug makatabang kaninyo nga makakita nga kita adunay komon nga mga butang sa mga hagit nga iyang giagian (tan-awa sa pahina 30). Usa sa mga hagit mao ang nanglimbasog siya nga makakuha og direksyon gikan sa Ginoo aron masayod unsaon sa pagtabang sa gipanggukod nga mga Santos sa Missouri. Sa dihang mitubag ang Ginoo, gihatagan Niya ang Propeta og makahupay nga pag-aghat: “Pagmalinawon ug hibaloi nga Ako mao ang Dios” (Doktrina ug mga Pakigsaad 101:16).

Daghan kita og makat-onan gikan niadtong kinsa nag-una kanato—dili lang gikan sa ilang milagroso nga mga kasinatian apan gikan usab sa ilang hilom nga debosyon.

Matthew C. Godfrey

Departamento sa Kasaysayan sa Simbahan