Feiā ʼāpī paʼari
I te taime fē’a’ara’a, ’ia vai mātara noa te ’ūputa o te fa’aro’o
Noa atu i te tahi mau taime e fē’a’a tātou i te mau ’ohipa pae vārua i tupu i roto i tō tātou orara’a, e nehenehe te pāpūra’a o te reira e ho’i mai mai te pape pu’e ra.
’Ua pa’ari ānei tātou i roto i te ’Ēkālesia ’aore rā ’ua fa’afāriuhia mai tātou i muri iho i roto i te orara’a, e rave rahi o tātou tei ’ite i te mau taime uiuira’a ’aore rā te mana’o fē’a’a. I tupu paha te mau ’ohipa pae vārua māere i roto i tō tātou vārua, i teienei rā, tē vai nei te māna’ona’ora’a ē : E parau mau ānei terā mau ’itera’a pae vārua, ’aore rā e mana’ora’a noa nā’u tō’u fāri’ira’a i te Vārua ? ’E mai te mea ē ’aita hō’ē a’e parau mau i reira ? E tā’u ïa mau uira’a ’aita i pāhonohia atu ra ? Nāhea vau i te fa’aea i roto i te ’Ēkālesia mai te peu ē ’aita vau i pāpū fa’ahou e parau mau ānei ?
Nō’u nei, ’ua māere au i te taera’a mai te reira mau uira’a i muri iho i te tāvinira’a i tā’u misiōni ! I ’ite ho’i au i te parau mau ma te mana’o pāpū ’e ’ua hina’aro vau e poro i te reira ia vētahi ’ē nō te hō’ē matahiti ’e te ’āfa—’e i teienei, tē fē’a’a ra vau i te mau mea ato’a tā’u i ’ite ’e i ha’api’i. ’Auē ïa te māu’a mai te mea e ’ere hō’ē a’e o te reira i te parau mau. E parau mau ānei ïa te reira mau mea ato’a tā’u i ha’api’i ? ’Āore rā ’o vau noa terā e hina’aro ra ’ia riro ’ei parau mau ? I muri a’e i tō’u hi’ora’a atu i te mau hoa e fa’aru’e ra i te ’Ēkālesia ’e ’a fa’aruru ai i te tāfifira’a o tō’u iho nei fa’aro’o, ’ua uiui noa vau ē ’ua ha’avare ānei au iā’u iho.
I taua taime ra, ’aita vau i fa’aea i te haere i te purera’a ’e i te ha’apa’ora’a i te mau fa’auera’a nō terā mau uira’a rahi tā’u. Terā rā, nō te mea e mau uira’a tā’u, ’ua tāmata vau i te pe’e i te a’o a te peresideni Russell M. Nelson ’ia « ha’amara’a i [tō’u nei] ’aravihi i te pae vārua nō te fāri’i i te heheura’a ».1
I ’ite au ē « ’aita e ’ohipa e ha’avētea a’e i te ra’i maori rā te ’āmuira’a te ti’amāra’a rahi a’e, te fa’aro’o pāpū, te ’imira’a pāpū, te tāmā’ara’a tāmahana i te parau a te Mesia i roto i te Buka a Moromona, ’e te fa’ata’ara’a i te taime tāmau nō te ’ohipa hiero ’e te ’ā’amu ’utuāfare ».2 ’Ua mana’o vau ē e mea faufa’a ’ia fa’aea noa i pīha’i iho i te Atua. Inaha ho’i, ’o ’oia ana’e te ta’ata e vai ra nō te pāhonora’a i tā’u mau uira’a.
Te ’ā’amu nō Eunice
I te hō’ē mahana ’a tai’o ai au i te Feiā mo’a : Te ’ā’amu o te ’Ēkālesia a Iesu Mesia i te mau Mahana Hope’a nei, ’ua topa vau i ni’a i te hō’ē ’ā’amu fa’ahiahia nō ni’a i te hō’ē vahine nō te ha’amatara’a o te tau fa’aho’i-fa’ahou-ra’a. Mai te huru ra ē hō’ē ā tā Eunice Franklin mau uira’a ’e mau ha’ape’ape’ara’a ’e tō’u.
’Ua bāpetizohia ’o Eunice i New York nā te hō’ē misiōnare ’o Elia Able te i’oa. ’Ua fa’afāriu-mau-hia ’oia i te ’evanelia i te taime ’a bāpetizo ai ’oia. ’Are’a i muri iho rā, i te fa’aru’era’a mai ’o Elia nō te fano atu i Canada nō te poro, ’ua ha’amata ’o Eunice i te fē’a’a i te ’evanelia ’e i te mau mea tāna i ’ite i te hō’ē taime e parau mau ho’i. ’Ua ha’amata ’oia i te uiui ē e peropheta mau ānei ’o Iosepha Semita ’e e pāpa’ira’a mo’a mau ānei te Buka a Moromona. E rave rahi pō ’aita te ta’oto e topa, ma te mana’o ē ’ua ha’avarehia paha ’oia.
’Ua fa’a’ite atu rā te Fatu i te ’arora’a a Eunice ia Elia i roto i te hō’ē moemoeā, ’e ua ho’i ’oi’oi mai ’oia i New York. I te pātōtōra’a ’oia i tōna ’ūputa, ’ua māere roa ’o Eunice—i mana’o ho’i ’oia e parau ia Elia ē ’aita fa’ahou ’ōna e ti’aturi ra, ’ia ’ite ana’e ’oia iāna. Terā rā, ’ua vaiiho ’oia iāna ’ia tomo mai. I tō Elia ani-manihini-ra’a iāna ’ia haere mai i tāna a’ora’a i taua pō ra, ’ua taiā ri’i ’oia, ’e ’aita ’oia i hina’aro ’ia haere. I te pae hōpe’a rā ’ua haere ’oia ’e ’ua fa’aro’o i te mea tāna i parau.
I roto i tāna a’ora’a, ’ua fa’ahiti Elia i te 1 Petero 4:12 tei nā ’ō ē, « ’eiaha e māere i te hāmani ’ino ’ū’ana i roto ia ’outou ’ei tāmatara’a ia ’outou ». E’ita e ti’a i teie mau tāmatara’a ’ia ha’amou i te fa’aro’o o Eunice—mai ia Eunice i fa’aro’o i te parau a Elia, ’ua mo’e atu ïa tōna fē’a’ara’a.Tē parau ra te Feiā mo’a ē : « Tē parau pāpū ra ’oia i te hō’ē taime ’ua ’ite ’oia i te ’ī-fa’ahou-ra’a ’ōna ».3
E ’ī fa’ahou mai te pāpūra’a
’Ua māere roa vau i te ’ohipa i tupu nō Eunice, ’e ’ua nā ni’a iho noa vau i te feruri fa’ahou ā i te reira. Mai ia Eunice, ’ua ha’api’i mai au nā roto i te mau parau ’ōhie ’e te pūai a Elia. ’Eiaha na tātou e « māere » ’ia tae mai te mau uira’a nō ni’a i tō tātou fa’aro’o. E ’ere roa atu i te fifi. Noa atu ē e mani’i mai te parau mau nō te ra’i mai, tē vai ra iho ā te tahi mau taime i muri mai e nā roto tātou i te pa’urā pae vārua. E uiui paha tātou ē i rari mau na tātou i te ua. ’Aita e pāhonora’a ’e ’aita e ha’apāpūra’a i hōro’ahia mai ra, e nehenehe tātou e tāmau noa i te pure ’ia topa mai te ua o te heheura’a. E nehenehe tā tātou e ’imi i te fa’a’ite pāpū nō te ’ite mai ē, te parau mau nō i nanahi ra, e parau mau noa ā i teie mahana. ’Ua ha’api’i mai ’o Elder Jeffrey R. Holland nō te pupu nō te Tino ’Ahuru Ma Piti ’āpōsetolo ē : « Mai te mea ē i tano i tō ’outou purera’a nō te reira ’e i tō ’outou ti’aturira’a i te reira ’e i tō ’outou orara’a i te reira, ’ua tano ato’a ïa i teienei… ’A ’aro atu i tō ’outou fē’a’ara’a. ’A ha’avī i tō ’outou mau mata’u ».4
Nā roto i te ’īriti-fa’ahou-ra’a i te ’ūputa i tōna hoa misiōnare, noa atu ho’i tōna mau mana’o uiui, ’ua ha’amahora fa’ahou ā ’o Eunice i tōna ’ā’au. ’Ua noa’a fa’ahou ā i te Fatu ’ia paraparau ia Eunice ’e ’ia tauturu iāna ’ia fāri’i i te ha’apāpūra’a nō te mau mea ato’a tāna i ’ite. Mai te reira ato’a, e nehenehe tā tātou tāta’itahi e vaiiho ’ia vai mātara noa te ’ūputa i te fa’aro’o noa atu te tāfifira’a ’e te fē’a’ara’a. E nehenehe tā tātou e tāmau noa i te rave i te mea ti’a ’e i te ’imira’a i te heheura’a—noa atu ’aita tātou i pāpū ē nō te aha tātou e rave ai i te reira.
E tāpe’a noa tātou i te ’ūputa matara nā roto i te mau mea iti tā te Atua i parau mai ia tātou ē e mea maita’i nō tō tātou vārua. E ha’amo’a tātou i te mahana sābati ’e e haere tātou i tā tātou mau purera’a. E tai’o tātou i te mau pāpa’ira’a mo’a, noa atu ē hō’ē noa iho ’īrava i te taime hō’ē. E fa’aro’o tātou i te hō’ē hīmene ’aore rā i te hō’ē a’ora’a nō te ’āmuira’a. E paraparau tātou i te Metua i te ao ra i tō tātou mau māna’ona’ora’a ’e tā tātou mau tīa’ira’a ’e e ani tātou iāna ’ia tauturu mai ia tātou ’ia ’ite i te parau mau. E ha’apa’o tātou i te mau fa’auera’a, e tātarahapa, ’e e ’imi i te fa’ahoara’a o te Vārua Maita’i.
Mai te mea ē ’aita atu ā tā tātou maori rā te hina’aro ’ia ti’aturi, e ti’a noa ā ïa ia tātou ’ia rave i te mau mea iti ha’iha’i ma te vaiiho te hia’ai ’ia ’ohipa i roto ia tātou. E nehenehe tā tātou e fa’aherehere i te tahi vāhi i roto i tō tātou ’ā’au ’ia nehenehe i te mau ti’aturira’a rahi atu ā ’ia tupu i te rahi. (Hi’o Alama 32:27.)
Te mea tā’u i ’ite
Noa atu ā i te tahi mau taime ’ua uiui noa tō’u mana’o, ’ua ’ōvere, ’e ’ua ’āueue, ’ua ha’api’i mai au ’e ’ua ha’api’i fa’ahou ā vau nō’u iho nei ē ’o teie te ’Ēkālesia a te Mesia. Noa atu ē ’aita Iosepha Semita i tae i te fāito maita’i roa, ’ua ’ite au ē e peropheta fa’auruhia ’oia nā te Atua, tei fa’atusia i te mau mea ato’a ’e tei fa’aitoito roa i te rave maita’i. ’Ua ’ite ato’a vau ē te Buka a Moromona ’o te hō’ē ïa parau tahito mau ’e te hō’ē pāpa’ira’a mo’a i fa’ahereherehia nō tātou i teie ’anotau. Te tāmau noa nei ā te Metua i te ao ra i te ha’apāpū mai i teie mau parau mau iā’u i te mau mahana ato’a. ’E tē ’oa’oa nei au ē ’ua ha’apāpū ato’a ’oia i teie mau parau mau ia Eunice Franklin.
’Ua ’ite au ē mai te mea e tāpe’a noa tātou i tō tātou mau ’ūputa ’e tō tātou ’ā’au matara i te parau mau, e tauturu mai te Atua ia tātou ’ia ’ite i te mea mau ’e te mea hape, nā roto i te Vārua Maita’i. E riro te mau ’ohipa pae vārua e tupu nō tātou i te tapitapi ’ore i taua taime ra. ’E i te mau taime ato’a i muri mai i te reira, ’ia ’ite ana’e tātou i te fē’a’ara’a i te ne’e-fa’ahou-ra’a mai, e nehenehe ïa tā tātou e fa’aha’amana’o ia tātou iho i te mea tā tātou i putapū. Mai te reira ato’a nō Eunice, e nehenehe tō tātou huru pāpū nō ni’a i te mau parau mau o te ’evanelia e ho’i mai mai te pape pu’e ra.
’Aita e tītauhia ia tātou ’ia ora i roto i te pa’urā o te fē’a’ara’a nō te hō’ē tau maoro mai te mea ’ua vai noa tātou i ni’a i te mau ’ohipa pae vārua i tupu nō tātou. ’Ua parau ’o Elder Neil L. Andersen nō te pupu nō te Tino ’Ahuru Ma Piti ’āpōsetolo ’a « tāuahi i tō mau ha’amana’ora’a mo’a… ’A ti’aturi ē e tae mai te reira ia ’outou na nō ’ō mai i tō ’outou Metua i te ao ra ’e i tāna Tamaiti here. ’A vaiiho i te reira ’ia fa’atae mai i te fa’a’oroma’i i tō ’outou fē’a’a, ’e te hāro’aro’a i tō ’outou mau fifi. Tē fafau atu nei au ia ’outou ē mai te mea ē e fā’i ’outou ma te hina’aro mau ’e e ha’apa’o māite ho’i i te mau ’ohipa faufa’a pae vārua i roto i tō ’outou orara’a, e rahi atu ā ’o tē tae mai ia ’outou ra ».5
’Ua ’ite au ē nō te feiā e tūtava nei i te fāri’i i te mau ’itera’a pae vārua ’āpī ’e tē fa’a’ohipa i te fa’aro’o i te Mesia, e parau mau teie fafaura’a : « Tē fa’aro’o mai i te [Mesia] e ’ore roa ïa e po’ihā » (Ioane 6:35). E tae pāpū mai te mau pāhonora’a tā tātou e hina’aro. E nehenehe tā tātou e haere nā roto i te mau tāmatara’a ’ū’ana tā Satane e tāora i ni’a i tō tātou ’ē’a. ’E e nehenehe tātou e vai ha’apa’o noa i tō tātou Atua here, i tō tātou mau mahana ato’a.