Pagpahinabo sa Zion
Ni Elder Gerrit W. Gong
Sa Korum sa Napulog Duha ka Apostoles
Samtang ang mga Santos sa Ulahing mga Adlaw napanalanginan uban sa gipahiuli nga ebanghelyo, kita gitawag sa pagpalig-on sa Simbahan ug pagtukod sa Zion.
iLITRATO SA MAPA GIKAN SA GETTY IMAGES
Sa tibuok kasaysayan, ang katawhan sa Ginoo nagtinguha sa pagpahinabo sa usa ka katilingban sa ebanghelyo diin Siya makapuyo. Aron mahimo ang mao nga komunidad sa mga Santos, kita kinahanglan nga makat-on sa pagbalaan ug paghiusa sa atong kasingkasing ug hunahuna, pakigsabot nga makiangayon nga wala ang panagbingkil ug panaglalis ug mopuyo diha sa pagkamatarong uban sa walay kabos taliwala kanato (tan-awa sa Moises 7:18).
Pananglitan, human si John ug si Maria Linford mipasakop sa Ang Simbahan ni Jesukristo sa mga Santos sa Ulahing mga Adlaw didto sa Gravely, England, niadtong 1842, si John nahimong presidente sa lokal nga branch. Ang mga paryente ug mga higala, hinoon, wala moambit sa kalipay nga nakaplagan sa mga Linford diha sa Pagpahiuli. Kon dili sila makaagni ni John sa pagbiya sa iyang bag-o nga relihiyon, sila “molisud-lisod kaniya” pinaagi sa pagtangtang sa ilang suporta sa iyang negosyo sa panghimo og sapatos.
Niadtong 1856 ang Perpetual Emigrating Fund mihatag og oportunidad ni John ug Maria sa paglalin ngadto sa Walog sa Salt Lake. Milawig sila ngadto sa New York uban sa ilang tulo ka mga anak nga lalaki. Gikan didto mibiyahe sila ngadto sa Siyudad sa Iowa, Iowa, diin sila mibiya sa Hulyo 1856 uban sa walay swerte nga panon sa kariton ni James G. Willie.
Sa sayo nga bahin sa Oktubre 21, duol sa tampi sa Sweetwater River sa Wyoming, si John namulong sa iyang kataposang mga pulong.
“Nalipay ko nga mianhi kami,” misulti siya ni Maria dihang siya nangutana kaniya kon naguol ba siya nga mibiya sila sa England. “Dili na ko makaabot sa Salt Lake nga buhi, apan ikaw ug ang mga bata makaabot pa, ug wala ko magbasol sa tanan natong giagian kon ang atong mga anak modako ug mopadako sa ilang mga pamilya diha sa Zion.”1
Unsa Ang Zion?
Pipila ka mga hilisgotan gawas pa nianang pagkahimugso ni Jesukristo ang nakadasig sa mga propeta sa karaan ug modernong panahon ug sa mga Santos labaw pa kay sa ulahing mga adlaw nga pagpundok sa balay ni Israel ug sa pagtukod sa Zion agig pagpangandam alang sa Ikaduhang Pag-anhi sa Manluluwas.2
Nganong importante kaayo sa Santos sa Ulahing mga Adlaw ang Zion—kaniadto ug karon, bisan asa nga ang mga katawhan sa Ginoo makita?
Si Elder Bruce R. McConkie (1915–85) sa Korum sa Napulog Duha ka Apostoles namahayag, “Gikan sa panahon ni Adan hangtod sa kasamtangan nga panahon—sa matag higayon nga ang Ginoo adunay katawhan nga iyang kaugalingon; kon aduna kadto kinsa mipatalingh[o]g sa iyang tingog ug mituman sa iyang mga sugo; sa matag higayon iyang santos miserbisyo kaniya diha sa hingpit nga katuyoan sa kasingkasing—anaa diha ang Zion.”3
Ang kasulatan naghulagway og usa ka katilingbanon nga Zion. Si Enoch, usa ka propeta nga may talagsaong hugot nga pagtuo sa panahon ni Noe,“mitukod og usa ka dakbayan nga gitawag og Dakbayan sa Pagkabalaan, gani ang Zion” (Moises 7:19). Ang Ginoo mipuyo didto uban sa Iyang mga katawhan, mipanalangin kanila ug sa ilang yuta (tan-awa sa Moises 7:16–18). Ang Ginoo miingon ngadto ni Enoch, “Tan-awa, Ako ang Dios; Tawo nga Balaan mao ang akong ngalan” (Moises 7:35).
Usa ka tinguha sa Zion mao ang pag-establisar og usa ka dapit nga nagkahiusa sa hugot nga pagtuo natukod diha sa celestial nga mga baroganan sa langit, diin ang katawhan sa Dios mahimo nga maglakaw uban Kaniya ug ang Dios mismo makakaplag og kapuy-an.
Ang Basahon ni Mormon nagpamatuod nga human ang nabanhaw nga Manluluwas mibisita sa Bag-ong Kalibotan, “ang tanan nga mga katawhan nakabig ngadto sa Ginoo, diha sa ibabaw sa tibuok yuta …
“Ug sila aduna sa tanan nga mga butang nga alang kanilang tanan; busa walay adunahan ug kab[o]s, ulipon ug gawasnon, apan silang tanan gihimo nga mga gawasnon, ug nag-ambit sa langitnon nga gasa. …
“Ug nahinabo nga walay panagbingkil diha sa yuta, tungod sa gugma sa Dios nga anaa sa mga kasingkasing sa mga katawhan” (4 Nephi 1:2, 3, 15).
Gisangkapan sa Pagkamatarong ug Gahom
Ang panahon ni Enoch usa ka panahon sa gubat, pagdanak og dugo, kahadlok, kangitngit ug kalagot—samtang “ang gah[o]m ni Satanas didto sa ibabaw sa yuta” (Moises 7:24; tan-awa usab sa bersikulo 16, 17, 33). Apan si Enoch matinud-anon, ug ang Ginoo mitawag kaniya sa pagsangyaw og paghinulsol.
Ang Ginoo misulti ni Enoch nga ang susama nga “dako nga mga katalagman” (Moises 7:61) ang mag-una sa Iyang Ikaduha nga Pag-anhi. “Samtang Ako buhi, gani Ako moab[o]t sa katap[o]san nga mga adlaw, diha sa mga adlaw sa pagkadautan ug sa pagpanimalos, aron sa pagtuman sa panumpa nga Ako mihimo nganha kanimo mahitungod sa mga anak ni Noeh” (Moises 7:60).
Sa atong panahon, si Presidente Russell M. Nelson bag-ohay lang miingon, “Akong gitan-aw ang [COVID-19] nga pandemya karon nga usa lang sa mga kasakit nga nagdala og kalis[o]d sa kalib[o]tan, lakip na ang kasilag, sibil nga kagubot, diskriminasyon sa kaliwat, pagkabiyolente, pagkadili matinud-anon, ug kakulang sa maayong pamatasan.”4 Apan, kita adunay propetikanhong kasigurohan. Si Presidente Nelson miingon usab:
“Kita nagpuyo sa adlaw nga ‘mahinamong gipaab[o]t sa atong mga katigulangan’ [Doktrina ug mga Pakigsaad 121:27.] Kita nakasaksi gay[o]d unsay nakita ni propeta Nephi sa panan-awon lamang nga ang “gah[o]m sa Kordero sa Dios” mokunsad “diha sa mga katawhan sa pakigsaad sa Ginoo, kinsa nagkatibulaag sa ibabaw sa yuta; ug sila gisangkapan sa katar[o]ng ug uban sa ga-h[o]m sa Dios sa dako nga himaya’ [1 Nephi 14:14.]
“Kamo, akong kaigsoonan, apil niadtong mga lalaki, mga babaye, ug mga bata nga nakita ni Nephi.”5
Ang pagdapit sa pagpundok ug panalanginan niadtong anaa sa duha ka habig sa tabil, pagtukod sa Zion, ug pag-andam sa kalibotan alang sa Ikaduhang Pag-anhi sa Manluluwas naglakip sa matag usa kanato. “Sa tanang katawhan nga nakapuyo niining kalib[o]tana,” miingon si Presidente Nelson, “kita ang makahimo sa pag-apil niini nga kalihokan sa katap[o]san, dakong panagpundok.”6
Unsaon Nato Pagkab-ot Niini?
Isip mga Santos sa Ulahing mga Adlaw nga napanalanginan uban sa gipahiuli nga ebanghelyo, kita “gitawag sa paghago sa [ubasan sa Ginoo], ug sa pagtukod sa [Iyang] simbahan, ug sa pagpahinabo sa Zion” (Doktrina ug mga Pakigsaad 39:13). Kana nga buhat nagkinahanglan og gugma, panaghiusa, hugot nga pagtuo, serbisyo, sakripisyo, ug pagkamasulundon.
“Kon ang mga tawo mohigugma sa Dios sa ilang tibuok kasingkasing ug matarong nga maningkamot nga mahimong sama Kaniya, adunay minos nga panagbangi ug panagbingkil sa katilingban. Adunay dugang nga panaghiusa,” miingon si Elder Quentin L. Cook sa Korum sa Napulog Duha ka Apostoles. Siya midugang: “Ang pagkahiusa usa usab ka termino nga mahimong magpasabot og daghan nga nagkalain-laing butang, apan sigurado gayod nga nagpakita sa una ug ikaduhang dako nga mga sugo sa paghigugma sa Dios ug paghigugma sa atong isigkatawo. Kini nagpasabot og usa ka katawhan sa Zion kansang mga kasingkasing ug mga hunahuna ‘nabugkos diha sa pagkahiusa’ [Mosiah 18:21].”7
Uban niana nga gugma ug panaghiusa, kita mopakita og hugot nga pagtuo aron mapaduol sa Pag-ula sa Atong Manluluwas, nga makapausab kanato samtang kita molimpyo sa atong mga kasingkasing ug mga kinabuhi (tan-awa sa Mosiah 3:19; Doktrina ug mga Pakigsaad 97:21). Kita mopundok niadtong andam nga moduol sa Ginoo diha sa pagkamatarong. Pinaagi sa sagradong mga ordinansa ug mga baroganan sa celestial, kita nagdapit sa gahom sa pagkadiosnon sa atong mga kinabuhi (tan-awa sa Doktrina ug mga Pakigsaad 105:5). Gipahinungod pinaagi sa pakigsaad nga iya sa Dios ug sa usag usa, kita mopalig-on sa Zion ug mangandam alang sa Ikaduhang Pag-anhi.
“Ang gugma nga putli mao ang tiunay nga gugma ni Kristo,” miingon si Presidente Henry B. Eyring, Ikaduhang Magtatambag sa Unang kapangulohan. “Ug ang hugot nga pagtuo diha Kaniya ug ang hingpit nga mga epekto sa Iyang walay kinutuban nga Pag-ula mao ang mohimo ninyo, ug niadtong inyong gihigugma ug giserbisyohan, nga sarang alang sa langitnong gasa sa pagpuyo niana nga panag-uban sa dugay nang gihulat ug gisaad sa Zion.”8
Pagpangandam alang sa Adlaw nga Moabot
Ang mga propeta sa modernong panahon nagtudlo nga ang pagpaduol ngadto sa Manluluwas usa ka indibidwal nga pasalig, dili pisikal nga lokasyon.
“Sa unang mga panahon sa Simbahan, ang pagkakabig kasagaran nagpasabot usab sa paglalin,” mipasabot si Presidente Nelson. “Pero karon ang pagpundok nahitabo diha sa kada nas[o]d. Ang Ginoo mimando sa pag-establisar sa Zion sa matag kayutaan diin Iyang gihatag sa Iyang mga Santos ang ilang natawhan ug nasyonalidad.”9
Samtang atong hangupon ang hagit ug panalangin sa pagtukod sa Zion diha sa atong mga pamilya, mga branch, ward, stake, ug mga komunidad, motan-aw kita uban ni John ug Maria Linford padulong sa adlaw nga ang atong mga anak ug apo “motubo ug moatiman sa ilang mga pamilya diha sa Zion” diha sa matag nasod, kaliwatan, ug pinulongan.
Samtang kita magtinguha sa pag una sa Ginoo ug sa Iyang pagkamatarong “nga ang iyang gingharian masangyaw diha sa yuta, nga ang mga lumulupyo diha niini unta modawat niini, ug moandam alang sa mga adlaw nga moab[o]t, diin ang Anak sa Tawo manaog gikan sa langit, magsap[o]t diha sa kahayag sa iyang himaya, aron sa pag-ipon sa gingharian sa Dios nga gipahimutang diha sa ibabaw sa yuta” (Doktrina ug mga Pakigsaad 65:5).