Mga Tingog sa mga Santos sa Ulahing mga Adlaw
Akong Kliyente o Akong Calling?
Samtang naningkamot ako sa pagtuman sa akong mga responsibilidad sa pagkapari, ang Ginoo mipakita kanako nga Siya nasayod sa akong pinansiyal nga sitwasyon.
Litrato gikan sa Getty Images
Sa dihang gitawag ko isip presidente sa elders quorum niadtong 2000, pito lamang ka elder ang nanambong sa miting sa pagkapari. Kami usab, dili maayong mibuhat sa among home teaching—karon pagpangalagad—nga mga pagbisita.
Nasayod ako nga kami nag-atubang og dako nga hagit sa pagdasig sa mga elder sa paglihok. Mao nga, sa pagsugod, kami mihukom sa pag-organisar og usab sa mga buluhaton ug sa pagpalig-on sa pagdumala.
Tungod kay ako usa ka abogado nga nagtrabaho sa akong kaugalingon [self-employed], sige ako og biyahe. Nagkapuliki kaayo ko, apan gusto kong motuman sa akong mga responsibilidad sa pagkapari.
Usa ka adlaw, kinahanglan kong mobiyahe sakay sa bus paingon ngadto sa laing siyudad aron makigkita sa usa ka kliyente. Tungod kay lisod ang akong panalapi, naglaom ko nga akong kliyente mouyon nga mobayad nako daan.
Sa pagpadulong aron mosakay sa bus, nakahukom ako nga mobisita sa pipila ka sakop sa korum ug moawhag kanila sa pagbisita sa gisangon kanila nga mga pamilya. Ang pipila nakalimot apan mipasalig sa pagbuhat sa ingon. Ang uban mipasalig sa paghuman sa ilang mga pagbisita niana gayod nga semana.
Naghinam-hinam gayod ako sa ilang mga pasalig nga ako mihukom sa pagbisita ug pag-awhag sa ubang mga sakop sa korum. Wala lang ko kabantay, lapas na diay kadto sa udto. Mao nga, imbes nga mobiya sa lungsod, nakahukom ako nga moadto sa akong opisina aron sa pagrebyo sa kaso sa kliyente.
Sa akong kasurprisa, sa dihang miabot ako didto sa akong opisina, ang akong kliyente nagbarog sa gawas uban ang lain nga tawo. Gipasabot nako sa akong kliyente nga padulong na nakong rebyohon ang iyang kaso ug makahimo og report alang kaniya sa sunod nga adlaw. Miingon siya nga siya miabot aron sa pagpailaila kanako sa usa ka bag-o nga kliyente. Human ang iyang higala ug ako nagkaistorya, nagkauyon kami sa bayad aron ako motabang kaniya sa pagsulbad sa iyang legal nga sitwasyon. Dayon, kalit lang, ang akong kliyente mitanyag nga mobayad nako daan.
Alang kanako, kadto usa ka milagro. Ang Langitnong Amahan nasayod nga ako naningkamot nga mahimong matinud-anon ngadto Kaniya. Nasayod usab siya sa akong mga panginahanglan. Siya mipanalangin kanako sa daghang paagi sulod sa daghang katuigan, apan niining higayona ang Iyang panalangin miabot sa pinansiyal nga paagi. Gituman Niya ang Iyang pulong diha sa mga kasulatan ngadto niadtong kinsa nagserbisyo Kaniya: “Paharia ninyo ang Dios ug pagkinabuhi kamo uyon sa iyang kabubut-on ug ang ubang mga butang ihatag ra niya kaninyo” (Mateo 6:33).
Ug ang among elders quorum? Ang Ginoo mipanalangin kanamo samtang kami mipadayon sa unahan uban sa nagkahiusa nga espiritu. Ang among home teaching sa wala madugay misaka ngadto sa 100 ka porsento, ug ang among pagtambong sa pagkapari [priesthood attendance] misaka ngadto sa 35 ka matinud-anon nga mga elder.
Mopamatuod ako nga kitang tanan mahimong mga instrumento sa buhat sa Ginoo ug makakaplag og hingpit nga kalipay ug mga panalangin sa pagserbisyo Kaniya pinaagi sa pagserbisyo sa uban.