Te reo o te feiā mo’a i te mahana hope’a nei
Tā’u hoani ’aore rā tō’u pi’ira’a ?
’A tāmata ai au i te rave i tā’u mau hōpoi’a nō te autahu’ara’a, ’ua fa’a’ite mai te Fatu iā’u ē, ’ua ’ite ’oia i tō’u vaira’a i te pae moni.
Hōho’a nā Guetty Images
I tō’u pi’ira’ahia ’ei peresideni nō te pupu peresibutero i te matahiti 2000, e hitu ana’e peresibutero e tae mai nei i te purera’a autahu’ara’a. ’Aita ato’a mātou e rave maita’i ra i tā mātou ’ohipa hāhaerera’a ha’api’ira’a ’utuāfare—tei parauhia i teienei, te aupurura’a.
’Ua ’ite au ē, e ’ohipa rahi tā mātou nō te fa’auru i te mau peresibutero ’ia ti’a i ni’a. Nō reira, nō te ha’amatara’a, ’ua fa’aoti mātou ’ia fa’anaho fa’ahou i te mau fa’auera’a ’ohipa ’e ’ia ha’apūai a’e i te hi’opo’ara’a.
E ta’ata rātere roa vau, nō te mea o vau iho te paoti, e pāruru tā’u ’ohipa. E mea rahi roa tā’u ’ohipa, terā rā ’ua hina’aro vau e rave i tā’u mau hōpoi’a nō te autahu’ara’a.
I te hō’ē mahana, ’ua tītauhia iā’u ’ia rātere nā ni’a i te pere’o’o uta ta’ata nō te haere i te tahi atu ’oire nō te fārerei i te hō’ē hoani. Nō te iti o tā’u moni, ’ua feruri au maita’i ē, e fāri’i tā’u hoani ’ia ’aufau ’oi’oi mai iā’u.
’A haere ai au i te vāhi tāpe’ara’a pere’o’o, ’ua fa’aoti au e haere e hi’o i te tahi mau melo o te pupu ’e ’ia fa’aitoito ia rātou ’ia fārerei i tā rātou mau ’utuāfare. ’Ua mo’ehia te reira i te tahi pae, terā rā ’ua fafau mai rātou e rave rātou. ’Ua fafau mai te tahi pae e fa’aoti rātou i tā rātou mau hāhaerera’a i terā iho hepetoma.
’Ua ’oa’oa roa vau nō tā rātou mau fafaura’a nō reira, ’ua fa’aoti a’era vau e haere e fārerei ’e e fa’aitoito i te tahi atu mau melo nō te pupu. Ma tō’u ’ite ’ore, ’ua ma’iri i te hora ’ahuru ma piti. Nō reira, ’aita vau i fa’aru’e fa’ahou i te ’oire, ’ua fa’aoti rā e haere i tō’u piha tōro’a nō te hi’opo’a i te parau a tā’u hoani.
I tō’u māere, i te taera’a atu vau i tō’u piha tōro’a, tē ti’a noa ra tā’u hoani i rāpae’au ’e te tahi atu ta’ata. ’Ua fa’ata’a atu ra vau i tā’u hoani ē, tē haere ra iho ā vau e hi’opo’a i tōna parau ’e e hōro’a atu ai iāna i te hō’ē parau fa’a’itera’a ananahi a’e. ’Ua parau mai ra ’oia ē, ’ua haere mai ’oia e fa’a’ite mai iā’u i te hō’ē hoani ’āpī. I muri a’e i tō’u paraparaura’a i tōna hoa, ’ua fa’aoti māua i te hō’ē tino moni nō te tauturu iāna ’ia fa’atītī’aifaro i tāna ’ohipa. I reira iho, ’ua parau mai tā’u hoani e ’aufau mai ’oia i te hō’ē tino moni nā mua a’e.
Nō’u nei, e temeio ïa te reira. ’Ua ’ite te Metua i te ao ra ē, tē tāmata nei vau i te ha’apa’o maita’i nōna. ’Ua ’ite ato’a ’oia i tō’u mau hina’aro. ’Ua ha’amaita’i ’oia iā’u nā roto i te mau rāve’a e rave rahi i te roara’a o te mau matahiti, i teie rā taime e ha’amaita’ira’a pae moni ïa. ’Ua fa’atupu ’oia i tāna parau i roto i te mau pāpa’ira’a mo’a i te feiā e tāvini iāna : « E mata na rā ’outou i te ’imi i te bāsileia о te Atua, ’e te parauti’a nāna ; e ’āmui-ato’a-hia mai taua mau mea ra ia ’outou » (Mataio 6:33).
’E tā mātou pupu peresibutero ? ’Ua ha’amaita’i te Fatu ia mātou ’a haere ai mātou i mua ma te vārua tāhō’ē. ’Aita i maoro ’ua mara’a tā mātou ha’api’ira’a ’utuāfare 100 i ni’a i te hānere, ’e ’ua mara’a te rahira’a ta’ata e tae mai nei i te purera’a i te fāito e 35 mau peresibutero ha’apa’o maita’i.
Tē fa’a’ite pāpū nei au ē, e nehenehe tātou pā’āto’a e riro ’ei mauiha’a i roto i te ’ohipa a te Fatu ’e e ’ite i te ’oa’oa ’e te mau ha’amaita’ira’a i roto i te tāvinira’a iāna nā roto i te tāvinira’a ia vetahi ’ē.