Nāhea vau e tauturu ai i te upo’oti’a i ni’a i te ha’avā na ?

Teie e ono rāve’a e nehenehe ai ia tātou ’ia fa’aru’e i te ha’avā na ’e ’ia tūra’i i te parau nō te fa’atura.

E aha tā’u e nehenehe e rave nō te upo’otia i ni’a i te ha’avā na ?

1. ’A hi’o nā mua i roto. E nehenehe tā tātou e fafau ’ia hi’o i roto ia tātou iho ’e ’ia fa’aru’e i te mau « huru ’e te mau ’ohipa ha’avā na ».¹

’Ua parau te peresideni Russell M. Nelson : « Tātou ato’a e ha’avā na i ni’a i te tahi atu nūna’a, tītauhia ’ia tātarahapa ! »²

2. ’Imi ’ia māramarama. ’A rave i te taime nō te fa’aro’o i te feiā tei fa’aruru i te ha’avā na. ’O te mau buka ato’a ïa, te mau hōho’a teata, ’e te mau parau ’āpī nō ni’a i teie tumu parau.³

’Ua parau ’o Darius Gray, e ta’ata ’Āfirita Marite tu’iro’o ’e e ti’a fa’atere ’Ēkālesia ho’i : « Mai te mea e tūtava mau tātou i te fa’aro’o i te feiā tā tātou e hi’o nei mai ‘te tahi’, ’e mai te mea ē tā tātou fā mau ’o te vaiihora’a ia rātou ’ia fa’a’ite mai nō ni’a i tō rātou orara’a, tō rātou ’ā’amu, tō rātou ’utuāfare, tō rātou ti’aturira’a, ’e tō rātou māuiui, e’ita ïa tātou e fāri’i noa i te hō’ē ’itera’a rahi a’e, e riro rā teie peu i te tere ātea roa nō te fa’aora i te mau puta nō te tati nūna’a ’ē. »⁴

3. ’A parau atu. Mai te mea e fa’aro’o ’outou i te tahi ta’ata ’ia fa’a’ite mai i te tahi mana’o hape ’e ’aore rā ’ino nō ni’a i te hō’ē nūna’a ta’ata, ’a parau atu ma te maita’i ’e te māramarama.

’Ua parau te peresideni Dallin H. Oaks, tauturu mātāmua i roto i te Peresidenira’a Mātāmua ē : « ’Ei mau melo nō Te ’Ēkālesia a Iesu Mesia i te Feia Mo’a i te Mau Mahana Hope’a nei, e mea ti’a ia tātou ’ia rave maita’i a’e nō te tauturu i te tinai i te tati nūna’a ’ē. »⁵

’Ua ha’api’i mai ’o Elder Gerrit W. Gong nō te pupu nō te Tino ’Ahuru Ma Piti ’āpōsetolo ē : « Tē anihia nei tātou ’ia taui i teie nei ao ’ei ao maita’i a’e, mai roto atu i rāpae, hō’ē ta’ata, hō’ē ’utuāfare ’e hō’ē veutupura’a i te taime hō’ē. »⁶

E aha tā’u e nehenehe e rave mai te mea ’ua fa’aruru vau i te hi’o-’ē-ra’a ?

1. Fa’a’ore i te hapa, ’e ’a fa’ahoa atu. ’Ia māuiui ana’e tātou nā roto i te mau ’ohipa a vetahi ’ē, e nehenehe tā tātou e ha’api’i atu ’e e fa’a’ore i te hapa ’e e ’imi ’ia patu i te hō’ē autā’atira’a.

’A tāvini ai ’oia ’ei Hitu ’Ahuru ārea, ’ua parau ’o Elder Fred A. ‘Tony’ Parker : « I te fa’arurura’a vau i te tati nūna’a ’ē, ’ua ’ite au i te manuiara’a e fa’aū i te reira ’e e fa’a’ore i te hapa a te ta’ata ’e e fa’a’āfaro i te reira fifi. Mai te mea e parau te tahi ta’ata i te tahi mea nō te ha’apēpē i tō’u mana’o, e tītauhia iā’u ’ia ’imi i te tahi rāve’a nō te tauturu iāna ’ia ta’a maita’i nō te aha e parau ha’apēpē te reira. E rāve’a te reira ’eiaha nō te fa’a’ore noa i te hapa, nō te patu ato’a rā i te autā’atira’a ’ia ’ore te ta’ata ’ia hi’o noa ia Tony Parker mai te hō’ē ta’ata ’Āfirita Marite, ’ei tamari’i rā nā te Atua. ’Ua ha’api’i Iesu i te fa’a’orera’a hara (hi’o Mataio 18:21–35), ’e ’ua ha’api’i mai ’oia ē, ’ia fa’a’ino ana’e te ta’ata ia tātou, ’ia haere e fārerei i terā ta’ata ’e ’ia fa’a’āfaro i te reira (hi’o Mataio 18:15) ».⁷

2. Ha’api’i mai i te mau ha’api’ira’a maita’i i roto i te mau ’itera’a mamae (hi’o Te Parau Ha’api’ira’a ’e te mau Parau Fafau 122:7).

’Ua fa’ati’a te ’orometua Amos C. Brown i te hō’ē ’ā’amu nō Howard Washington Thurman. ’Ua fa’aea ’o Howard i pīha’i iho i te fare o te hō’ē vahine ’o tei hāmani ’ino i tōna ’utuāfare nō te mea e mau ta’ata ’ere’ere rātou—’ua tāora roa ato’a i te para nō tāna ’āua moa i roto i te ’āua o Thurmans mā.

I te ma’ira’ahia taua vahine ra, ’ua hōpoi atu te metua vahine o Howard i te tahi tihōpu ’e te mau rōti nāna. Ma te māuruuru, ’ua ui te vahine ē nō hea mai te mau tiare. ’Ua fa’ata’a atu te tuahine Thurman ē : « Tē tāora ra ’oe i te para moa, tē fa’aineine ra ïa te Atua i te repo. »

« ’O te mea ïa tā tātou e rave i roto i te ’ino », ’ua parau te ’orometua Brown. « E fāri’i i te para, e fa’aro’o rā i te Atua nō te fa’a’ohipa i te reira ’ia tupu te ’āua rōti. »⁸

3. Fāriu i ni’a i te Mesia nō te fa’aorara’a ’e te arata’ira’a. E nehenehe te fāriura’a i ni’a i te Fa’aora nō tō ’outou ’oto, ’e te pe’era’a iāna, e hōro’a mai i te hau.

’Ua ha’api’i mai ’o Elder D. Todd Christofferson nō te pupu nō te Tino ’Ahuru Ma Piti ’āpōsetolo ē, ta’a ’ē noa atu te fa’aorara’a ia tātou i te hara nā roto i te ha’amāhara’a i te mau tītaura’a a te parauti’a i ni’a ia tātou, ’oia ato’a « e ha’amāha [Iesu Mesia] i te tārahu a te parauti’a ia tātou nā roto i te fa’aorara’a ’e te fa’ahotura’a ia tātou nō te mau huru māuiui ato’a tā tātou e fa’a’oroma’i hapa ’ore noa. »⁹

’Ua hōro’a mai te Fa’aora i te hi’ora’a maita’i roa a’e e pe’e. ’Ua ha’api’i mai ’oia ia tātou e aha tē rave ’ia fa’a’inohia tātou (hi’o Mataio 18:15), ’ia hāmani-’ino-hia (hi’o Mataio 5:38–48), ’e ’ia fa’autu’a-ti’a-’ore-hia i te pohe (hi’o Luka 23:34).

Fa’ata’ara’a

1. Buka arata’i rahi : Te tāvinira’a i roto i Te ’Ēkālesia a Iesu Mesia i te Feiā Mo’a i te mau Mahana Hope’a nei, 38.6.14, ChurchofJesusChrist.org.

2. Russell M. Nelson, i roto « President Nelson Shares Social Post about Racism and Calls for Respect for Human Dignity », Newsroom, 1 nō Tiunu 2020, newsroom.ChurchofJesusChrist.org.

3. Hi’o « Seeking Information from Reliable Sources [’Imi i te ha’amāramaramara’a nō roto mai i te mau rāve’a pāpū] », Buka arata’i rahi, 38.8.45.

4. Darius Gray, « Healing the Wounds of Racism », 5 nō ’Ēperēra 2018, blog.ChurchofJesusChrist.org.

5. Dallin H. Oaks, « Aroha atu i tō ’outou mau ’enemi », Liahona, Novema 2020, 28.

6. Gerrit W. Gong, « Te mau nūna’a ato’a, te mau ’ōpū ato’a, ’e te mau reo ato’a », Liahona, Novema 2020, 38.

7. Fred A. Tony Parker, « The Savior Heals Our Hurts », Ensign, Tiunu 2018, 44–45.

8. « We Are Family: A Discussion on Overcoming Prejudice with Elder Jack N. Gerard and the Reverend Amos C. Brown », Liahona, Tetepa 2021, ve’a rorouira.

9. D. Todd Christofferson, « Fa’aorara’a », Liahona, Mē 2013, 110.