PARAU PORO’I A TE FEIĀ FA’ATERE O TE ĀREA

Te fa’aro’o i te Fatu ia Iesu Mesia

Nā Elder Allistair B. Odgers

Hitu Ahuru Area

« ’Aita te Fatu e tītau i te fa’aro’o pāpū e ti’a ai ia tātou ’ia fāri’i i te mana pāpū. E ani mai rā ’oia ia tātou ’ia ti’aturi »,¹ nō reira, ’aita i tītauhia te māramarama hope e fa’a’ohipa ai tātou i te fa’aro’o nō te fāri’i i tōna mana.

Nā te reira e tāmarū maita’i ia tātou ’ia tupu ana’e te mana’o fē’a’a ’e te taiā i roto ia tātou. ’Ia fa’a’ite ana’e tātou i te fa’aro’o, tē fa’a’ite ra ïa tātou i te Atua ē, noa atu ē, ’aita tātou i ’ite i te mau pāhonora’a i te mau uira’a, ’ua ineine tātou ’ia ti’aturi iāna ’e i tāna mau parau fafau.

Nō reira, « te fa’aro’o, ’o te fāri’ira’a ïa ma te tu’u ’ore i tā tātou iho tītaura’a—’e te fāri’i nā mua roa—i te mau tītaura’a ato’a tā te Atua e nehenehe e tītau nō te tau poto ’e nō te tau ātea ».²

Te fa’aro’o, e ha’amatara’a maita’i roa ïa i roto i tō tātou tere—’o te parau tumu mātāmua o te ’evanelia—’e e ’ere te fa’aro’o i te fāri’ira’a i te ’ite-maita’i-roa-ra’a i te mau mea, ’o te ti’aturira’a rā i te mau mea ’ite-’ore-hia ; ’ei mau mea parau mau ato’a rā, ’aita ana’e, e ’ere ïa i te fa’aro’o.³

« Te fa’aro’o ’o te niu ïa i reira e patuhia ai te huru Atua. ’O te ’ōmuara’a ïa nō te tahi atu mau huru maita’i ato’a ».⁴

E toru huru fa’aro’o :

« E tupu te fa’aro’o fa’aineinera’a nā roto i te mau ’itera’a tahito, nā roto i te ’ite ’o tē hōro’a mai i te niu nō te ti’aturira’a ».
« E nehenehe te fa’aro’o fa’aora e fa’a’ohipa-pinepine-hia nō te ’ohipa a muri a’e—te mea ’ite-’ore-hia ’o tē fa’afāna’o mai i te rāve’a nō te temeio ».
« Te fa’aro’o tītau rahi—te fa’aro’o e tūra’i i te mou’a, te fa’aro’o mai tō te taea’e o Iareda, e nā mua te reira i te temeio ’e i te ’ite. »⁵

Noa atu te huru fa’aro’o, e mea faufa’a ’ia ’ite ē, e’ita te tauto’ora’a iti e fa’atupu i te fa’aro’o. ’Ia hōro’a ana’e tātou i te tauto’ora’a rahi ’aore rā ’ia fa’arahi ana’e tātou i tā tātou tauto’ora’a, e roa’a ia tātou te ti’ara’a ’ia fa’a’ohipa ’e ’ia ’ite i te fa’aro’o rahi a’e.

E māu’ara’a maita’i tō te mau tauto’ora’a ato’a. ’Ua fa’a’ohipa ’o Petero i te fa’aro’o ’a haere ai ’oia nā ni’a i te miti. E parau paha te tahi pae ’o tātou ē, ’aita tōna fa’aro’o i vai maoro ’aore rā ’aita i pūai roa nō te mea ’ua ha’amata ’oia i te paremo ’e maoti te Fa’aora i fa’aora mai iāna, terā rā, tā’u i ’ite, ta’a ’ē atu te Fa’aora, ’o ’oia ana’e te ta’ata tei haere nā ni’a i te miti. Māuruuru e Petero nō tā ’oe fa’a’ohipara’a i te fa’aro’o ’e te fa’a’itera’a mai ia mātou ē, e nehenehe mātou e rave i te temeio i te taime ’aita roa atu te reira e mana’ohia.

« Te fa’aro’o, ’o te mana ïa e ti’a ai i te pāpū ’ore ’ia rave i te mea e’ita e ti’a ’ia rave. »⁶

« E tītauhia te fa’aro’o nō te tāvini i te hō’ē misiōni i roto i te hō’ē tau ma’i pe’e ».⁷

’Ua fāri’i au i te hō’ē rata uira tei hāponohia mai e Elder L. Taleni ’o tē tāvini nei i roto i te misioni nō Hamilton i Niu Terani. E ta’ata maita’i roa teie taure’are’a hou ’a reva ai nō tāna misiōni, i teienei rā, ’ua riro mai ’oia ’ei ta’ata rahi maoti tōna fa’aro’o i te Fatu ia Iesu Mesia. Nā roto i tāna parau fa’ati’a, tē fa’a’ite atu nei au ia ’outou i te tahi tuha’a o tāna rata uira.

« ’Ua riro tō’u taime i roto i te misiōni nō Niu Terani Hamilton ’ei ’ohipa māere. E rave rahi taime tō’u ’itera’a i te rima o te Fatu, ’e e nehenehe tā’u e fa’a’ite pāpū ē, e ha’apa’o te Atua i te mau mea ri’i ato’a… ‘E ta’ata ’ā’au piti ïa, ’e te pāpū ’ore i tōna ato’a ra mau haere’a’ (Iakobo 1:8). E’ita e roa’a ia tātou te hau mai te mea ē, e ti’aturi tātou i te hō’ē mea ’e e rave i te ’ohipa ta’a ’ē atu i te reira mea, ’aore rā mai te mea e fa’a’ite tātou i te hō’ē orara’a i mua i te ta’ata ta’a ’ē atu i tā tātou e ora nei iō tātou iho. ’Ua ’ite au i roto i tō’u iho orara’a ’e nā roto i te mana o te mau pāpa’ira’a mo’a ē, teie te rāve’a vitiviti roa a’e i te hepohepo, i te mata’u, i te ha’ape’ape’a, i te ’oto, i te mana’o fa’ahapa, i te ha’amā, i te ti’aturi ’ore, ’e i te mo’era’a o te ’itera’a pāpū. Te orara’a i te hō’ē orara’a ’ā’au piti, ’o te tumu ïa tātou e riro ai ’ei ta’ata pāpū ’ore i roto i tā tātou mau peu.

« Tē ani nei au ia ’outou ’ia ’imi i te hau mau ’o roto nā roto i te tauto’ora’a rahi atu ā nō te fa’atū’ati i tō ’outou orara’a, i mua i te ta’ata ’e iō ’outou iho, i ni’a i te mau ha’api’ira’a ’e i te mau ha’api’ira’a tumu o te ’evanelia a Iesu Mesia i fa’aho’i-fa’ahou-hia mai. ’O terā ïa tā’u ’ōpuara’a hope’a nō te mea ’ua ’ā’au piti au e rave rahi taime, ’e nā te reira i vaiiho i te ’enemi ’ia ha’amou i tō’u hau ’e ’ia ha’ape’ape’a i tō’u vārua. Terā rā, e nehenehe tātou e pi’i hua ’e ’o Nephi : ‘’A ara e tō’u vārua ! ’Eiaha e ha’aparuparu i roto i te hara. ’A ’oa’oa, e tō’u ’ā’au, ’e ’eiaha e hō atu i te vāhi nō te ’enemi o tō’u vārua.’ Tē ani ato’a nei au ia ’outou ’ia tuatāpapa ’e ’ia feruri hōhonu i te 2 Néphi 4:26-28, hō’ē o tā’u mau pāpa’ira’a au roa ».

Nō Elder L. Taleni, ’e nō tātou nei ho’i, e tītauhia te fa’aro’o nō te taui.

’Ia fa’a’ite ana’e tātou i te fa’aro’o ateate, ma te ’āueue ’ore⁸ ’e te mata nō te fa’aro’o⁹ ’ei reira tātou e ’ohipa ai i ni’a i te mau muhumuhu a te Vārua, noa atu ē, ’aita tā tātou e ha’apāpūra’a ’ite-mata-hia ’e ’o tē nehenehe e tāpe’ape’a.

E mata na tātou i te rave mai tā te Fatu e parau nei, ’e « ’a fa’atupua na, ’ia ’ite mai ē, ’o vau te Atua »¹⁰ ’e ’a fa’a’ohipa i te fa’aro’o. « E tura’i tō ’outou fa’aro’o […] i te mau mou’a ».¹¹

« E mau mou’a i mua ia tātou pā’āto’a e ta’uma, e mau mou’a e upo’oti’a ’e e mau mou’a mai te mea ra ē, e mea fifi roa ’ia tae i ni’a, terā rā, nā roto i tō ’outou fa’aro’o ia Iesu Mesia e fa’arahi ’outou i tō ’outou ’aravihi nō te tūra’i i te mau mou’a i roto i tō ’outou orara’a, noa atu ē, e au tō ’outou iho mau tāmatara’a mai te mou’a Everest te rahi. E tura’i tō ’outou fa’aro’o e tupu ra i te rahi i te mau mou’a, ’eiaha te mau mou’a ’ōfa’i ’o tē fa’a’una’una nei i te fenua, te mau mou’a rā nō te veve rahi i roto i tō ’outou orara’a. E tauturu tō ’outou fa’aro’o ruperupe ia ’outou ’ia huri i te mau tāmatara’a ’ei mau tupura’a i te rahi ’e ’ei mau rāve’a ’ite-’ore-hia a’e nei. »¹²

’Ua anihia i te peresideni Nelson e aha tāna e feruri i te taime nō te ’ōro’a mo’a. E piti noa ta’o tāna i fa’ahiti : « Iāna ana’e ».

Noa atu te vāhi tei reira tō tātou fa’aro’o, tē fafau atu nei au ē, mai te mea e tu’u tātou i te mau fa’anevanevara’a o te ao nei i te hiti, ’e e rōtahi i ni’a ia Iesu Mesia, ’e i ni’a i te fa’atupura’a i tōna hīro’a i roto ia tātou, e tupu ïa tō tātou fa’aro’o i te rahi, e iti mai tō tātou mana’o fē’a’a, e rahi tō tātou ti’ara’a ’ia ora ma te ti’aturi rahi ’e te pāpū rahi, ’e e ha’amaita’ihia tātou i nā mea e 3 : te MANA rahi a’e, te HAU rahi a’e, ’e te RUPERUPE rahi a’e.