Feiā ʼāpī paʼari
Te ’ite-māite-ra’a i te maita’i i roto ia tātou iho
Tē ora nei te ta’ata pāpa’i i Utaha, (fenua Marite).
Nāhea ’outou i te fa’ata’a i te hōro’a o te ’ite-māite-ra’a ? Tae roa ’aita i maoro a’enei, ’ua ’ere roa vau i te hō’ē o te mau fā faufa’a o teie hōro’a.
Fa’ahōho’ara’a nō roto mai i te mau hōho’a a Getty Images
Nō te tuha’a rahi o tō’u orara’a, ’ua tātara vau i te aura’a nō te hōro’a o te ’ite-māite-ra’a mai te ti’ara’a ’ia ’ite i te maita’i ’e te ’ino, te parau mau ’e te hape. Noa atu e tuha’a faufa’a te reira o te hōro’a, ’aita i maoro a’e nei, ’ua ha’api’i mai au tē vai fa’ahou atu ra.
’Ua ’itehia iā’u te hō’ē tao’a rahi i roto i te mau nota o te hō’ē a’ora’a tei hōro’ahia i roto i te ’āmuira’a rahi nō ’Ēperēra 2020. ’Ua fa’ahiti te hō’ē ta’ata a’o i te peresideni Stephen L Richards (1879–1959), tauturu hō’ē i roto i te Peresidenira’a Mātāmua, i mua ra i tei parau ē, « te huru o te ’ite-māite-ra’a teitei roa a’e o te ’itera’a ïa i roto ia vetahi ’ē ’e te ’itera’a nō rātou i tō rātou nātura maita’i roa a’e, te maita’i i roto ia rātou ».1
E ’ere ānei te reira mai te hō’ē pehepehe ra te huru ?
E nehenehe te Vārua Maita’i e tauturu ia tātou ’ia ’ite i te maita’i i roto ia vetahi ’ē. Nō te marū o taua fa’ahitira’a parau ra nō’u, i hina’aro ai au e ha’api’i hau mai ā. ’Ua ’ite a’era vau ē, ’ua ha’api’i ato’a o Elder David A. Bednar, nō te pupu nō Tino ’Ahuru ma Piti ’āpōsetolo, e tauturu te hōro’a o te ’ite-māite-ra’a ia tātou « ’ia ’itea ’e ’ia fa’atupu ho’i i te maita’i tei hunahia paha i roto ia tātou. »2
Mai te taime ’a ’ite ai au i te reira, ’ua ’ite a’era vau e mea faufa’a rahi mau teie tuha’a nō te hōro’a o te ’ite-māite-ra’a. E ti’a ia tātou ’ia ’imi i te mau ’aravihi maitata’i i roto ia tātou iho ’ia nehenehe ia tātou ’ia fa’ananea i te reira. Mai te mea e nā reira tātou, e ’ite tātou ’e e rave hau atu mai te mau tamari’i a te Atua, ’o tātou mau ïa (hi’o Salamo 82:6 ; Mosia 5:7 ; Moroni 7:19).
Nō reira, nāhea e nehenehe ai ia tātou ’ia ha’amata i te ’imi i te maita’i i roto ia tātou iho ? Teie te tahi mau rāve’a nō te ha’amata.
’A fa’atumu i ni’a i te fa’a’ohipara’a i tō ’outou pūai nō te ha’amaita’i ia vetahi ’ē
E parau mau te ha’api’ira’a tumu ē, tē vai ra te tahi mau hōro’a a te Atua i roto i te mau ta’ata ato’a (hi’o Te Parau Ha’api’ira’a ’e te mau Parau Fafau 46:11)—’e e ’ere i te mea faufa’a ’ore ’ia feruri i te reira. ’Oia mau, ’ua ani mai te Fatu ia tātou ’ia nā reira ! Tē ha’api’i nei te mau pāpa’ira’a mo’a ia tātou ’ia « ’imi onoono ’outou i te mau hōro’a maita’i roa ra, ma te ha’amana’o-noa-ra’a i te tumu i hōro’ahia mai ai taua mau mea ra » (Te Parau Ha’api’ira’a ’e te mau Parau Fafau 46:8 ; ha’apāpūra’a i ’āpitihia atu).
’A ’ite maita’i ai tātou i tō tātou mau hōro’a ’aore rā mau tāreni, e ti’a ia tātou ’ia ’imi i te mau rāve’a nō te fa’a’ohipa i te reira nō te tāvini ia vetahi ’ē.
Te hō’ē rāve’a nō te fa’ata’a i tō ’outou mau hōro’a, mea nā roto ïa i te anira’a i te hō’ē ta’ata tā ’outou e ti’aturi nei ! ’A ui atu ia rātou e aha tō ’outou mau pūai. Mai te mea mai iā’u ato’a ’outou, e feruri paha ’outou ē, e ’ohipa huru ’ē ri’i te reira. Terā rā ’a ha’amana’o na, e ’ere teie nō te fa’aahaaha ; nō te ’ite mai rā i tō ’outou mau huru ’aore rā mau ’aravihi nō te pūpū atu i tō ’outou mau taea’e ’e mau tuahine o te ao nei (hi’o Mosia 8:18).
’Ei hi’ora’a, ’ua parau mai te hō’ē ta’ata tāpiri mai iā’u i te hō’ē mahana, e hōro’a tō’u nō te tauturu i te ta’ata ’eiaha ’ia huru ’ē. ’Aita vau i fa’ariro i te reira parau mai te hō’ē peu maita’i fa’atura noa, ’ua ha’amata rā vau i te moemoe i taua hōro’a ra i roto i tō’u orara’a. ’A nā reira ai au, ’ua ’ite a’era vau ē, e nehenehe te Metua i te ao ra e tauturu iā’u ’ia fa’a’ohipa i tō’u mau ’aravihi tōtiare nō te fa’ahoa ia vetahi ’ē, ’e nō te ha’amaita’i i te mau orara’a hau atu i tō’u iho.
Nā roto i te ’itera’a i tō ’outou mau hōro’a, e nehenehe ’outou e mā’iti pāpū ’ia fa’a’ohipa i te reira nō te ha’amaita’i ia vetahi ’ē (hi’o Te Parau Ha’api’ira’a ’e te mau Parau Fafau 82:18).
’A tuatāpapa i tō ’outou ha’amaita’ira’a pātereāreha
Hōho’a nā Judith Ann Beck
’Ua riro ato’a te mau ha’amaita’ira’a pātereāreha ’ei rāve’a maita’i nō te ’ite i tō tātou mau hōro’a ’ōtahi tei hōro’ahia mai e te Atua. ’Ua parau o Elder Larry R. Lawrence, te hō’ē melo fa’atuha’ahia nō te Hitu Ahuru ē : « E nehenehe te Vārua e fa’a’ite mai ia tātou i tō tātou mau paruparu, e nehenehe ato’a rā tāna e fa’a’ite mai ia tātou i tō tātou mau pūai… ’Ia tai’o ana’e tātou i tō tātou mau ha’amaita’ira’a pātereāreha, e ha’amana’o tātou ē, ’ua ’ite tō tātou Metua i te ao ra i tō tātou pūai hanahana ».3
Te tuatāpapara’a i tō ’outou ha’amaita’ira’a pātereāreha, e tauturu te reira ia ’outou ’ia rōtahi i ni’a i te fa’ahotura’a i te mau huru ’o tē nehenehe e tauturu ia ’outou ’ia tae’ahia tō ’outou pūai.
Nō’u nei, pinepine au i te feruri i te huru metua vahine tā’u e ti’aturi e riro vau i te hō’ē mahana. Ma te ’ite ore e ’ite au iho i te feruri ē, te hō’ē metua vahine maita’i e tino maita’i ïa tōna, e mea nahonaho, ’e e mea hāviti—’e tāna faraoa monamona e riro ïa ’ei fa’ahina’arora’a nā te Sōtaiete Tauturu o te pāroita. Noa atu e ’ere teie mau mea i te mea ’ino, ’ua fa’a’ite mai te tuatāpapara’a i tō’u ha’amaita’ira’a pātereāreha iā’u ē, e mea tau’a a’e nā te Fatu ’ia riro vau ’ei metua vahine maita’i ’e te aroha. Nō’u nei, taua mau huru mai tō te Mesia ra, ’o te mau huru ïa ’o tē ti’a iā’u ’ia fa’ahotu.
’A ha’amana’o ’e ’a feruri i te taime o te ’ōro’a mo’a
Hōho’a nā Jerry Garns
’Ua riro te ’ōro’a mo’a ’ei taime nō te feruri i ni’a i te Fa’aora. E taime ato’a nō te ferurira’a i ni’a i tō ’outou haerera’a i mua ’ia riro mai iāna te huru. ’A ha’a ai ’outou nō te ’ite i tō ’outou mau huru maita’i, te hi’ora’a i muri i te hepetoma tāta’itahi i tā ’outou mau ’ohipa i rave, te mau ’itera’a, ’e te mau fārereira’a tōtiare, e nehenehe te reira e tauturu ia ’outou ’ia ’ite i te tahi mau taime ’a fa’a’itehia mai ai tō ’outou mau hōro’a.
’Ua parau te peresideni Henry B. Eyring, tauturu piti i roto i te Peresidenira’a Mātāmua : « ’A hi’opo’a ai ’outou i tō ’outou orara’a i roto i te taime nō te ’ōro’a mo’a, maita’i ē, e fa’atumu tō ’outou mau mana’o ’eiaha i ni’a iho noa i te mau mea ti’a ’ore tā ’outou i rave, i ni’a iho ato’a rā i te mau mea ti’a tā ’outou i rave—te mau taime ’a ’ite ai ’outou ē, ’ua māuruuru te Metua i te ao ra ’e te Fa’aora ia ’outou. E nehenehe ato’a ’outou e rave i te hō’ē taime i roto i te ’ōro’a mo’a ’ia ani i te Atua ’ia tauturu mai ia ’outou ’ia ’ite i te reira mau mea ».4
Teie te tahi mau uira’a e nehenehe e ui ia ’outou iho ’aore rā, i te Atua i te taime o te ’ōro’a mo’a :
-
Nāhea vau i te pe’e i te hi’ora’a o te Mesia i teie hepetoma ?
-
‘O vai tā’u i tāvini ?
-
E aha te taime ’a ’ite ai au i te Vārua i teie hepetoma ? Nō te aha ?
-
E aha te huru Mesia tā’u e tāmata nei i te fa’ahotu ? E aha tō’u huru ?
-
Tē vai ra ānei te tahi mea i roto i tō’u orara’a e ti’a iā’u ’ia pure nō te ani i te tauturu ?
-
Tē vai ra ānei te tahi ta’ata e ti’a iā’u ’ia fa’a’ore i te hapa ?
-
E aha te hō’ē fifi, e mea rahi ’aore rā e mea na’ina’i, tā te Metua i te ao ra ’e tā Iesu Mesia i tauturu iā’u i teie hepetoma ?
Te ferurira’a i te maita’i o te Atua ’e te hi’opo’ara’a i tō’u orara’a i te taime nō te ’ōro’a mo’a ’eiaha rā te rōtahira’a i ni’a iho noa i te mau manuia-’ore-ra’a ’e te mau hapehape, e tauturu te reira iā’u ’ia tu’u i tō’u ti’aturira’a i ni’a iāna.
Ravera’a i tō ’outou pi’ira’a
’Ua hōro’ahia tō tātou mau pi’ira’a nō te hō’ē tumu, noa atu ē, ’aita tātou i ’ite i te tumu i te ha’amatara’a.
I te hō’ē taime, ’ua pi’ihia vau i roto i te peresidenira’a Sōtaiete Tauturu nō tā’u pāroita feiā ’āpī pa’ari ’ōtahi. ’Ua ’oa’oa roa vau i te ha’amata. I muri a’e rā i te tahi tau ’āva’e, ’ua tō’aru’aru vau. ’Aita tā’u e nehenehe e ’ite i te tupura’a rahi i te pae vārua i roto i te feiā tā’u e tāmata ra i te aupuru. E au ra ē, tā’u mau tauto’ora’a nō te fārerei ’e nō te fa’ahoa ’aita ïa i manuia.
I te hō’ē sābati, mai te huru ra ē, ’ua ’ere au i te mau hōro’a pae vārua nō te tauturu i te hō’ē ta’ata ’ia riro ’ei ta’ata maita’i i roto i te ’ohipa aupurura’a. Tā’u pure i roto i te taime nō te ’ōro’a mo’a i taua mahana ra, nō te fāri’i ïa i te ha’apāpūra’a ē, e mara’a iā’u ’ia rave i tō’u pi’ira’a. ’Ua tupu te hina’aro i roto iā’u ’ia ani i te hō’ē ha’amaita’ira’a autahu’ara’a.
’Ua fārerei au i tō’u ’episekōpo, ’e i te taime ’a tu’u ai ’oia i tōna nā rima i ni’a i tō’u upo’o, hō’ē o te mau mea mātāmua tāna i parau mai iā’u ’oia ho’i, « tē māuruuru nei te Metua i te ao ra i te maita’i tā ’oe e fa’a’ite nei ia vetahi ’ē ».
’Ua ’ī a’era vau i te vārua, ’e ’ua ’ite pāpū a’era vau ē, ’ua māuruuru te Fatu i tā’u mau tauto’ora’a. ’Ua ’ite a’era vau ē, tē vai mau ra i roto iā’u te hō’ē tuha’a o te mau hōro’a e tītauhia nō te aupuru ma te here. ’Ua fāito noa vau i tō’u mau manuia-’ore-ra’a ’eiaha rā tō’u mau manuiara’a.
E riro tō ’outou mau pi’ira’a ’ei mau rāve’a maita’i roa nō te ’imi ’e nō te fa’a’ohipa i tō ’outou mau hōro’a pae vārua.
E nehenehe ’outou e ha’amata i teienei
’Aita e tītauhia ia tātou ’ia tīa’i nō te ha’amata i te ’ite i te maita’i i roto ia tātou iho.
’Ua parau te peresideni Dieter F. Uchtdorf, tauturu piti i roto i te Peresidenira’a Mātāmua :
« I te tahi taime e tupu mai te mana’o paruparu i roto ia tātou nō te mea ’aita tātou i ‘hau atu’ i te tahi mea—hau atu i te pae vārua, i te fa’aturahia, i te māramarama, i te tino maita’i, i te moni, i te auhoa, ’aore rā i te aravihi…
« ’Ua ha’api’i mai au i roto i tō’u orara’a ē, ’aita e tītauhia ia tātou ’ia hau atu i te hō’ē mea nō te ha’amata ’ia riro ’ei ta’ata tā te Atua i fa’aoti ’ia riro mai tātou ».5
E nehenehe tā tātou e ha’amata nā roto i te hō’ē pure. ’A parau i te Metua i te ao ra e aha tō ’outou huru i teienei, ’e e aha tā ’outou e hina’aro ’ia feruri nō ni’a ia ’outou iho. ’A ani ta’a ’ē i te hōro’a o te ’ite-māite-ra’a nō te tauturu ia ’outou ’ia ’ite i tō ’outou maita’i i roto ia ’outou. Te tahi o te mau taime au roa o tō’u orara’a, ’ua tupu ïa nā roto i tō’u fa’ahitira’a i teie mau pure. Tē ti’aturi nei au ē, e hina’aro rahi tō te Metua i te ao ra ’ia tauturu ia tātou ’ia ’ite i te mau mea ato’a tāna e ’ite ra.
Nō tō tātou ti’ara’a ta’ata ’ei mau tamari’i nā te Atua, ’ua fa’ata’ahia tātou nō te fāito rahi (hi’o Te Parau Ha’api’ira’a ’e te mau Parau Fafau 78:17). Nā roto i te hōro’a o te ’ite-māite-ra’a, e nehenehe tātou e ’ite i te reira nō tātou iho.