“Pwupwilahu Wia Kisehn Sapwellimen Koht Pilahn,” Liahona, Seniweri 2022
Padahk en Sounpwong kan Liahona Seniweri 2022
Pwupwilahu Wia Kisehn Sapwellimen Koht Pilahn
Pwehki Pwupwilahu, kitail kin kohdo pohn sampah oh kak ehu rahn pwurala oh kousonla rehn Samatail Nanleng.
Adam and Eve in the Gorden of Eden [Adam oh Ihp nan Mwetuwel en Ihden], sang Robert T. Barrett
Nan Mwetuwel en Ihden, Koht kehkehlikiong Adam oh Ihp en dehr kang wahn ttuhkehn kamarain en me mwahu oh suwedo. Eri E ahpw ketin masahniong ira en peihn pilada, ahpw ira en tamataman me E ketin kainapwihsang ira (Moses 3:17). Sehdan kasongisongi Ihp en kang wahn tuhkehu. E padahkiong me e pahn duwehla koht akan, me esehla dahme mwahu oh suwed (Moses 4:11). E ahpw kangada wahn tuhkehu oh ehukiong Adam. Koht kaus irahsang nan Mwetuwel en Ihden.
Pwupwilahu
Adam oh Ihp Pokous Sang nan Mwetuwelo, sang Gary L. Kapp, sohte pahn koapihdi
Ansou me Adam oh Ihp kokohsang Mwetuwel en Iden, ira solahr mih mwohn silangin Koht. Tohrohrpeseng wet me sang rehn Koht iei me kahdaneki mehlan palingehn. Kohkolahsang mwetuwelo pil wewehki me Adam oh Ihp alehda paliwar me pahn kin kak mehla. Mendahte Adam oh Ihp solahr mih rehn Koht oh ahnekier paliwar, ira ahneki peren oh koapworopwor ni ansou me ira kilangada me ira kak pweida (kilang Moses 5:10–11). “Adam pwupwidi pwe aramas en kak miehda; oh aramas mie, pwe irail en kak peren. (2 Nephi 2:25).
Ehu Ansou en Kasongosong
Ni ansou me kitail kin ipwidi, kitail kin sohte kouson rehn Koht, duehte dahme Adam oh Ihp wia mwurin Pwupwilahu. Setan kin kasongosonge kitail en kin wiahda pilipil suwed kan. Kasongosong pwukat kin elehda kitail en soang oh pilada nan pwungen me mwahu oh sued (kilang Alma 12:24). Ansou koaros me kitail kin wiahda dihp oh sohte koluhla, kitail kin dohdohlahsang Sahm Nanleng. Apw ma kitail kin koluhla, kitail kin wie karkaranihla Samatail Nanleng
Mehlahn Paliwar
Sampah kepikpikdahr ong kitail (kilang 1 Nephi 17:36). Pwupwilahu karehieng Adam oh Ihp en kak kapwaiada sapwelimen Koht koasondi en naineki seri, kareieng kitail en kak kohdo pohn sampah ni paliwar. Paliwaratail kan pahn ehu rahn mehla, apw palingenitail kan pahn momourte kohkohla. Paliwaratail kan oh palingenitail kan pahn pilehu pwurpene ni atail pahn iasada.
Komourla pwehki Sises Krais
Iasadahu, sang Harry Anderson
Sang ni kamatalahn Sises Krais, kitail kak powehdi mehlahn paliwar oh palingehn. Pwehki Krais ah ketin iasadahr, koaros me ipwidi pohn sampah wet pahn iasada oh ahniki mour soutik. Oh pwehki Krais ketin lokolongkiher dipatail kan, kitail kak koluhla oh ale mahkepen dipatail kan pwe kitail en kak pwurala rehn Samatail Nanleng.
© 2021 sang Intellectual Reserve, Inc. Kolokol pwuhng koaros. Ntingda nan USA. Kamanaman ong ni lokaiahn Wai: 6/19. Kamanaman ong kawehwe: 6/19. Kawehwehpen Monthly Liahona Message, January 2022. Pohnpeian. 18295 885