Mesaj Mansyèl Liahona, Fevriye 2022

Alyans ki Konekte Nou avèk Bondye

Fè alyans ak respekte alyans pote benediksyon.

Yon alyans se yon pwomès ant Papa nou ki nan Syèl la avèk pitit Li. Li fikse kondisyon pou alyans nou fè avèk Li yo. Lè nou fè sa Li mande, nou resevwa anpil benediksyon. Epi se pa sèlman sou tè a nou resevwa benediksyon—lè nou fè alyans epi nou respekte alyans yo, n ap retounen al viv avèk Bondye ansanm ak fanmi nou nan syèl la yon jou tou.

Alyans ak Òdonans

Nou fè alyans pandan kèk òdonans. Nou bezwen resevwa òdonans sa yo ak obeyi alyans sa yo pou nou ka retounen al viv avèk Bondye. Òdonans sa yo akonpli pa otorite prètriz la. Òdonans sa yo enkli batèm ak konfimasyon, resevwa Prètriz Mèlkisedèk la (pou gason), ak òdonans nou resevwa nan tanp yo. Pandan sentsèn nan, manm Legliz yo renouvle pwomès yo te fè avèk Bondye yo (gade Doktrin ak Alyans 20:77, 79).

Alyans yo Ede Nou Viv Dwat

Pandan batèm nan, nou pwomèt pou nou suiv Jezikri, pou nou toujou sonje Li epi pou nou respekte kòmandman yo (gade Doktrin ak Alyans 20:37). Bondye pwomèt ke Sentespri a ka toujou avèk nou.

Lè gason resevwa prètriz la, yo pwomèt pou yo viv diy pou yo ka gen pouvwa prètriz Bondye a. Bondye pwomèt pou L beni yo. (Gade Doktrin ak Alyans 84:33–40.)

Ilistrasyon Tanp Recife nan Brezil la pa James Porter

Alyans Nou Fè nan Tanp yo

Lè manm Legliz yo resevwa dotasyon yo nan tanp lan, yo pwomèt pou yo viv dwat epi pou yo fè sakrifis pou levanjil la. Bondye pwomèt yo pouvwa (gade Doktrin ak Alyans 38:32; 109:22).

Pandan sèlman nan tanp lan, yon mari ak madanm li marye pou letènite epi yo pwomèt pou yo rete fidèl youn anvè lòt epi anvè Bondye. Bondye pwomèt yo ka retounen al jwenn Li epi viv an fanmi pou tout tan. (Gade Doktrin ak Alyans 132:19–20.)

Nou se yon Pèp Alyans

Moun ki antre nan Legliz Jezikri pou Sen Dènye Jou yo vin tounen pèp alyans Bondye. Yo eritye benediksyon ak responsablite alyans Abraramik la tou (gade Galat 3:27–29). Fè pati pèp alyans Bondye a vle di pou youn ede lòt pandan n ap vin pi pre Kris la. Sa vle di tou, nou travay pou nou fòtifye Legliz Bondye a sou tè a. Lè nou respekte alyans nou yo, nou ka jwenn pouvwa ak fòs nan men Bondye.

Nan Ekriti yo

Lè yo te batize, Alma ak pèp li a te fè yon alyans pou youn te ede lòt ak pou yo te obeyi kòmandman Bondye yo (gade Moyiz 18:8–11).

Apre yo te fin konvèti, Anti Nefi Leyi yo te fè yon alyans pou yo pa t janm itilize zàm yo ankò (gade Alma 24:17–19).

Senyè a te fè yon alyans avèk Abraram (gade Abraram 2:9–11).

© 2022 pa Intellectual Reserve, Inc. All rights reserved. Enprime nan Etazini Damerik. Apwobasyon anglè: 6/19. Apwobasyon tradiksyon: 6/19. Tradiksyon Monthly Liahona Message, February 2022. Haitian Creole. 18313 036