“Ato ba nga Gilimitahan ang Dios sa Atong Kinabuhi?,” Liahona, Abr. 2022.
Ato ba nga Gilimitahan ang Dios sa Atong Kinabuhi?
Ang bishop dili lamang mao ang gipadala sa Dios sa pagtabang kanato sa atong mga hagit.
Mga paghulagway pinaagi ni David Green
Sa dihang gitawag si Marco isip usa ka bishop, usa sa iyang una nga mga alatubangon [appointment] mao si Brother ug Sister Peña (mga ngalan giusab). Silang duha nag-antos gikan sa trauma nga may kalabotan sa pag-abuso. Ang resulta sa ilang mga hagit sa kahimsog sa pangisip malisod na. Silang duha nakasinati og pakyas nga mga kaminyoon ug naningkamot sa pagbuhat sa ilang labing maayo aron makapadako sa nagsagolsagol nga sakop sa pamilya. Ang nagpadayon nga mga hagit sa panarbaho nakapahimo nga lisod sa pagbarug sa kaugalingong paningkamot. Gusto silang moadto sa templo apan wala mosarang sa mga rekomend. Ang usa o ang laing paagi kanunay nga daw anaa sa krisis.
Gihigugma sila ni Marco, apan maklaro kaayo nga nagkinahanglan sila og dugang nga tabang kay sa iya lang mahatag nga mag-inusara.
Subo lang, ang mga Peña nagpanuko sa pagtugot sa bishop nga apilon ang uban. Nianang higayona, dinhay mitumaw nga pagtuo sa kadaghanan nga mga miyembro sa Simbahan nga ang bishop mao ang responsable sa pagtabang sa mga miyembro sa sama niini nga mga hagit. Agig dugang, nahadlok si Marco nga ang mga Peña mobati unya nga dili sila importante ngadto kaniya kon magpatabang siya sa lain.
Mao nga gibuhat ni Marco ang iyang labing maayo. Mibisita siya. Mitambag siya. Naningkamot siya nga makonektar sila ngadto sa gikinahanglan nga mga propesyonal alang sa kahimsog sa pangisip. Si Marco ug ang iyang asawa mitambong uban nila sa mga klase sa pagbarog sa kaugalingong paningkamot ug mitabang kanila sa pagtrabaho sa ubang mga hagit sa pinansyal. Samtang ang uban sa ward mitabang usab, ang bishop migahin og daghang oras uban sa mga Peña. Sa kataposan sa lima ka tuig, nasilyo sila, apan nakigbisog pa gihapon sila sa mao gihapon nga dugay na nilang mga isyu sa ilang una nga pagbisita kaniya.
Sa pagtan-aw og balik, miingon si Marco nga siya ug ang mga Peña wala makasabot sa tahas sa bishop. Agig dugang, silang tulo napakyas sa pagsalig sa mga presidente sa Relief Society ug korum sa mga elder sa pagtuman sa ilang balaang gisangon nga mga responsibilidad sa pagtabang sa mga miyembro nga aduna niini nga matang sa mga hagit. Ang resulta mao nga gilimitahan nila ang mga panalangin sa Ginoo sa kinabuhi sa mga Peña.
Pagpalapad sa Atong Panglantaw ug sa mga Tawo sa Atong Palibot
Komon kini nga istorya. Kadaghanan kanato nagtan-aw sa atong bishop isip ang espiritwal nga lider sa atong ward. Siya ang tigdumala nga high priest sa ward ug naghupot sa mga yawe sa pagkapari sa pagpangulo sa buhat sa Simbahan diha sa ward. Tungod kay ang iyang espiritwal nga tahas naglakip sa pag-alagad isip maghuhukom sa kadaghanan, nagkinahanglan kita sa iyang tabang sa mga isyu nga may kalabotan sa pagkatakos ug paghinulsol. Siya usab ang kataposan nga responsable sa paggamit sa mga kapanguhaan sa Simbahan aron sa pagtabang niadtong nanginahanglan. Mao nga siya kasagaran ang unang tawo nga atong mahunahuna kon magkinahanglan kita og bisan unsa nga tabang.
Bisan pa man, sa Ang Simbahan ni Jesukristo sa mga Santos sa Ulahing mga Adlaw, ang bishop dili lamang mao ang usa ka tawo nga gitugotan sa Ginoo sa paglihok alang Kaniya. Nangalagad ubos sa direksiyon sa mga yawe sa pagkapari, ang ubang mga lalaki ug mga babaye diha sa ward adunay awtoridad ug gahom sa pagdawat og pagpadayag ug pagtabang niadtong gisangon sa ilang pag-atiman. Ang mga presidente sa korum sa mga elder ug Relief Society gisangonan sa pagdawat og giya sa Dios sa pagtabang kanato. Ang ubang opisyales sa ward, tigpangalagad nga mga brother ug mga sister, ug bisan kinsa nga gihatagan og katungdanan ubos sa awtoridad sa mga yawe sa pagkapari sa paglihok alang sa Ginoo makahatag usab sa gikinahanglan nga tabang.
“Ang mga presidente sa korum sa mga elder ug Relief Society aduna sa balaang gisangon nga responsibilidad ug pagpadayag sa pagtabang sa mga miyembro,” miingon si Presidente Jean B. Bingham, Presidente sa Kinatibuk-ang Relief Society. “Ang tanan kinsa gi-set apart alang sa usa ka calling o kinsa nakadawat og buluhaton ubos sa mga yawe sa pagkapari adunay awtoridad ug may katungod sa pagpadayag nga gikinahanglan sa paglihok niana nga responsibilidad.” 1
Ang Dios nahigugma kanato, ug gusto Niyang gamiton ang Iyang walay kinutoban nga gahom sa pagpanalangin kanato (tan-awa sa Doktrina ug mga Pakigsaad 41:1). 2 Bisan pa man, “sa kasagaran ipaagi niya kini sa uban aron iyang mahatag ang atong mga gikinahanglan.” 3 Kon atong limitahan kadtong atong gisaligan sa pagtabang kanato, atong mahikawan ang atong kinabuhi sa daghang panalangin nga gusto sa Dios nga ihatag kanato, tungod kay wala kita mobuhat sa mga kondisyon nga Iyang gihatag sa pagdawat niadto nga mga panalangin (tan-awa sa Doktrina ug mga Pakigsaad 130:20–21). 4
Paghatag og Katungod sa mga Presidente sa Relief Society ug Korum sa mga Elder
Sa Abril 2018 nga kinatibuk-ang komperensiya, ang mga lider nagpahibalo og mahinungdanong mga kausaban, lakip sa pag-usab sa mga korum sa pagkapari, sa pasiuna bahin sa pagpangalagad puli sa home ug visiting teaching, ug sa pagpataas sa mga kapangulohan sa Relief Society ug korum sa mga elder sa pagtabang sa pagpangulo sa buhat sa kaluwasan ug kahimayaan diha sa ward. Kini nga mga kausaban naghatag og importansiya sa tahas sa mga presidente sa Relief Society ug korum sa mga elder sa “paghimo sa unang responsibilidad sa … pagbantay ug pagpangalagad sa mga miyembro sa Simbahan,” 5 ingon man usab sa pagtinabangay sa pagtabang sa temporal nga mga panginahanglan kauban sa bishop. 6
Kining bag-ohay nga mga kausaban sa organisasyon sa Simbahan, mga polisiya, ug mga programa gituyo, sa usa ka bahin, aron “makatabang sa mga korum sa mga elder ug mga Relief Society aron magkahiangay ang ilang buhat. … Ug sila magtugot sa bishop nga makadelegar og mas daghang responsibilidad ngadto sa mga presidente sa korum sa mga elder ug sa Relief Society aron ang bishop ug iyang mga magtatambag makatutok sa nag-una nilang mga katungdanan” uban sa bag-o nga kaliwatan sa ward. 7
Alang sa mga Bishop: Ang Gahom sa Balaang Pagdelegar
Tungod kay adunay mga responsibilidad nga ang bishop lang ang makapatuman, ang pagkaanaay mga presidente sa Relief Society ug korum sa mga elder kinsa gihatagan og gahum sa pagtabang mahimong usa ka dako nga panalangin ngadto sa mga bishop ug sa mga miyembro nga nanginahanglan.
Sama pananglit, ang bishop lang ang makaalagad isip maghuhukom sa kadaghanan sa mga butang nga may kalabotan sa pagkatakos. Maingon man usab, siya lamang ang adunay responsibilidad alang sa paggamit sa mga halad sa puasa ug sa panalapi sa ward. Siya mao ang naghupot sa mga yawe sa Aaronic nga Pagkapari sa ward ug dili makapasagad sa iyang mga responsibilidad alang sa bag-o nga kaliwatan.
Ang sa pagdelegar usa ka panalangin ngadto sa bishop ingon man usab ngadto sa mga miyembro sa ward. “Ang usa ka bishop kinahanglan nga batid sa pagdelegar, o mahugno siya sa kabug-at sa iyang mga responsibilidad o mahigawad nga makita ang daghan kaayo niini nga wala matuman,” miingon si Presidente Dallin H. Oaks, Unang Magtatambag sa Unang Kapangulohan. 8
“Ang bishop kinahanglan nga makasabot nga kini wala magpakunhod kaniya,” miingon si Sister Reyna Aburto, Ikaduhang Magtatambag sa Kinatibuk-ang Kapangulohan sa Relief Society. 9 Hinuon, ang pagdapit sa uban sa pagtabang sa buhat sa Ginoo mopalambo ug mopanalangin kanila pinaagi sa mga kahigayonan sa pagpangalagad. Mao kana ang resulta sa paglihok diha sa ngalan sa Manluluwas ug uban sa Iyang awtoridad sa pagpanalangin sa uban.
Alang sa mga Lider: Giunsa Kini Paghimo?
Ang mga miyembro ug mga lider labing siguro makakita niini nga mga panalangin sa mga ward diin ang mga miyembro nakasabot og maayo sa panan-awon bahin sa pagpangalagad ug diin ang mga presidente sa korum sa mga elder ug Relief Society nakigsabot og maayo sa usag usa ug sa bishop.
“Ang pinakaamaayo, ang mga presidente sa korum sa mga elder ug Relief Society kinahanglan nga nagtambayayong na sa mga panginahanglan sa mga miyembro nga ilang gihisgotan sa dihang sila nagsabot sa pagpangalagad,” miingon si Presidente Bingham. “Dayon makigkita sila sa bishop aron pagkuha sa iyang mga ideya ug pagtugot sa ilang mga plano sa pagtabang.” 10
Mahinungdanon ang pag-ila nga kon ang mga miyembro sa ward mangalagad, ang buhat matuman. “Ang pagpangalagad mao ang ebanghelyo sa buhat,” miingon si Elder Walter F. González sa Seventy. “Ang paghatag sa mga gikinahanglan sa miyembro dili lang trabaho sa mga presidente sa korum sa mga elder ug Relief Society, sama ra nga dili lang kini trabaho sa bishop.” 11
“Ang pagpangalagad mao ang yawe sa pagtubag sa panginahanglan ug pagkab-ot sa buhat sa kaluwasan ug kahimayaan,” miingon si Presidente Bingham. “Ang pagpangalagad mao ang pagdapit sa katawhan sa pagduol ngadto kang Kristo ug paghimo og mga pakigsaad sa templo uban Kaniya. Ang pagpangalagad mao ang paagi unsaon nato pag-ila sa mga panginahanglan ug mga kalig-on sa mga miyembro samtang giabagan nato sila sa pagpuyo sa ebanghelyo ug mahimong makabarog sa kinaugalingong paningkamot.” 12
Dili ang Kataposan
Wala madugay human na-release si Marco isip bishop, miigo ang pandemya. Nawad-an og trabaho si Brother Peña, ug ang pamilya naunlod ngadto sa bag-ong emosyonal ug pinansyal nga krisis. Nagsunod sa tambag sa mga lider sa Simbahan ug sa bag-ong inusab nga handbook, 13 ang presidente sa korum sa mga elder alang sa mga Peña nangulo sa pagpangita og dinasig nga mga paagi sa pagsuporta kanila. Nakigtambag uban sa bag-o nga bishop, ang presidente sa korum sa mga elder mibati og pag-aghat sa pagtawag ni Marco sa pagtabang kang Brother Peña.
Ang mahinungdanon nga relasyon sa pagsalig anaa na. Ug uban sa maong buluhaton, gihatag ubos sa awtoridad sa mga yawe sa pagkapari, si Marco makasalig nga makadawat og pagpadayag nga iyang gikinahanglan sa pagtabang. 14
“Ang uban motawag niini nga nabale nga gihangyo ko sa pagtabang ni Brother Peña human nga migahin ko og daghang panahon uban kanila isip bishop,” miingon si Marco. “Apan kini nga buluhaton nahimong talagsaon nga kasinatian alang kanako. Buluhaton kini gikan sa Ginoo sa pagtabang sa Iyang buhat. Malipayon ko nga makatabang sa pagtuboy dili lang sa mga palas-anon sa mga Peña apan sa bishop usab.”