Pagkat-on kon Unsaon sa Pagpakig-istorya sa Espiritu nganha Kanimo

Ni Chakell Wardleigh Herbert

Mga Magasin sa Simbahan

Dili kini ingon ka lisod sama sa ato tingaling gihunahuna.

“Naglibog lang gayod ako kaayo kon nganong nakadawat ko og pag-aghat sa pagserbisyo kaniya nga wala man gani niya kini hatagi og bili.”

Ang akong higala nga si Sarah (ang ngalan giusab) naghilak nga mipasabot nako kon sa unsang paagi nga siya nakadungog nga ang usa ka karaan nga kaila bag-o lang nga nanganak, ug si Sarah, kinsa dugay na nga nag-ampo og mga kahigayonan sa pagserbisyo, mibati og pag-aghat nga dad-an siya og panihapon. Ang iyang higala midawat sa tanyag.

Apan wala mahitabo kon unsa ang giplanohan.

Kanunay nga adunay dili maayo nga mga nahitabo samtang giandam ang pagkaon, ug sa dihang si Sarah naabot sa balay sa iyang higala usa ka oras nga ulahi sa giplanohan, ang iyang kaila dili mabination nga misulti kaniya nga ang iyang pamilya nakakaon na ug gisirad-an ang pultahan.

Nasagmuyo kaayo si Sarah sa unsay gisangpotan, apan labaw sa tanan siya naglibog kaayo—wala siya makahibalo kon nakadawat ba gayod siya og pag-aghat gikan sa Espiritu sa pagserbisyo sa iyang higala o kon kini iya lang ba kaha nga kaugalingon nga ideya.

Daghan kanato ang nakasinai sa mga sitwasyon nga sama niini—kahibalo ko nga nakasinati ko. Mga sitwasyon diin atong gibati nga giaghat nga mohimo sa piho nga mga desisyon, aron lang nga kadto nga mga desisyon dili mahitabo sa paagi nga gusto nato. Niana nga mga higayon, tingali kita mangutana kon ang Espiritu Santo nakigkomunikar ba gayod kanato.

Ang Espiritu Santo tinuod nga makig-istorya gayod kanato, apan ang pagkat-on sa pag-ila sa Iyang mga pag-aghat magkinahanglan og pagbansay. Ania ang pipila ka ideya nga makatabang kanimo nga makaila ug mosalig sa Iyang tingog.

1. Hinumdomi nga ang pagdawat sa Espiritu Santo usa ka pagpili.

Sa dihang kita nakompirmahan nga mga miyembro sa Simbahan, kita giingnan sa usa ka panalangin nga “dawata ang Espiritu Santo.”

Ang labing importante nga pulong mao ang dawata.

Ang pagdawat nagpasabot nga bisan kita nahatagan sa gasa sa Espiritu Santo, naa na kanato ang pagdawat sa walay ikakomparar nga gasa pinaagi sa pagpili nga mopuyo nga takos sa Iyang pag-uban ug dayon pagpili nga maminaw sa Iyang hinay nga mga pag-aghat.

Sama sa gitudlo ni Elder David A. Bednar sa Korum sa Napulog Duha ka Apostoles: “Ang Espiritu Santo wala himoa nga kanunayng maglihok sa atong kinabuhi tungod lamang kay gipand[o]ngan na kita sa mga kamot sa atong ulo ug gipamulong na kadtong importanting [upat] ka pulong. Sa atong pagdawat niini nga ordinansa, ang matag usa kanato midawat og usa ka sagrado ug padayong responsibilidad sa pagtinguha, sa pagpangita, sa pagtrabaho, ug sa pagkinabuhi nga kita sa pagkatinuod ‘nakadawat sa Espiritu Santo.’” ¹

Ang pagdawat sa Espiritu Santo ug pag-ila sa Iyang impluwensiya naglakip sa mga buhat sa hugot nga pagtuo sama sa pag-ampo, pagtuon sa mga kasulatan, ug pagtambong sa templo. Sa kataposan, kon kamo nanlimbasog sa pagsunod ni Jesukristo matag adlaw, ang “Espiritu Santo mao ang inyong kauban sa kanunay” (Doktrina ug mga Pakigsaad 121:46; tan-awa usab sa bersikulo 45).

2. Hibaloi nga ang Espiritu mahimong makig-istorya kaninyo matag adlaw.

Oo, matag adlaw. Si Presidente Lorenzo Snow (1814–1901) sa makausa nagtudlo, “Mahinungdanon kini nga pribilehiyo sa matag Santos sa Ulahing mga Adlaw … nga atong katungod nga mobati sa Espiritu matag adlaw sa atong kinabuhi.” ²

Apan uban sa makalibog nga mga paglinga sa kalibotan nga naningkamot sa pag-impluwensiya kanato ug sa kadaghan sa mga responsibilidad diha sa atong mga abaga, mao nga dili katingalahan nga usahay atong mataligam-an ang hilom, gamay nga tingog sa Espiritu Santo diha sa atong mga kinabuhi.

Usa ka butang nga makatabang nato nga makaila sa Iyang tingog matag adlaw mao ang paghimo og listahan sa maayo nga mga butang nga nahitabo o mga butang nga kita gidasig nga buhaton o isulti. Kasagaran dili nato mailhan ang pagpadayag hangtod human nato nga nabuhat ang usa ka pag-aghat ug mobalik og hunahuna sa atong mga kasinatian.

Importante usab nga hinumdoman nga, aron matugotan kita nga makat-on ug molambo, ang Dios dili kinahanglan nga molatid sa matag lakang nga kinahanglan natong himoon sa kinabuhi. Sama sa gitudlo ni Elder Dale G. Renlund sa Korum sa Napulog Duha ka Apostoles, “Ang tumong sa atong Langitnong Amahan sa pagkaginikanan dili ang pagpabuhat sa Iyang mga anak sa unsay matar[o]ng; kini ang pag[pa]pili sa Iyang mga anak sa pagbuhat sa matar[o]ng ug sa katap[o]san mahimong sama Kaniya.” ³

3. Pangitaa ang nakatago nga mga kahulogan.

Usahay mahimong masobrahan nato sa paghunahuna kon ang mensahe gikan ba sa Espiritu. Importante ang paglihok inubanan sa hugot nga pagtuo, apan kita mahimo usab nga masayod kon ang pag-aghat naggikan ba sa Espiritu Santo samtang atong ikonsiderar ang pipila ka pangutana:

Kanunay ka ba nga nagtinguha og pagpadayag?
Nagpuyo ka ba sa paagi nga ang Espiritu magpadayon nga naa kanimo?
Ang impresyon miaghat ba kanimo sa pagbuhat og maayo?
Andam ka ba sa pagpaminaw sa Espiritu kaysa imong kaugalingon nga mga kagustohan?

Kon naghimo ka sa imong labing maayo aron magtinguha og pagpadayag ug ikaw nakadawat og impresyon nga dili masabtan, hinumdomi kini nga mga pulong ni Elder Dieter F. Uchtdorf sa Korum sa Napulog Duha ka Apostoles: “Tingali dili pa dayon nato makita ang kinatibuk-ang larawan [sa atong kinabuhi], apan igo ang atong makita aron mosalig nga adunay matah[o]m, maanindot nga desinyo. Ug samtang maningkamot kita nga mosalig sa Dios ug mosunod sa Iyang Anak, si Jesukristo, usa ka adlaw atong makita ang nahuman nga produkto, ug atong masayran nga ang mismong mga kamot sa Dios ang nagdirekta ug naggiya sa atong mga lakang.” ⁴

Nga mopabalik kanato sa panag-istoryahanay namo ni Sarah.

4. Tinguhaa nga mahibaloan unsaon nimo sa pagbati ang Espiritu.

Si Sarah misulti nako nga sa dihang mipauli siya gikan sa napalpak nga pagsulay og serbisyo sa iyang higala, nangutana siya sa Langitnong Amahan ngano nga gibati niya ang pag-aghat nga bati man kaayo ang nahitabo. Ug samtang siya hilom nga naminaw, siya adunay klaro kaayo nga nahunahunaan: “Ang tubag mas dako pa kaysa imong gihunahuna.”

Samtang akong gihinuktokan ang iyang gisulti nako, kalit lang nako nga nahunahunaan ang usa ka pakigpulong sa kinatibuk-ang komperensiya nga bag-o lang nakong gitun-an—“Makapungot nga Pagkadili Makiangayon,“ ni Elder Renlund.

Mibati ko og pag-aghat nga mopaambit sa pipila sa iyang gitudlo: “Si Jesukristo makasabot sa pagkadili makiangayon ug adunay gahom sa paghatag og paagi nga kini mahimong mas makiangayon. Walay ikatandi sa pagkadili makiangayon nga Iyang giantos. … Siya nakasabot sa hingpit unsay atong gisinati.” ⁵

Mihatag ko sa ideya nga tingali kini nga pag-aghat gihatag aron matugotan si Sarah nga makapalambo sa iyang pagdayeg ug paghigugma sa Manluluwas. Samtang akong gipaambit kini nga panghunahuna, nanlimbawot ang akong mga balhibo sa bukton, ug nakadawat ko og pagkompirmar nga gibati nako ang Espiritu.

Nianang higayona, nakaamgo ko kon unsa gayod kadaghan ang mga paagi nga ang Espiritu Santo makig-istorya kanato:

Si Sarah adunay maayo nga hunahuna sa pagserbisyo sa usa ka tawo.
Usa ka gamay nga tingog sa iyang hunahuna ang mitubag sa iyang pangutana human mag-ampo.
Kalit lang ko nga nakahunahuna kabahin sa pakigpulong ni Elder Renlund, ug nahitabo nga mao kadto ang kinahanglan gayod nga madungog ni Sarah.
Mibati ko og makapahupay nga pagbati human makapaambit nga nagkompirmar nga ang akong gihunahuna nagagikan Kaniya.

Gitapos namo ang among panaghisgotay nga mibati sa Espiritu ug nakadawat og mas dako nga pagsalig nga Siya gayod makig-istorya kanato. Kini usab mipabalik sa among hugot nga pagtuo nga bisan tuod kon ang mga pag-aghat dili mahitabo sa paagi nga among gilaoman, kini gikan gihapon sa Espiritu Santo.

Ang pag-ila sa kalahian sa Espiritu gikan sa imong kaugalingon nga mga hunahuna mahimong mas sayon samtang ikaw mangutana sa Langitnong Amahan sa pagtabang nimo nga mailhan kon sa unsang paagi ang Espiritu makig-istorya nimo. Nagkinahanglan usab kini og andam nga kasingkasing, hunahunang andam sa espiritu, ug dalunggan nga makalikay og paminaw sa mga impluwensiya sa kalibotan.

Nagkat-on pa ko sa espirituhanon nga lenggwahe, apan mapasalamaton ako alang niadto nga mga higayon diin, pinaagi sa gasa sa Espiritu Santo, ang Langitnong Amahan nagpahinumdom kanako nga Siya nakaila kanako ug nagbarog nga andam sa paggiya kanako—ug sa matag usa kanato kinsa magpadayon sa pagdangop ngadto Kaniya.