Kisa Ki Pase nan Reyinyon Legliz yo nan jou Dimanch?

Manm Legliz Jezikri pou Sen Dènye Jou yo rasanble chak Dimanch pou yo adore Bondye ak pou youn anseye lòt levanjil Jezikri a. Tout moun byenveni pou yo patisipe, e manm yo ap gen chans pou yo priye, fè diskou ak anseye leson si yo vle sa. Reyinyon sa yo ede manm yo ranfòse youn lòt nan lafwa yo nan Bondye epi yo fè “kè yo makonnen ansanm nan inite ak lanmou youn pou lòt” (Mozya 18:21).

yon tigason sou chèz woulant k ap pase sentsèn

Reyinyon Sentsèn

Manm pawas oswa branch yo rasanble chak Dimanch pou reyinyon Sentsèn. (Moun ki pa gen menm lafwa avèk nou yo byenveni pou yo asiste tou.) Yo bay manm yo sentsèn nan pandan reyinyon sa a pou ede yo sonje Jezikri (gade atik sou prensip debaz Levanjil yo nan mwa Avril 2022 a pou plis enfòmasyon sou Sentsèn). Reyinyon an gen ladan priyè, mizik adorasyon, ak diskou manm yo bay sou levanjil Jezikri a tou.

Lòt Reyinyon

Apre reyinyon Sentsèn nan, manm yo divize an klas ak kowòm. Timoun ki gen laj 18 mwa rive 11 zan ale nan Primè. Nan premye ak twazyèm Dimanch chak mwa, tout lòt manm yo ale nan Lekòldidimanch. Nan dezyèm ak katriyèm Dimanch yo, yo ale nan reyinyon Sosyete Sekou, Jènfi, oswa kowòm prètriz.

Lapriyè

Se manm yo ki fè lapriyè nan reyinyon Legliz la. Priyè yo senp e se Sentespri a ki gide yo. Lè y ap priye, manm yo itilize mo ki eksprime lanmou ak respè pou Pè Selès la. Sa enkli itilizasyon pwonon tankou Oumenm, Limenm, Oumenm, ak Limenm lè y ap priye L.

Diskou

Yon manm episkopa a oswa prezidans branch lan mande manm yo pou yo fè diskou nan reyinyon Sentsèn nan. Diskou sa yo konsantre sou levanjil Jezikri a. Oratè yo sèvi avèk ekriti yo ak pawòl dirijan Legliz yo pandan y ap prepare diskou yo. Yo rann temwanyaj sou benediksyon prensip levanjil yo nan lavi yo tou.

Leson

Apre reyinyon Sentsèn, manm yo aprann sou levanjil la nan klas ki pi piti. Leson yo kapab osijè ekriti yo, ansèyman yo bay nan konferans jeneral yo, oswa lòt sijè. Menmsi enstriktè a ap dirije leson an, se pa yon konferans. Tout manm klas la ka pataje panse yo sou sijè a.

yon mesye k ap pale sou chè a nan legliz la

Temwanyaj

Yon fwa pa mwa, reyinyon Sentsèn nan gen yon reyinyon temwayaj ladan l. Dabitid se premye Dimanch nan mwa a. Pandan reyinyon sa a, manm yo ka rann temwayaj yo sou Jezikri ak levanjil Li a. Rann temwayaj vle di deklare verite levanjil yo jan yo enspire pa Sentespri a.

Preparasyon

Manm yo prepare pou reyinyon Dimanch yo lè yo priye, etidye ekriti yo, epi pare pou yo resevwa enspirasyon Sentespri a. Si yo mande w pou w bay yon diskou oswa anseye yon leson, nan lapriyè, reflechi sou fason w ka anseye prensip levanjil yo. Itilize ekriti yo. Rann temwayaj sou verite a. Dirijan Legliz ou yo ka ede w prepare, si sa nesesè.

© 2022 pa Intellectual Reserve, Inc. All rights reserved. Enprime nan Etazini Damerik. Apwobasyon anglè: 6/19. Apwobasyon tradiksyon: 6/19. Tradiksyon Monthly Liahona Message, Jen 2022. Haitian Creole. 18315 036