Mukenji wa ku Ngondo wa Liahona Ngondo Muisambombo 2022

Ntshinyi Tshidi Tshienzeka mu Bisangilu bia Ekelezia bia Dialumingu?

bamamu babidi bakidilangana

Bidimba bia Ekelezia wa Yezu Kilisto wa Bansantu ba Matuku a Ndekelu bidi bidisangisha Dialumingu dionsu bua kukukuila Nzambi ne bua kulongeshangana lumu luimpa lua Yezu Kilisto. Bantu bonsu badi bakidibua bua kubuela, ne bidimba nebikala ne diba dia kusambila, kuenza mayisha ne kulongesha bikalebu basua. Bisangilu ebi bidi biambuluisha bidimba bua kukankamikangana mu ditabuija ne kuikala ne “mitshima yabu misuikakaja pamue mu bobumue ne mu dinanga” (Mosiya 18:21).

nsongaluma mu nkuasa wa nkata upitshisha biakudia bia tshijila

Tshisangilu tshia Biakudia bia Tshijila

Bidimba bia mu tshikongu anyi mu ditamba bidi bidisangisha Dialumingu dionsu bua tshisangilu tshia biakudia bia tshijila. (Aba badi kabayi ba ditabuija dimua netu, badi pabu bakidibua bua kubuela.) Biakudia bia tshijila bidi bifidibua kudi bidimba mu tshisangilu etshi bua kubambuluisha bua kuvuluka Yezu Kilisto (tangila April 2022 Gospel Basics article bua mamanyisha abungi bua bualu bua biakudia bia tshijila). Tshisangilu etshi tshidi kabidi tshikumbaja masambila, misambu ya dikukuila ne mayisha mafila kudi bidimba pa lumu luimpa lua Yezu Kilisto.

nsongakaji ibidi itua mimuemua mu ekelezia

Bisangilu Bikuabu

Panyima pa tshisangilu tshia biakudia bia tshijila, bidimba bidi bitapuluka mu tulasa ne mu mpuilu. Bana badi ne ngondo 18 tô ne ku bidimu 11 badi babuela mu Kalasa ka Bana. Mu Dialumingu dia kumpala ne disatu dia ngondo yonsu, bidimba bionsu bikuabu bidi bibuela mu Kalasa ka Dialumingu. Mu Dialumingu dibidi ne dinayi, badi babuela mu bisangilu bia mu Kasumbu Kambuluishi, mu Kalasa ka Bansonga Bakaji, anyi mu mpuilu wa buakuidi.

Masambila

Masambila a mu bisangilu bia Ekelezia adi enjibua kudi bidimba bia Ekelezia. Masambila adi mapepela ne maludika kudi Nyuma wa Tshijila. Bidimba bidi bisambila ne miaku idi ileja dinanga ne kanemu kudi Tatu wetu wa mu Diûlu. Etshi tshidi tshiangata kuakula ne miaku mipinganyi bu mudi Wewe, biebe, tshiebe, ne webe padibu basambila kudiye.

Mayisha

Tshidimba tshia mu buepiskopo anyi tshia mu bulombodi bukulu bua ditamba tshidi mua kulomba bidimba bua bifila mayisha mu tshisangilu tshia biakudia bia tshijila. Mayisha â adi akula pa lumu luimpa lua Yezu Kilisto. Bayishi badi balongolola mayisha abu ne mifundu ne mêyi a balombodi ba Ekelezia. Badi kabidi bafila bujadiki bua mabenesha a malongesha a lumu luimpa a mu mioyo yabu.

Malongesha

Panyima pa tshisangilu tshia biakudia bia tshijila, bidimba bidi bilonga lumu luimpa mu tulasa tukesa. Malongesha adi mua kuikala mangata mu mifundu, mu malongesha a mpungilu munena, anyi pa biena-bualu bikuabu. Nansha pikala mulongeshi ulombola dilongesha, katshiena dibala to. Bidimba bionsu bia kalasa bidi mua kufila ngenyi yabi pa tshiena bualu.

muntu udi wakula ku mesa a tshiambilu mu ekelezia

Bujadiki

Musangu umua ku ngondo, tshisangilu tshia biakudia bia tshijila tshidi tshiangata tshisangilu tshia bujadiki. Pa tshibidilu, etshi tshidi mu Dialumingu dia kumpala dia ngondo. Mu tshisangilu etshi, bidimba bidi mua kufila majadiki abi pa Yezu Kilisto ne lumu luimpa luende. Kufila bujadiki kudi kumvuija ne: kuamba malelela a lumu luimpa bu mudi Nyuma wa Tshijila wamba mu lungenyi.

Kudilongolola

Bidimba bidi bidilongolola bua bisangilu bia Dialumingu mu kusambila, mu kulonga mifundu ne mu kuikala pabuipi bua kupeta lungenyi lua kudi Nyuma wa Tshijila. Biwikala mulombibua bua kuyisha anyi kufila dilongesha, ela meji mu kusambila pa mushindu uudi mua kulongesha malongesha a lumu luimpa. Longesha ne mifundu. Fila bujadiki bua bulelela. Balombodi beba ba Ekelezia badi mua kukuambuluisha, padibi bikengela.

Biwikala ne nkonku pa bisangilu bia Ekelezia, udi mua kuyukila ne batatu anyi bamamu bakubi beba, balombodi ba tshikongu anyi ba ditamba beba, anyi bena bukenji.

Kupitshila ku Mifundu

Bisangilu bia Ekelezia bidi bilombodibua kupitshila ku Nyuma (tangila Moloni 6:9).

Bidimba bia Ekelezia bidi bilongeshangana lumu luimpa (tangila Dilongesha ne Bipungidi 88:77–78).

Balongeshi badi balongesha ne mifundu pa malongesha a lumu luimpa (tangila Dilongesha ne Bipungidi 42:12).

Malongolodi a Tshikongu

Kalasa ka Bana: Bua bana badi ne ngondo 18 tô ne ku bidimu 11.

Tulasa tua Bansonga Bakaji: Bua bansonga bakaji badi ne bidimu 12 tô ne 18.

Mpuilu ya Buakuidi bua Alona: Bua bansonga baluma badi ne bidimu 12 tô ne 18.

Kasumbu Kambuluishi: Bua bamamu bakulumpa, badi ne bidimu kubangisha pabuipi ne 18.

Mpuilu wa Bakulu: Bua batatu bakulumpa, badi ne bidimu kubangisha pabuipi ne 18.

© 2022 by Intellectual Reserve, Inc. All rights reserved. Mupatula mu USA. Dianyisha mu Angele: 6/19. Dianyisha dia dikudimuna: 6/19. Dikudimuna dia Monthly Liahona Message, June 2022. Tshiluba. 18315 760