“Kisa Sware Familyal ye?” Liahona, Out 2022
Mesaj Mansyèl Liahona, Out 2022
Kisa Sware Familyal ye?
Sware familyal se yon moman pandan semèn nan ki rezève pou fanmi w reyini. Pandan moman sa a, nou kapab “aprann levanjil la, ranfòse temwanyaj nou, bati inite, ak amize nou ansanm” (Manyèl Jeneral: Sèvi nan Legliz Jezikri pou Sen Dènye Jou yo, 2.2.4, ChurchofJesusChrist.org). Sware familyal parèt yon ti jan diferan pou chak fanmi. Men objektif la se pou nou itilize moman sa a pou nou youn vin pi pwòch lòt ak pi pwòch Sovè a.
Preparasyon
Panse ak yon aktivite fanmi w renmen ak yon sijè levanjil ou ta renmen diskite ak aprann sou li ansanm. Epitou, chwazi yon jou ak yon lè chak semèn kote pifò oswa tout manm fanmi an kapab reyini. Legliz la ankouraje manm yo pou yo fè sware familyal jou lendi swa. Men fanmi yo kapab reyini nan lè ki bon pou yo a.
Priyè
Anpil fanmi kòmanse epi fini sware familyal la avèk yon priyè. Sa envite Sentespri nan fwaye yo. Sware familyal se yon moman ideyal pou timoun ak granmoun aprann priye avèk yon ti gwoup moun.
Mizik
Anpil fanmi chante yon chan pou kòmanse ak yon chan pou fini tou. Dabitid yo chwazi yon chante nan liv kantik la oswa nan liv chan Primè a. Legliz la genyen anrejistreman pyano pou kantik yo nan music.ChurchofJesusChrist.org. Ou kapab gade videyo Kè Tabènak nan Temple Square la genyen yo tou. Chante pandan sware familyal la ap ede manm yo aprann kantik yo chante nan legliz la.
Leson
Legliz la genyen plizyè resous ki kapab ede nan sware familyal. Ou gen dwa pran kèk minit pou w li ak diskite sou yon atik ki nan revi Liahona, Zanmi an, oswa Pou Fòs Jèn yo. Sa kapab yon moman pou nou gade videyo Legliz yo epi diskite sou yo tou. Oubyen ou kapab li yon diskou konferans jeneral, li ekriti, oswa diskite sou lekti yo bay pou semèn nan, nan Vini, Suiv Mwen an.
Foto timoun k ap fè bonbon pa Michelle Loynes
Patisipasyon Familyal
Timoun yo kapab patisipe nan sware familyal la. Yo kapab ede planifye aktivite, priye, oswa chwazi ak dirije chante yo. Yo kapab menm anseye leson. Avan sware familyal la, ou kapab ede pitit ou a li yon istwa nan revi Zanmi an oubyen nan istwa biblik li prefere yo. Apre sa, timoun nan kapab rakonte fanmi an istwa sa a kòm leson an. Anpil timoun renmen jwe wòl sou istwa ki nan ekriti yo pou sware familyal. Kite timoun ki pi gran yo planifye leson an oubyen chwazi yon diskou konferans jeneral yo ta renmen li. Epi fè yo gide diskisyon an.
Aktivite
Anpil fanmi pran plezi nan fè aktivite kòm yon pati nan sware familyal la. Aktivite ki fèt anndan yo enkli jwe jwèt, fè travay atizanal, oubyen fè manje ansanm.
Pou aktivite ki fèt deyò yo, ou kapab al fè yon ti mache, ale nan yon randone an fanmi, oswa jwe yon jwèt espòtif ansanm deyò. Chèche yon aktivite tout manm nan fanmi an kapab fè, epi amize nou ansanm. Evite moman konpetisyon ki ka fè Sentespri a ekate.
Sèvis
Sware familyal se yon bon moman pou fanmi sèvi lòt moun. Ou ta gen dwa, paregzanp, ede kèk vwazen ki aje, sèvi manje nan yon sant pou sanzabri, ekri misyonè yo, oubyen ranmase fatra.
© 2022 pa Intellectual Reserve, Inc. Tout dwa rezève. Enprime nan Etazini Damerik. Apwobasyon anglè: 6/19. Apwobasyon tradiksyon: 6/19. Tradiksyon Monthly Liahona Message, August 2022. Haitian Creole. 18316 036