Mukenji wa ku Ngondo wa Liahona Ngondo wa Muanda Mukulu 2022

Dilolu dia ku Nzubu Ntshinyi?

mamu, tatu ne muana wa nsongakaji basomba pambelu

Dilolu dia ku nzubu didi diba tshipesha dîku mu lumingu bua kukunguila. Mu diba edi, nudi mua “kulonga lumu luimpa, kukankamika bujadiki, kuibaka bobumue ne disanka pamue” (General Handbook: Serving in The Church of Jesus Christ of Latter-day Saints, 2.2.4, ChurchofJesusChrist.org). Dilolu dia ku nzubu didi dishilangana bilondeshila ku dîku. Kadi kipatshila nka kuangata diba edi bua kusemena pabuipi ne Musungidi.

Kudilongolola

Ela meji ku tshibilu tshidi dîku dieba disankila ne tshiena bualu tshia lumu luimpa tshinudi basua kulejangana ne kulonga pamue. Kabidi, sungula dituku ne diba lumingu lonso didi bidimba bia dîku mua kututakena. Ekelezia udi ukankamika bidimba bua bienza dilolu dia ku nzubu mu Dimua dilolu. Kadi mêku adi mua kututakena pikalabi bikumbana bua bonso.

dîku didi disambila

Disambila

Mêku abungi adi abanga ne ajikija dilolu dia ku nzubu ne disambila. Didi dibikila Nyuma wa Tshijila mu nzubu wabu. Dilolu dia ku nzubu tshidi diba dimpa bua bana ne bakola balonga bua kusambila mu tusumbu tukesa.

Musambu

Mêku abungi adi kabidi ne musambu wa dikangula ne dikanga nawu. Badi basungula nangananga musambu wa mukanda wa Misambu anyi mu wa Misambu ya Bana. Ekelezia udi ne misambu mikuata pa piano mu music.ChurchofJesusChrist.org. Nudi mua kumona kabidi video ya Chœur du Tabernacle wa Temple Square. Kuimba mu dilolu dia ku nzubu didi diambuluisha bidimba bua bilonga misambu idi imbibua mu ekelezia.

Dilongesha

Ekelezia udi ne bintu bia bungi bidi mua kuambuluisha bua kuenza dilolu dia ku nzubu. Nudi mua kuangata minuta mikesa bua kubala ne kulejangana tunungu tudi mu Liahona, Mulunda, anyi Bua Dikankamika dia Bansonga. Tshidi mua kuikala kabidi diba dia kumona ne kulejangana video ya ekelezia. Anyi nudi mua kubala muyuki wa ku mpungilu munena, kubala mifundu, anyi kulejangana ku dibala dia mu lumingu mu Luaku Undonda.

bana benza biscuite

Photo ya bana benza biscuite kudi Michelle Loynes

Didibuika dia Dîku

Bana badi mua kubuela mu dilolu dia ku nzubu. Badi mua kuambuluisha bua kulongolola bibilu, kusambila, anyi kusungula ne kulombola misambu. Badi mua kulongesha malongesha. Kumpala kua dilolu dia ku nzubu, udi mua kuambuluishi muaneba bua kubala muyuki mu makazina Mulunda anyi mufundu munanga. Muana udi mua kuakula muyuki ewu mu dîku bu dilongesha. Bana babungi kabidi mbasua kuakula miyuki ya mu mifundu mu dilolu dia ku nzubu. Lekela bana badi batantamana balongolola dilongesha anyi basungula muyuki wa ku mpungilu munena udibu basua kubala. Pashisha balomba bua balombola dilejangana.

Bibilu

Mêku abungi adi asanka ne kuenza bibilu bu tshitupa tshia dololu dia ku nzubu. Bibilu bia munda bidi mua kuikala manayi, midimu ya bianza, kuipika pamue.

Bua bibilu bia patoka nudi mua kuenda pamua, kuiya ku lepa ne dîku anyi kuenza dinaya dia patoka pamua. Peta tshibilu tshidi bidimba bionso mua kuenza ne nayayi pamue. Epukayi bia kupitangana bidi mua kupula buludiki bua Nyuma

Disadila

Dilolu dia ku nzubu didi diba bua dîku disadila bakuabu. Udi mua kuambuluisha bena mutumba bakola, kufila biakudia kudi bena tshimuangi, kufundila bena bukenji, anyi kumbusha bukoya tshilejelu.

Biambuluishi

• Mifundu

• Miyuki ya mpungilu munena

• Ngenyi ya dilonga dia mu dîku mu Luaku Undonda—Bua Bantu ne Mêku

• Liahona makazina

• Bua Dikankamika dia Bansonga makazina

• Mulunda makazina

• Tshitupa tshia Lumu luimpa mu bikandakanda mu ChurchofJesusChrist.org

• Mukanda wa Misambu ya Bana

• Muimanyinyi wa Ekelezia wa Yezu Kilisto wa Bansantu ba Matuku a Ndekelu

Biwikala dijinga ne diambuluisha pa bulongolodi bua dilolu dia mu dîku, udi mua kukonka ngenyi kudi bana betu baluma ne bakaji bakubi mu tshikongu anyi ditamba.

© 2022 kudi Intellectual Reserve, Inc. All rights reserved. Mupatula mu USA. Dianyisha mu Angele: 6/19. Dianyisha dia dikudimuna: 6/19. Dikudimuna dia Monthly Liahona Message, August 2022. Tshiluba. 15056 760