“Inou Sarawi Potopot,” Liahona, Oakotohpe 2022.
Padahk en Sounpwong kan Liahona Oakotohpe 2022
Inou Sarawi Potopot
Irail kan koaros me wiadahr arail inou sarawi rehn Koht alehdier soangen limpoak oh mahk kesempwal ehu.
Kaun Sises Krais, sang Del Parson
Nan sampah wet me ohkilahr mawin kan oh rohngen mawin kan, anahnepen me mehlelo, kamaraihn, oh limpoak mehlel en Sises Krais me inenen laud mehlel. Rongamwahu en Sises Krais me ienen lingan, oh kitail ahniki kapai en onopki oh momourki nin duwen ehu ehu mahsen kan. Kitail kin kapingki atail ansou mwahu kan en kin ehukihwei—ni atail kin kadehdehki duwen me mehlel kan ni wasah kan koaros me kitail kin mih ie.
I kin kalapw patohwan duwen kesempwalpen en Aprahm inou sarawi oh kapokonpenehn Israel. Ni ansou me kitail alehda rongamwahuo oh pepdaisla, kitail kin alehda mwahr sarawi en Sises Krais. Pepdais iei wenihmw en ahlo me kahluwaikitailahng inou kan koaros me Kauno ketkiheng Aprahm, Aisek, Seikop, oh sapwellimerailko nan mweihn kawaho.1
“Inou sarawi kapw oh kohkohlahte”2 Doctrine and Covenants 132:6 oh inou sarawi en Aprahm ira duwepene—mih ni soangen wiepen koasoi riau duwen inou en Koht ah wiawihda ong ohl en sampah oh lih en sampah nan ansou riau me sohte duwepene.
Lepin mahsen me inda kohkohlahte kawehweh me inou sarawi wet e miehierte mwohn poahson en sampah! Pilahn wet wiawihdahier nan Mihting en Kaunsel Lap Nanleng me iangahki duwen kitail koaros atail pahn lekdeklahsang mwohn sihlangin Koht. Ahpw, Koht inouki me E pahn ketin ketkihda Sounkomour men me pahn powehdi kahpwal kan koaros en Pwupilau. Koht mahsanieng Adam mwurin ah pepdaisla:
Iei komwi mwurin ih me sohte mie tepin rahn akan de imwin sounpar akan, sang ni mehkoaros kohkohlahte lel ni mehkoaros kohkohlahte.
Kilang, komwi me ketket loaleiet, ieros en Koht; oh me pahn wiahla ai tungoal kan koaros Moses 6:67-68.
Adam oh Ihp alehda tiahk sarawi en pepdais oh tapiada en wia ehu rehn Koht. Ira pidolongehr nan ahl en inouo.
Ni ansou me komwi oh ngei pil pidolongehngehr nan ahlo, kitail aledahr ehu ahl en mour kapw. Oh ni ansouo me kitail tapiada atail ehuieng Koht me ketkiheng Ih en kak kapaikitailda oh wekidala atail mour. Ahl en inouo kin kapwureikitailahng Ih. Ma kitail pahn mweidehng Koht en kaunda atail mour, inou sarawio pahn kahluwaikitail en karaniala Ih ansou koaros. Inou sarawi koaros kin tengetengpene. Irail wiahda ehupene ehu me pahn teng kohkohlahte.
Limpoak oh Mahk Kesempwal Ehu
Ni ahnsou kitail wiahda inou sarawi ehu rehn Koht, kitail mweselsang momour en sampah kohkohlahte. Koht sohte pahn likidmeliehla Sapwellime ehuiong irail kan me nantiheng en tengedi Reh. Ni mehlel, irail kan koaros me wiadahr arail inou ehng Koht alehdier soangen limpoak oh mahk kesempwal ehu. Nan mahsen en Ipru, limpoak en inou sarawi wet kin kadaniki hesed (חֶסֶד).3
Hesed sohte kawewehpe me mih ni lokaiahn Wai. Irail sounkaweweh kan en Pwuhk Sarawi en King James pil ahniki kahpwal en kak kawewehdi 9hesed0 kadek oh limpoak ni lokaiahn Wai. Irail kalapw pilada “limpoak kadek.” Met me mwur karanih ahpw kaidehn e mih ni kawewehpe koaros en (hesed) kadek oh limpoak. Ekei pil kaweweh kan pil soang en inda, me duwehte “mahk” oh “kalinganpe.” Kadek oh Limpoak wia lepin mahsen kesempwal ehu me kaweweh duwen inou sarawi ehu en nan pwungen riemen me katengtengkipene mehlel oh pwoson ong emen emen.
Kapwopwoud en mour soutik wia inou sarawi kesempwal ehu ong nan pwungen riemen. Ohl oh lih pwopwoud ehu wiahda inou sarawi ehu rehn Koht oh ong emen emen ira en mehlelpene oh ahniki pwoson.
Kadek oh Limpoak iei soangen limpoak oh mahk kesempwal ehu me Koht kin ketin ahniki pepephm ong oh kin kadaiewei rehn irail kan me wiadahr inou sarawi ong Ih. Oh kitail kin kehn oh pil kapwurelahng kadek oh limpoak Reh.
Ni ahnsou me komwi oh ngehi wiadahr atail inou sarawi rehn Koht, nanpwungen kitail oh Ih kin kerenpene sang ni tepin atail wiahda inou sarawio. Met kitail katengtengpenehr.
Kilel sang Jerry L. Garns
Pwehki Koht ahniki hesed ong irailko me wiadahr arail inou sarawi ong Ih, E kin ketin poakoahng irail E pahn ketin wenla mwowe sewesewesei irail oh ketkihong irail ahnsou mwahu kan en wekila. E pahn ketin kin mahkehng irail ni ahnsou me irail pahn kin koluhla. Oh ma irail pahn luwetala, E pahn kin ketin sewesei irail en pwurehng diar ahlo kolahng Ih.
Ni ahnsou me komwi oh ngei wiadahr atail inou sarawi rehn Koht, nanpwungen kitail oh Ih kin kerenpene sang ni tepin atail wiahda atail inou sarawio. Met kitail katengtengpenehr. Pwehki atail inou sarawi kan rehn Koht, E sohte pahn kin ketin pwangahkihda sewesei kitail, oh sohte pahn kin ketin pwangahkihda Sapwellime limpoak en kanangamah ong kitail. Emen emen kitail mie dowetail kesempwal nan Sapwellimen Koht mongiong. E ahniki lapalahn koapwoaroapwoar ong kitail.
Kumwail ese duwen poahngok en kawaho me Kauno ketkihong Soukohp Joseph Smith. E kohda sang ni kaudiahl. Kauno ketin mahsaniong Joseph me inou wet iei pil ong komwi, pwehki komwi iei kadaudok en Abram, oh inouo e wiawihda ong Abram Doctrine and Covenants 132:31.
Eri, inou sarawi kohkohla wet e kopwurupwurdo ni ah wia kisehn Kopwurupwurdohn rongamwahu unsek keieu laud. Medewe ire wet! Inou sarawi en kapwopwoud me kin wiawihda nan tehnpas sarawi pirapirlahng inou sarawi en Abram. Nan tehnpas sarawio pwopwoud ehu kin kapehse ong kapai kan koaros me kaunopadahr ong irail me pwoson kan en Abram, Aisek, oh Seikop.
Nin duwen me Adam pil wiahier, komwi oh ngei pil pidolongehr nan ahl en inouo ni ansou en pepdaiso. Oh kitail ahpw pil kaimwsekihala ni ahnsou me kitail pidolongehng nan tehnpas sarawi. Kapai kan en inou sarawi en Abram kin alahlda nan tehnpas sarawi kan. Kapai pwukat kin mweidohng kitail, ni ahnsou en iasadau, ong ni kapai en sohsohki sehr en me lapalap akan, wehi kan, manaman akan, sapwasapw akan, oh kehkehlik kan ong atail sepwilda oh lingan nan mehkoaros Doctrine and Covenants 132:19.4
Nan keimwseklahn ire en Kadehde Mering, kitail wadek en Malakai ah inou me Elaisa pah “wekidala mongiong en pahpah kan ong serih kan, oh mohngiong en serih kan ong arail pahpah kan” (Malakai 4:6). Nan mweihn Israelo, e kasalehda pahpah kan me iangahki pahpa Abram, Aisek, oh Seikop. Inou wet sansal mwahu ni ansou me kitail pahn wadek sang ni ire ehu me sang Joseph Smith me Moroni wadekada me koasoia: Ih [Elaisa] pahn padokedi nan mohngiong en serih kan inou kan me wiawihda ong pahpah kan, oh mohngiong en serih kan pahn pirekekiong arail pahpah kan (Joseph Smith—History 1:39). Pahpah kau iei me iangahki Abram, Aisek, oh Seikop. (Kilang Doctrine and Covenants 27:9-10.)
Irailko me wiahda inou sarawi kan oh kapwaiada wie kolokol alehier inou en mour soutik oh lapalapala. Sises Krais me wia poahson en inou sarawih kau.
Ire pisetik sang Christ and the Rich Young Ruler, sang Heinrich Hofmann
Sises Krais: Me wia Werengen Inou Sarawio
Sapwellimen Sounkomouro tomw en tohnmetei me kahrehda Sahmo a kak ketin kapwaiada Sapwellime inou kan me wiawihda ong Sapwellime serih kan. Pwehki Sises Krais iei “me ahl, me mehlel, oh mour,” oh pil idawehnla oh inda me “sohte me kak kolahng Semehu, ma soh [Ih]” (Sohn14:6). Pweidahn inou en Abram tepida sansalada pwehki sang ni Tomw en atail Sounkomouro, Kaun Sises Krais. Sises Krais e mih nan werengen inou sarawi en Abram.
Kadehde Mering sohte wiahte pwuhk en iren pwuhk sarawih kan; e pil wia pwuhk en poadoapoad. Kumwail tamataman wadawad me pid duwen kapwopwoud en Sarai oh Abram. Pwehki sohte neira seri, Sarai kiheng nah sounsawaso, Hagar, pwehn pil wia en Abram pwoud, sang ni kaweid en Kauno. Hagar naitikihdi Ismail.5 Abram poakoahng Ismail, ahpw kaidehn ih me wia seri me inouo pahn kohieng. (Kilang Senesis 11:29-30; 16:1, 3, 11; Doctrine and Covenants 132:34.)
Ni ah wia kapai ehu sang Koht, oh pasepeng ong en Sarai pwoson,6 e ahpw liseianda ni eh sounpar mahlahr pwe inouo en kak pweida sapwellime pwutak, Aisek (kilang Senesis 17:19). E ipwidieng nan inouo.
Koht ketkihong Sarai oh Abram ahd kapw ekei—Sara oh Eipraam (kilang Senesis 17:5, 15. Kesepwildahn ahd pwukat kilelehdier tepin mour kapw oh seilok kapw ehu ong peneinei wet.
Eipraam poakoahng Ismail oh Aisek koaros. Koht mahsaniheng Eipraam me Ismail pahn kaparaparala oh wiahla wehi laud ehu (kilgang Senesis 17:20). Pil ni ansouohte, Koht kasalehda ni sansal me inou sarawi soutiko pahn wiawihda sang Aisek (kilang Genesis 17:19).
Koaros me pahn alehda rongamwahuo pahn wiahla keinek en Eipraam. Nan Kalehsia kitail wadek:
“Pwe kumwail papidaislahr ni miniminiong Krais oh alieir mouren Krais.
“… Kumwail koaros wia ehu rehng Krais Sises.
“Oh ma kumwail sapwellimen Krais, eri kumwail kadaudok en Eipraam, oh kumwail pahn ale dahme Koht ketin inoukidahr” (Kalehsia 3:27-29).
Oh, kitail kak wiahla soun sohsoh kan en inouo sang ni ipwikihdi de sang ni pwekpwekda.
Ni ansou me kitail wiahda inou sarawi rehn Koht, kitail kohlahsang nan wasa sohte mwahu kohkohlahte. Koht sohte pahn pohnsehsehla Sapwellime ehupene ong irail kan me nantihong en ehuieng Ih.
Aisek oh neihn Rebeka pwutak Seikop koaros ipwidieng nan inou sarawio. Ni ansouohte, e pilada en pidolongehng sang ni peihn ah pilipil. Ni amwail ese, eden Seikop wekidekla oh uhd adanikihla Israel (kilangSenesis 32:28), me wewehki “mweidehng Kauno en kaunda” de “emen me mweidehng Kauno en kaunda ah mour.”7
Nan Exodus kitail wadek me “Koht tamatamante sapwellime inou sarawi ong Eipraam, ong Aisek, oh ong Seikop” (Eksodus 2:24). Koht mahsanihong seri en Israel kan, “Eri, ma kumwail pahn peikiong ie oh dadaur ei inou, kumwail pahn wiahla nei aramas kesempwal” (Eksodus 19:5).
Lepin mahsen “kesempwal” kawewehdihsang nan Ipru segullah, wewehki soahng ehu me keieu kesempwal sang mehkoaros— “dipisou kesempwal.”8
Pwuhk en Dedironomi pil kosoia duwen kesempwalpen inouo. Soukohp akan en Kadehde Kapw pil mwahngih duwen inou sarawi wet. Mwurin Peter ah kamwauwiala ohl mwoatoro pohn kehndakehn tehnpas sarawio, e ahpw wia padahk ong irail kan me kilikilang duwen Sises. Peter mahsanih, “Eri, Koht en Eipraam, Aisek, oh Seikop, Koht en atail pahpa kahlap ako, iei ih me ketikihongehr sapwellime manaman lingan ong sapwellime Ieros Sises” (Wiewiah Kan 3:13).
Peter ahpw kaimwsengkihla sapwellime padahko ni ah patohwanehng sapwellime pokono, “Kumwail me wia sapwellimen soukohp akan serih kan, oh serihn inou me Koht ketkihong atail pahpahko, mahsanihong Eipraam, Oh kadaudokomw koaros pohn sampah pahn kapaida” (Wiewiah Kan 3:25). Peter mahsanihong irail ni sansal me kisehn sapwellimen Krais doadoahk de misin iei en kapwaiada sapwellimen Koht inouo.
Kauno ketkihong soangen padahkohte rehn irail aramas en Amerika en kawahuo. Wasahu, Krais mwurin ah iasadahu mahsanihong aramasoko ihs udahn irail. E mahsanih:
“Kumwail iei serihn soukohp akan; oh kumwail me wia towehn Israel; oh kumwail me wia serihn inou me Sahmo ketkihong amwail pahpahko, masahnihong Eipraam: Oh kadaudokomw kan koaros pohn sampah pahn kapaida.
“Sahmo ni eh apwaliehda mahs, oh kadariehdo pwe ien kapaikumwailda en sohpeisang amwail kahpwal kan; oh met me wiawi pwehki kumwail wia serihn inouo” 3 Nephi 20:25-26).
Kumwail kak kilang wen kesempwal en met? Irail kan me kin kolokol arail inou sarawih kan rehn Koht pahn wiahla aramas ekei me pahn mengei en kak powehdi dihp akan. Irail kan me kin kolokol arail inou sarawih kan pahn ahniki kehlail en kak kapwure wiewiahn sampah.
Irail kan me kin kolokol arail inou sarawih kan rehn Koht pahn wiahla aramas ekei me pahn mengei en kak powehdi dihp akan. Irail kan me kin kolokol arail inou sarawih kan pahn ahniki kehlail en kak kapwure wiewiahn sampah.
Doadoahk en Misineri: Ehukihwei duwen Inou Sarawio
Kauno ketin poahngoki me kitail en padahngkiwei rongamwahuo oh ehukihwehng aramas koaros duwen inou sarawio. Ihme kahrehda miehki neitail misinerih kan. E ketin kupwurki ong emen emen Sapwellime serih kan en ahniki ansou mwahu en pilada rongamwahu en Sounkomouro oh nantihong mihmihte pohn ahl en inouo. Koht kupwurki en ehukihong aramas koaros inouo me E ketin wiahiong Eipraam mahso.
Oh doadoahk en misineri me keieu kesempwal ong kapokonpenehn Israel. Kapokonpene wet me wia keieu doadoahk kesempwal en wiawi pohn sampah rahnwet. Sohte mehkot me pahn kak karasahieng wen laudpe. Sohte mehkot me pahn kak karasahieng wen kesempwal. Sapwellimen Kauno misinerih kan—Sapwellime tohnpadahk kan—koaros ehukipene doadoahk keieu apwal laud ehu, kahrepe keieu laud, doadoahk keieu laud pohn sampah rahnwet.
Ahpw miehte soahng kei—me tohtohie. Mie lapalahn anahn ehu en ehukiwei rongamwahuo ong aramas akan me mih palio kadingo. Koht kupwurki koaros, pali riau koaros en kadingo, en iang perepereniki kapai kan en Sapwellime inouo. Ahl en inouo e ritidang koaros. Se peki ni karakarahk ong koaros en iang kiht alu pohn ahlo. Sohte doadoahk ehu me sohte kin patehng ansou koaros. Pwe “Kauno kin ketin mahkong koaros me kin, ni saledek en arail mongiong kan, me kin lukweriong ih me sarawi” (Helaman 3:27).
Pwehki Melkesidik Prihsduhd kopwurupwurdohr, ohl oh lih akan me kin kolokol arail inou sarawih kan alehier “kapai en palingehn koaros” en rongamwahuo (Doctrine and Covenants 107:18; ire kesempwal kapatpatieng).
Ni kasarawihn Tehnpas Sarawi en Kirtland nan 1836, pahn kaweihdpen Kauno, Elaisa ahpw pwaredo. Sapwellime kahrepe? “Pwehn wekidohng serih kan rehn papah kan” (Doctrine and Covenants 110:15). Elias pil pwaredo. Sapwellime kahrepe? Pwehn ehukiheng Joseph Smith oh Oliver Cowdery “me duwen koasondi en rongamwahu en Eipraam, e mahsanih me sang kitail oh kadaudokatail koaros me pahn kohdo mwurin kitail pahn anahne en kapaida” (Doctrine and Covenants 110:12). Oh Kaun Lapalapo ahpw ketkihda mweimwei ong Joseph Smith oh Oliver Cowdery mweimwie en prihsduhd oh pwuhng en patohwanda kapai kan en inou en Eirpraam ong mehtei kan.9
Nan Mwomwohdiso, kitail kin seilok pohn ahl en inouo kak sang emen emente wia peihn ah oh de pil wia pokon ehu. Duwehte kapwopwoud kan oh peneinei kan ni arail kin ehukipene soangen miniminpene ehu me kin kasalehda songen limpoak kesempwal ehu, me duwehte kapwopwoud kapw ehu me wiawihda ni ansou me kitail kin katengeikitailpene sang ni inou sarawio me inenlahngete rehn atail Koht!
Met pahn kak kasalehda dahme Nihpai kaweweh ni ansou me Koht mahsanih “poakoahng irailko me wiahki ih arail Koht” (1 Nephi 17:40). Iei met me kahrehda, ni ah wia kisehn inou sarawio, soangen mahk oh limpoak kesempwal ehu—de hesed—e mie ong koaros me pidolongehng nan katengtengpene oh limpoakpene wet rehn Koht, oh pil “ong irail kid kei me pahn kohdo mwuhr kan” (Dedironomi 7:9).
Wiahda inou sarawi rehn Koht pahn wekidala atail ehuieng Ih kohkohlahte. E pahn kapaiai kitail kihda diren limpoak oh mahk.10 E pahn mie lupwe ong ihs kitail oh mwomwen Koht ah pahn sewesei kitail en wiahla dahme kitail kak wiahla. Kitail pil alehier inouo me kitail, pil, kak wia aramas “kelik kesempwal” Reh Melkahka Kan 135:4).
Inou kan oh Kapai kan
Irail kan me wiahda inou sarawi kan oh kolokol irail alehdier inou en mour soutik oh lapalapala, “me wia kisakis keieu laud nan kisakis koaros en Koht” Doctrine and Covenants 14:7). Sises Krais me wia samworo en inou lap ko (kilang Ipru 7:22; 8:6). Irail me kin kolokol inou lapo kin poakoahng Koht oh mweidohng Ih en kaunda mehkoaros nan arail mour oh wiahkihla Ih me keieu kehlail en katakatanga arail mour.
Nan atail ansou pwukat kitail ahniki kapai en alehda kapai kan en peitrakel oh esehla mwomwen atail kodokodok ong peitriak en mahsoko. Kapai pwuko pil kasalehieng kitail dahme pahn wiawi mwohtail.
Pwehki atail inou lap ong Koht, E sohte pahn pwangahkihda sewesei kitail, oh kitail sohte pahn pwangahkihda awih Sapwellime mahk ong kitail.
Lovest Thou Me More Than These? sang David Lindsley
Atail pwukoah en inou lap en Israel iei en tehk mwahu me toweh kan koaros en Mwomwohdiso en wewehki popohl oh kapai kan me mie ong ni wiahda inou lap kan rehn Koht. E wia ehu pwukoah en koangoangoahki koaros me kolokol inou lapo, ohl oh lih, pwutak oh serepein, en ehukiwei rongamwahuo rehn irail kan me inangiher oh men rong. E pil wia pwukoah ehu en utungada oh koangoangoahki misineri kan, me pekederlahr oh wa duwen kaweid kan en pepdais oh sawas en kapokonpenehn Israel, pwe kitail koaros en wia sapwellimen Koht aramas oh E pahn ketin wia atail Koht (kilang Doctrine and Covenants 42:9).
Ohl koaros oh lih koaros me iang patehng wia doadoahk en tiahk sarawih kan en prihsduhd oh me wiahda oh kolokol inou sarawih kan rehn Koht ahnikiher mweimwei en ale manaman sang Koht. Kitail alehda mwaren Kauno pohn emen emen kitail. Kitail pil alehda Mware pohn kitail aramas akan. E kesempwal ong ni duwen doadoahngki pwungen eden Mwomwohdiso en Sises Krais en Souleng en Imwin Rahn-akan ni eh wia mehkot keieu kesempwal ehu me kitail aramas pahn alehda Mware pohtail. Ni mehlelo, ehu ehu mwekid kan koaros en Mwomwohdiso en Sises Krais en Souleng en Imwin Rahn-akan oh toweh kan e wia kasalepen Koht hesed.
Dahme karehda Israel mwerkipeseng? Pwehki aramasoko kawehla kosoned akan oh kemehla soukohp akan. Sahm me limpoak oh ni ansouohte pahtoula ahpw kasalehda ah pasapeng sang ni eh ketin kamwarak irail peseng wasa doh kan oh tehlap kan.11
Ahpw, E ketin kamwarak irail pesengki inou ehu me ehu rahn Israel pahn pwurehng kapokonpene Reh.
Keinek en Sudah kohieng irail pwukoah en kaunopada sampah ong ni keieu en ketdohn Kauno. Sang nan keineko, Mary ahpw alehdi pwukoah en wia nohnohn Ieros en Koht.
Keinek en Sosep, sang ih oh neihn Asened pwutak, Ephraim oh Manasseh (kilang Senesis 41:50-52; 46:20), kohieng irail pwukoah en kaweihd kapokonpenehn Israel, pwehn kaunopada sampah ong Ketido Keriau en Kauno.
Nan songen ansou me miehte songen limpoak de hesed, e sansal mwahu me Koht kupwurki kapokonpenehn Israel. Iei Ih me Samatail Nanleng. E kupwurki emen emen Sapwellime serih kan—ni pali koaros en kadingo—en rong padahk en rongamwahu en Sises Krais kopwurupwurdou.
Ehu Ahl en Limpoak
Ahl en inouo wia ahl en limpoak—me wia limpoak de hesed kaselel ehu, me mie limpoak en poakoahng oh sewese mehtei kan. Ahniki pepehm me limpoak me saledek oh mehn kakehlail. Popohl keieu laud me kumwail pahn ahnikihdi iei ansou me kumwail pahn direkihla limpoak ong Koht oh ong Sapwellime serih kan koaros.
Poakoahng Koht laudsang emen aramas de mehkot sohte lipilipil iei mwekid ehu me pahn wahdo popohl mehlel, kaloalamwahu, koapwoaroapwoar, oh popohl.
Ahl en inouo iei soahng koaros e poahsonkihda atail ehuiong Koht—atail limpoak de hesed ong Ih. Ni ansou me kitail pidolongehng nan inou ehu ong Koht, kitail wiahdahr inou lap ehu ong Ih me pahn kin ansou koaros kolokol Sapwellime mahsen. E pahn ketin wia soahng koaros me E pahn kak wia, ni E sohte pahn kedirapwa atail saledek en pilipil, pwehn sewesei kitail kolokol atail.
Pwuhk en Mormon tapihkihda oh keimwsengkihla audepeh kan en inou lap kohkohlahte wet. Sang ni daidel lel ni keimwseklahn kadehde en Mormon oh Moroni, Pwuhk en Mormon kasalehda ireh kan me doke inou lapo (kilang {Mormon 5:20; 9:37). “Pwuhk en Mormon eh pahn wiawihda e wia sain ehu ong sampah pwon me Kauno tapiadahr kapokonpene Israel oh kapwaiadahr inou kan me E ketin wiadahr ong Eipraam, Aisek, oh Seikop.” 12
Riei ohl oh lih oko, kitail alehier atail pwukoah nan ansou apwal kesempwal wet nan poadoapoad en sampah en padahkieng sampah duwen lingan oh manaman en inou lap kohkohlahteh. Samatail Nanleng likih kitail en wia pwukoah doadoahk laud wet.
Padahk wet pil wiawi nan mihting en kaun kan ni kapokon lap en Mahs 31, 2022.
© 2022 sang Intellectual Reserve, Inc. Kolokol pwuhng koaros Ntingda nan USA. Kamanaman ong ni lokaiahn Wai: 6/19. Kamanaman ong kawehwe: 6/19. Translation of Monthly Liahona Message, October 2022. Pohnpeian. 18317 885.