“Ahyɛmudzi a ɔwɔ hɔ Daapem no,” Liahona, Ɔbɛsɛ 2022.
Bosoom bosoom Liahona Amandzɛɛbɔ, Ɔbɛsɛ 2022
Ahyɛmudzi a ɔwɔ hɔ Daapem no
Hɔn a wɔnye Nyankopɔn edzi ahyɛmu nyina no wɔ ɔdɔ na ehumbɔbɔr soronko bi ho kwan.
Ewuradze Jesus Christ, Del Parson yɛɛ nsaano mfonyin no
Wiadze yi mu a akõkõekõ na ɔkõ ho nsɛm atsetseew mu yi, nokwar, kan na Jesus Christ no dɔ mapã no ho hia ayɛ kɛse kyɛn ber biara dze. Christ asɛmpa no yɛ enyimnyam, na ɔyɛ nhyira ma hɛn dɛ yesũa na yɛdze n’ahyɛdze no bɔ bra. Yedzi ehurusi wɔ hɛn kwan a yenya dze kyɛ—dze gye no nokwar ho dase beebiara a yɛwɔ no.
Maataa akasa afa Abraham Ahyɛmudzi no na Israel mboano ho nsɛm ho hia ohia tsitsir. Sɛ yefua asɛmpa no na wonuma hɛn a, yɛfa Jesus Christ ne dzin krɔnkrɔn no to hɛn do. Enuma no nye abobow a ogya hɛn ma yɛbɛyɛ afɛ-adzedzifo ma anohoba nyinara a Ewuradze dze maa Abraham, Isaac, Jacob, na hɔn asefo tsetseber no.1
“Ahyɛmudzi fofor a ɔwɔ hɔ daapem no”2 (Nkyerɛkyerɛ na Ahyɛmudzi 132:6) na Abraham Ahyɛmudzi tsitsir ara wɔyɛ adze kor—akwan ebien a wɔdze kã ahyɛmu a Nyankopɔn nye dasanyi, mbarimba na mbaa edzi wɔ mber nsonsonee mu.
Dzin tamsi daapem no kyerɛ dɛ iyi yɛ ahyɛmu a ɔwɔ hɔ ana wɔrotow wiadze ne fapem! Nhyehyɛɛ no wɔdze too hɔ wɔ Ɔsor Nhyiamu Soronko no ase a nna ntseasee okitsaa ara yie dɛ wobotwa hɛn efi Nyame n’enyim akyen kã ho. Naaso, Nyankopɔn bɔɔ anohoba dɛ Ɔbɛma Agyenkwa a Obedzi Asehwe no nsunsuando no do konyim no aba. Adam n’enuma ekyir no, Nyankopɔn see no dɛ:
“Ɔwo idzi onyia no a onnyi nda ahyɛse anaa mfe ewiei ne nhyehyɛɛ no do, fi mfesantsen nyina kesi mfesantsen nyina no.
“Hwɛ, ɔwo ayɛ kor wɔ mo mu, Nyankopɔn ne ba, ɔnam dɛm ntsi hɔn nyinara botum aabɛyɛ me mba” (Moses 6:67–68).
Adam na Eve gyee enuma ayɛdze no too mu na wɔhyɛɛ kwan a wɔnye Nyame bɛyɛ kor no ase. Nna wɔahɛn ahyɛmu anamɔn kwan no do.
Sɛ emi na ɔwo so yɛhɛn dɛm kwan no do a, yenya abrabɔ fofor. Yɛnam do nye Nyame nya nkitahodzi a ɔma No kwan ma Ohyira hɛn na Ɔsesa hɛn. Ahyɛmu anamɔn kwan no gya hɛn dze san kɔ Ne nkyɛn. Sɛ yɛma Nyame dzi nyim wɔ hɛn abrabɔ mu a, dɛm ahyɛmu no begya hɛn ma yɛbɛn no ara yie. Ahyɛmudzi nyina wɔ botae dɛ ɔkyekyer hɛn. Ɔyɛ nkitahodzi a ɔkɔ do daapem.
Ɔdɔ na Ehumbɔbɔr Soronko bi
Yɛnye Nyame dzi ahyɛmu ara pɛr a, yefi kwan no finimfin ngyinae afebɔɔ. Nyankopɔn renndan N’ekyir mma hɔn a wɔnye No akyekyer dɛm nkitahodzi no. Nokwar nsɛm, hɔn a wɔnye Nyankopɔn edzi ahyɛmu nyina no wɔ ɔdɔ na ehumbɔbɔr soronko bi ho kwan. Hebrew kasa mu no, dɛm ɔdɔ ahyɛmudzi yi wɔfrɛ no hesed (חֶסֶד).3
Hesed nnyi Ngyiresi Borɔfo nkyerɛasee papa. Hɔn a wɔkyerɛɛ Ɔhen James Bible Nwoma ase no hɔn ho kyer hɔn wɔ mbrɛ wɔbɛkyerɛ hesed ase wɔ Ngyiresi Borɔfo kasa mu. Wɔtaa dɛ wɔsan mu yi “adɔyɛ.” Iyi ne nsa kã kakra mbom ɔnnyɛ hesed ne nkyerɛasee nyina. Nkyerɛasee binom yɛɛ no, dɛ “ehumbɔbɔr” na “papayɛ.” Hesed yɛ asɛmfua soronko a ɔkyerɛkyerɛ ahyɛmu nkitahodzi a afã beenu no nyina dze nokwardzi kyekyer hɔnho.
Celestial awar yɛ dɛm ahyɛmu nkitahodzi no bi. Okun na ɔyer nye Nyankopɔn na wɔnye hɔnho dzi ahyɛmu dɛ wobedzi nokwar ama hɔnho.
Hesed yɛ ɔdɔ na ehumbɔbɔr soronko a Nyankopɔn tse ma hɔn a wɔnye No edzi ahyɛmu no na Ɔtserɛw mu kɔ hɔn do. Na hɛn so yɛdze hesed san ma No.
Emi na ɔwo yedzi kan nye Nyankopɔn edzi ahyɛmu no, hɛn nkitahodzi a yɛnye No wɔ no twe bɛn kyɛn yenndzii ahyɛmu no. Afei yɛakã abɔmu.
Mfonyin a Jerry L. Garns twae
Osiandɛ Nyankopɔn wɔ hesed ma hɔn a wɔnye no edzi ahyɛmu no, Ɔbɔdɔ hɔn. Ɔbɔkɔ do nye hɔn ayɛ edwuma na Ɔama hɔn kwan a wɔdze bɛsesa. Ɔdze bɛkyɛ hɔn sɛ wonu hɔnho a. Na sɛ wɔman a, Ɔbɔboa hɔn ma woehu hɔn kwan asan aba Ne nkyɛn.
Emi na ɔwo yedzi kan nye Nyankopɔn edzi ahyɛmu no, hɛn nkitahodzi a yɛnye No wɔ no twe bɛn kyɛn yenndzii ahyɛmu no. Afei yɛakã abɔmu. Osian hɛn ahyɛmu a yɛnye Nyame edzi ntsi, Ɔnnkɛberɛ dabiara da wɔ No mbɔdzembɔ mu dɛ Ɔbɔboa hɛn, na N’ehumbɔbɔr abotar a Ɔwɔ ma hɛn no nnkɛpa dabiara da. Hɛn mu kor biara da bea soronko wɔ Nyankopɔn n’akoma mu. Enyidado kɛse na Ɔwɔ ma hɛn.
Hom nyim mpaamukã a ɔayɛ atsenkã a Ewuradze dze maa Nkɔnhyɛnyi Joseph Smith. Ɔnam nyikyerɛ mu baa. Ewuradze see Joseph dɛ “Dɛm anohoba yi yɛ hom so homdze, osiandɛ hom yɛ Abraham dze, na anohoba no wɔbɔe maa Abraham” Nkyerɛkyerɛ na Ahyɛmudzi 132:31).
Dɛm ntsi, ahyɛmudzi a ɔwɔ hɔ daapem yi wɔdze asan ananmu aba dɛ asɛmpa Nsanananmu wɔ ne mãhyɛ mu. Dwen ho! Awar ahyɛmu a wodzi no wɔ temple mu no fam Abraham ahyɛmudzi no ho akwantsen. Temple mu no wɔma awarfo nhyira nyinara a wɔdze esie ama Abraham, Isaac, na Jacob asefo no ne nyienyim.
Dɛ mbrɛ Adam yɛɛ no, emi na ɔwo yɛhɛɛn ahyɛmu anamɔn kwan wɔ enuma mu dɛ ankorankor. Nkyii yɛhɛn mu emu wɔ Temple mu. Abraham ahyɛmudzi mu nhyira no wɔdze ma wɔ temple krɔnkrɔn mu. Nhyira yinom ma hɛn kwan ma, yɛasoɛr efi owu mu “[ye]benya ahengua, ahenman, mpanyindzi, na tumdzi, ahendzi, akɔ [hɛn] ‘nkwagye ntowdo na enyimnyam mu wɔ ndzɛmba nyina mu’[Nkyerɛkyerɛ na Ahyɛmudzi 132:19.].” 4
Asɛm a wɔakyerɛw dze ewie Ahyɛmu Dadaw mu no, yɛkenkan Malachi n’anohoba dɛ Elijah “bɛdandan egyanom hɔn akoma aba mba no do, na mba hɔn akoma aba hɔn egyanom do” (Malachi 4:6). Tsetse Israel no, sɛ wɔkã egyanom hɔnho asɛm a nkyɛ egyanom Abraham, Isaac, na Jacob bɛkã ho. Anohoba yi wɔakyerɛ mu pefee sɛ yɛkenkan nyiyimu bi so a Moroni serɛɛ kãa kyerɛ Nkɔnhyɛnyi Joseph Smith: “Na [Elijah] dze anohoba a wɔdze bɔɔ egyanom no bɛhyɛ mba hɔn akoma mu, na mba no hɔn akoma bɛdan akɔ hɔn egyanom hɔ.Joseph Smith—Abakɔsɛm 1:39. Dɛm egyanom no, ampaara Abraham, Isaac, na Jacob kã ho. (Hwɛ Nkyerɛkyerɛ na Ahyɛmudzi 27:9–10.)
Hɔn a wodzi ahyɛmu krɔnkrɔn na wosie no wɔdze onnyiewiei nkwa na nkwagye ntowdo bɔ hɔn anohoba. Jesus Christ nye dɛm ahyɛmudzi horow ne ntamugyinafo.
Christ na Aberantsɛ Ɔhwɛfo Ɔdzefo, a Heinrich Hofmann yɛɛ nsaano mfonyin pefee
Jesus Christ: Ahyɛmu no ne Fapem
Agyenkwa no werdam afɔrbɔ no maa Egya no tumii hyɛɛ N’anohoba horow a Ɔdze abɔ Ne mba no mã. Osiandɛ Jesus Christ nye “ɔkwan no, nye nokwar no, nye nkwa no” ntsi “obi mmba Egya no hɔ, gyedɛ ɔnam [No] do” (John 14:6) Abraham ahyɛmudzi no ne mãhyɛ no tum ba mu osian hɛn Agyenkwa, Ewuradze Jesus Christ no No Werdambɔ no ntsi. Jesus Christ nye Abraham Ahyɛmudzi no ne fapem.
Ahyɛmu Dadaw no nnyɛ kyerɛwsɛm nwoma nko; ɔyɛ abakɔsɛm nwoma so. Hom bɛkãa dɛ hom kenkaan Sarai na Abram hɔn awar ho nsɛm. Osiandɛ nna wɔnnwoo ba ntsi, Sarai dze n’afonabaa, Hagar, maa dɛ ɔmbɛyɛ Abram ne yer so, dɛ ma Ewuradze kyerɛɛ no ara. Hagar woo Ishmael.5 Abram dɔɔ Ishmael, naaso nna ɔnnyɛ abofra no a ahyɛmu no bodua no mu. (Hwɛ Genesis 11:29–30; 16:1, 3, 11; Nkyerɛkyerɛ na Ahyɛmudzi 132:34.)
Dɛ ɔyɛ nhyira a ofi Nyame hɔ, na Sarai ne gyedzi ho mbuae no,6 onyisɛɛn wɔ ne mpanyinyɛ mu ama ahyɛmu no edua ne babanyin, Isaac mu (hwɛ Genesis 17:19). Wɔwoo no wɔ ahyɛmudzi mu.
Nyankopɔn maa Sarai na Abram edzin afofor—Sarah na Abraham (hwɛ Genesis 17:5, 15). Dɛm edzin afofor ne mmae na ɔhyɛɛ abrabɔ fofor na nkrabea fofor ase maa ebusua yi.
Abraham dɔɔ Ishmael na Isaac beenu no nyina. Nyankopɔn kãa kyerɛɛ Abraham dɛ Ishmael ɔbɔdɔr mbordo na ɔabɛyɛ ɔman kɛse (hwɛ Genesis 17:20). Aber noara no, Nyankopɔn ma ɔdaa edzi pefee dɛ ahyɛmudzi a ɔwɔ hɔ daapem no wɔbɛkyekyer edua Isaac mu (hwɛ Genesis 17:19).
Hɔn a wɔgye asɛmpa no to mu no bɛyɛ Abraham asefo ne fã. Galatiafo nwoma mu no yɛkenkan dɛ:
“Hom mu dodow a woenuma hɔn akɔ Christ mu no wɔahyɛ Christ.
“… Hom nyina ayɛ kor wɔ Christ Jesus mu.
“Na sɛ hom yɛ Christ dze a, na hom yɛ Abraham asefo, na hom nam anohoba no do yɛ adzedzifo.” (Galatiafo 3:27–29).
Dɛm ntsi, yɛnam awoo do anaa abanyɛn do ba bɛyɛ ahyɛmu no mu adzedzifo.
Yɛnye Nyame dzi ahyɛmu ara pɛr a, yefi kwan no finimfin ngyinae afebɔɔ. Nyankopɔn renndan N’ekyir mma hɔn a wɔnye No akyekyer dɛm nkitahodzi no.
Isaac na Rebekah ne babanyin Jacob wɔwoo no wɔ ahyɛmudzi mu. Dza ɔkã ho no so, ɔsaan mu yii dɛ ɔbɛhɛn mu wɔ nankasa ne pɛ do. Dɛ mbrɛ hom nyim no, wɔsesaa Jacob ne dzin yɛɛ no Israel (hwɛ Genesis 32:28), asekyerɛ nye “ma Nyankopɔn ndzi nyim” anaa “obi a ɔnye Nyame dzi nyim.”7
Exodus nwoma mu no, yɛkenkan dɛ “na Nyankopɔn kaa n’ahyɛmu a ɔnye Abraham, nye Isaac, na ɔnye Jacob dzii” (Exodus 2:24). Nyankopɔn kãa kyerɛɛ Israel mba dɛ, “Sɛ hom betsie me ndze ara ampa, na woedzi m’ahyɛmu do a, ɔno dze hom bɛyɛ soronko egyapadze ama me” (Exodus 19:5).
Kasasin “soronko egyapadze: wɔkyerɛɛ ase fii Hebrew kasa segullah mu, a ɔkyerɛ adze a ɔsombo paapaapa—“egudze bi.”8
Deuteronomy nwoma no kã mbrɛ osi na ahyɛmu no ho hia. Asomafo a wɔwɔ Ahyɛmu Fofor mu no nna wonyim ahyɛmu yi. Peter saa obubuafo no yarba wɔ temple ntwerba do no, ɔkyerɛkyerɛɛ bɔhwɛadzefo Jesus no ho nsɛm. Peter see dɛ, “Abraham nye Isaac nye Jacob Nyankopɔn, hɛn egyanom hɔn Nyankopɔn na ɔahyɛ ne [Ba] Jesus enyimnyam” (Ndwuma 3:13).
Peter wiei n’asɛm kã a ɔsee n’etsiefo no dɛ, “Hom nye nkɔnhyɛfo nye ahyɛmu a Nyankopɔn nye hom egyanom dzii no mba, na ɔsee Abraham dɛ, W’asefo mu na wobehyira asaase do mbusua kuw nyina”(Ndwuma 3:25). Peter maa ɔdaa edzi pefee kyerɛɛ hɔn dɛ Christ no botae nye dɛ ɔbɛhyɛ Nyankopɔn n’ahyɛmu mã.
Ewuradze kãa asɛmpa a ɔtse dɛm kyerɛɛ tsetse Americafo. Hɔ no, Christ a wɔasoɛr fi ewufo mu no kãa nkorɔfo no hɔn nyimpa ban ankasa kyerɛɛ hɔn. Ɔkãa dɛ:
“Na hwɛ, hom nye nkɔnhyɛfo no hɔn mba; na hom nye Israel fifo no; na hom nye ahyɛmu no a Egya no nye hom egyanom dzii no, na ɔsee Abraham dɛ: W’asefo mu na wɔbehyira asaase ebusuafo nyinara.
“Na Egya no enyan me edzi kan aba hom hɔ, na ɔasoma me dɛ mebehyira hom na memma hom mu biara ndan mfi [n’]emumuyɛ ho; osiandɛ hom nye ahyɛmu mba no” (3 Nephi 20:25–26).
Ana hom hu iyi ho mfaso? Hɔn a wosie hɔn ahyɛmudzi a wɔnye Nyankopɔn edzi no bɛyɛ akra soronko a bɔn nntum hɔn! Hɔn a wosie hɔn ahyɛmudzi no benya ahoɔdzen dze esiw wiadze ne daa daa nhyɛdo no do.
Hɔn a wosie hɔn ahyɛmudzi a wɔnye Nyankopɔn edzi no bɛyɛ akra soronko a bɔn nntum hɔn! Hɔn a wosie hɔn ahyɛmudzi no benya ahoɔdzen dze esiw wiadze ne daa daa nhyɛdo no do.
Asɛmpasomafo Edwuma: Ahyɛmudzi ne Nkyɛe
Ewuradze ahyɛ dɛ yɛntserɛw asɛmpa no mu na yɛnkyɛ ahyɛmudzi no. Dɛm ntsi na yɛwɔ asɛmpasomafo. Ɔpɛ dɛ Ne ba kor biara benya kwan asan mu eyi dɛ ɔbɛfa Agyenkwa n’asɛmpa no na ɔahyɛ ahyɛmu anamɔn kwan no ase. Nyame pɛ dɛ Ɔnye nyimpa nyina dua ahyɛmu a tsetse ɔnye Abraham dzii no mu no nya nkitahodzi.
Dɛm ntsi, asɛmpasomafo edwuma no yɛ afã tsitsir wɔ Israel mboano mu. Dɛm mboano no nye edwuma a ohia dodow a ɔrokɔ do wɔ asaase do ndɛ. Biribiara nnye no nnsɛ wɔ ne kɛseyɛ mu. Biribiara nnye no nnsɛ wɔ ne hia a ohia mu. Ewuradze n’asɛmpasomafo—N’esuafo—dze hɔnho ahyɛ tafɛrbanyinmbɔmu kɛse, botae kɛse, na edwuma kɛse mu a ɔwɔ asaase do ndɛ mu.
Naaso mbordo mpo wɔ hɔ—mbordo koraa. Ɔyɛ ehiadze kɛsenara dɛ yɛtserɛw asɛmpa no mu ma nkorɔfo a wɔwɔ ntwamutam n’afã no ho. Nyame pɛ dɛ obiara, a ɔwɔ ntwamutam n’afã ebien nyina no, nya N’ahyɛmu mu nhyira enyigye. Ahyɛmudzi anamɔn kwan no woebue ama nyimpa nyina. Yɛtotɔ serɛ obiara dɛ ɔnye hɛn nnantsew anamɔn kwan no do. Edwuma biara nnyi hɔ a wiadze nyina mu no ɔkã obiara fua. Na “Ewuradze yɛ mbɔbɔrhufo ma hɔn a wɔdze akoma a no mu tsew bɔ ne dzin krɔnkrɔn no” (Helaman 3:27).
Osiandɛ Melchizedek Asɔfodzi wɔdze asan ananamu aba no ntsi, mbaa na mbarimba a wosie ahyɛmudzi wɔ kwan wɔ asɛmpa no ne sunsum mu nhyira nyina (Nkyerɛkyerɛ na Ahyɛmudzi 107:18; woetsĩ mu akã ho)
Worutu Kirtland Temple no ahyɛ Nyame nsa wɔ afe 1836 mu no, Elijah puei, wɔ Ewuradze no kwankyerɛ ase. No botae? “Na ɔbɛdandan … mba aba hɔn egyanom do” (Nkyerɛkyerɛ na Ahyɛmudzi 110:15). Elias so puei. No botae? “Na ɔdze Abraham n’asɛmpa ne mberano” no bɛma Joseph Smith na Oliver Cowdery “a ɔse, hɛn mu nye hɛn asefo na ebusuasantsen nyina a wobefi hɛn ekyir aba no, wobehyira hɔn no (Nkyerɛkyerɛ na Ahyɛmudzi 110:12). Dɛm no, Owura no dze asɔfodzi tumdzi na ndzinoa wɔdze Abraham ahyɛmudzi mu nhyira soronko no ma nkaafo hyɛɛ Joseph Smith na Oliver Cowdery.9
Asɔr mu no, yetwa ahyɛmu anamɔn kwan no ankorankor na asɔr no nyina. Tse dɛ ma awar na ebusua ebusua kyɛ koryɛ nkitahodzi a ɔdze ɔdɔ soronko bɔbɔ adze no, dɛmara so na nkitahodzi fofor a ɔba ber a yɛdze ahyɛmu kyekyer hɛn kɔ sor kɔ hɛn Nyame hɔ!
Bia iyi bɛyɛ dza Nephi kyerɛɛ ber a ɔkãa dɛ Nyame “dɔ hɔn a wɔdze no yɛ hɔn Nyankopɔn” (1 Nephi 17:40). Iyi nye siantsir pɔkyee a, ɔkã ahyɛmu no ho dɛ, ehumbɔbɔr na ɔdɔ soronko—anaa hesed—wɔ hɔ ma hɔn nyina a wɔhɛn nkitahodzi nkyekyeree mapã a wɔnye Nyame, mpo “dze kodu ebusuasantsen apem do”Deuteronomy 7:9).
Yenye Nyame dzi ahyɛmu a ɔsesa hɛn na Ɔno nkitahodzi afebɔɔ. Ɔdze ɔdɔ na ehumbɔbɔr mbordo hyira hɛn.10 Ɔkã hɛn nyimpa ban na mbrɛ Nyame besi bɔboa hɛn ma yɛabɛyɛ nyia yebotum abɛyɛ. Wɔbɔ hɛn anohoba dɛ hɛn, so, botum abɛyɛ “soronko egyapadze” ama No (Ndwom 135:4).
Anohoba na Adom
Hɔn a wɔyɛ ahyɛmudzi krɔnkrɔn na wosie no wɔdze onnyiewiei nkwa na nkwagye ntowdo bɔ hɔn anohoba, “akyɛdze a ɔsõ sen Nyame n’akyɛdze nyina” Nkyerɛkyerɛ na Ahyɛmudzi 14:7). Jesus Christ nye dɛm ahyɛmudzi no ne ntamugyinafo (hwɛ Hebrewfo 7:22; 8:6). Ahyɛmu siefo a wɔdɔ Nyankopɔn na wɔma No kwan ma odzi nyim wɔ hɔn abrabɔ mu ndzɛmba nyina do no yɛ No hɔn abrabɔ mu nhyɛdo a ɔyɛ ndam kɛse.
Hɛn nda yi mu no ɔyɛ hɛn adom dɛ yɛgye patriarch nhyira na yesũa hɛn na tsetse egyanom hɛn ntamu nkyekyeree. Dɛm nhyira no so ma yehu dza ɔda hɛn enyim no ho kakra.
Osian hɛn ahyɛmu a yɛnye Nyame edzi ntsi, Ɔnnkɛberɛ dabiara da wɔ No mbɔdzembɔ mu dɛ Ɔbɔboa hɛn, na N’ehumbɔbɔr abotar a Ɔwɔ ma hɛn no nnkɛpa dabiara da.
Ana Edɔ Me Sen Yinom? David Lindsley yɛɛ nsaano mfonyin no
Hɛn frɛ dɛ Israel ahyɛmudzi no nye dɛ yɛbɛyɛ ahwɛyie dɛ Asɔrba biara bohu enyigye na adom a ɔkã yɛnye Nyame ridzi ahyɛmu ho. Ɔyɛ ɔfrɛ a ɔhyɛ barimba anaa ɔbaa, banyimba na basiaba ahyɛmu siefo biara nkuran, dɛ wɔnye hɔn a wɔba hɔn nhyɛdo ase no kyɛ. Ɔyɛ ɔfrɛ so dɛ yɛmma hɛn asɛmpasomafo no a, wɔasoma hɔn a wɔahyɛ hɔn dɛ wonuma Israel na wɔmboa mboa hɔn ano no bamba na nkuranhyɛ, ama yɛabɔ mu abɛyɛ Nyame no nkorɔfo na Ɔbɛyɛ hɛn Nyankopɔn (hwɛ Nkyerɛkyerɛ na Ahyɛmudzi 42:9).
Banyin biara na basia biara a ɔdze noho hyɛ asɔfodzi ayɛdze horow mu na wɔnye Nyankopɔn dzi ahyɛmu horow na wosie no nya akwantsen kwan kɔ Nyankopɔn no tum no ho. Yɛfa Ewuradze ne dzin to hɛnankasa hɛn do dɛ ankorankor. Yɛfa Ne dzin so to hɛn do dɛ ɔman. Ɔreyɛ hɛn ehiasɛm kɛse dɛ yɛdze Jesus Christ N’Asɔr a ɔwɔ hɔ Ma Nda a Odzi Ekyir Ahotseweefo ne dzin a ɔtsen bedzi dwuma no yɛ kwan pa a ohia dɛ yɛyɛ ɔman no yɛdze ne dzin to hɛn do. Nokwar, ayamuyie ndzeyɛɛ biara a Jesus Christ N’Asɔr a ɔwɔ hɔ Ma Nda a Odzi Ekyir Ahotseweefo na n’asɔrmba bɛyɛ no kyerɛ Nyankopɔn ne hesed.
Dɛn ntsi na wɔbɔɔ Israel apetse? Osiandɛ nkorɔfo no buu mbrasɛm no do na wosiiw nkɔnhyɛfo no abo. Egya dɔfo a Origyam no bɔɔ Israel apetse kɔr ekyir mbeambea dze yɛɛ mbuae.11
Naaso, Ɔbɔɔ hɔn anohoba dze bɔɔ hɔn apetse dɛ dabi wɔbɔboaboa Israel ano aba No nguankuw mu bio.
Judah ebusua no wɔmaa hɔn asodzi dɛ wobesiesie wiadze no ama Ewuradze ne mbae a odzi kan no. Fi dɛm ebusua mu no, wɔfrɛɛ Mary dɛ ɔmbɛyɛ Nyankopɔn Ne Ba ne nã.
Joseph ebusua no, ɔnam ɔno na Asenath ne mbabanyin, Ephraim na Manasseh do (hwɛ Genesis 41:50–52; 46:20), wɔmaa hɔn asodzi dɛ wɔbɛyɛ kandzifo wɔ Israel mboano no mu na woesiesie wiadze no ama Ewuradze Ne Mbae a Otsĩa Ebien no.
Onnyiewei hesed nkitahodzi a ɔtse dɛm mu no, ɔsɛ fata dɛ Nyankopɔn pɛ dɛ Ɔboaboa Israel ano. Ɔyɛ hɛn Ɔsor Egya! Ɔpɛ dɛ Ne mba mu kor biara—a wɔwɔ ntwamutam n’afã ebien nyina—tse Jesus Christ asɛmpa a wɔdze asan-ananmu aba no mu nsɛm.
Ɔdɔ Anamɔn Kwan Bi
Ahyɛmu anamɔn kwan no yɛ ɔdɔ anamɔn kwan—a dɛm hesed nwanwa no kã ho, dɛm ayamuhyehye na hwɛ pa no a yɛdze tsen kɔ hɛnho nkorkor no. Irinya dɛm ɔdɔ no ho atsenkã no yɛ fahodzi na nkenyan. Ehurusi kɛse a yebenya ho sũaho dabi nye ber a yɛbɛma Nyankopɔn na Ne mba nyina hɔnho dɔ bekitsa hɛn ara yie.
Yɛrodɔ Nyankopɔn akyɛn obiara anaa biribiara nye gyinabew a ɔdze nokwar asomdwee, awerɛkyekye awerɛhyɛmu, na enyigye brɛ hɛn.
Ahyɛmu anamɔn kwan no nyina fa yɛnye Nyankopɔn nkitahodzi ho asɛm—hɛn hesed nkitahodzi a yɛnye No wɔ. Sɛ yɛnye Nyame dzi ahyɛmu a, nna yɛnye Ɔno edzi ahyɛmu a aber nyina Obesie N’asɛm. Ɔbɛyɛ adzebiara a Obotum, dze aboa hɛn ma yesie hɛn dze a, Orinntseatsea hɛn pɛ do.
Mormon Nwoma no dze ahyɛmudzi a ɔwɔ hɔ daapem yi ho ntõtõho hyɛ ase na ɔdze wie. Ofitsi ne dzin krataafa kesi Mormon na Moroni hɔn dasegye a odzi ewiei no, Mormon Nwoma no kã ahyɛmu yi ho asɛm (hwɛ Mormon 5:20; 9:37). “Mormon Nwoma no no mpuei no yɛ sɛnkyerɛdze dɛ Ewuradze ahyɛ ase roboaboa Israel ano na Ɔrehyɛ N’ahyɛmudzi a Ɔnye Abraham, Isaac, na Jacob dzii no mã.”12
Mo nuanom na nkyerɛbaa adɔfo, wɔafrɛ hɛn mber mapã yi wɔ wiadze abakɔsɛm mu yi dɛ yɛnkyerɛkyerɛ wiadze no ahyɛmudzi a ɔwɔ hɔ daapem no ne fɛw na no tum. Hɛn Ɔsor Egya wɔ awerɛhyɛmu ara yie wɔ hɛn mu dɛ yɛbɛyɛ edwuma kɛse yi.
Amandzɛɛbɔ yi wɔmaa no wɔ wiadze mfɛndzanan baanodzifo ehyiadzi ase wɔ Ebɔw 31, 2022.
© 2022 odzi wɔ Intellectual Reserve, Inc. All rights reserved. Wotsintsimii wɔ USA. Ngyiresi Borɔfo kasa ngye ntomu: 6/19. Nkyerɛase ngye ntomu: 6/19. Monthly Liahona Message, October 2021 ne nkyerɛasee. Fante. 18317 502