“Olwelah Ma Pahtpaht,” Liahona, Ohktohpa 2022.
Mahlwem Nuhkwewa LiahonaMwe Fahkwack, Ohktopa 2022
Olwelah Ma Pahtpaht
Oasr inkacnek nuhke luhngse ac pahkomuhta oa nuh selos nuhkwewa suc ma oraclah olwelah lalos nuh sin God.
Leum Jisus Kraist, sel Del Parson
Ke facluh se inge ahkkolukyeyucklac ke mweun ac sramsram ke mweun, enenuh luhn ma pwacye, kahlwem, ac luhngse pwacye luhn Jisus Kraist yohkwaclihk liki meet ah. Wosasuc luhn Kraist uh wolacna, ac kuht ahkinsewowoyeyuck ke kuht lutlut kac ac moulkihn oacna ke lutiyuck. Kuht engan ke pacl wo lasr in akacsruhi kac—in fahkwack ke pwacyeiyac ke oacna sie acn kuht oasr we.
Nga kwacna sramsram ke yohk srihpaciyen olwelah lal Abraham ac fahsrweni luhn Israel. Ke kuht eis wosasuc ac pacptaislac uh, kuht eis nuh facsr sifacna ine muhtahl luhn Jisus Kraist. Pacptais pa motonoac se ma kol in tuhkweni usrui olwelah nuhkwewa ma tuh ituckyang ke pacl meet ah sin Leum nuh sel Abraham, Isaac, Jacob ac fihtac lalos.1
“Olwelah sasuc ac ma pahtpaht”2 (Doctrine and Covenants 132:6)—ac olwelah lal Abraham elos oacna sie—inkacnek luo ma ahkuhtweyac olwelah ma God el oraclah nuh sin mukul ac muhtwacn fin facluh ke kais sie pacl.
Kahs se ingema pahtpaht el ahkkahlwemye lah olwelah se inge oasr na emeet liki pwelucng luhn facluh! Plwacn se ma tuh elakihnyuck ke Tuhkweni Luhlahp se Inkuhsrao ah el ahkuhtweyac pac arulacna kahlwem lah kuht ac muh utiyucklac luhkwel God. Ne ohinge, God el olwelah lah El ac fah acse sie Mwet Lahngo suc ac fah kuhtanglah ma sikyak ke Puhtatlac luhn mwet uh. God el fahk nuh sel Adam tukun pacptaislac lal:
“Kom fahsr tukun ohiyac luhn el suc wacngihn muhtwacwacackiyen lwen kuh sahflahiyen yac, ke ma pahtpaht nuhke ma pahtpaht.
“Liye, kom pa sie in nga, sie wen nuhtin God; ac tuh kowos nuhkwewa ac fah eklac wen nuhtihk (Moses 6:67–68).
Adam ac Eve elos eis akwuck muhtahl nuhke pacptais ac muhtwacwacack ke inkacnek in ma se fanna lac nuh yurin God. Elos ilyak nuhke inkacnek in olwelah.
Ke nga ac kom oacyacpac ilyak nuhke inkacnek se inge, kuht eis ohiyac sasuc luhn moul. Ohinge kuht oraclah kuhpahsr lasr nuh sin God suc ma lwelah nuh Sel in ahkinsewowoye ac ikihl kuht. Inkacnek in olwelah uh kol kuht in fohlohk nuh Yohrohl. Fin kuht lwelah God Elan kuhtanglah in moul lasr, olwelah sac ac kol kuht fototo ac fototoyang nuh Sel. Olwelah nuhkwewa na na oreklac na in ahkfahsryeyucklac. Elos oraclah sie kuhpahsr nuhke akohnohki ma pahtpaht.
Luhngse ac Pahkomuhta Oa
Ke kuht oraclah olwelah yurin God, kuht sislah tiac wi lasr ne tok ma pahtpaht. God el ac tia sislah kuhpahsr Lal nuh selos suc oraclah kuhpahsr na oa nuh Sel uh. Pwacye lah, oasr inkacnek nuhke luhngse ac pahkomuhta oa nuh selos nuhkwewa suc ma oraclah olwelah lalos nuh sin God. Ke kahs Hebrew, luhngse suc olweyucklac el pahngpahnghesed3
Hesed el sie kahs ma wacngihn kahs Paclahng nuhkac. Mwet Lweng ke King James Version ke Pwacpuhl oacna sringelihk lah elos ac ekuhllah fuhkah kahs se ingehesed nuhke kahs Paclahng. Elos kwacna sulaclah “luhngsekuhlwacng.” Sun kuhtuh kalmac uh tuh tiac nohfohnna kalmen kahs se ingehesed. Lweng pac sahyac oacyacpac oreklac, oacna nuhke “pahkomuhta” ac “wo.” Hesed el kahs na oa se suc ma ahkuhtweyac ke kuhpahsr in olwelah suc ma kwewa na lac luo an enenuh se na in pwacye ac luhlahlfongi nuh sin sie sin sie.
Macruht ma pahtpaht el kuhpahsr in olwelah se. Sie mukul ac muhtwacn pahyuck oraclah olwelah nuh sin God ac nuh sin sie sin sie in pwacye ac luhlahlfongi nuh sin sie sin sie.
Hesed el kain in luhngse ac pahkomuhta oa suc ma God el puhla nuh selos ac tahfwelac nuh selos suc ma oraclah olwelah nuh Sel. Ac kuht fohlohkihn hesed nuh Sel.
Ke kom ac nga oraclah olwelah nuh sin God, kuhpahsr lasr nuh Sel eklac fototoeni likina meet ah. Inge kuht ahkohnohki nuh sie.
Petsac suc oreklac sel Jerry L. Garns
Ke srihpen oasrhesed luhn God nuh selos suc olwelah nuh Sel, El ac luhngse elos. El ac tahfwelah in weluhlos ke orekma lalos ac sang pacl wowo lalos in eklac. El ac nuhnakmuhnahs nuh selos ke elos ac auliyak uh. Ac fin elos kihlac , El ac kahsrwelos in sokwack inkacnek in fohlohk lalos nuh Yohrohl.
Ke kom ac nga oraclah olwelah nuh sin God, kuhpahsr lasr nuh Sel eklac fototoeni likina meet ah. Inge kuht ahkohnohki nuh sie. Ke srihpen olwelah lasr nuh sin God, El ac fah tiac tohtohlah ke insacnweacng Lal in kahsrwe kuht, ac kuht ac fah tia ahktohtohyelah pahkotwen mongfishrwacsr Lal nuh sesr. Oasr acn sacohk se srisrilac ke nuhnak luhn insiyacn God nuh sesr kais sie. Yohk finsrak lal kacsr.
Kom etuh ke mwe fahkwack yohk mahtuh ma Leum el tuh sang sin Mwet Pahluh Joseph Smith. Tuhkuh ke fwackyuck. Leum el fahk nuh sel Joseph, “Olwelah se inge ma lom pac, mweyen kom tuhkuh kacl Abraham, ac olwelah sac oreklac nuh sel Abraham”(Doctrine and Covenants 132:31).
Ohinge, olwelah ma pahtpaht se inge fohlohkihnyuckyak oacna sie ip ke Fohlohkyak yohk luhn wosasuc ke fohnlah la. Nuhnkuh kac! Olwelah lun sie macruht ma oreklac in tempuhl el kuhpahsr suwohs nuh ke olwelah lal Abraham. Lun tempuhl uh, ikacklah nuh sin sie siyacnyacnkwewa mwe insewowo ma srisrilac nuh sin fahko ma pwacye nahtuhl Abraham, Isaac, ac Jacob.
Oacpacna Adam, nga ac kom sifacna ilyak nuhke inkacnek in olwelah ke pacptais. Ac kuht ahksahfyelah yohk ke ilyak lasr lun tempuhl. Mwe insewowo ke olwelah lal Abraham ac eisyuck lun tempuhl muhtahl. Mwe insewowo inge ikacslah nuh sesr, ke kuht ac sifil moulyak uh, in “usrui tron, tohkohsrai, kuh, mwe luti pwacye, ac kuh in kol, nuhke ‘moul ma pahtpaht yurin God ac wolacna in ma nuhkwewa’[Doctrine and Covenants 132:19].”4
Ke ahksahfyeyacn ma sruhmuhnyuck ke olweacng Mahtuh, kuht riti ke Malachi el olwelah muh Elijah elac “fa furokla insien papa nu sin tulik natu, a insien tulik nu sin papa tuma.”(Malachi 4:6). Israel in pacl meet ah, sramsram ke pahpah somlah inge ac kuh in ma nuh sel pahpah Abraham, Isaac, ac Jacob. Olwelah se inge lihksrweni ahkkahlwemyeyuck ke kuht riti sie pacna ipin fuhs ke Moroni el luti nuh sel Mwet Pahluh Joseph Smith: “El [Elijah] fah yukiyac insiyacn tuhlihk uh olwelah oreklac nuh sin pahpah tuhmwaclos, ac insiyacn tuhlihk fah forlah nuh sin pahpah tuhmwaclos”(Joseph Smith—History 1:39) Elos uh Abraham, Isaac, ac Jacob oasr pac ke pahpah sruhmuhnyuck inge. (Liye Doctrine and Covenants 27:9–10.)
Elos suc oraclah olwelah muhtahl ac liyacacng ac fah uliyuck nuh selos moul ma pahtpaht ac moul ma pahtpaht yurin God. Jisus Kraist pa mwe ahkpwacye luhn olwelah inge.
Mwe ahkuhtweyac ke Christ and the Rich Young Ruler, sel Heinrich Hofmann C.
Jisus Kraist: Pa Kuhiyacn Olwelah
Iwaclah luhn Mwet Lahngo el ikacslah nuh sel Pahpah in ahkpwacyeye olwelah Lal ma oreklac nuh sin tuhlihk Nahtuhl. Ke srihpen Jisus Kraist pa “inkanek, ac pwaye, ac moul; wangin mwet som nu yurin Papa fin tia [ke El]” (John 14:6. Ahkpwacyeiyacn olwelah lal Abraham kuh in ahkfahsryeyuck ke srihpen Iwaclah luhn Mwet Lahngo lasr, Leum Jisus Kraist. Jisus Kraist el oasr ke infulwen olwelah lal Abraham.
Olweang Mahtuh el tiac puk ke ma suhmuhslah muhkwena; a el oacyacpac puk ke sramsram mahtuh. Kom esam ke kom riti ke macruht lal Sarai ac Abram. Ke srihpen wacngihn tuhlihk nahtuhlos, Sarai el sang muhtwacn kuhlwacnsap lal, Hagar, in ekihn muhtwacn kiyacl Abram pac, in oacna ma Leum el sapkihn. Hagar el oswellah Ishmael.5 Abram el luhngse Ishmael, tuhsruhk tiac el pa tuhlihk se ma ac ahkfahsryelah olwelah sac. (Liye Genesis 11:29–30; 16:1, 3, 11; Doctrine and Covenants 132:34.)
In oacna sie mwe insewowo sin God, ac in topukyacn luhlahlfongi lal Sarai,6 el pihtuctucyak ke matwac mahtuh lal olwelah uh in muh ahkfahsryeyuck ke wen nahtuhl suc pa, Isaac (liye Genesis 17:19). El isuslac nuh lun olwelah.
God el sang nuh sel Sarai ine sasuc—Sarah ac Abraham (liye Genesis 17:5, 15). Utuckyang luhn ine sasuc inge el mahkiyac muhtwacack luhn moul ac fuhfahsryucsr sasuc nuh sin sucu se inge.
Abraham el luhngse kwewana Ishmael ac Isaac. God el fahk nuh sel Abraham lah Ishmael el ac fah puhsweni ac eklac sie muhtuhnfacl luhlahp (liye Genesis 17:20). Ke pacl sacn pacna, God el oraclah kahlwem lah olwelah ma pahtpaht ac fah tulokyak kacl Isaac (liye Genesis 17:19),
Elos nuhkwewa ma eis wosasuc elos eklac wi sucu lal Abraham. Kuht riti ke Galatia:
“Kowos nuhkwewa ma pactaislac in kupasryang nu yurin Kraist ac inge kowos nokomang tari moul lun Kraist sifacna.
“… Kowos nuhkwewa ma sefanna yurin Kraist Jisus.
“A kowos fin sran Kraist, na kowos futel Abraham, a mwet usru fal nu ke wulweang” (Galatians 3:27–29).
Ohinge, kuht kuh in eklac mwet in usru nuhke olwelah ke kuht isuslac kuh nuhtlac uh.
Ke kuht oraclah olwelah yurin God, kuht sislah tiac wi lasr ne tok ma pahtpaht. God el ac tia sislah kuhpahsr Lal nuh selos suc oraclah kuhpahsr na oa nuh Sel uh.
Wen nahtuhl Isaac ac Rebekah suc pa Jacob el isuslac nuh lun olwelah. In weacng pac, el sulaclah in ilyak ke kena lal sifacna. Oacna ke kowos etuh, inel Jacob ikihlyucklac nuhke Israel (liye Genesis 32:28), kalmac pa “lwelah God Elan kuhtanglah” kuh “el suc kuhtanglah yurin God.” 7
Ke Exodus kuht riti lah “God el esam wuleang lal yorol Abraham, Isaac, ac Jacob” (Exodus 2:24). God el fahk nuh sin tuhlihk nuhtin Israel, “Kows fin akosyu ac liaung wulela luk, kowos ac fah mwet luk sifacna.Facl nufon ma luk, tuh kowos fa mwet solla luk” (Exodus 19:5).
Pohloh kahs se inge “ma sollac sacohk” luhngasyucklac ke kahs Hebrew sesegullah, kalmac pa ma sacohk sollac---sie “ma sacohk”8
Puk lal Deuteronomy el sramsram ke yohk srihpaciyacn olwelah. Mwet Sap ke Wuhlweacng Sasuc etuh ke olwelah se inge. Tukun Peter el ahkkweyelah mwet ul se ke motonoac luhn tempuhl uh, el luti mwet inte ah kacl Jisus. Peter el fahk, “God lal Abraham, Isaac, ac Jacob, God lun mwet matu lasr somla, pa nawella Jesus, Mwet Kulansap lal, ke wolana mutal” (Orekma 3:13).
Peter el ahksahfye pweng lal ke el fahk nuh sin mwet inte ah, “Wuleang lun God ma El tuh orala sin mwet palu lal, ma inge ma nu suwos, ac kowos wi pac ipeis ke wulela se su God el tuh oakiya yurin mwet matu lowos meet ah. Oana ke El tuh fahk nu sel Abraham mu, ‘Ke fita lom nga fah akinsewowoye mwet nukewa faclu.’” (Orekma 3:25). Peter el oraclah kahlwem nuh selos lah ipin orekma lal Kraist pa in ahkpwacyeye olwelah luhn God.
Leum el sang kain in pweng se pacna inge nuh sin mwet emeet ah fin acn Macrike. Fin acn we, Kraist suc sifil moulyak el fahk nuh sin mwet ah lah suc elos na pwacye. El fahk:
“Ac liye, kowos tuhlihk nuhtin mwet pahluh; ac kowos mwet Israel; ac kowos ma ke wuhlweacng se suc Pahpah El tuh oraclah nuh sin pahpah tomowos, fahk nuh sel Abraham: Ac ke fihtac lom kain in mwet nuhkwewa fin facluh ac fah ahkinsewowoyeyuck.
“Pahpah El tuhfweyuclac nuh suwos emet, ac suhpweyucme in ahkinsewowoye kowos kais sie nuhkwewa in forlah liki ma koluk lowos; ac ma se inge ke srihpen kowos pa tuhlihk ke wuhlweacng”(3 Nephi 20:25–26).
Kowos liye yohk srihpaciyacn ma se inge? Elos suc liyacacng olwelah lalos yurin God ac fah eklac nguhn fokoko suc ma lain ma koluk. Elos suc liyacacng olwelah lalos ac fah oasr kuh lalos in lain mukwikwi koluk luhn facluh.
Elos suc liyacacng olwelah lalos yurin God ac fah eklac nguhn fokoko suc ma lain ma koluk. Elos suc liyacacng olwelah lalos ac fah oasr kuh lalos in lain mukwikwi koluk luhn facluh.
Orekma luhn Misineri: Akacsruhi ke Olwelah
Leum El sapkihn tuh kuht in fahkwelihk wosasuc ac akacsruhi ke olwelah sac. Pa oruh oasr misineri uh. El kena tuh tuhlkihk nuhkwewa Nahtuhl in oasr pacl wowo lalos in sulaclah wosasuc luhn Mwet Lahngo ac fuhfahsryucsr ke inkacnek luhn olwelah. God el kena kapsrweni mwet nuhkwewa nuhke olwelah ma El oraclah in pacl omeet ah nuh sel Abraham.
Ohinge, orekma luhn misineri pa ip enenweyuck se nuhke fahsrweni yohk luhn Israel. Fahsrweni sacn pa orekma se ma yohk srihpac emeet ma sik in pacl inge fin facluh. Wacngihn ma yohk sahyac oacna ma se inge. Wacngihn ma yohk srihpac sahyac oacna ma se inge. Misineri luhn Leum—mwet tuhma lutlut Lal—elos ahkfahsrye orekma na upac se inge, orekma suc ma yohk srihpac emeet, orekma suc ma yohk emeet fin facluh mihsenge.
Tuhsruhk oasr pac ma yohk sahyac—kuhtuh pac ma yohk sayac. Oasr enenuh na yohk se in fahkwelihk wosasuc nuh sin mwet misac ke lacfahl lihsrlihsr ingoh. God el kena tuh kwewana, ke lacfahl in lihsrlihsr luhn moul ac misac, in engankihn mwe insewowo luhn olwelah Lal. Inkacnek in olwelah uh el ikacklah nuh sin mwet nuhkwewa. Kuht kwacfe mwet nuhkwewa in wi kuht fahsr ke inkacnek se inge. Wacngihn orekma yohk oacna orekma se inge ma oracni mwet nuhkwewa in wi. Tuh For “Leum El pahkotwen nuh selos nuhkwewa suc ac fah, ke inse pwacye lalos, pahngon ine muhtahl Lal” (Helaman 3:27).
Ke srihpen Melchizedek Pristut el fohlohkihnyuckyak, kewana muhtwacn ac mukul ma sruok olwelah uh oasr lwelah nuh se ke “nohfohn mwe ahkinsewowo luhn nguhn ke wosasuc” (Doctrine and Covenants 107:18; weacng pac mwe ahkuhtweyac).
Ke aluiyuck Tempuhl Kirtland ke 1836, ye kohkoh luhn Leum, Elijah el sikyak. Sriihpac Lal? “In furohklah … tuhlihk nuh sin pahpah tuhmwaclos” (Doctrine and Covenants 110:15). Elias el oacyacpac sikyak. Sriihpac Lal? In sang nuh sel Joseph Smith ac Oliver Cowdery “we luhn wosasuc lal Abraham, suc fahk lah ke kuht ac fihtac lasr fihl nuhkwewa tohkohsr ac fah ahkinsewowoyeyuck” (Doctrine and Covenants 110:12). Ohinge, Sifac el sang nuh sel Joseph Smith ac Oliver Cowdery kuh luhn pristut ac suwohs in sang mwe insewowo oa ke Olwelah lal Abraham nuh sin mwet sahyac. 9
Ke Alu uh, kuht fuhfahsryucsr ke inkacnek luhn olwelah kwewana ke ohiyen mwet se ac mwet puhs. Oacna ke macruht ac sucu tuhkweni ke sienakain in kuhpahsr ma oraclah luhngse sacohk, oacpacna nuhke kuhpahsr sasuc ma foklac ke kuht orekuhtweni nuh sie ke olwelah ma tulokyak nuh sin God lasr.
Sahp ac pa inge kalmacn fahk lal Nephi ke el fahk muh God El “luhngse elos suc ma ac fah Eisacl in God lalos” (1 Nephi 17:40). Pa inge srihpac na pwacye se pwacnwacng, in oacna sie ipin olwelah, luhngse ac pahkomuhta oa—kuhhesed—el oasr nuh selos nuhkwewa suc ilyak nuhke kuhpahsr fokoko ac fototo se inge yurin God, finne “nuh sin tausin fihl” (Deuteronomy 7:9).
Kuht ekuhllah kuhpahsr lasr nuh Sel ne tok ma pahtpaht ke kuht oraclah olwelah lasr yurin God. E ahkinsewowoye kuht ke luhngse ac pahkomuhta yohk.10i E ikihl lah suc kuht uh ac lah God el ac kahsrwe kuht fuhkah in eklac nuhke mwet ma kuht kuh in eklac nuhkac uh. Uliyuck nuh sesr lah kuht, oacyacpac, kuh in “ma sollac sacohk” nuh Sel (Psalm 135:4).
Olwelah ac Pacl Wo
Elos suc oraclah olwelah muhtahl ac liyacacng ac fah uliyuck nuh selos moul ma pahtpaht ac moul ma pahtpaht yurin God, “mwe sang se ma yohk emeet ke mwe sang luhn God” (Doctrine and Covenants 14:7). Jisus Kraist pa mwe ahkpwacye luhn olwelah inge. (liye Hebrews 7:22; 8:6). Elos suc liyacacng olwelah suc luhngse God ac lwelah nuh Sel in kuhtanglah ma nuhkwewa sahyac in moul lalos oraclah tuh in El pa kuh fokoko se emeet in moul lalos.
In lwen lasr pacl inge utuckuh pacl wo lasr in eis mwe insewowo luhn patriarch ac lutlut ke kuhpahsr lasr nuhke patriarch mahtuh e ke pacl meet ah. Mwe insewowo ingacn el ikacslah pac kuht in kuh in liye ma ma sikyak tok.
Ke srihpen olwelah lasr nuh sin God, El ac fah tiac tohtohlah ke insacnweacng Lal in kahsrwe kuht, ac kuht ac fah tia ahktohtohyelah pahkotwen mongfishrwacsr Lal nuh sesr.
Yac Kom Lungse Nga Yohk Liki Ma Inge? sel David Lindsley
Pahng lasr ke kuht ekihn Israel Wuhlweacng uh pa in oruh mempucr nuhkwewa ke Alu uh in etuh ke engan ac ma wo ma tuhkuh ke kuht oraclah olwelah yurin God. El sie pahng in ahkkweye mukul ac muhtwacn nuhkwewa ma liyacacng olwelah lalos, tuhlihk mukul ac muhtwacn, in akacsruhi ke wosasuc nuh selos ma kwacna falyang nuh selos ke moul in luhlahlfongi lalos. El sie pac pahng in tahpuhk ac ahkkweye misineri lasr, suc suhpweyuck ke sap in pacptais ac kahsruh in oracni Israel, kuht in muh tuhkweni mwet luhn God ac Elan muh God lasr (liye Doctrine and Covenants 42:9).
Mukul ac muhtwacn nuhkwewa suc ma wi oruh akwuck luhn pristut ac oruh ac liyacacng olwelah lalos yurin God eis lwelah suwohs lalos nuhke kuh luhn God. Kuht eis inen Leum nuh facsr ke kuht ekihn sie mwet. Kuht eis Inel nuh facsr ke kuht ekihn sie u in mwet. Ke kuht oaru in orekmakihn ine pwacye ke Alu luhn Jisus Kraist luhn Mwet Luhlahlfongi ke lwen Sahflah el sie inkacnek yohk srihpac ke kuht ekihn u in mwet se in eis Inel nuh facsr. Pwacyelah, mukwikwi kuhlwacng nuhkwewa luhn Alu luhn Jisus Kraist luhn Mwet Luhlahlfongi ke lwen-Sahflah ac mwet kac an el fahkwack hesed luhn God.
Kuh efuh Israel fahsrwelihk? Mweyen mwet ah kuhnahoslah masap ac tuhngal uniyac mwet pahluh. Ke luhngse ac ahsor Pahpah el fohlohkihn nuh selos ke el oruh elos fahsrwelihk nuh yen loes ac sralacp.11
Tuhsruhk, el oruh elos fahsrwelihk ac olwelah muh sie pacl Israel ac muh sifil fohkohkweni nuhke u Lal.
Utuckyang nuh sin sruf luhn Judah tuh in ma kunaclos pa in ahkolah facluh nuhke tuhkuh se meet luhn Luem. Ke sruf se inge, Mary el pahng tuh elan ninac kiyacn Wen nuhtin God.
Ke sruf lal Joseph, ke tuhlihk nahtuhl ac wen nahtuhl Asenath, Ephraim ac Manasseh (liye Genesis 41:50–52; 46:20), ituckyang in ma kunaclos pa in kol fahsweni luhn Israel, in ahkolah facluh nuhke Tuhkuh Ahkluo luhn Leum.
Ke kain in kuhpahsr luhnhesedma koflah srihkasrakuh, arulacna fal tuh God el kena oracni Israel. El pa Pahpah tuhmasr Inkuhsrao! El kena kais sie tuhlihk Nahtuhl—kwewana ma oasr ke lacfahl luo luhn mwe lihsrlihsr uh—in lohng ke pweng luhn fohlohkyak luhn wosasuc luhn Jisus Kraist.
Inkacnek luhn Luhngse
Inkacnek luhn olwelah pa inkacnek luhn luhngse—pa wolacna hesed, pahkomuhta nuhnkuh yohk ac kahsruh sie sin sie. Puhlakihnyacn luhngse se inge el ahksukohsohkyelah ac tahpuhk. Engan se ma yohk emeet kom ac puhlakihn pa pacl se ma kom sesseslah ke luhngse lom nuh sin God ac nuh sin tuhlihk Nahtuhl.
Luhngse God liki mwet nuhkwewa kuh ma nuhkwewa sahyac pa ohiyac se ma ac use mislac, puhla wo, luhlahlfongi kom sifacna, ac engan pwacye.
Inkacnek luhn olwelah pa kuhpahsr lasr nuh sin God hesed—kuhphasr lasr Yohrohl. Ke kuht ilyak nuhke olwelah yurin God, kuht oraclah olwelah nuh Sel suc pwacye ke kahs Lal pacl nuhkwewa. El ac oruh ma nuhkwewa ma El kuh, in tiac lain sukohsohk in sulaclah lasr, in kahsrwe kuht in karihngihn ip lasr kac an.
Puk luhn Mormon el sramtweack ac ahksahf ke sruhmuhnyacn olwelah ma pahtpaht se inge. Ke sra puk luhn sifac neke testimoni in kaliyac lal Mormon ac Moroni, Puk luhn Mormon el sramsram ke olwelah (liye Mormon 5:20;9:37). “Tuhkuh luhn Puk luhn Mormon pa sie mwe akucl nuh sin facluh nohfohn lah Leum el muhtwacwacack in oracni Israel ac ahkpwacyeye olwelah ma El oraclah nuh sel Abraham, Isaac, ac Jacob.”12
Tamuhlwel ac tahmtahel sacohk wiyuck, kuht pahng ke pacl na ekyek ke pacl luhn facluh in luti facluh ke kahto ac kuh luhn olwelah ma pahtpaht. Pahpah Tuhmasr Inkuhrsao El luhlahlfongi lah kuht ac oruh orekma yohk se inge.
Pweng se inge tuh tuhkahkihnyucklac ke toeni luhlahp luhn mwet kol ke March 31, 2022 ah.
© 2022 sin Intellectual Reserve, Inc. Kuh ac suwohs nuhkwewa fihliyucki. Sihmlac fin acn USA. Ahkkweyeyucklac ke kahs English: 6/19. Ahkkweyeyucklac ke Lweng: 6/19. Lwenglah luhn Mahlwem Nuhkwewa Liahona Pweng ke, Ohktohpa 2022. Kosraean. 18317 000