« Te fafaura’a mure ’ore », Liahona, ’Ātopa 2022.
Poro’i tā’āva’e o te Liahona ’Ātopa 2022
Te fafaura’a mure ’ore
Te feiā ato’a tei rave i te fafaura’a ’e te Atua, e roa’a ïa ia rātou te huru here ’e te aroha ta’a ’ē.
Te Fatu ’o Iesu Mesia, nā Del Parson
I roto i teie ao tei haehaehia e te mau tama’i ’e te mau parau nō te mau tama’i, e mea rahi a’e te hina’aro i te parau mau, te māramarama ’e te here mau o Iesu Mesia hau atu i te mau tau ato’a. E mea hanahana te ’evanelia a te Mesia, ’e ’ua ha’amaita’ihia tātou ia tuatāpapa i te reira ’e ’ia ora mai te au i tāna mau ha’api’ira’a. Tē ’oa’oa nei tātou nō tā tātou mau rāve’a nō te fa’a’ite i te reira—nō te fa’a’ite pāpū i tāna mau parau mau i te mau vāhi ato’a tei reira tātou.
’Ua paraparau pinepine au nō ni’a i te faufa’a o te fafaura’a a Aberahama ’e te ha’aputuputura’a o ’Īsera’ela. ’Ia fāri’i ana’e tātou i te ’evanelia ’e ’ua bāpetizohia, te rave ra ïa tātou i ni’a ia tātou iho i te i’oa mo’a o Iesu Mesia. ’O te bāpetizora’a te ’ūputa ’ia riro ’ei feiā tufa’a ’āpī nō te mau fafaura’a ato’a tei hōro’ahia i tahito ra e te Fatu ’ia Aberahama, Isa’aka, Iakoba ’e tō rātou huā’ai.1
« Te fafaura’a ’āpī ’e te mure ’ore »2 (Te Ha’api’ira’aTumu ’e te mau Fafaura’a 132:6) ’e te fafaura’a a Aberahama, hō’ē ā ïa huru—e piti rāve’a nō te fa’ahiti i te fafaura’a tā te Atua i rave i mua i te mau tāne ’e te mau vahine tāhuti i te mau taime ta’a ’ē.
Tē fa’ata’a nei te ta’o ra mure ’ore ē, i vai na teie fafaura’a hou roa te hāmani-ra’a-hia o te ao nei ! I roto i te fa’anahora’a tei vauvauhia i roto i te ’āpo’ora’a rahi i te ra’i ra, tē vai ra te ’itera’a fifi ē, e tāpū ’ē hia tātou pā’āto’a mai mua atu i te aro o te Atua. Terā rā, ’ua fafau mai te Atua ē, e hōro’a mai ’oia i te hō’ē Fa’aora ’o tē upo’oti’a i ni’a i te mau hope’ara’a o te hi’ara’a. ’Ua parau te Atua ia Adamu i muri a’e i tōna bāpetizora’a :
« ’E tei roto ’oe i te ha’apa’ora’a o tōna ra huru, ’aore tōna e mau mahana ha’amatara’a, ’e ’aore ho’i e mau matahiti hope’a ra,mai a muri ’e a muri noa atu.
« Inaha, ’ua hō’ē ’oe i roto iā’u, e tamaiti nā te Atua ; ’e mai te reira ho’i e ti’a ai ia rātou ato’a ’ia riro ’ei tamaiti nā’u » (Mose 6:67–68).
’Ua fāri’i Adamu ’e ’o Eva i te ’ōro’a o te bāpetizora’a ’e ’ua ha’amata i te riro ’ei hō’ē ’e te Atua. ’Ua tomo rāua i ni’a i te ’ē’a nō te fafaura’a.
’Ia tomo ato’a ana’e ’outou ’e ’o vau nei i ni’a i taua ’ē’a ra, e huru orara’a ’āpī tō tātou. Nō reira, e fa’atupu tātou i te hō’ē tā’amura’a ’e te Atua ’o tē fa’ati’a iāna ’ia ha’amaita’i ’e ’ia taui ia tātou. E arata’i te ’ē’a nō te fafaura’a ia tātou iāna ra. Mai te mea e vaiiho tātou i te Atua ’ia upo’oti’a i roto i tō tātou orara’a, e arata’i ïa tāua fafaura’a ra ia tātou ē, fātata roa atu iāna. ’Ua ’ōpuahia te mau fafaura’a ato’a ’ia riro ’ei tā’amura’a. E fa’atupu te reira i te hō’ē auta’atira’a ’e te mau natira’a mure ’ore.
E here ’e e aroha ta’a ’ē
’Ia rave ana’e tātou i te hō’ē fafaura’a ’e te Atua, e fa’aru’e ïa tātou i te rēni rōpū ’e a muri noa atu. E’ita te Atua e fa’aru’e i tōna tā’amura’a ’e te feiā i fa’atupu i te reira huru natira’a ’e ’ōna. ’Oia mau, te feiā ato’a tei rave i te hō’ē fafaura’a ’e te Atua, e fāri’i rātou i te hō’ē huru here ’e te aroha ta’a ’ē. I roto i te reo hebera, e parauhia taua here fafaura’a ra e hesed (חֶסֶד).3
’Aita tō teHesed e tū’atira’a reo peretane tano. E mea pāpū ē, ’ua fifi te mau ta’ata huri parau o te nene’ira’a a te Ari’i Iakobo o te Bibilia i mua i te parau hesed nā roto i te reo peretāne. ’Ua mā’iti pinepine rātou i te parau « hāmani maita’i ». E mea rahi tā teie e haru mai, ’eiaha rā te tā’āto’ara’a o te aura’a o te parau hesed. ’Ua hōro’a-ato’a-hia te tahi atu mau ’īritira’a, mai te « aroha » ’e te « maita’i ». Hesed e parau ta’a ’ē mau ïa ’o tē fa’ata’a ra i te hō’ē auta’atira’a fafau, i roto ho’i i te reira, i ru’uru’uhia ai nā pae e piti ’ia vai pāpū noa ’e ’ia ha’apa’o maita’i te tahi i te tahi.
Te fa’aipoipora’a tīrētiēra ’o te hō’ē ïa huru auta’atira’a fafau. E rave te tane ’e te vahine fa’aipoipo i te hō’ē fafaura’a i te Atua ’e i te tahi ’e te tahi ’ia vai pāpū noa ’e ’ia ha’apa’o maita’i i te tahi ’e te tahi.
hesed ’o te hō’ē ïa huru here ’e te aroha ta’a ’ē tā te Atua e fāri’i ’e e fa’atae atu i te feiā tei rave i te hō’ē fafaura’a ’e ’ōna. ’E e fa’aho’i tātou i te reira ma te hesed iāna ra.
’Ia rave ana’e ’outou ’e ’o vau nei i te hō’ē fafaura’a ’e te Atua, e fātata roa atu ā tō tātou tā’amura’a ’e ’ōna hau atu i tei nā mua a’e i te fafaura’a. I teienei, ’ua nati-’āmui-hia tātou.
Hōho’a nā Jerry L Garns
I te mea ho’i ē, ’ua hesed te Atua nō te feiā tei rave i te fafaura’a ’e ’ōna, e here ’oia ia rātou. E tāmau noa ’oia i te ’ohipa ’e ’o rātou ’e e hōro’a ho’i ia rātou i te mau rāve’a nō te taui. E fa’a’ore ’oia i tā rātou hara ’ia tātarahapa ana’e rātou. ’E mai te mea ē, e hahi ’ē rātou, e tauturu ’oia ia rātou ’ia ’ite i tō rātou ’ē’a ho’ira’a iāna ra.
’Ia rave ana’e ’outou ’e ’o vau nei i te hō’ē fafaura’a ’e te Atua, e fātata roa atu ā tō tātou tā’amura’a ’e ’ōna hau atu i tei nā mua a’e i te fafaura’a. I teienei, ’ua nati-’āmui-hia tātou. Maoti tā tātou fafaura’a ’e te Atua, e ’ore roa ’oia e rohirohi i roto i tāna mau tauto’ora’a nō te tauturu ia tātou, ’e e’ita roa atu tātou e ha’apau i tōna fa’a’oroma’i aroha ia tātou. E vāhi ta’a ’ē tō tātou tāta’itahi i roto i te ’ā’au o te Atua. E ti’aturira’a rahi tōna nō tātou.
’Ua ’ite ’outou i te fa’a’itera’a rahi tā te Fatu i hōro’a i te peropheta Iosepha Semita. ’Ua tae mai te reira nā roto i te heheura’a. ’Ua parau te Fatu ia Iosepha : « Nō ’oe ato’a teie nei fafaura’a, nō te mea nō Aberahama ’oe, ’e ’ua hōro’ahia mai te fafaura’a ia Aberahama » (Te Ha’api’ira’aTumu ’e te mau Fafaura’a 132:31).
Nō reira, ’ua fa’aho’i-fa’ahou-hia mai teie fafaura’a mure ’ore ’ei tuha’a nō te fa’aho’i-fa’ahou-ra’a rahi o te ’evanelia i roto i tōna ’īra’a. ’A feruri na i te reira ! Te hō’ē fafaura’a nō te fa’aipoipora’a tei ravehia i roto i te hiero, ’ua nati-’āfaro-ti’a-hia ïa i taua fafaura’a ra a Aberahama. I roto i te hiero, e fa’a’itehia i nā ta’ata fa’aipoipo te tā’āto’ara’a o te mau ha’amaita’ira’a i fa’ahereherehia nō te huā’ai ha’apa’o maita’i o Aberahama, Isa’aka, ’e Iakoba.
Mai ia Adamu, ’ua tomo ’outou ’e ’o vau iho nei i ni’a i te ’ē’a nō te fafaura’a i te bāpetizora’a. I muri iho, e tomo hau roa atu tātou i ni’a i te reira i roto i te hiero. I roto i te mau hiero mo’a te mau ha’amaita’ira’a o te fafaura’a a Aberahama e hōro’ahia ai. E fa’ati’a teie mau ha’amaita’ira’a ia tātou, ’ia ti’afa’ahou mai, ’ia « noa’a ho’i i te mau terōno, te mau bāsileia, te mau mana, te mau hau hui ari’i, ’e te mau hau, nō tō tātou ‘fa’ateiteira’a ’e te hanahana i roto i te mau mea ato’a’ [Te Ha’api’ira’aTumu ’e te mau Fafaura’a 132:19] ».4
I roto i te mau parau hope’a o te Faufa’a Tahito, tē tai’o nei tātou i te parau fafau a Malaki ē, « E fa’afāriu […] Elia i te ’ā’au o te mau metua ’e te tamari’i, ’e te ’ā’au o te tamari’i ’e tō rātou mau metua » (Malaki 4:6). I roto ia ’Īserā’ela i tahito ra, teie huru fa’ahitira’a nō te mau metua tāne, tei roto ato’a ïa te parau nō te mau metua Aberahama, Isa’aka ’e Iakoba. ’Ua ha’amāramaramahia teie parau fafau ’ia tai’o ana’e tātou i te fa’ahitira’a ta’a ’ē o teie ’īrava tā Moroni i fa’ahiti atu i te peropheta Iosepha Semita : « E tu’u ho’i ’oia [Elia] i roto i te ’ā’au o te mau tamari’i te mau fafau i fa’aauhia i tō rātou metua, ’e e fāriu ho’i te ’ā’au o te mau tamari’i i to rātou mau metua » (Iosepha Semita—’A’amu 1:39). Pāpū roa ē, ’o Aberahama, ’o Isa’aka, ’e ’o Iakoba terā nau metua. (Hi’o Te Ha’api’ira’a Tumu ’e te mau Fafaura’a 27:9–10.)
Te feiā e rave i te mau fafaura’a mo’a ’e e ha’apa’o ho’i i te reira, e fafau-hia mai ïa ia rātou te ora mure ’ore ’e te fa’ateiteira’a. ’O Iesu Mesia te tīa’i o te reira mau fafaura’a.
Fa’ata’ara’a nō roto mai i Te Mesia ’e te ha’apa’o ture tao’a rahi, nā Heinrich Hofmann
Iesu Mesia : Te pū o te fafaura’a
Nā roto i te tusia tāra’ehara a te Fa’aora, ua ti’a i te Metua ’ia fa’atupu i tāna mau fafaura’a i rave i tāna mau tamari’i. I te mea ho’i ē, ’o Iesu Mesia « te ’ē’a, te parau mau, ’e te ora », e mea tano ihoā ïa ē, « ’Aore roa e ta’ata e tae i te Metua ra, maori rā ’ei [iāna] » (Ioane 14:6). Nō reira, e nehenehe te fafaura’a a Aberahama e tupu maoti te tāra’ehara a tō tātou Fa’aora, te Fatu o Iesu Mesia. ’O Iesu Mesia te pū o te fafaura’a a Aberahama.
E ’ere te faufa’a tahito i te hō’ē noa buka pāpa’ira’a mo’a : e buka ’ā’amu ato’a. Tē ha’amana’o ra ’outou i tō ’outou tai’ora’a i te fa’aipoipora’a ’o Sarai ’e ’o Aberama. I te mea ho’i ē, ’aita tā rāua e tamari’i, ’ua hōro’a ’o Sarai i tōna tāvini vahine ia Hatara, ’ei vahine ato’a nā Aberama, mai te au i te arata’ira’a a te Fatu. ’Ua fānau Hatara ia Isemaela.5 ’Ua here Aberama ia Isemaela, terā rā, e ’ere ’oia te tamari’i nā roto iāna e he’e ai te fafaura’a. (Hi’o Genese 11:29–30 ; 16:1, 3, 11 ; Te Ha’api’ira’aTumu ’e te mau Fafaura’a 132:34.)
’Ei ha’amaita’ira’a nō ’ō mai i te Atua ra, ’e ’ei pāhonora’a i te fa’aro’o o Sara,6 ’ua hapū ’oia i tōna ruhiruhiāra’a ’ia ti’a ho’i i te fafaura’a ’ia he’e nā roto i tāna tamaiti, ia Isa’aka (hi’o Genese 17:19). ’Ua fānauhia ’oia i roto i te fafaura’a.
’Ua hōro’a te Atua ia Sarai ’e ia Aberama i te i’oa ’āpī—Sara ’e Aberahama (hi’o Genese 17:5, 15). Nā te hōro’ara’a i tāua mau i’oa ’āpī ra i fa’ata’a i te ha’amatara’a o te orara’a ’āpī ’e te hope’ara’a ’āpī nō teie ’utuāfare.
’Ua here Aberahama ia Isemaela ’e ia Isa’aka. ’Ua parau te Atua ia Aberahama ē, e fa’arahihia ’o Isemaela ’e e riro mai ’oia ’ei nūna’a rahi (hi’o Genese 17:20). I taua taime ato’a ra, ’ua ha’apāpū mai te Atua ē, e ha’amauhia te fafaura’a mure ’ore nā roto ia Isa’aka (hi’o Genese 17:19).
Te feiā ato’a e fāri’i i te ’evanelia, e riro mai rātou ’ei tuha’a nō te huā’ai o Aberahama. Tē taiʼo nei tātou i roto i te Galatia :
« ’О tō ’outou ato’a ho’i i bāpetitohia i te Mesia ra, ’ua ’ahu ïa i tā te Mesia ra.
« […] Hō’ē ā ho’i ’outou i roto i te Mesia ra ia iesu.
’E nō te Mesia ’outou na, e huā’ai ïa ’outou nō Aberahama, ’e e feiā ’āi’a ïa i tei parauhia mai ra ».(Galatia 3:27–29).
Nō reira, e nehenehe tātou e riro ’ei feiā ’āi’a nō te fafaura’a nā roto i te fānaura’a ’aore rā nā roto i te fa’a’amura’a.
’Ia rave ana’e tātou i te hō’ē fafaura’a ’e te Atua, tē fa’aru’e ra ïa tātou i te rēni rōpū e a muri noa atu. E’ita te Atua e fa’aru’e i tōna tā’amura’a i te feiā tei hāmani i te reira huru natira’a ’e ’ōna.
’Ua fānauhia te tamaiti a Isa’aka ’e o Rebeka, ’o Iakoba, i roto i te fafaura’a. Ta’a ’ē atu i te reira, ’ua mā’iti ’oia e tomo i roto nā roto i tōna iho hina’aro. Mai tā ’outou i ’ite, ’ua tauihia te i’oa o Iakoba ia ’Īsera’ela (hi’o Genese 32:28), ’oia ho’i, « vaiiho i te Atua ’ia upo’oti’a » ’aore rā « e upo’oti’a te ta’ata i ni’a i te Atua ».7
Te tai’o nei tātou i roto i te Exodo ē, « ’Ua mana’o te Atua i tāna faufa’a ia Aberahama, ia Isa’aka, ’e ia Iakoba » (Exodo 2:24). ’Ua parau te Atua i te mau tamari’i a ’Īsera’ela « ’Ia fa’aro’o mau mai ’outou i tā’u reo, ’e ’ia ha’apa’o māite i tā’u ra faufa’a, e riro ïa ’outou ’ei tao’a here rahi nā’u » (Exodo 19:5).
’Ua ’īritihia te parau « tao’a here rahi » mai roto mai i te reo Hebera segullah, ’oia ho’i te hō’ē tao’a faufa’a rahi—hō’ē « tao’a rahi ».8
Tē fa’ati’a nei te buka Deuteronomi i te faufa’a rahi o te fafaura’a. ’Ua ’ite te mau ’āpōsetolo o te faufa’a ’āpī i teie fafaura’a. I muri a’e i tō Petero fa’aorara’a i te hō’ē piri’o’i i ni’a i te mau ta’ahira’a ’ē’a o te hiero, ’ua ha’api’i atura ’oia i te mau ta’ata māta’ita’i nō ni’a ia Iesu. ’Ua parau Petero, « Nā te Atua ’o Aberahama, ’e ’o Isa’aka, ’e ’o Iakoba, nā te Atua ’o tō tātou hui tupuna ra i ha’amana i tāna tamaiti ia Iesu » (Te ’Ohipa 3:13).
’Ua ’ōpani Petero i tāna parau poro’i nā roto i te paraura’a i te mau ta’ata e fa’aro’o ra iāna, « ’O ’outou ho’i tā taua mau peropheta ra tamari’i, ’e nō ’outou ho’i te faufa’a tā te Atua i fa’aau atu i tō tātou hui tupuna ra, ’a nā ’ō ai ia Aberahama ra ē, ’ei tō huā’ai e hope ai te mau fēti’i ato’a o te ao nei i te ora » (Te ’Ohipa 3:25). ’Ua ha’apāpū atu Petero ia rātou ē, te tahi tuha’a o te misiōni a te Mesia ’o te fa’atupura’a ïa i te fafaura’a a te Atua.
’Ua hōro’a te Fatu i te hō’e a’ora’a mai te reira te huru i te mau ta’ata nō Amerika tahito ra. I reira, ’ua parau te Mesia ti’afa’ahou i te ta’ata ’o vai mau rātou. ’Ua parau ’oia :
« E inaha, ’o ’outou ho’i tā taua mau peropheta ra tamari’i ; ’e nō te ’utuāfare o ’Īsera’ela ho’i ’outou ; ’e nō ’outou ho’i te faufa’a tā te Metua i fa’aau mai i tō ’outou hui Metua ra, ’a nā ’ō ai ’oia ia Aberahama ra ē, ’ei tō huā’ai e maita’i ai te mau feti’i ato’a o te ao nei.
« I fa’ati’ahia ’e i tonohia mai na vau e te Metua e ha’amaita’i ia ’outou, ’ia fa’aru’e ’outou ato’a e hope roa’e i tā ’outou parau ’ino ; ’o ’outou te tamari’i i raro a’e i te fafaura’a ra » (3 Nephi 20:25–26).
Tē ’ite ra ānei ’outou i te aura’a o te reira ? Te feiā ha’apa’o i tā rātou mau fafaura’a i te Atua, e riro mai ïa rātou ’ei puai nō te mau vārua pāto’i i te hara! Te feiā ha’apa’o i tā rātou mau fafaura’a, e fāri’i ïa rātou i te pūai nō te pāto’i i te mana tāmau o te ao nei.
Te feiā ha’apa’o i tā rātou mau fafaura’a i te Atua, e riro mai ïa rātou ’ei puai nō te mau vārua pāto’i i te hara! Te feiā e ha’apa’o i tā rātou mau fafaura’a, e fāri’i ïa rātou i te pūai nō te pāto’i i te mana tāmau o te ao nei.
’Ohipa misiōnare : Fa’a’itera’a i te fafaura’a
’Ua fa’aue mai te Fatu ’ia ha’aparare tātou i te ’evanelia ’e ’ia fa’a’ite i te fafaura’a. Nō reira tē vai nei tā tātou mau misiōnare. Tē hina’aro nei ’oia nō tāna mau tamari’i tāta’itahi ’ia fāri’i rātou i te rāve’a nō te mā’iti i te ’evanelia a te Fa’aora ’e ’ia haere nā ni’a i te ’ē’a nō te fafaura’a. Tē hina’aro nei te Atua ’ia fa’atū’ati i te mau ta’ata ato’a i te fafaura’a tāna i rave i tahito ra ’e ’o Aberahama.
Nō reira, ’ua riro te ’ohipa misiōnare ’ei tuha’a faufa’a rahi nō te ha’aputuputura’a ’o ’Īsera’ela. Taua haʼaputuputuraʼa ra, ʼo te ʼohipa faufaʼa roa a’e ïa e tupu nei i niʼa i te fenua nei, i teie mahana. ’Aita e ’ohipa ’ē atu e fa’aauhia i te rahi. ’Aita e ’ohipa ’ē atu e fa’aauhia i te faufa’a. Tei roto te mau misiōnare o te Fatu—tāna mau pipi—i te tītaura’a rahi roa a’e, te ōpuara’a rahi roa a’e, te ’ohipa rahi roa a’e i ni’a i te fenua nei i teie mahana.
Tē vaira rā te tahi mea hau atu—hau rahi roa atu. Tē vai ra te hō’ē hina’aro rahi ’ia ha’aparare i te ’evanelia i te mau ta’ata i te tahi atu pae i te paruru. Tē hina’aro nei te Atua i te mau ta’ata ato’a, i nā pae e piti o te pāruru, ’ia fāna’o i te mau ha’amaita’ira’a o tāna fafaura’a. ’Ua matara te ’ē’a nō te fafaura’a i te mau ta’ata ato’a. Tē tāparu nei mātou i te mau ta’ata ato’a ’ia haere nā ni’a i te reira ’ē’a nā muri iho ia tātou. ’Aita e ’ohipa ’ē atu e ’āmui rahi i te ta’ata. Nō te mea « e aroha tō te Fatu i tē ti’aoro i tōna ra i’oa mo’a ma te ’ā’au hina’aro mau » (Helamana 3:27).
Nō te mea ’ua fa’aho’ihia mai te autahu’ara’a a Melehizedeka, e fāri’i te mau vahine ’e te mau tāne ha’apa’o i te fafaura’a i « te mau ha’amaita’ira’a ato’a i te pae vārua » ’o te ’evanelia (Te Ha’api’ira’aTumu ’e te mau Fafaura’a 107:18 ; reta fa’a’opa i ’āpitihia atu).
I te ha’amo’a-ra’a-hia te hiero nō Kirtland i te matahiti 1836, i raro a’e i te fa’aterera’a a te Fatu, ’ua fā mai Elia. Tāna ’ōpuara’a ? « Nō te fa’afāriu […] i te mau tamari’i i te mau metua » (Te Ha’api’ira’aTumu ’e te mau Fafaura’a Fafau 110:15). ’Ua fā ato’a mai ’o Elia. Tāna ’ōpuara’a ? Nō te hōro’a ia Iosepha Semita ’e ia Olive Kaudere « i te tau tu’ura’a nō te ’evanelia a Aberahama, i te nā ora’a mai ē, i roto ia mātou ’e i tō mātou huā’ai e ha’amaita’ihia ai te mau u’i ato’a i muri iho ia māua » (Te Ha’api’ira’aTumu ’e te mau Fafaura’a 110:12). Nō reira, ’ua hōro’a mai te Fatu ia Iosepha Semita ’e ia Olive Kaudere i te mana o te autahu’ara’a ’e i te ti’ara’a ’ia hōro’a i te mau ha’amaita’ira’a hō’ē roa nō te fafaura’a a Aberahama ia vetahi ’ē.9
I roto i te ’Ēkālesia, tē rātere nei tātou tāta’itahi, ’e ma te ’āmui pā’āto’a nā ni’a i te ē’a nō te fafaura’a. Mai te mau fa’aipoipora’a ’e te mau ’utuāfare e fa’a’ite nei i te hō’ē tā’amura’a nā te hiti ’o tē fa’atupu i te hō’ē here ta’a ’ē, mai te reira ato’a te aura’a ’āpī e tupu mai ’ia ru’uru’u ’āfaro ti’a ana’e tātou ia tātou iho nā roto i te fafaura’a i tō tātou Atua !
Teie paha tā Nephi i hina’aro e parau ’a nā ’ō ai ’oia ē, « Nāna ho’i e aroha i te ta’ata e hina’aro iāna ’ei Atua nō rātou » (1 Nephi 17:40). Te reira mau te tumu, ’ei tuha’a nō te fafaura’a, e roa’a ai te hō’ē aroha ’e te here ta’a ’ē—aore rā hesed—i te mau ta’ata ato’a e tomo i roto i teie tā’amura’a ’e te hereherera’a ’e te Atua, « ’e tausani noa atu i te u’i ra » (Deuteronomi 7:9).
Te ravera’a i te hō’ē fafaura’a ’e te Atua, e taui te reira i tō tātou tā’amura’a ’e ’ōna ’e a muri noa atu. E ha’amaita’i te reira ia tātou i te hō’ē fāito hau atu o te here ’e te aroha.10 E ’ohipa te reira i ni’a i tō tātou huru ’e e nāhea te Atua ’ia tauturu mai ia tātou ia riro mai te huru tā tātou e nehenehe e riro mai. ’Ua fafauhia ia tātou ē, e nehenehe ato’a tātou, e riro ’ei « tao’a here » nāna (Salamo 135:4).
Te mau parau fafau ’e te mau ha’amaita’ira’a
Te feiā e rave i te mau fafaura’a mo’a ’e e ha’apa’o ho’i i te reira, ’ua fafauhia mai ïa ia rātou te ora mure ’ore ’e te fa’ateiteira’a, « te hōro’a hau a’e i te mau hōro’a ato’a a te Atua » (Te Ha’api’ira’aTumu ’e te mau Fafaura’a 14:7). ’O Iesu Mesia te tīa’i nō taua mau fafaura’a ra (hi’o Hebera 7:22 ; 8:6). Te feiā tāpe’a fafaura’a ’o tē here i te Atua ’e ’o tē fa’ati’a iāna ’ia upo’oti’a i ni’a i te mau mea ato’a i roto i tō rātou orara’a, e fa’ariro rātou iāna ’ei fa’aurura’a pūai roa a’e i roto i tō rātou orara’a.
I tō tātou nei ’anotau, ’ua fāna’o tātou ’ia fāri’i i te mau ha’amaita’ira’a pātereāreha ’e ’ia ha’api’i mai i tō tātou tū’atira’a i ni’a i te mau pātereāreha i tahito ra. E hōro’a ato’a mai te reira mau ha’amaita’ira’a i te hō’ē ’itera’a i te mau mea e tīa’i mai ra ia tātou.
Maoti tā tātou fafaura’a i te Atua, e’ita roa ’oia e rohirohi i roto i tāna mau tauto’ora’a nō te tauturu ia tātou, ’e e’ita roa tātou e ha’aparuparu i tōna fa’a’oroma’i aroha ia tātou.
Tē rahi na tō ’oe hina’aro iā’u i teie ? nā David Lindsley
Tō tātou pi’ira’a ’ei ’Īsera’ela fafauhia, ’o te ha’apāpūra’a ïa ē, tē ’ite nei te mau melo ato’a o te ’Ēkālesia i te ’oa’oa ’e i te mau ha’amaita’ira’a e ’āpitihia atu i te ravera’a i te mau fafaura’a ’e te Atua. E pi’ira’a teie nō te fa’aitoito i te mau tāne ’e te mau vahine ha’apa’o fafaura’a ato’a, te tamāroa ’e te tamāhine, ’ia fa’a’ite i te ’evanelia i te feiā ato’a e ti’a mai i mua ’ia rātou. E pi’ira’a ato’a nō te pāturu ’e nō te fa’aitoito i tā tātou mau misiōnare, tei tonohia ’e tei hōro’ahia te mau arata’ira’a nō te bāpetizo ’e nō te tauturu ’ia ha’aputuputu ia ’Īsera’ela, ’ia riro ’āmui ho’i tātou ’ei mau ta’ata nō te Atua ’e e riro ho’i ’oia ’ei Atua nō tātou (hi’o Te Ha’api’ira’aTumu ’e te mau Fafaura’a 42:9).
Te mau tane ato’a ’e te mau vahine ato’a ’o tē ’āmui nei i roto i te mau ’ōro’a o te autahu’ara’a ’e ’o tē rave ’e ’o tē ha’apa’o i te mau fafaura’a ’e te Atua, e fāri’i ’āfaro ti’a ïa rātou i te mana o te Atua. E rave tātou i te i’oa o te Fatu i ni’a ia tātou tāta’itahi. E rave ato’a tātou i tōna i’oa i ni’a iho ia tātou ’ei nūna’a. Te hina’arora’a mau e fa’a’ohipa i te i’oa ti’a o te ’Ēkālesia a Iesu Mesia i te Feiā Mo’a i te mau Mahana Hope’a nei, ’o te hō’ē ïa rāve’a faufa’a rahi nō tātou, ’ei nūna’a, nō te rave i tōna i’oa i ni’a iho ia tātou. ’Oia mau, te mau ’ohipa ’ā’au maita’i ato’a a te ’Ēkālesia a Iesu Mesia i te Feiā Mo’a i te mau Mahana Hope’a nei, ’e a tōna mau melo, e fa’a’itera’a te reira nō te hesed o te Atua.
Nō te aha ’Īserā’ela i ha’apurarahia ai ? Nō te mea ’ua ’ōfati te nūna’a i te mau fa’auera’a ’e ’ua pehi i te mau peropheta. ’Ua pāhono mai te hō’ē Metua here ’e te ’oto ato’a nā roto i te ha’apurarara’a ia ’Īsera’ela i te ātea ’ē roa.11
Terā rā, ’ua ha’apurara ’oia ia rātou ma te hō’ē parau fafau ē, ’ia tae i te hō’ē mahana, e ha’aputuputu-fa’ahou-hia ’o ’Īsera’ela i roto i tōna ’āua.
’Ua hōro’ahia i te ’ōpū o Iuda te hōpoi’a ’ia fa’aineine i te ao nō te tae-mātāmua-ra’a mai o te Fatu. Mai taua ’ōpū ra, ’ua pi’ihia o Maria ’ia riro ’ei metua vahine nō te tamaiti a te Atua.
’Ua hōro’ahia i te ’ōpū o Iosepha, nā roto i tāna tamaiti ’e i tā Asena, ’o Epheraima ’e ’o Manase (hi’o Genese 41:50–52 ; 46:20), te hōpoi’a ’ia arata’i i te ha’aputuputura’a ’o ’Īsera’ela, ’ia fa’aineine i te ao nei nō te Tae-Piti-ra’a mai o te Fatu.
I roto i te hō’ē huru hesed auta’atira’a taime ta’a ’ore, ’ua ti’a mau ïa ’ia hina’aro te Atua e ha’aputuputu ia ’Īsera’ela. ’Oia tō tātou Metua i te ao ra! Tē hina’aro nei ’oia i tāna mau tamari’i tāta’itahi—i nā pae e piti o te pāruru—’ia fa’aro’o i te poro’i o te ’evanelia a Iesu Mesia.
E ’ē’a nō te here
Te ’ē’a nō te fafaura’a e ’ē’a ïa nō te here—taua hesed, fa’ahiahia ra, taua aupurura’a aumihi ra ’e te torora’a i te rima i te tahi ’e te tahi. Te ’itera’a ē, e mea fa’aora ’e e mea fa’ateitei te here. Te ’oa’oa rahi roa a’e tā ’outou e fāri’i ’o te taime ïa e pau roa ’outou i te ’amuhia i te here i te Atua ’e i tāna mau tamari’i ato’a.
Te herera’a i te Atua hau atu i te tahi ta’ata ’aore rā i te tahi atu mea, ’o te reira ïa te huru e hōpoi mai i te hau mau, te tāmāhanahana, te ti’aturi, ’e te ’oa’oa.
Te ’ē’a o te fafaura’a nō ni’a ana’e ïa i tō tātou tā’amura’a ’e t Atua—tō tātou tā’amura’a hesed ’e ’ōna. ’Ia fafau ana’e tātou i te Atua, ’ua rave ïa tātou i te hō’ē fafaura’a ’e ’ōna ’o tē ha’apa’o tāmau noa i tāna parau E rave ’oia i te mau mea ato’a e ti’a iāna ’ia rave, ma te ha’afifi ’ore i tō tātou ti’amāra’a ’ia mā’iti, nō te tauturu ia tātou ia tāpe’a noa i tā tātou parau.
E ha’amata ’e e hope te Buka a Moromona ma te fa’ahiti i teie fafaura’a mure ’ore. Mai te ’api upo’o parau e tae atu i te mau ’itera’a pāpū hope’a a Moromona ’e a Moroni, tē fa’ahiti nei te Buka a Moromona i te parau nō te fafaura’a (hi’o Moromona 5:20 ; 9:37). « Te fāra’a mai o te Buka a Moromona, e tāpa’o fa’a’ite ïa i tō te ao nei ē, ’ua ha’amata te Fatu i te ha’aputuputu ia ’Īserā’ela ’e i te fa’atupu i tāna i fafau ia Aberahama, Isa’aka, ’e Iakoba ».12.
E au mau taea’e e au mau tuahine here, ’ua pi’ihia tātou i roto i teie tau faufa’a rahi i roto i te ’ā’amu o te fenua nei nō te ha’api’i i tō te ao nei nō ni’a i te haviti ’e te mana o te fafaura’a mure ore. Tē ti’aturi nei to tātou Metua i te ao ra ia tātou nō te rave i teie ’ohipa rahi.
’Ua hōro’a-ato’a-hia teie parau poro’i i roto i te hō’ē putuputura’a feiā fa’atere nō te ’āmuira’a rahi i te 31 nō Māti 2022.
© 2022 nā Intellectual Reserve, Inc. Fatura’a pāruruhia. Nene’ihia i te Fenua Marite. Parau fa’ati’a nō te reo peretāne : 6/19. Parau fa’ati’a nō te ’īritira’a : 6/19. ’Īritira’a nō Monthly Liahona Message, October 2022. Tahitian. 17467 895