“Il-Patt ta’ Dejjem,” Liahona, Ott. 2022.
Messaġġ ta’ Kull Xahar mir-rivista Liahona, Ottubru 2022
Il- Patt ta’ Dejjem
Dawk li għamlu patt ma’ Alla għandhom aċċess għal tip speċjali ta’ mħabba u ħniena.
Il-Muelj Ġesù Kristu, ta’ Del Parson
F’din id-dinja mġarrfa bil-gwerra u bi xnihat ta’ gwerra, il-ħtieġa għall-verità, id-dawl, u l-imħabba pura ta’ Ġesù Kristu hija ikbar minn qatt qabel. L-evanġelju ta’ Kristu huwa glorjuż, u aħna mberkin li nistudjawh u li ngħixu skont il-preċetti tiegħu. Aħna nifirħu fl-opportunitajiet tagħna li nixxerjawh—biex nixhdu dwar il-veritajiet tiegħu nkunu fejn inkunu.
Jien tkellimt spiss dwar l-importanza tal-patt Abrahamiku u l-ġabra ta’ Iżrael. Meta nħaddnu l-evanġelju u nitgħammdu, aħna nieħdu fuqna nfusna l-isem sagru ta’ Ġesù Kristu. Il-magħmudija hija l-bieb li jwassal biex insiru werrieta konġunta għall-wegħdiet kollha li ngħataw fil-qedem mingħand il-Mulej lil Abraham, Iżakk, Ġakobb, u lill-posterità tagħhom. 1
“Il-patt ġdid u għal dejjem”2(Doctrine and Covenants 132:6) u l-patt Abrahamiku huma essenzjalment l-istess—żewġ modi kif nesprimu fi kliem il-patt li Alla għamel ma’ rġiel u nisa mortali fi żminijiet differenti.
Il-frażi ta’ dejjem tindika li dan il-patt eżista saħansitra qabel il-ħolqien tad-dinja! Il-pjan imfassal fil-Kunsill il-Kbir fis-Smewwiet inkluda r-realizzazzjoni xejn ħafifa li aħna lkoll se nkunu maqtugħin mill-preżenza ta’ Alla. Madanakollu, Alla wiegħed li Huwa kien se jipprovdi Salvatur li kellu jegħleb il-konsegwenzi tal-Waqgħa. Alla qal lil Adam wara l-magħmudija tiegħu:
“Inti int fl-ordni ta’ dak li kien mingħajr bidu ta’ jiem jew tmiem ta’ snin, minn kull eternità sa kull eternità.
Ara, inti ħaġa waħda fija, iben Alla; u hekk ħalli jsiru kollha wliedi” (Moses 6:67–68).
Adam u Eva aċċettaw l-ordinanza tal-magħmudija u bdew il-proċess li jkunu ħaġa waħda ma’ Alla. Huma kienu daħlu fit-triq tal-patt.
Meta intom u jien nidħlu wkoll f’dik it-triq, aħna jkollna mod ġdid ta’ ħajja. Aħna b’dan il-mod noħolqu relazzjoni ma’ Alla li tippermettilu li jberikna u jbiddilna. It-triq tal-patt twassalna lura għandu. Jekk inħallu lil Alla jiddomina f’ħajjitna, dak il-patt iressaqna eqreb u eqreb lejh. Il-patti kollha huma intenzjonati li jorbtu. Huma joħolqu relazzjoni b’irbit għal dejjem.
Imħabba u Ħniena Speċjali
La darba nagħmla patt ma’ Alla, qatt iżjed ma nistgħu nerġgħu lura. Alla mhux se jabbanduna r-relazzjoni tiegħu ma’ dawk li jkunu sawru relazzjoni bħal din miegħu. Fil-fatt, dawk kollha li għamlu patt ma’ Alla għandhom aċċess għal tip speċjali ta’ mħabba u ħniena. Fil-lingwa Ebrajka, dik l-imħabba tal-patt tissejjaħ ħesed.(חֶסֶד)3
Ħesed m’għandhiex kelma adegwatament ekwivalenti fil-lingwa Ingliża. It-tradutturi tal-Verżjoni King James tal-Bibbja kellhom probabbli jitħabtu biex sabu kif se jaqilbu ħesed bl-Ingliż. Ta’ spiss għażlu “lovingkindness.” Din taqbad ħafna mit-tifsira ta’ ħesed iżda mhux kollox. Intużaw traduzzjonijiet oħrajn, bħal “mercy” u “goodness”. Ħesed hija kelma unika li tiddeskrivi relazzjoni ta’ patt fejn iż-zewġ partijiet huma marbutin li jkunu leali ma’, u fidili lejn, xulxin.
Żwieġ ċelestjali huwa relezzjoni tal-patt ta’ dan it-tip. Raġel u mara miżżewġin jagħmlu patt ma’ Alla u ma’ xulxin li jkunu leali ma’, u fidili lejn, xulxin.
Ħesed hija tip speċjali ta’ mħabba u ħniena li Alla jħoss għal, u jestendi ma’, dawk li jagħmlu patt miegħu. U aħna nirriċiprokaw b’ ħesed għalih.
La darba intom u jien għamilna patt ma’ Alla, ir-relazzjoni tagħna miegħu ssir ħafna eqreb milli kienet qabel il-patt tagħna. Issa aħna marbutin flimkien.
Ritratt ta’ Jerry L. Garns
Peress li Alla għandu ħesed għal dawk li għamlu patt miegħu, Huwa jħobbhom. Huwa jibqa’ jaħdem magħhom u joffrilhom opportunitajiet biex jinbidlu. Huwa jaħfrilhom meta huma jindbu. U kieku kellhom jitbiegħdu, huwa jgħinhom isibu t-triq lura lejh.
La darba intom u jien għamilna patt ma’ Alla, ir-relazzjoni tagħna miegħu ssir ħafna eqreb minn kif kienet qabel il-patt. Issa aħna marbutin flimkien. Minħabba l-patt tagħna ma’ Alla, Huwa qatt mhu se jegħja fl-isforzi tiegħu biex jgħinna, u aħna qatt m’aħna se naħlu s-sabar mimli ħniena tiegħu għalina. Kollha kemm aħna għandna post speċjali fil-qalb ta’ Alla. Huwa għandu tamiet kbar għalina.
Tafuha d-dikjarazzjoni storika li l-Mulej ta lill-Profeta Joseph Smith. Hija ġiet b’rivelazzjoni. Il-Mulej qal lil Joseph, “Din il-wegħda hija tiegħek ukoll, għaliex inti ta’ Abraham, u l-wegħda saret ma’ Abraham” (Doctrine and Covenants 132:31).
Għaldaqstant, il-patt ta’ dejjem kien irrestawrat bħala parti mr-Restawrazzjoni kbira tal-evanġelju fil-milja tiegħu. Aħsbu ftit dwar dan! Patt taż-żwieġ magħmul fit-tempju huwa marbut direttament ma’ dak il-patt Abrahamiku. Fit-tempju l-koppja hija introdotta mal-barkiet kollha irriservati għall-posterità fidila ta’ Abraham, Iżakk, u Ġakobb.
Kif għamel Adam, intom u jien personalment dħalna fit-triq tal-patt permezz tal-magħmudija. Imbagħad nidħlu fiha iktar bis-sħiħ ġewwa t-tempju. Il-barkiet tal-patt Abrahamiku jingħataw f’tempji mqaddsa. Dawn il-barkiet jippermettulna, hekk kif niġu mqajmin mill-imwiet, li “nirtu t-tronijiet, is-saltniet, il-qawwiet, il-prinċipalitajiet, u d-dominji, għal ‘l-eżaltazzjoni u l-glorja tagħna fil-ħwejjeġ kollha’ [Doctrine and Covenants 132:19].”4
Fit-test li jagħlaq it-Testment il-Qadim, aħna naqraw dwar kif il-wegħda ta’ Malakija li Elija se “jraġġa’ qalb il-missirijiet lejn uliedhom, u qalb l-ulied lejn missirijiethom” (Malakija 4:6). F’iżrael tal-qedem, dawn it-tip ta’ referenzi għall-missirijiet kienu jinkludu l-missirijiet Abraham, Iżakk, u Ġakobb. Din il-wegħda hija kkjarifikata meta aħna naqraw il-verżjoni differenti ta’ dan il-vers ikkwotata minn Moroni lill-Profeta Joseph Smith: “Hu [Elija] se jiżra’ f’qalb l-ulied il-wegħdiet li saru lill-missirijiet, u se jraġġa’ l-qlub tal-ulied lejn missirijiethom” (Joseph Smith—History 1:39). Dawk il-missirijiet żgur jinkludu lil Abraham, Iżakk, u Ġakobb. (Ara Doctrine and Covenants 27:9-10.)
Dawk li jagħmlu patti sagri u jżommuhom huma mwegħdin ħajja eterna u eżaltazzjoni. Ġesù Kristu huwa l-garanti ta’ dawk il-patti.
Dettal minn Kristu u ż-Żagħżugħ Għani, ta’ Heinrich Hofmann.
Ġesù Kristu: Iċ-Ċentru tal-Patt
Is-sagrifiċċju tal-espjazzjoni tas-Salvatur ippermetta lill-Missier biex iwettaq il-wegħdiet tiegħu magħmulin lil uliedu. Peress li Ġesù Kristu huwa “it-triq, il-verità u l-ħajja,” ifisser li “ħadd ma jmur għand il-Missier jekk mhux permezz [tiegħu]” (Ġwanni 14:6). It-twettiq tal-patt Abrahamiku jsir possibbli minħabba l-Espjazzjoni tas-Salvatur tagħna, il-Mulej Ġesù Kristu. Ġesù Kristu huwa fiċ-ċentru tal-patt Abrahamiku.
It-Testment il-Qadim mhuwiex biss ktieb ta’ skrittura; huwa wkoll ktieb ta’ storja. Tiftakruha l-istorja li qrajtu dwar iż-żwieġ bejn Saraj u Abram. Peress li ma kellhomx tfal, Saraj tat il-qaddejja tagħha, Ħagar, biex tkun mart Abram ukoll, skont id-direzzjoni tal-Mulej. Ħagar welldet lil Ismagħel.5 Abram kien iħobb lil Ismagħel, imma dan ma kellux ikun l-iben li minnu l-patt kellu jgħaddi. (Ara Ġwanni 11:29–30; 16:1, 3, 11; Doctrine and Covenants 132:34.)
Bħala barka minn Alla, u bi tweġiba għall-fidi ta’ Saraj, 6 hija kkonċepiet fl-età avvanzata tagħha, sabiex il-patt seta’ jgħaddi minn l-iben tagħha, Iżakk (ara Ġenesi 17:19). Huwa twieled fil-patt.
Alla ta ismijiet ġodda lil Saraj u Abram—Sara u Abraham (ara Ġenesi 17:5, 15). L-għotja ta’ dawk iż-żewġ ismijiet immarkat il-bidu ta’ ħajja ġdida u destin ġdid għal din il-familja.
Abraham kien iħobb kemm lil Ismagħel u kemm lil Iżakk. Alla qal lil Abraham li Ismagħel kien se jitkattar u jsir ġens kbir (ara Ġenesi 17:20). Fl-istess ħin, Alla għamilha ċara li l-patt ta’ dejjem kien se jitwaqqaf permezz ta’ Iżakk (ara Ġenesi 17:19).
Dawk kollha li aċċettaw l-evanġelju jsiru parti min-nisel ta’ Abraham. Fil-Galatin naqraw:
“Intom, li intom mgħammda fi Kristu, ilbistu ’l Kristu.
“… Intom ilkoll ħaġa waħda fi Kristu Ġesù.
“Imma jekk intom ta’ Kristu, intom ukoll nisel Abraham, werrieta skont il-wegħda” (Galatin 3:27-29).
Għalhekk, nistgħu nsiru werrieta tal-patt sew bin-nisel u sew bl-adozzjoni.
La darba nagħmlu patt ma’ Alla, qatt iżjed ma nistgħu nerġgħu lura. Alla mhux se jabbanduna r-relazzjoni tiegħu ma’ dawk li jkunu sawru din it-tip ta’ rabta miegħu.
Iben Iżakk u Rebekka, Ġakobb, twieled fil-patt. Barra minn hekk, huwa għażel li jidħol minn rajh. Kif tafu, isem Ġakobb ġie mibdul għal Iżrael (ara Ġenesi 32:28), li jfisser “ħallu lil Alla jiddomina” jew “wieħed li jiddomina ma’ Alla.” 7
Fl-Eżodu aħna naqraw li “Alla ftakar fil-patt tiegħu ma’ Abraham, ma’ Iżakk, u ma’ Ġakobb” (Eżodu 2:24). Alla qal lil ulied Iżrael, “Issa, jekk tisimgħu leħni u żżommu l-patt tiegħi, intom tkunu l-wirt tiegħi” (Eżodu 19;5).
Il-frażi “l-wirt tiegħi” kienet tradotta mill-Ebrajk segullah, li tfisser possessjoni ta’ valur kbir— “teżor.”8
Il-ktieb tad-Dewteronomju jirrakkonta l-importanza tal-patt. L-Appostli tat-Testment il-Ġdid kienu jafu b’dan il-patt. Wara li Pietru kien fejjaq raġel zopp fuq it-taraġ tat-tempju, huwa għallem lil dawk li kienu hemm dwar Ġesù. Pietru qal, “Alla ta’ Abraham, Alla ta’ Iżakk, u Alla ta’ Ġakobb, Alla ta’ missirijietna gglorifika lill-qaddej tiegħu, Ġesù” (Atti 3:13).
Pietru għalaq il-messaġġ tiegħu billi qal lill-udjenza tiegħu, “Intom ulied il-profeti u werrieta tal-patt li Alla għamel ma’ missirijietkom meta qal lil Abraham, ‘F’nislek jitbierku l-ġnus kollha tal-art” (Atti 3:25). Pietru għamilha ċara magħhom li parti mill-missjoni ta’ Kristu kienet li jwettaq il-patt ta’ Alla.
Il-Mulej għamel diskors simili lill-poplu tal-Amerka tal-qedem. Hemmhekk, Kristu mqajjem mill-imwiet qal lill-poplu min fil-fatt kienu. Huwa qal:
“Intom ulied il-profeti; u intom mid-dar ta’ Iżrael; u werrieta tal-patt li l-Missier għamel ma’ missirijietkom meta qal lil Abraham, ‘F’nislek jitbierku l-ġnus kollha tal-art.
“Il-Missier wara li qajjimni għalikom l-ewwel, u bagħatni biex inberikkom biex inbiegħed lil kull wieħed minnkom minn ħżunitkom; u dan għaliex intom ulied il-patt” (3 Nephi 20:25–26).
Tarawh is-sinifikat ta’ dan? Dawk li jħarsu l-patti tagħhom ma’ Alla se jsiru razza ta’ erwieħ reżistenti għad-dnub! Dawk li jħarsu l-patti tagħhom se jkollhom il-qawwa li jirreżistu l-influwenza kostanti tad-diinja.
Dawk li jħarsu l-patti tagħhom ma’ Alla se jsiru razza ta’ erwieħ reżistenti għad-dnub! Dawk li jħarsu l-patti tagħhom se jkollhom il-qawwa li jirreżistu l-influwenza kostanti tad-diinja.
Ħidma Missjunarja: Nixxerjaw il-Patt
Il-Mulej ikkmanda li aħna nxerrdu l-evanġelju u nixxerjaw il-patt. Hu għalhekk li għandna l-missjunarji. Huwa jixtieq li wliedu kollha jkollhom l-opportunità li jagħżlu l-evanġelju tas-Salvatur u jmorru għal għonq triq il-patt. Alla jrid li jikkonnettja lin-nies kollha mal-patt li Hu għamel fil-qedem ma’ Abraham.
Għaldaqstant, il-ħidma missjunarja hija parti essenzjali tal-ġabra kbira ta’ Iżrael. Dik il-ġabra hija l-aktar ħaġa importanti li qed isseħħ illum fid-dinja. Xejn iżjed ma jikkompara fil-kobor. Xejn iżjed ma jikkompara fl-importanza. Il-missjunarji tal-Mulej—id-dixxipli tiegħu—huma ingaġġati fl-ikbar sfida, fl-ikbar kawża, l-ikbar ħidma fid-dinja llum.
Iżda hemm xi ħaġa aktar minn hekk—ħafna iktar. Hemm il-bżonn kbir li jinxtered l-evanġelju lil nies fuq in-naħa l-oħra tal-velu. Alla jrid lil kulħadd, fuq iż-żewġ naħat tal-velu, igawdi l-barkiet tal-patt tiegħu. It-triq tal-patt hija miftuħa għal kulħadd. Nitolbu lil kulħadd biex timxu dik it-triq magħna. L-ebda ħidma oħra ma hija daqstant inklussiva universalment. Għax “il-Mulej huwa ħanin ma’ dawk kollha li, fis-sinċerità ta’ qalbhom, isejħu l-isem qaddis tiegħu” (Helaman 3:27).
Minħabba li s-saċerdozju ta’ Melkisedek ġie rrestawrat, nisa u rġiel li jħarsu l-patti għandhom aċċess għall- “barkiet spiritwali kollha tal-evanġelju (Doctrine and Covenants 107:18; enfasi miżjuda).
Fid-dedikazzjoni tat-Tempju ta’ Kirtland fl-1836, taħt id-direzzjoni tal-Mulej, deher Elija. L-għan tiegħu? “Li jreġġa’ … l-ulied lejn missirijethom” (Doctrine and Covenants 110:15). Deher ukoll Elijas. L-għan tiegħu? Biex jafda lil Joseph Smith u lil Oliver Cowdery “id-dispensazzjoni tal-evanġelju ta’ Abraham, fejn iddikjara li fina u fin-nisel tagħna l-ġenerazzjonijiet kollha li ġejjin warajna se jkunu mberkin” (Doctrine and Covenants 110:12). Għaldaqstant, l-Imgħallem għadda lil Joseph Smith u Oliver Cowdery l-awtorità tas-saċerdozju u d-dritt li jgħaddu l-barkiet uniċi tal-patt Abrahamiku lil oħrajn.9
Fil-Knisja, aħna nivvjaġġaw fuq it-triq tal-patt kemm individwalment u kemm kollettivament. Bħalma ż-żwiġijiet u l-familji jixxerjaw rabta għall-wisa’ unika li toħloq imħabba speċjali, l-istess tagħmel ir-relazzjoni ġdida msawra meta aħna norbtu lilna nfusna għat-tul permezz ta’ patt ma’ Alla tagħna!
Forsi dan hu dak li ried ifisser Nefi meta qal li Alla “jħobb lil dawk li jriduh ikun Alla tagħhom” (1 Nefi 17:40). Dan huwa eżattament għala, bħala parti mill-patt, ħniena u mħabba speċjali—jew ħesed—hija disponibbli għal dawk kollha li jidħlu f’din ir-relazzjoni li torbot u intima ma’ Alla, saħansitra “għal elf nisel” Dewteronomju 7:9).
Li tagħmel patt ma’ Alla jibdel ir-relazzjoni tagħna miegħu għal dejjem. Dan iberikna b’doża aqwa ta’ mħabba u ħniena.10 Jaffettwa min aħna u kif Alla se jgħinna nkunu dak li nistgħu nkunu. Aħna mwegħdin li aħna, ukoll, nistgħu nkunu “teżor speċjali” għalih (Salmi 135:4).
Wegħdiet u Privileġġi
Dawk li jagħmlu patti sagri u jħarsuhom huma mwegħdin ħajja eterna u l-eżaltazzjoni, “l-akbar fost ir-rigali kollha ta’ Alla” (Doctrine and Covenants 14:7). Ġesù Kristu huwa l-garanti ta’ dawk il-patti (ara Lhud 7:22; 8:6). Dawk li jħarsu l-patti u li jħobbu lil Alla u jħalluh jiddomina fl-affarjiet kollha ta’ ħajjithom jagħmluh i-iktar influwenza qawwija f’ħajjithom.
Fi żmienna aħna privileġġjati li nirċievu barkiet patrijarkali u nitgħallmu dwar il-konnessjonijiet tagħna mal-patrijarki tal-qedem. Dawk il-barkiet jipprovdu wkoll ħarsa lejn il-ġejjieni.
Minħabba l-patt tagħna ma’ Alla, huwa qatt mhu se jegħja fl-isforzi tiegħu biex jgħinna, u aħna qatt m’aħna se naħlu s-sabar tiegħu kollu ħniena għalina.
Lovest Thou Me More Than These? ta’ David Lindsley
Is-sejħa tagħna bħala patt ta’ Iżrael hija li nassiguraw li kull membru tal-Knisja jirrealizza l-ferħ u l-privileġġi assoċjati mal-għemil tal-patti ma’ Alla. Hija sejħa li tinkoraġġixxi kull raġel u mara , u kull tifel u tifla li jħarsu l-patti, sabiex dawn jaqsmu l-evanġelju ma’ dawk li jiġu fl-isfera tal-influwenza tagħhom. Hija wkoll sejħa biex nissapportjaw u ninkoraġġixxu lill-missjunarji tagħna, li jintbagħtu b’istruzzjonijiet biex jgħammdu u jgħinu ħalli jinġabar Iżrael, sabiex flimkien aħna nkunu l-poplu ta’ Alla u Hu jkun Alla tagħna (ara Doctrine and Covenants 42:9).
Kull min jipparteċipa fl-ordinanzi tas-saċerdozju, sew jekk raġel, sew jekk mara, u li jagħmel l-patti ma’ Alla u jħarishom għandu aċċess dirett lejn il-qawwa ta’ Alla. Aħna nieħdu isem Alla fuqna nfusna bħala individwi. Nieħdu wkoll ismu fuqna nfusna bħala poplu. Li nkunu passjonali dwar l-użu korrett tal-Knisja ta’ Ġesù Kristu tal-Qaddisin tal-Aħħar Żmien huwa mod vitali kif aħna bħala poplu nieħdu fuqna. Sewwasew, kull att benevolenti tal-Knisja ta’ Ġesù Kristu tal-Qaddisin tal-Aħħar Żmien u l-membri tagħha huwa espressjoni tal-ħesed ta’ Alla.
Għalfejn Iżrael kien imxerred? Għaliex il-poplu ma ħarisx il-kmandamenti u ħaġġar lill-profeti. Missier kollu mħabba u mimli bin-niket wieġeb billi ferrex lil Iżrael ma’ kull naħa.11
Madanakollu, huwa ferrixhom bil-wegħda li xi darba Iżrael kellu jinġabar mill-ġdid fl-għalqa tiegħu.
It-tribù ta’ Ġuda ngħata r-responsabbiltà li jipprepara d-dinja għall-ewwel miġja tal-Mulej. Minn dak it-tribù, Marija ssejjħet biex tkun omm l-Iben ta’ Alla.
It-tribù ta’ Ġużeppi, permezz tal-ulied tiegħu u ta’ Asenat, Efrajm u Manassi (ara Ġenesi 41:50–52; 46:20), ingħata r-responsabbiltà biex imexxi l-ġabra ta’ Iżrael, ħalli jħejji lid-dinja għat-Tieni Miġja tal-Mulej.
F’din ir-relazzjoni ta’ ħesed, relazzjoni bla kont ta’ żmien, hija ħaġa naturali li Alla jrid li jiġbor flimkien lil Iżrael. Huwa Missierna tas-Smewwiet! Huwa jrid li uliedu kollha—fuq iż-żewġ naħat tal-velu— jisimgħu l-messaġġ tal-evanġelju rrestawrat ta’ Ġesù Kristu.
Triq ta’ Mħabba
It-triq tal-patt hija triq ta’ mħabba— dik il-ħesed inkredibbli, li nieħdu ħsieb xulxin b’mod sensittiv u naraw li ta’ madwarna ma jonqoshom xejn. Li tħoss dik l-imħabba jilliberak u jelevak. L-ikbar hena li tista’ qatt tesperjenza huwa meta inti timtela bl-imħabba għal Alla u għal uliedu kollha.
Li tħobb lil Alla iktar minn kulħadd u kull ħaġa oħra hija l-kondizzjoni li ġġib il-vera paċi, il-faraġ, il-kunfidenza, u l-hena.
Fil-qofol tagħha, it-triq tal-patt hija dwar ir-relazzjoni tagħna ma’ Alla— ir-relazzjoni ħesed tagħna miegħu. Meta nidħlu f’patt ma’ Alla, aħna nkunu għamilna patt ma’ Dak li dejjem iżomm il-kelma tiegħu. Huwa jagħmel dak kollu li jista’, mingħajr ma joħnoq il-volontà tagħna, biex jgħinna nżommu tagħna.
Il-Ktieb ta’ Mormon jibda u jispiċċa b’referenza għal dan il-patt ta’ dejjem. Mill-paġna tat-titlu sat-testimonjanzi fl-aħħar ta’ Mormon u Moroni, il-ktieb ta’ Mormon jagħmel referenza għall-patt (ara Mormon 5:20; 9:37). “Il-miġja tal-Ktieb ta’ Mormon huwa sinjal lid-dinja kollha li l-Mulej beda jiġbor lil Iżrael u jwettaq il-patti li hu għamel ma’ Abraham, Iżakk, u Ġakobb.”12
Għeżież ħuti, aħna ġejna msejħin f’dan iż-żmien kruċjali fl-istorja ta’ did-dinja biex ngħallmu lid-dinja dwar il-ġmiel u l-qawwa tal-patt ta’ dejjem. Missierna fis-Smewwiet jafdana impliċitament li nagħmlu din il-ħidma kbira.
Dan il-messaġġ ngħata wkoll waqt laqgħa għat-tmexxija fil-konferenza ġenerali nhar il-31 ta’ Marzu, 2022.
© 2022 minn Intellectual Reserve, Inc. Id-drittijiet kollha riservati. Stampat fl-Istat Uniti. Approvazzjoni bl-Ingliż: 6/19. Approvazzjoni tat-traduzzjoni: 6/19. Traduzzjoni ta’ Monthly Liahona Message, October 2022. Maltese. 18317 159