“Cov Ntaub Ntawv rau cov Tub Hluas Ntxhais Hluas thiab cov Me Nyuam,” Liyahaunas, Ob Hlis Ntuj 2023.
Zaj Lus hauv phau Liyahaunas Txhua Hli, Ob Hlis Ntuj 2023
Cov Ntaub Ntawv rau cov Tub Hluas Ntxhais Hluas thiab cov Me Nyuam
Cov niam tsev txiv tsev muaj kev lav ris qhia lawv cov me nyuam txog Yexus Khetos thiab Nws txoj moo zoo. Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg muaj koom haum, tej txheej xwm, thiab lwm yam kev pab uas pab tau cov niam tsev txiv tsev. Cov niam tsev txiv tsev, nrog cov thawj coj ntawm lub Koom Txoos, thiab cov phooj ywg pab tau tag nrho cov me nyuam thiab cov tub hluas ntxhais hluas los cuag Khetos.
Daim duab los ntawm Ben Johnson
Koom Haum Me Nyuam Yaus
Koom Haum Me Nyuam Yaus yog lub Koom Txoos lub koom haum rau cov me nyuam uas muaj hnub nyoog 18 hli mus rau 11 xyoos. Hauv lub Koom Haum Me Nyuam Yaus, cov me nyuam kawm txog Yexus Khetos thiab Nws txoj moo zoo los ntawm tej zaj lus qhia, cov nkauj, thiab tej yam ntxim saib ntxim ua. Lub Koom Haum Me Nyuam Yaus pab tau cov me nyuam paub txog Vajtswv txoj kev hlub rau lawv.
Tej Pawg Pov Thawj Hwj Aloos, thiab Koom Haum Ntxhais Hluas tej Pawg
Pib thaum lub Ib Hlis Ntuj ntawm xyoos uas cov me nyuam yuav muaj 12 xyoos, yuav tawm ntawm Koom Haum Me Nyuam Yaus mus rau tej Pawg Pov Thawj Hawj Aloos (rau cov tub) los sis lub Koom Haum Ntxhais Hluas tej Pawg (rau cov ntxhais). Nyob hauv lawv cov koom haum thiab pawg, cov tub hluas ntxhais hluas rau siab ua kom lawv zaj lus tim khawv muaj dag zog ntxiv thiab pab lwm tus.
Lub Txheej Xwm rau cov Me Nyuam thiab cov Tub Hluas Ntxhais Hluas
Thaum Nws tseem hluas, Yexus Khetos tau “loj hlob zoo thiab muaj tswv yim, nws ua haum Vajtswv siab thiab haum neeg siab” (Lukas 2:52). Lub txheej xwm rau cov Me Nyuam thiab cov Tub Hluas Ntxhais Hluas pab lub Koom Txoos cov mej zeej hluas ua raws li Yexus Khetos tus yam ntxwv . Lawv kawm thiab loj hlob txhua yam hauv lawv lub neej—ntawm sab ntsuj plig, kev sib raug zoo, sab cev nqaij daim tawv, thiab kev txawj ntse.
Lub Koom Txoos cov Ntawv Xov Xwm
Lub Koom Txoos cov ntawv xov xwm rau me nyuam yaus yog phau ntawv xov xwm Phooj Ywg. Phau ntawv xov xwm Ntxiv Dag Zog rau cov Tub Hluas Ntxhais Hluas yog rau cov tub hluas ntxhais hluas. Ob phau xov xwm no muaj dab neeg, tej lus qhia, thiab tej yam ua sau rau cov me nyuam thiab cov tub hluas nxthais hluas.
Phau Ntawv Coj Kev Ntxiv Dag Zog rau cov Tub Hluas Ntxhais Hluas
Ntxiv Dag Zog rau cov Tub Hluas Ntxhais Hluas: Phau Ntawv Coj Kev Pab Neeg Xaiv qhia cov tub hluas ntxhais hluas txog qhov tseeb ntawm txoj moo zoo. Phau ntawv ntawd qhia lawv paub txiav txim siab thiaj pab lawv coj raws li Yexus Khetos. Phau ntawv ntawd kuj muaj tej lus teb rau tej yam uas cov tub hluas ntxhais hluas nug txog kev ua neej raws li txoj moo zoo.
Txoj Moo Zoo cov Ntawv
Txoj Moo Zoo cov Ntawv muaj ntau yam pab uas yog hom digital, xws li cov vidi-aus, cov nkauj, cov dab neeg hauv vaj lug kub, thiab tej yam ua. Kuj muaj tej yam pab cov niam tsev txiv tsev thiab cov thawj coj qhia tej ntsiab cai ntawm txoj moo zoo. Nrhiav tau tej yam pab no hauv Txoj Moo Zoo cov Ntawv uas nyob hauv ChurchofJesusChrist.org thiab hauv qhov app Txoj Moo Zoo cov Ntawv.
Rooj Sab Laj rau cov Hluas FSY
Pib thaum xyoo uas lawv yuav muaj 14 xyoo, cov tub hluas ntxhais hluas mus tau tej rooj sab laj Ntxiv Dag Zog rau cov Tub Hluas Ntxhais Hluas (For the Strength of Youth, FSY). Nyob hauv tej yam xwm no muaj tej yam ua thiab tej chav kawm uas pab lawv ntseeg Yexus Khetos thiab pab cov tub hluas ntxhais hluas loj hlob tuaj ntawm sab ntsuj plig, kev sib raug zoo, sab cev nqaij daim tawv, thiab kev txawj ntse.
© 2023 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Askiv: 6/19. Pub txhais ua lus Hmoob: 6/19. Kev txhais Monthly Liahona Message, Ob Hlis Ntuj 2023. Language. 18910 295