Parau poro’i tā’āva’e nō te Liahona, Fepuare 2023

Mātēria tauturu nō te feiā ’āpī ’e te mau tamari’i

Tei te mau metua te hōpoi’a mātāmua ’ia ha’api’i i tā rātou mau tamari’i nō ni’a ia Iesu Mesia ’e tāna ’evanelia. Tē vai nei tā Te ’Ēkālesia a Iesu Mesia i te Feiā Mo’a i te mau Mahana Hope’a nei te mau ’āvirira’a, te mau tāpura ’ohipa ’e te tahi atu mau mātēria tauturu nō te mau metua, nō te tauturu i tā rātou mau tauto’ora’a. Ma te ’āmui, e ti’a i te mau metua, te feiā fa’atere o te ’Ēkālesia ’e te mau hoa, e tauturu i te mau tamari’i ato’a ’e te feiā ’āpī ’ia haere mai i te Mesia.

Hōho’a nā Ben Johnson

Paraimere

Te Paraimere ’o te hō’ē ïa ’āvirira’a nā te mau tamari’i 18 ’āva’e ē tae atu i te 11 matahiti. I roto i te Paraimere, e ha’api’i mai te mau tamari’i nō ni’a ia Iesu Mesia ’e tāna ’evanelia nā roto i te mau ha’api’ira’a, te pehe ’e te mau ’ohipa e rave. E tauturu te reira ia rātou ’ia ’ite i te here o te Fatu nō rātou.

Te mau pupu Autahu’ara’a a Aarona ’e te mau piha Feiā ’Āpī Tamāhine

I te ’āva’e Tēnuare o te matahiti e ti’ahia ai tō te mau tamari’i 12 matahiti, e fa’anu’u rātou mai te Paraimere i te mau pupu Autahu’ara’a a Aarona (nō te mau tamāroa), ’aore rā i te mau piha Feiā ’Āpī Tamāhine (nō te mau tamāhine). I roto i tā rātou mau pupu autahu’ara’a ’e piha tamāhine, e tāmau noa te feiā ’āpī i te ha’apūai i tō rātou ’itera’a pāpū ’e i te tāvini ia vetahi ’ē.

Fa’anahora’a Te mau tamari’i ’e te feiā ’āpī

I tōna ’āpīra’a ’ua « tupu [Iesu Mesia] i te rahi ’e te pa’ari, ’e te herehia mai e te Atua ’e te ta’ata ato’a » (Luka 2:52). E tauturu te fa’anahora’a ’ohipa nā te mau tamari’i ’e te feiā ’āpī i te mau taure’are’a o te ’Ēkālesia ’ia pe’e i te hi’ora’a o te Mesia. E ha’api’i mai rātou ’e e tupu ho’i i te rahi i roto i te mau tuha’a ato’a o tō rātou orara’a—i te pae vārua, i te pae sōtiare, i te pae tino, ’e i te pae ferurira’a.

Mau ve’a a te ’Ēkālesia

Te ve’a a te ’Ēkālesia nō te mau tamari’i, ’o te ve’a Hoa ïa. Nō te pūai o te feiā ’āpī, ’o te ve’a ïa nā te feiā ’āpī. Tei roto i teie mau ve’a te mau ’ā’amu, te mau ha’api’ira’a, ’e te mau ’ohipa e rave tei pāpa’i-ta’a-’ē-hia nō te mau tamari’i ’e te feiā ’āpī.

Te buka iti Nō te pūai o te feiā ’āpī

Tē ha’api’i nei te Nō te pūai o te feiā ’āpī : E arata’i nō te rave i te mau mā’itira’a, i te mau parau mau o te ’evanelia. Tē ha’api’i nei te reira ia rātou nāhea i te rave i te mau fa’aotira’a ’o tē tauturu ia rātou ’ia pe’e ia Iesu Mesia. Tei roto ato’a te tahi mau pāhonora’a i te mau uira’a a te feiā ’āpī, e nāheai te ora i te ’evanelia.

Vaira’a buka ’evanelia

E rave rahi mātēria tauturu i roto i te Vaira’a buka ’evanelia, mai te mau vidéo, te pehe, te mau ’ā’amu o te pāpa’ira’a mo’a, ’e te mau ’ohipa e rave. Tei roto ato’a te mau mātēria tauturu nō te mau metua ’e te feiā fa’atere, nō te tauturu ia rātou ’ia ha’api’i i te tamari’i i te mau parau tumu o te ’evanelia. E ’itehia teie mau mātēria tauturu i roto i te Vaira’a buka ’evanelia i ni’a ia ChurchofJesusChrist.org ’e i roto i te fa’aaura’a rorouira Vaira’a buka ’evanelia.

Te mau ’āmuira’a JSF

Ha’amata i te matahiti e rae’ahia tō rātou 14 matahiti, tē anihia nei te feiā ’āpī ’ia haere i te mau ’āmuira’a Nō te pūai o te feiā ’āpī (JSF). Tē vai ra i roto i teie mau fa’anahonahora’a te mau ’ātivite ’e te mau piha ha’api’ira’a ’o tē tauturu i te ha’apūai i te fa’aro’o ia Iesu Mesia ’e i te tauturu i te feiā ’āpī ’ia tupu i te rahi i te pae vārua, i te pae sōtiare, i te pae tino ’e i te pae ferurira’a.

I roto i te mau pāpa’ira’a mo’a

E fāri’i te mau tamari’i i te hau ’a ha’api’i ai tātou ia rātou nō ni’a i te Atua (hi’o Isaia 54:13 ; 3 Nephi 22:13).

E hōpoi’a nā te mau metua ’ia ha’api’i i tā rātou mau tamari’i ’ia hāro’aro’a i te ’evanelia (hi’o Te Ha’api’ira’a Tumu ’e te mau Fafaura’a 68:25).

’Ua fa’auehia te mau metua ’ia ’atu’atu i tā rātou mau tamari’i « i roto i te māramarama ’e te parau mau » (Te Ha’api’ira’a Tumu ’e te mau Fafaura’a 93:40).

Te mau mātēria rorouira nā te mau tamari’i

Mau ’ā’amu o te pāpa’ira’a mo’a (scripturestories.ChurchofJesusChrist.org) : ’A hi’o mai i te mau ’api nō te fa’a’ūra’a, te mau video ’e te mau ’ā’amu pāpa’ira’a mo’a tei pāpa’ihia nō te feiā ’āpī e tai’o nei.

Mau video (ChurchofJesusChrist.org/children/videos) : Māta’ita’i i te mau vidéo nā te mau ’e nō ni’a i te mau tamari’i.

Ha’aputura’a nā te mau tamari’i i roto i te Vaira’a buka ’evanelia : I roto i te fa’aaura’a rorouira ’e i ni’a ia ChurchofJesusChrist.org, tē vai nei i roto i te ha’aputura’a nō te Vaira’a buka ’evanelia, i raro a’e i te upo’o parau « Children (Tamari’i) », te pehe, te video, te mau ’ā’amu ’e te tahi atu mau ’ohipa e rave.

Ha’api’i rahi atu ā

Mai te mea e uira’a tā ’outou nō ni’a i te mau mātēria a te ’Ēkālesia nō te mau tamari’i ’e te feiā ’āpī, e ’āparau atu i tō ’outou mau taea’e aupuru, ’aore rā mau tuahine aupuru, te feiā fa’atere nō tā ’outou pāroita ’aore rā ’āma’a, ’aore rā te mau misiōnare. E ’ite-ato’a-hia ia ’outou e rave rahi rave’a tauturu i ChurchofJesusChrist.org.

© 2023 nā Intellectual Reserve, Inc. Fatura’a pāruruhia. Nene’ihia i te Fenua Marite. Parau fa’ati’a nō te reo peretāne : 6/19. Parau fa’ati’a nō te ’īritira’a : 6/19. ’Īritira’a nō Monthly Liahona Message, February 2023. Language. 18910 895