Digital Lamang: Mga Young Adult
Unsaon Nako nga Makasinati og Kamaya sa Ebanghelyo kon dunay Sakit sa Pangisip?
Nakigbisog ko sa akong sakit sa pangisip sa akong tibuok nga kinabuhi, apan usa ka kausaban sa panglantaw mipakita nako kon unsa ka dako ang akong pag-uswag pinaagi sa pakigbisog.
Ang akong kinabuhi dili kanunay sayon. Nagsugod ko sa pagsinati og mga simtoma sa sosyal nga kabalaka ug depresyon isip usa ka tin-edyer ug nadayagnos nga adunay ADHD sa high school. Sa dihang ako hapit na mag-15 ka bulan nga nagserbisyo sa akong full-time nga misyon, nagsugod ko sa pagsinati og mga hunahuna sa paghikog. Sa wala madugay, nadayagnos ko nga adunay sakit nga bipolar II.
Nakita nako ang akong kaugalingon nga nag-atubang og malisod nga desisyon. Ang akong presidente sa misyon ug ako nag-istorya mahitungod nako nga mopauli aron ako makakuha og tabang nga akong gikinahanglan. Apan ako dili makapugong nga nahiubos sa Ginoo. Gibati nako nga ang akong tinguha nga magpabilin ug magpadayon sa pagserbisyo sa mga tawo nga akong nakat-onan sa paghigugma usa ka matarong nga tinguha.
Sa kataposan, akong nahibaloan nga adunay mga tawo nga gusto sa Ginoo nga akong mahimamat sa among panimalay ug nga adunay mga oportunidad nga mamaayo ang akong nahiubos nga kasingkasing. Ug ako nakahibalo nga ang akong misyonaryo nga pagserbisyo Iyang gidawat.
Bisan pa sa kasiguroan, naghunahuna gihapon ko nganong kinahanglang makigbisog man ako sa hilabihan. Ang mga kasulatan nagtudlo nga “ang mga tawo naingon, nga unta sila makabaton og hingpit nga kalipay.” (2 Nephi 2:25), ug ang “buhat” ug “himaya” sa Ginoo mao ang “pagpahinabo sa pagka-imortal ug kinabuhi nga dayon sa tawo” (Moises 1:39). Busa ang tanan nga gibuhat sa Ginoo mao nga aron kitang tanan makabalik ngadto Kaniya ug sa kataposan magmalipayon, dili ba?
Unsa ang mahitungod nako? Ngano nga ako nakasinati og mga sakit sa pangisip nga nakababag sa akong abilidad sa pagpili og kalipay? Ngano nga ang Ginoo mitugot nga ako makasinati og hilabihan nga kasakit? Nakahimo ba ako og butang nga sayop nga maoy hinungdan sa akong sakit? Ang pipila ka panglantaw nakatabang nako sa pagkaplag og pipila ka pagsabot.
Pagkaila sa Manluluwas
Kanunay akong maghunahuna sa istorya bahin ni Kristo nga miayo sa buta nga tawo ug gipangutana kinsa ang nakasala nga maoy hinungdan sa iyang kakulangan. Ang makadasig nga tubag ni Jesus makahuluganon kaayo ngari kanako: “Ang iyang pagkabuta dili tungod sa iyang mga sala o sa mga sala sa iyang mga ginikanan. Siya natawong buta aron ang gahom sa Dios ikapadayag diha kaniya” (Juan 9:3). Dayon milagrosong giayo ni Kristo ang tawo, nagtudlo og leksiyon nga makapadugang sa hugot nga pagtuo, pagsalig, ug pagsabot sa Iyang gahom ug plano.
Ang mga buhat sa Dios gipakita dinhi niini nga tawo, ug ako nasayod nga kini mapakita usab ngari kanako. Nakita nako ang Iyang mga buhat nga gipakita pinaagi sa kapuangod nga akong naangkon pinaagi sa akong mga pagsulay ug sa kapuangod nga akong gipaningkamotan nga ipakita ngadto niadtong naglibot nako. Nakita nako ang Iyang mga buhat nga gipakita diha sa paagi sa akong pagkaila sa akong Manluluwas ug nasayod nga Siya nakaila nako tungod kay Siya nag-antos alang nako didto sa Getsemani ug diha sa krus.
Pagsinati og Kamaya Nga Mas Maanindot Pa
Duha ka bulan na ang milabay, ang akong mama nadasig pinaagi sa Espiritu sa pagsulti nako nga siya naghunahuna mahitungod sa mga pagsulay nga akong nasinati. Nangutana siya nako, “Unsa kaha kon kining mga butanga wala mahitabo nganha kanimo apan alang kanimo?” Mipamatuod siya nako nga tungod sa kasakit nga akong nasinati, ako makabaton og mas lawom nga kapasidad sa pagsinati og kamaya.
Kini mao ang baroganan nga nasabtan nila ni Adan ug Eva. Diha sa Tanaman sa Eden, anaa sila “sa kahimtang nga walay sala, walay hingpit nga kalipay, tungod kay sila wala makasinati sa pagkauyamot”(2 Nephi 2:23). Sa higayon nga ako mobati og hingpit nga kalipay, mas maanindot kini tungod kay nasayod ko unsa ang bation sa pagkauyamot.
Si Lehi mitudlo ni Jacob, kinsa natawo sa kamingawan ug wala gayod makakita sa mas sayon nga kinabuhi didto sa Jerusalem, nga ang Ginoo “nagpahinungod sa imong mga kasakit alang sa imong kaayohan” (2 Nephi 2:2). Sa kataposan, mapasalamaton ko sa akong mga pakigbisog sa sakit sa pangisip. Nasayod ko nga kon kita motugot sa atong mga balatian nga modala nato paduol ngadto sa Langitnong Amahan ug ni Jesukristo ug moputli nato, kita mahimong mas sama Kanila.
Kini nga kahibalo wala makapahimo sa akong mga pakigbisog nga mas sayon, apan kini nakahatag nako og mahangtoron nga panglantaw. Sa malisod nga mga panahon, nakakaplag ko og paglaom diha sa paghunahuna sa mga pakigsaad nga akong nahimo uban sa Langitnong Amahan. Nasayod ko nga Siya motuman sa Iyang mga saad kon ako motuman sa akong saad. Nagkinahanglan gihapon ko og temporal nga mga panalangin sama sa therapy, pagtambal, ug mga buluhaton nga makapahimsog sa akong hunahuna, apan ang pag-uban niini og espirituhanon nga mga himan sama sa pagtuon sa kasulatan, pag-ampo, ug pagsimba sa templo nakapahimo og labing dako nga kalainan sa akong sakit sa pangisip.
Ug sa mga adlaw nga ako makasinati og kamaya bisan pa sa akong mga pakigbisog, ako napahinumdoman sa mga milagro nga ikahatag ni Jesukristo ug sa Iyang Pag-ula sa akong kinabuhi.