Mānava ia ’outou i roto i teie ve’a

E vāhi ruru i mua i te vero

Hōho’a nā Getty Images

’Ua pārahi a’ena ānei ’outou i raro a’e i te hō’ē vāhi ruru i roto i te hō’ē vero ua ? ’Ia topa ana’e mai te pape, e topa ’oia i ni’a i te tāpo’i fare ’e e’ita e fa’aro’o-fa’ahou-hia te tahi atu mau māniania. Nāhea ’ia vai marō noa i rōpū i te vero ? E au te mana ’e te aro o tō tātou Fa’aora mai taua vāhi ruru ra.

Tē fa’atumu nei teie ve’a Liahona i ni’a e nāhea Iesu Mesia i te hōpoi mai i te hau i roto i te mau vero o te orara’a. E’ita tā tātou e nehenehe e ’ape i te mau tāmatara’a ’e te mau tītaura’a. Terā rā, mai te hō’ē vāhi ruru e tāpe’a noa ia tātou ’ia vai marō noa i raro a’e i te ua, ’a ani ai tātou ia Iesu Mesia ’ia haere mai nā muri iho ia tātou i roto i tō tātou tere, e tauturu ’oia ia tātou ’ia ’ite mai i te hau i roto i te vero. Tē ani nei au ia ’outou ’ia tai’o i te parau pāpa’i a Dieter F. Uchtdorf « Tō’u hau tā’u e hō atu nō ’outou » (’api 4). Tē ha’api’i nei ’oia ē, « Iesu Mesia, ’o tē arai nei i te mau pūai o te nātura, e ha’amāmā ato’a ’oia i tā tātou mau hōpoi’a » ’e « e ’ore roa ho’i te hau e ’īriti-’ē-hia atu i tō tātou ’ā’au, noa atu e tītauhia ia tātou ’ia māuiui, ’ia ’oto, ’e ’ia turu’i i ni’a i te Fatu ».

’Ua fa’aruru ato’a vau i « te mau vero » i roto i tō’u orara’a. ’Ua ha’api’i mai teie mau tāmatara’a iā’u ē, ’o Iesu Mesia ana’e te puna mau vai maoro nō te tauturu ’e nō te hau. Mai tā’u i fa’a’ite i roto i tā’u parau pāpa’i « Te mana nō te fa’ati’a i ni’a  » (’api 40), e nehenehe tō tātou Fa’aora e haere mai nā muri iho ia tātou i roto i tō tātou tere ho’ira’a i te fare. Tei pīha’i iho ’oia ia tātou ’a tīa’i ai tātou i te mau ha’amaita’ira’a tei fafauhia mai. ’E e’ita roa atu e tāere roa nōna nō te fa’ati’a ia tātou i ni’a. ’Ua here ’oia ia ’outou. Tē pure nei au ’ia vaiiho ’outou iāna ’ia riro ’ei vāhi ruru ’e ’ei vāhi pāpū nō ’outou, noa atu te mea tā ’outou e fa’aruru ra.

Mā te here,

Bonnie H. Cordon

Peresideni rahi nō te Feiā ’Āpī Tamāhine