“Foom Koob Hmoov Pov Thawj Hwj,” Liyahaunas, Peb Hlis Ntuj 2023.
Zaj Lus hauv Liyahaunas Txhua Hli, Peb Hlis Ntuj 2023
Foom Koob Hmoov Pov Thawj Hwj
Yexus Khetos tsa Kaum Ob tug Thwj Tim, los ntawm Harry Anderson
Ib txoj koob hmoov pov thawj hwj yog muab los ntawm ib tug uas tuav lub Pov Thawj Hwj Mekhixedes. Cov koob hmoov pov thawj hwj ua rau Vajtswv txhua tus me nyuam txais tau Nws lub hwj chim, Nws txoj kev kho mob, txoj kev nplij siab, thiab txoj kev coj kev.
Lub Pov Thawj Hwj
Lub pov thawj hwj yog Vajtswv lub hwj chim thiab txoj cai. Cov txiv neej tsim nyog uas tuav lub Pov Thawj Hwj Mekhixedes ua tej yam los ntawm Yexus Khetos lub npe thaum lawv foom koob hmoov pov thawj hwj. Thaum lawv foom cov koob hmoov no, lawv ua raws li tus Cawm Seej tus yam ntxwv thaum Nws foom koob hmoov rau lawm tus.
Daim duab los ntawm David Winters
Txoj Kev Foom Koob Hmoov
Cov txiv neej foom koob hmoov pov thawj hwj thaum lawv tsa tes saum lwm tus lub taub hau. Ib tug uas tuav lub Pov Thawj Hwj Mekhixedes tsa tes saum tus neeg uas txais koob hmoov lub taub hau. Ces nws foom koob hmoov raws li tus Ntsuj Plig qhia. Cov uas foom koob hmoov thiab cov uas txais koob hmoov muab siab rau ntseeg Vajtswv thiab tso siab rau Nws lub siab nyiam thiab kev teem sij hawm.
Kev Tis Npe thiab Foom Koob Hmoov rau cov Me Nyuam
Tom qab ib tug me nyuam yug los, ib tug uas tuav lub pov thawj hwj muab npe rau nws thiab foom koob hmoov rau nws (saib Lus Qhuab Qhia thiab Kev Khi Lus 20:70). Feem ntau muaj li no nyob hauv kev sib ntsib yoo mov thiab hais lus pov thawj. Nws muab npe rau tus me nyuam. Ces tus uas tuav lub pov thawj hwj foom koob hmoov rau tus me nyuam.
Daim duab los ntawm Welden C. Andersen
Cov Koob Hmoov rau cov Neeg Mob
Cov uas tuav lub Pov Thawj Hwj Mekhixedes foom tau koob hmoov rau cov neeg mob. Txoj koob hmoov no muaj ob feem: kev pleev roj thiab kev khi txoj kev pleev roj ntawd. Qhov thib ib, tus uas tuav lub pov thawj hwj pleev ib tee roj uas tau muab fij tseg, los sis foom koob hmoov rau, pleev saum tus neeg lub taub hau thiab hais ib zaj lus thov Vajtswv. Ces ib tug ntxiv uas tuav lub pov thawj hwj yuav khi txoj kev pleev roj ntawd thiab foom koob hmoov rau tus neeg ntawd raws li tus Vaj Ntsuj Plig Dawb Huv qhia.
Cov Koob Hmoov uas Nplij Siab thiab Hais Lus Ntuas
Cov uas tuav lub Pov Thawj Hwj Mekhixedes foom tau koob hmoov kom nplij neeg lub siab thiab hais lus ntuas cov hauv lawv tsev neeg los sis lwm tus uas thov. Ib tug txiv tsev uas tuav lub Pov Thawj Hwj Mekhixedes foom tau leej txiv txoj koob hmoov rau nws cov me nyuam. Nyaj cov koob hmoov no yuav pab cov me nyuam thaum lawv raug xwm txheej tshwj xeeb heev.
Kev Foom Koob Hmoov Muab cov Mej Zeej Tsa Ua Hauj Lwm
Thaum lub Koom Txoos cov mej zeej txais kev hu, lawv tau ib txoj koob hmoov thaum cov thawj coj muab lawv tsa ua hauj lwm. Ib tug thawj coj pov thawj hwj foom koob hmoov rau lawv kom muaj txoj cai ua raws li qhov uas tau hu lawv ua. Tus thawj coj pov thawj hwj kuj foom koob hmoov rau lawv kom pab lawv ua hauj lwm.
Daim duab los ntawm Shauna Stephenson
Yawg Suab cov Koob Hmoov
Txhua tus mej zeej hauv lub Koom Txoos uas tsim nyog txais tau yawg suab txoj koob hmoov. Txoj koob hmoov no yog cov lus qhia los ntawm tus Tswv. Txoj koob hmoov no pab coj kev thiab nplij ib tug neeg lub siab tas nws lub neej. Txoj koob hmoov no kuj qhia tias tus neeg muaj caj ceg twg nyob hauv tsev neeg Ixayees. Tsuas yog ib tug yawg suab uas Vajtswv muab tsa lawm xwb foom tau txoj koob hmoov zoo li no.
© 2023 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Askiv: 6/19. Pub txhais ua lus Hmoob: 6/19. Kev txhais Monthly Liahona Message, March 2023. Language. 18905 295