Te mau niu o te ’evanelia

Te mau ha’amaita’ira’a o te autahu’ara’a

Tē fa’atōro’a nei te Mesia i nā ’āpōsetolo hō’ē ’ahuru ma piti, nā Harry Anderson

E hōro’ahia te hō’ē ha’amaita’ira’a o te autahu’ara’a nā roto i te fa’aurura’a e te hō’ē ta’ata tei mau i te autahu’ara’a a Melehizedeka. E fa’ati’a te mau ha’amaita’ira’a o te autahu’ara’a i te mau tamari’i ato’a a te Atua ’ia fāri’i i tōna mana, te fa’aorara’a, te tāmāhanahana ’e te arata’ira’a.

Te autahu’ara’a

Te autahu’ara’a o te mana ïa ’e te ha’amanara’a o te Atua. Te mau tāne ti’amā tei mau i te autahu’ara’a a Melehizedeka, e rave rātou nā roto i te i’oa o Iesu Mesia, ’a hōro’a ai rātou i te mau ha’amaita’ira’a o te autahu’ara’a. ’A hōro’a ai rātou i teie mau ha’amaita’ira’a, e pe’e rātou i te hi’ora’a o te Fa’aora ’a ha’amaita’i ai rātou ’ia vetahi ’ē.

Hōho’a nā David Winters

Nāhea te mau ha’amaita’ira’a i te hōro’ahia

E hōro’ahia te mau ha’amaita’ira’a o te autahu’ara’a nā roto i te tu’ura’a rima. E tu’u te hō’ē taea’e tei mau i te autahu’ara’a a Melehizedeka i tōna nā rima i ni’a i te upo’o o te ta’ata e fāri’i ra i te ha’amaita’ira’a. ’Ei reira ’oia e hōro’a ai i te hō’ē ha’amaita’ira’a ’ia au i te arata’ira’a a te Vārua. Te feiā e hōro’a i te mau ha’amaita’ira’a ’e te feiā e fāri’i i te reira, e fa’a’ohipa rātou i te fa’aro’o i te Atua ’e e ti’aturi i tōna hina’aro ’e tāna tārena.

Te hōro’ara’a i te i’oa ’e te ha’amaita’ira’a i te mau tamari’i.

I muri a’e i te fānaura’a o te hō’ē tamari’i, e hōro’a te hō’ē taea’e tei mau i te autahu’ara’a iāna i te hō’ē i’oa ’e te hō’ē ha’amaita’ira’a (hi’o Te Ha’api’ira’a Tumu ’e te mau Fafaura’a 20:70). Mai tei mātarohia, e tupu te reira i roto i te hō’ē purera’a ha’apaera’a mā’a ’e te ’itera’a pāpū mana’o. E hōro’ahia nā mua i te tamari’i i te hō’ē i’oa. I muri iho, e hōro’a te taea’e o te autahu’ara’a i te hō’ē ha’amaita’ira’a i te tamari’i.

Te mau ha’amaita’ira’a nō te feiā ma’i

E nehenehe te mau taea’e tei mau i te autahu’ara’a a Melehizedeka e hōro’a i te mau ha’amaita’ira’a i te mau ta’ata tei ro’ohia i te ma’i. E piti tuha’a i roto i teie huru ha’amaita’ira’a : fa’atāhinura’a i te hinu ’e te ha’amaura’a i te fa’atāhinura’a. ’A tahi, e tu’u te hō’ē taea’e o te autahu’ara’a i te hō’ē tōpata hinu ’ōlive tei ha’amo’ahia ’aore rā tei ha’amaita’ihia, i ni’a i te upo’o o te ta’ata ’e e hōro’a i te hō’ē pure poto. I muri iho, nā te tahi atu taea’e tei mau i te autahu’ara’a e ha’amau i te fa’atāhinura’a ’e e hōro’a i te ta’ata i te hō’ē ha’amaita’ira’a mai te au i te arata’ira’a a te Vārua Maita’i.

Te mau ha’amaita’ira’a nō te tāmāhanahana ’e nō te a’o

E nehenehe te mau taea’e o te autahu’ara’a a Melehizedeka e hōro’a i te mau ha’amaita’ira’a nō te tāmāhanahana ’e nō te a’o i te mau melo o te ’utuāfare ’e ia vetahi ’ē e tītau mai i te reira. E nehenehe te hō’ē metua tāne tei mau i te autahu’ara’a a Melehizedeka e hōro’a i te mau ha’amaita’ira’a a te metua tāne i tāna mau tamari’i. E riro te reira ’ei tauturura’a ta’a ’ē ’ia fa’aruru ana’e te mau tamari’i i te mau tāmatara’a ta’a ’ē.

Te fa’ata’ara’a i te mau melo nō te tāvini i roto i te mau pi’ira’a

’Ia fāri’i ana’e te mau melo o te ’Ēkālesia i te mau pi’ira’a, e hōro’ahia ia rātou te hō’ē ha’amaita’ira’a i te taime e fa’ata’ahia ai rātou nō te tāvini. E ha’amaita’i te ta’ata fa’atere o te autahu’ara’a ia rātou ma te ha’amanara’a nō te ’ohipa i roto i te pi’ira’a. E hōro’a ato’a te ta’ata fa’atere o te autahu’ara’a ia rātou i te hō’ē ha’amaita’ira’a nō te tauturu ia rātou i roto i tā rātou tāvinira’a.

Hōho’a nā Shauna Stephenson

Mau ha’amaita’ira’a pātereāreha

E nehenehe te mau melo ti’amā ato’a o te ’Ēkālesia e fāri’i i te hō’ē ha’amaita’ira’a pātereāreha. E hōro’a teie ha’amaita’ira’a i te parau a’o nō te ta’ata iho nō ’ō mai i te Fatu ra. E nehenehe te reira e hōro’a mai i te arata’ira’a ’e te tāmāhanahanara’a i roto i te orara’a o te hō’ē ta’ata. E fa’a’ite ato’a te reira i te ’ōpū o te ta’ata i roto i te ’utuāfare o ’Īserā’ela. ’O te pātereāreha ana’e tei fa’atōro’ahia ’o tē nehenehe e hōro’a i teie huru ha’amaita’ira’a.

Nō roto mai i te mau pāpa’ira’a mo’a

’Ua ha’amaita’i Iesu Mesia i te feiā ma’i nā roto i te tu’ura’a rima (hi’o Luka 4:40).

Te mau melo e tāvini nei i roto i te ’Ēkālesia, e fa’ata’ahia rātou e te feiā tei mau i te ha’amanara’a ti’a (hi’o Te Ha’api’ira’a Tumu ’e te mau Fafaura’a 42:11 ; Te mau Hīro’a Fa’aro’o 1:5).

E nehenehe te mau ta’ata ma’i e ani i te feiā tei mau i te autahu’ara’a nō te mau ha’amaita’ira’a (hi’o Iakobo 5:14 ; Te Ha’api’ira’a Tumu ’e te mau Fafaura’a 42:44).

Te mau parau e ha’amana’o

Purera’a ha’apaera’a mā’a ’e te ’itera’a pāpū : E purera’a ’ōro’a i reira te mau melo o te ’āmuira’a e fa’a’ite ai i tō rātou ’itera’a pāpū. E ha’apae te mau melo i te mā’a—ma te ’ore e ’amu i te mā’a ’e e inu i te pape i terā mahana—mātarohia i te sābati mātāmua o te ’āva’e.

Fa’atāhinura’a : Te fa’a’ohipara’a i te hinu ha’amo’ahia ’ei tuha’a nō te hō’ē ha’amaita’ira’a o te autahu’ara’a nō te feiā ma’i.

Pātereāreha : E taea’e tei mau i te autahu’ara’a tei fa’atōro’ahia nō te hōro’a i te mau ha’amaita’ira’a pātereāreha i te mau melo o te ’Ēkālesia i roto i tāna titi.

Ha’api’i rahi atu ā

Mai te mea e uira’a tā ’outou nō ni’a i te ha’amaita’ira’a o te autahu’ara’a, e nehenehe ’outou e paraparau i tō ’outou mau taea’e ’aore rā mau tuahine aupuru, i tō ’outou feiā fa’atere pāroita ’aore rā ’āma’a, ’aore rā i te mau misiōnare. Nō te mau ha’amāramaramara’a hau atu nō ni’a i te ravera’a i te mau ha’amaita’ira’a o te autahu’ara’a, hi’o i te pene 18 o te Buka arata’i rahi : Te tāvinira’a i roto i Te ’Ēkālesia a Iesu Mesia i te Feiā Mo’a i te mau Mahana Hope’a nei i ni’a i te ChurchofJesusChrist.org.