« Noa atu ’ia pa’ari a’e ’outou, e ore roa te aroha e mou », Liahona, Māti 2023.
Rūhiāra’a ma te ha’apa’o maita’i
Noa atu ’ia pa’ari a’e ’outou, e ’ore roa te aroha e mou
Pi’ihia i roto i te hō’ē peresidenira’a o te Sōtaiete Tauturu i roto i tō rātou matahiti pa’ari, tē fa’a’ite nei teie mau vahine i tō rātou ’itera’a ’e tō rātou hāro’aro’ara’a i tā rātou tāvinira’a.
Hōho’a nā Richard M. Romney
« ’O mātou paha te peresidenira’a pa’ari a’e o te Sōtaiete Tauturu i roto i te ’Ēkālesia », ’ua parau Sharon Alexander. Nō ti’a noa mai nei tōna matahiti e 89. ’E tōna nā tauturu ’o Marlene Peterson ’e ’o Dorothy Arnold, e 90 ’e e 91 matahiti pāpū maita’i.
« Nō reira, tō mātou matahiti ’aifāito e 90 » tē nā reira ra Dorothy, ma te ’ata.
Tē tāvini nei teie peresidenira’a o te Sōtaiete Tauturu i roto i te hō’ē ’āma’a nō te hō’ē fare orara’a nō te mau ta’ata ti’amā i Ogden, Utaha, i te fenua Marite. E fare teie nō e rave rahi melo pa’ari o te ’Ēkālesia, ’e e mea pinepine te peresidenira’a i te ’itehia i te haerera’a ’e tō rātou turuto’oto’o mai te tahi ’ōpani i te tahi ’ōpani, i te arohara’a i te ta’ata ’e te ha’apāpūra’a ē, e mea maita’i te mau ta’ata ato’a.
I te hō’ē taime, nā te mau ta’ata o te mau pāroita nō te fenua iho e rave nei i te fārereira’a o te aupurura’a. I muri iho, ’ua fa’auruhia te peresideni titi e fa’aitoito i te peresidenira’a o te ’āma’a ’ia ani i te Fatu, ’o vai te feiā e fa’aea ra i reira e nehenehe e tāvini ’e i roto i tei hea pi’ira’a.
’Ua ha’amaita’i-rahi-hia nō te parau, ’aita
« I te pi’ira’a mai te peresideni ’āma’a iā’u ’ia riro ’ei peresideni nō te Sōtaiete Tauturu », tē parau ra Sharon, « ’ua mana’o vau ē, ’ua fāri’i au e rave rahi ha’amaita’ira’a nō te parau, ’aita ». ’Oia ra, i muri iho, ’ua fāri’i i te fa’aurura’a ’o vai te riro mai tōna nā tauturu. « ’O Marlene tei puta mai i roto i te ferurira’a nā mua », ’ua parau ’oia. « ’Ua rave ’āmui nā māua i te ’ohipa i roto i te titi, te fa’aineinera’a i te mau i’oa nō te ’ohipa hiero. ’Ua ’ite au ’ua pohe tāna tāne ’aita i maoro a’e nei, noa atu ē tē fifi noa ra ā ’oia nō te reira, ’ua ’ite au e ta’ata ha’apa’o maita’i ’oia.
I muri iho, i muri a’e i te hō’ē purera’a ’ōro’a, ’ua hi’o haere Sharon nā roto i te piha, ma te ’imi i te fa’aurura’a. « ’Ua ’ite atu vau ia Dorothy. ’Ua ’ata’ata mai ’oia iā’u ’e ’ua ’ite a’era vau ē, ’o ’oia te tahi tauturu. ’Ua arata’i te Fatu iā’u ia rāua rā, ’e ’aita ’oia i hape i ni’a i te tahi ’e te tahi ».
Mai te hō’ē ’utuāfare rahi
Tē parau ato’a ra Sharon ē, e nehenehe tāna e ’ite i te faufa’a ’ia roa’a te mau ta’ata o te fare iho, ’o tē tāvini nei i te tahi atu mau ta’ata i roto i te fare iho. « E mea fātata roa mātou i te tupura’a ’ohipa », tē parau ra ’oia. « ’Ua ta’a ia mātou ē e ’ere mātou i te mea ’aravihi roa i te tahi taime, e mo’ehia ia mātou i te tahi taime e rave rahi ’ohipa, ’e i te tahi taime ’aita roa mātou i te mea maita’i roa. ’E ’ua ’ite mātou e nāhea ’ia ’ata nō te mau fifi ’o tā mātou e fārerei ’āmui nei ».
« Te mau ta’ata e ora nei i’ō nei ’ua riro a’ena ri’i mai te hō’ē ’utuāfare rahi », tē parau ra Marlene. « Tē tāmā’a ’āmui nei mātou, nō reira tē fārerei nei mātou te tahi i te tahi e toru taime i te mahana. I te tahi taime, e ’āmui ato’a mātou nō te mau ’ātivite. Nō reira, tē mana’o nei au ē, ’ua fa’auruhia te peresideni titi ’a ’ite ai ’oia ē, tē vai ra te mau ta’ata i’ō nei e nehenehe e tāvini i te tahi ’e te tahi ».
« ’Ua ’ite mātou e aha te ’ohipa e tupu nei i terā ’e terā mahana. ’Ua ’ite mātou, e hina’aro ānei te hō’ē ta’ata i te tauturu ’aore rā tē ma’ihia ra ānei te hō’ē ta’ata », ’ua parau Dorothy.
Ta’a ’ē atu te aupura’a ’e te tauturura’a ia vetahi ’ē ’ia aupuru, tē fa’anaho nei te mau melo o te peresidenira’a i te ha’api’ira’a nā te Sōtaiete Tauturu. E hōro’a nei rātou i te i’oa o te feiā e fa’aea nei i reira ’o vai te nehenehe e pi’ihia nō te ha’api’i, ’e e fa’atano rātou i te mau hōro’ara’a ’ohipa ’e i te mau tārena mai te au i te mau hina’aro o te mau ’orometua ha’api’i tāta’itahi.
’A ha’amana’o ē, ’ua here te Fatu ia ’outou
« Tā mātou rā ’ohipa tumu ’o te fa’aha’amana’ora’a ïa i te tahi atu mau ta’ata e fa’aea ra i reira ē, ’ua here te Fatu ia rātou », ’ua parau Marlene. « ’E ’a nā reira ai mātou, e ’ite ato’a mātou i tōna here ».
« E fifi tō tātou pā’āto’a », tē parau ra Sharon. « E fifi tō’u i teienei, ’aita e vai ra ’a pae ’āva’e i ma’iri a’e nei. Terā rā ’ia ’oto ana’e au nō ni’a iā’u iho, e feruri au, ‘hey, ’aita ho’i teie, ’ia fa’aauhia i tā te Fa’aora i fa’aruru’. Tei i’ō nei tātou nō te haere i mua ’e nō te tupu i te rahi. ’E noa atu i roto i te matahiti pa’ari, mai te mea e vaiiho ’outou i tō ’outou mau ’itera’a ’ia ha’api’i ia ’outou, e nehenehe ’outou e tāmau noa i te ha’api’i mai ē a muri noa atu ».
Nō te mea, nō rātou tāta’itahi, ’ua mo’e tei herehia e rātou, ’ua ha’api’i rahi ato’a mai te mau melo o te peresidenira’a nō ni’a i te aroha. ’Ua ’ite rātou nāhea ’ia fa’aora i te feiā e hina’aro i te tāmāhanahana. ’Ei hi’ora’a, i roto hō’ē matahiti, ’ua mo’e tō Marlene e maha melo o te ’utuāfare ’e hō’ē hoa rahi roa.
« Nō te mea ’ua fa’aruru mātou i te mau ’ohipa fifi », tē nā ’ō ra ’oia, « e nehenehe ato’a mātou e tauturu ia vetahi ’ē ’ia fa’aruru i te mau ’ohipa fifi. Mai te mea tē tāfifi ra ’outou nō hō’ē ’ohipa, ’a ha’amo’e ia ’outou iho i roto i te tāvinira’a ia vetahi ’ē. Teie tā teie pi’ira’a i tauturu iā’u ’ia rave ».
Tē ’āfa’i nei te mau melo o te peresidenira’a i te hō’ē tao’a rahi o te ’itera’a ’e o te hāro’aro’ara’a i tō rātou pi’ira’a. ’Ua ora nā rātou ’e ’ua ’ohipa i roto e rave rahi vāhi—California, Ohio, Wyoming ’e Utaha. ’Ua tāvini rātou i roto i te hiero, i roto i te mau pi’ira’a pāroita ’e te titi, i roto i te Paraimere, te Feiā ’Āpī Tamāhine ’e te ’ohipa tāvinira’a te ta’ata nā te ao ato’a nei. ’Aita roa atu rā Dorothy i fāri’i i te hō’ē pi’ira’a i roto i te Sōtaiete Tauturu, ē tae roa mai i teienei.
« E aha te parau tumu a te Sōtaiete Tauturu ? » ’ua parau ’oia. « ‘E ’ore roa te aroha e mou’. E parau mau te reira i tō ’outou ’āpīra’a, e parau mau ato’a rā ’ia pa’ari ana’e ’outou. ’Ei peresidenira’a, tē ha’api’i mai nei mātou i te reira i te mau mahana ato’a ».
« Tē mana’o nei au ē, e mea maita’i roa tā mātou ravera’a ’ohipa ’āmui », tē parau ra Sharon, ma te ’amo i te mata, « nō te hō’ē peresidenira’a e ’aifāito te matahiti e 90 ».