Usa ka Pagtan-aw sa Nagpadayon nga Tawag sa Pagpasidaan sa Atong Propeta

Ni Jamie Kathryn LeSueur

Mga Magasin sa Simbahan

Palamboa ang inyong umaabot nga kasinatian sa kinatibuk-ang komperensiya pinaagi sa pagrebyo sa tawag sa pagpasidaan ni Presidente Nelson nga gibalik-balik sa iyang kataposang pipila ka pakigpulong.

Ang kinatibuk-ang komperensiya hapit na—nga nagpasabot nga ang pagpadayag pinaagi sa mga propeta nagsingabot na kaninyo!

Samtang kita magpaabot og bag-ong tambag, dili nato kalimtan unsay atong nakat-onan sa bag-ohay lang nga mga komperensiya. Human sa tanan, ang pulong sa Ginoo dili lamang balido matag unom ka bulan. Unsay atong madungog niini nga komperensiya madugang sa unsay atong nakat-onan sa miaging mga komperensiya kay sa pulihan kadto nga mga pagtulon-an.

Ang Tawag sa Pagpasidaan

Kon inyong tan-awon ang bag-ohay nga mga pakigpulong sa atong propeta, si Presidente Russell M. Nelson, inyong mamatikdan nga iyang gibalik-balik ang pagkadinalian sa piho nga mga kamatuoran. Kini nga pagbalik-balik makamugna og “usa ka mas lanog, klaro nga pagpasidaan kay sa kausa lang nga pagpahibalo.”¹ Ug unsa man ang iyang gipasidaan kanato? “Ang mabangis nga mga pag-atake sa kaaway.”²

Ang mga kasulatan nagpasidaan nga sa kataposan nga mga adlaw “ang mga kasingkasing sa mga tawo mopakyas kanila” (Doktrina ug mga Pakigsaad 45:26) ug ang mini nga mga Kristo “molingla sa labing pinili” (Joseph Smith—Mateo 1:22). Kini tinuod sa atong panahon. Tingali kamo nakaila og usa ka tawo kinsa usa ka disipulo ni Jesukristo kaniadto apan karon nawala na ang ilang pagpamatuod. Ang kaaway sa pagkatinuod naghulga sa atong hugot nga pagtuo samtang nagkaduol na kita sa Ikaduhang Pag-anhi ni Kristo.

Ang atong propeta sama sa usa ka “magbalantay” sa tore (Ezequiel 33:2). Siya gitawag nga “patingogon niya ang trumpeta agig pasidaan sa katawhan” (Ezequiel 33:3). Ug ang pagpasidaan ni Presidente Nelson mas labaw pa kay sa pahibalo sa kakuyaw—usa kini ka plano sa pagtabang sa matag usa nato nga mag-andam ug makigbatok sa espirituhanon nga mga pag-atake. Ug karon mao ang perpekto nga panahon sa pagrebyo niini nga tambag!

Ang Plano sa Paglihok

Pagpalig-on sa Inyong Hugot nga Pagtuo diha ni Jesukristo

Ania ang unsay gisulti ni Presidente Nelson mahitungod sa paglig-on ug pagpadayon og usa ka pagpamatuod nga makabatok sa mga pang-atake sa kaaway:

“Ako mangamuyo kaninyo sa pag-angkon sa responsibilidad sa inyong pagpamatuod. Trabahoa kini. Angkona kini. Atimana kini. Amumaha kini aron motubo kini.”³
“Ang usa ka pagpamatuod nga dili maalimahan matag adlaw ‘sa maayong pulong sa Dios’ [Moroni 6:4] mahagsa. … Nagkinahanglan kita og inadlaw nga mga kasinatian nga magsimba sa Ginoo ug magtuon sa Iyang ebanghelyo.”⁴
“Magtuon dala ang tinguha nga motuo … tugoti ang Ginoo nga mogiya kaninyo sa inyong panaw sa espirituhanong panimpalad.”⁵

Paggahin og Panahon alang sa Ginoo

Wala gayoy panahon nga adunay igong kahilom aron inyong madungog ang Espiritu. Kinahanglan kamong mogahin gayod og panahon aron magmahilom ug maminaw. Naggahin ba kamo og panahon nga naningkamot sa pagpaminaw Kaniya?

“Hatagi [ang Ginoo] og patas nga bahin sa inyong panahon. Kon inyo kining buhaton, panid-i kon unsay mahitabo sa inyong positibo nga esprituhanong paglambo.”⁶
“Kita mohan-ay sa atong mga prayoridad ug motino kon unsaon nato paggamit sa atong kusog, panahon, ug mga kahimtang. … Suklan ang kalibotanong pagtintal pinaagi sa paggahin og panahon alang sa Ginoo diha sa inyong kinabuhi––matag adlaw.”⁷
“Kita [maka]puno sa [atong] panahon … uban sa kasaba ug kaguliyang sa kalibotan. O kita makagamit sa atong panahon sa pagpaminaw sa tingog sa Ginoo nga naghonghong sa Iyang paggiya, paghupay, ug kalinaw.”⁸

Paghimo ug Pagtuman sa mga Pakigsaad

Kon mohimo kamo og mga pakigsaad uban sa Langitnong Amahan, mosulod kamo ngadto sa hiniusang mga saad sa katuyoan ug aksiyon. Ug kon kamo mas nahiusa Kaniya, mas malig-on kamo sa inyong pagpakigbatok sa kaaway.

“Ang Dios adunay espesyal nga gugma alang sa matag tawo nga mohimo og pakigsaad ngadto Kaniya diha sa mga tubig sa bunyag. Ug kana nga balaanon nga gugma mapalawman samtang ang dugang pa nga mga pakigsaad gihimo ug matinud-anong gituman.”⁹
“Uban sa tanan nga pangaliyupo gikan sa akong kasingkasing, awhagon ko kamo sa pagsubay sa dalan sa pakigsaad ug magpabilin didto.”¹⁰
“Kon kamo magmatinud-anon sa inyong mga pakigsaad nga gihimo didto sa templo, kamo lig-onon pinaagi sa Iyang gahom … kamo makabarog nga lig-on tungod kay ang inyong espirituwal nga pundasyon lig-on ug dili matarog.”¹¹

Ang mga Saad

Kon tipunon, kining tulo ka mensahe—pagpalig-on sa inyong hugot nga pagtuo, paggahin og panahon alang sa Ginoo, ug pagtuman sa mga pakigsaad—naghatag og importante nga ebidensya sa usa ka importante nga kamatuoran: Si Presidente Nelson nasayod nga kita ania sa kataposang mga adlaw, ug siya naghimo sa tanan nga iyang mahimo sa pagtabang nato nga mobarog nga lig-on.

Karon nga kamo nakadungog sa iyang “pagpatingog sa trumpeta” (Ezequiel 33:4), anaa ra ninyo ang paglihok! Gamita ang tambag sa propeta. Paghimo og mga kausaban sa inyong naandan aron mosunod sa plano sa paglihok. Ug kon inyong buhaton “mahimo kamong mas epektibo nga instrumento diha sa mga kamot sa Ginoo.”¹² Kamo “masangkapan sa gahom sa pagkapari.”¹³ Makahimo kamo sa “pagbalhin sa inyong mga hagit ngadto sa dili hitopngan nga kalamboan ug oportunidad.”¹⁴ Ug kamo maandam sa pagdawat og dugang nga kamatuoran, pasidaan, ug pagpangandam gikan sa Ginoo pinaagi sa Iyang propeta sa sunod nga kinatibuk-ang komperensiya.