Feiā ʼāpī paʼari
Te tahi a’ora’a nō te fa’aruru i te hō’ē ananahi ri’ari’a ’e te pāpū ’ore
I roto i tō’u iho orara’a ’e tō’u orara’a ’ohipa, ’ua fa’aruru vau e rave rahi pāpū-’ore-ra’a, ’e ’ua ha’api’i mai au nāhea te Metua i te ao ra e nehenehe ai e tauturu ia tātou ’ia fa’aruru i te reira.
I tō’u ’āpīra’a, ’ua reva atu tō’u ’utuāfare mai Tona haere atu i te fenua Marite. E ta’ata moto tō’u metua tāne ’a ora ai mātou i Tona, ’e ’ua ha’amata ’oia i te ha’api’ipi’i iā’u i te moto i muri a’e i tō mātou taera’a i te fenua Marite. Tāna ’ōpuara’a tumu ’oia ho’i, ’ia riro mai au i te hō’ē mahana ’ei ’aito nō te ao nei nō te fāito teiaha. ’Ua ha’api’i ’oia iā’u ’eiaha e ri’ari’a. E’ita e ti’a ia ’oe e ri’ari’a i ni’a i te tahua mai te mea ē, e hina’aro ’oe ’ia manuia. E ’ere paha tō’u metua tāne i te ta’ata ha’apa’o roa i roto i te ’Ēkālesia i taua tau ra, ’ua ha’api’i rahi mai rā ’oia iā’u e mea nāhea i te fa’aruru i te mau fifi ’e ’ia roa’a te itoito i mua i te ri’ari’a.
Te ha’api’ira’a i te moto, ’ua fa’aineine ta’a ’ē mau te reira iā’u i tō’u tōro’a. ’Ua haere au i te fare ha’api’ira’a tuatoru nō Brigham Young maoti te pūtē nō te tu’era’a pōpō. ’E tae noa atu i te ravera’a i te mea tā te rahira’a o te ta’ata e fa’ariro nei ’ei mea ri’ari’a roa a’e ’ia rave i ni’a i te hō’ē tahua tu’era’a pōpō—te harura’a i te hō’ē tu’e nō te fa’aātea i te pōpō—’ua rave noa vau i te reira ma te hau. ’Aita roa atu vau i mata’u noa a’e. E mea au roa nā’u te tītaura’a o te tu’era’a pōpō.
’Ua mito tō’u metua tāne ē, e roa’a iā’u te hō’ē tōro’a ’ohipa i roto i te tū’aro—i roto iho ā ra te tu’era’a pōpō, ’eiaha i roto i te ’ohipa moto. Terā rā, tē mana’o nei au ē, ’ua tauturu tā’u ha’api’ipi’ira’a iā’u ’ia fāri’i i te fa’aro’o ’e ’oia ato’a ’ia hi’o i mua ma te fa’aro’o ’e te tīa’ira’a i roto i te pāpū ’ore.
Tē fa’ahanahana nei te metua tāne o Vai i te rē a tāna tamaiti i ni’a i te tahua.
Hōho’a nā Mark Philbrick / BYU © BYU Photo
’Ei feiā ’āpī pa’ari, tē fa’aruru nei ’outou e rave rahi mau mea fifi ’e te ri’ari’a—tō ’outou iho mau fifi mai te mau fa’aotira’a nō ni’a i te ha’api’ira’a, te tōro’a ’ohipa, te fa’aipoipora’a ’e te ’utuāfare. ’E tē fa’aruru ato’a nei ’outou i te mau fifi rahi atu ā, mai te mau fifi i te pae faufa’a, te mau fa’ahemara’a tōtiare, te mau ’ārepurepura’a poritita ’e te tama’i ato’a. Terā rā, nā roto i te ’ohipa i tupu i roto i tō’u iho orara’a, ’ua ’ite au ē, ’ia mā’iti ana’e tātou e tu’u i te Fatu nā mua roa i roto i tō tātou orara’a, tei reira noa ’oia nō te arata’i ia tātou nā roto i taua mau mea ra.
Te mana fa’auru o te mau hoa maita’i ’e te mau ta’ata maita’i
’Ua fāna’o vau i te fāri’ira’a i te mau hoa maita’i i tō’u ho’ira’a mai nā te misiōni. Nā te hō’ē hoa tā’u i fārerei i roto i te pū ha’api’ipi’ira’a misiōnare i ha’afārerei iā’u i te hō’ē vahine ’o tei riro mai tā’u vahine i muri a’e. ’Aita roa atu vau i tāu’a ’ore i te mea ē, pinepine tō ’outou mau hoa i te fa’aoti i tō ’outou manuiara’a ’aore rā tō ’outou manuia-’ore-ra’a i roto i te orara’a. E nehenehe tō ’outou mau hoa ’e te mau arata’i e tauturu ia ’outou ’ia rave i te mau fa’aotira’a ’o tē arata’i ia ’outou, ’ia ha’afātata atu ’aore rā ’ia fa’aātea i te Atua.
I tō’u ha’utira’a i roto i te tā’atira’a fa’ahoro pōpō o te fenua, ’ua fa’ahiahia vau ia Gifford Nielsen, tei ha’uti ato’a nō BYU hou ’oia ’a haere atu ai i te NFL, ē, riro mai nei i te pae hope’a ’ei ta’ata tātara parau tū’aro, ’e i muri iho ’ei Hitu ’Ahuru Huimana fa’atere rahi. I te hō’ē mahana, ’ua fārerei au iāna i ni’a i te hō’ē tahua huira’a pōpō, ’e ’ua hōro’a mai ’oia iā’u i te a’ora’a ’o tei taui i te terera’a o tō’u tōro’a ’ohipa.
Tē pārahi ra māua i roto i te hō’ē pere’o’o hui pōpō, ’o vau ana’e ’e ’ōna, ’e i muri a’e i tō’u paraura’a iāna nō tā’u ’ōpuara’a ’ia haere i roto i te ’āfata teata, mai tāna i nā reira i muri a’e i te fa’aeara’a i te tu’era’a pōpō, ’ua hōro’a mai ’oia iā’u i te a’ora’a ’eiaha e rave i te tōro’a ’ohipa ’o tē tītau iā’u ’ia haere i te mau ha’utira’a i te sābati. Nō te reira, e ti’a noa iā’u ’ia fāri’i i te hō’ē pi’ira’a i te sābati ’e ’ia tāvini i roto i te ’Ēkālesia.
E mea ’ōhie roa te reira, ’aita roa atu rā vau i feruri mai te reira. ’E ’ua taui te reira i te terera’a o tō’u orara’a.
’A ti’a nō te mea tā ’outou e ti’aturi nei
E mea ri’ari’a roa ’e te pāpū ’ore te tuha’a rahi o tō’u tōro’a ’ohipa i roto i te NFL. E 2 ana’e i ni’a i te hānere o te mau ta’ata tu’e pōpō nō te fare ha’api’ira’a tuatoru e ō i roto i te NFL, ’e noa atu ’ua ō vau i roto i te pupu e nehenehe noa vau e tātarahia i te mau huru taime ato’a. Te oraorara’a maoro mai tā’u i nā reira, ’ua riro ’ei ha’amaita’ira’a rahi, terā rā, te orara’a ma te ’ōtohera’a e ’ohipa fifi ïa. E tītau te reira i te fa’aro’o rahi.
I roto i te NFL, e haere ’outou mai terā pupu i terā pupu, mai terā matahiti ’e terā matahiti, ma te rātere ’ati a’e te fenua. E au ra e mea ’oa’oa, ’aita rā te rahira’a o te ta’ata e ’ite ra i te mau vāhi e ’ere i te mea ’oa’oa. E mea pa’ari ’ia ora mai te reira. ’E e mea pa’ari ato’a nō te feiā fa’aipoipo ’ia ora mai te reira ; ’o te hō’ē o te mau tumu i mara’a roa ai te fāito o te fa’ata’ara’a i rotopū i te mau ta’ata tōro’a mā’ona.
Te mea tei tauturu iā’u, ’oia ho’i ’ua ’ite au tei hea vau i te ti’ara’a. E niu pa’ari tō’u i roto i te Mesia ’e ’ua rave tāmau noa vau i taua mau mea ato’a ’o tei tāpe’a fātata iā’u i pīha’i iho iāna ’e i tō tātou Metua i te ao ra.
’Aita paha ’outou e fa’aruru nei i te hō’ē tōro’a tei ’ī i te ’ume’umera’a rahi ’e te fa’ahemara’a, i roto rā i tō’u nei, te rirora’a ’ei tōro’a mā’ona ’ua tu’u iā’u i roto i te hō’ē huru orara’a ta’a ’ē mau i te huru orara’a tā’u i mātau. ’Ei hi’ora’a, i tō mātou tāpaera’a i roto i te mau ’oire rarahi ’e ’a rātere ai mātou i te ha’amatara’a, ’ua hina’aro ’oi’oi tō’u mau hoa o te pupu e haere i rāpae ’e ’ia ’āmui atu i roto i te mau ’ātivite rau ’aita e tū’ati i te mau fa’aturera’a o te ’evanelia, ’e ’ua ’ite ’oi’oi a’era vau ē, e’ita tā’u e nehenehe e haere nā Ziona ’e nā Babulonia. ’Aita tā’u e nehenehe e pāhono atu « e feruri au nō te reira » nō te tāmarū ia rātou. E ti’a rā iā’u ’ia vai pāpū i roto i tō’u fa’aro’o ’e ’ia fa’ata’a atu nō te aha ’aita e ti’a iā’u ’ia ’āmui atu ia rātou.
’O Vai ’e tāna vahine ’o Keala, i tō rāua mahana fa’aipoipora’a
Mau hōho’a o te ’utuāfare tei hō-mai-hia e te ta’ata fatu
’Ua fāna’o vau ’ia fa’aipoipohia, ’a haere noa ai au i te ha’api’ira’a tuatoru. I tō’u haerera’a i te NFL, ’ua haere ato’a mai tā’u vahine ’e tā māua ’aiū e ono ’āva’e nā muri iā’u. ’Ua fa’aipoipohia māua i roto i te hiero ’e ’ua ’ite au e aha te aura’a te reira mau fafaura’a nō’u, ’e e aha tā te reira e tītau nei iā’u. Nō reira, ’ua parau atu vau i tō’u mau hoa pupu, « ’aita, ’aita vau e rave i te reira ». ’E ’ia onoono ana’e mai rātou, e parau atu vau, « ’ua fa’aipoipohia māua tā’u vahine i roto i te fare o te Fatu, i reira tō māua ravera’a i te mau fafaura’a mo’a. E mea faufa’a rahi a’e te reira mau fafaura’a nō’u i te tahi atu mau mea ato’a ».
’E te ’ohipa māere, i tō rātou uira’a mai iā’u i te reira mau uira’a ’e ’ua ’ite pāpū maita’i ho’i rātou tō’u huru, ’ua ha’amata te reira mau hoa pupu i te pāruru iā’u ’e i te fa’atura i tā’u mau ture ’e tā’u mau fafaura’a. E tītauhia te itoito nō te ti’a nō te mea tā ’outou e ti’aturi nei ’e e poihere nei.
I te ha’amatara’a, e mea ri’ari’a mau ’ia fa’aruru i te mau fa’ahemara’a e rave rahi, terā rā te ti’aturira’a i ni’a i te Metua i te ao ra ’e te ha’amana’ora’a i te mo’ara’a ’e i te aura’a o tā’u mau fafaura’a i mua i te onoonora’a, ’ua tauturu tāmau noa te reira iā’u ’ia vai pāpū noa i ni’a i te ’ē’a nō te fafaura’a i roto i tō’u tōro’a ’ohipa. E nehenehe ’outou e nā reira ato’a i roto i te mau huru tupura’a ato’a e fārereihia e ’outou i roto i te roara’a o tō ’outou tere.
Pe’e i te peropheta
’Ua ’ite au ē, ’ei feiā ’āpī pa’ari i teie mahana, tē fa’aruru nei ’outou e rave rahi mau pāpū-’ore-ra’a ’e te mata’u nō te ananahi. ’E e ui paha ’outou ia ’outou iho e aha te rave ’e nāhea ’ia fa’aruru i te reira. Te pāhonora’a ’ōhie ’o tē pe’era’a ïa i te a’ora’a a te peropheta, te peresideni Russell M. Nelson. ’Ia parau ana’e te hō’ē peropheta a te Atua ’e ’ia hōro’a ia ’outou i te hō’ē mea ta’a ’ē, e mea ’ōhie roa ’ia pe’e i te reira a’o.
’Ua hi’o vau ē, e mea au nā te peresideni Nelson e hōro’a i te mau tāpura ’ōhie nō te mau mea tā tātou e nehenehe e rave nō te ti’a pāpū i roto i tō tātou fa’aro’o. I roto i te mau matahiti i ma’iri a’e nei, ’ua hōro’a ’oia i te mau melo o te ’Ēkālesia e pae ’ohipa e rave nō te fa’arahi i tō tātou fa’aro’o, e pae rāve’a nō te fa’arahi i te haerera’a i mua i te pae vārua, e toru ’ohipa te ti’a ia ’outou e rave i te ha’amatara’a o te matahiti ’āpī ’e tē vai atu ra.
’Aita ’oia i hōro’a mai i te hō’ē tāpura nō te hō’ē tātini ’ohipa. E mau ’ohipa ’ōhie noa. ’E mai te mea e rave ’outou i te reira mau ’ohipa ’ōhie ’e ’ia pāpū maita’i, e taui tō ’outou orara’a nā roto i te ravera’a i te mau mea ’ōhie roa a’e. E vai pāpū noa tō ’outou niu o te fa’aro’o, noa atu tē vai ra te mau mea ri’ari’a i roto i te ao nei. ’A rave i teie mau mea ’e e maita’i ’outou. E pāruruhia ’outou.
Tē fa’aha’amana’o mai nei te reira iā’u i te ’ā’amu o Naamana i roto i te Faufa’a Tahito, e fa’atere fa’ehau tei ro’ohia i te ma’i lepera. ’Ua haere atu ’oia ia Elisaia ra, te peropheta, tei parau iāna ’ia haere e hopu iāna iho i roto i te ’ānāvai nō Ioridana e hitu taime. ’Ua feruri te fa’atere fa’ehau ē, e ’ohipa ma’au, ’ua fa’aitoito rā te mau ta’ata ati a’e iāna ’ei fa’atere fa’ehau ’ia haere noa e rave i te reira. ’E ’ua roa’a te fa’aro’o iāna nō te haere e rave i te reira—e ’ohipa ’ōhie roa. ’E ’ua tāmāhia ’oia. (Hi’o Te mau Ariʼi 2 5:1–15.)
Te ’utuāfare o Elder Sikahema
’A tu’u i tō ’outou ananahi i roto i te rima o te Metua i te ao ra
I teienei, ’aita paha vau i riro mai ’ei ta’ata tōro’a ’ohipa moto, ’ua ha’api’i rā vau i te tahi mau mea nō ni’a i te fa’arurura’a i te mata’u. I roto i te mau fa’aotira’a ’e te mau tāmatara’a ato’a tā ’outou e fa’aruru nei i teienei ’ei feiā ’āpī pa’ari, tē tāparu nei au ia ’outou ’ia rave i te mau mea ato’a tā ’outou e nehenehe e rave nō te ’imi ’e nō te tāpe’a mai i te fa’aurura’a a te Vārua ia ’outou ra i te mau taime ato’a. Terā te tāviri. Mai tā te peresideni Nelson i ha’api’i ’aita i maoro a’e nei : « Nā te haerera’a maita’i i mua i te pae vārua e fa’ahaere tāmau noa ia tātou i mua i rōpū i te mata’u ’e te pāpū ’ore tei fa’atupuhia e te mau ma’i pe’e, te miti fa’a’ī, te mau pa’a’inara’a mou’a auahi ’e te mau ’arora’a ma te mauiha’a. E nehenehe te haerera’a i mua i te pae vārua e tauturu ia tātou ’ia pāto’i i te mau ’arora’a ’ū’ana ’e te ’ino a te ’enemi ’e e pāto’i ho’i i tāna mau tauto’ora’a nō te fa’a’ino i tō tātou iho niu pae vārua ».1
I tō’u taure’are’ara’a ’e tō’u fa’arurura’a i te parau mau nō te fa’anu’u i roto i te hō’ē fenua ’āpī ’ei ta’ata ’e’ē, ’aita i nehenehe iā’u ’ia feruri i te hō’ē orara’a ’aita e pāpū ’ore. ’A tamau noa ai au i te fa’aruru i te mau pāpū-’ore-ra’a i te roara’a o tō’u orara’a ’e tō’u tōro’a ’ohipa, ’ua ha’api’i mai au ’ei mau pipi nā te Mesia, e nehenehe tā tātou e fa’aruru i te mau huru mata’u ato’a ’aore rā te mau huru ha’afifira’a i ni’a i tō tātou ’ē’a.
Mai te mea ē, e ha’a’ati ’outou ia ’outou i te mau ta’ata maita’i, ’e e ti’a ’outou nō tō ’outou mau ti’aturira’a, ’e e pe’e ’outou i te peropheta, ’e’ita ïa te ananahi e riro ’ei mea ri’ari’a roa. ’E e nehenehe ’outou e haere i mua ma te fa’aro’o, noa atu te ri’ari’a ’e te pāpū ’ore. ’Ia tu’u ana’e ’outou i tō ’outou ananahi i roto i te rima o tō tātou Metua i te ao ra here, e nehenehe ’outou e ti’aturi ē, tei reira ’oia nō ’outou i te mau taime ato’a.