“Hugot nga Pagtuo sa Pag-atubang sa Kawalay Kasegurohan,” Liahona, Abr. 2023.
Mga Hulagway sa Hugot nga Pagtuo
Hugot nga Pagtuo sa Pag-atubang sa Kawalay Kasegurohan
Tungod sa mga komplikasyon nga giatubang sa among bag-ong natawo nga anak nga babaye, ang adlaw nga nag-una sa mahimayaong Pagkabanhaw sa Manluluwas sa Dominggo adunay espesyal nga kamahinungdanon alang kanako.
Mga litrato sa maayong kabubut-on sa tagsulat
Ang among anak nga babaye, si Alexis, natawo nga wala pa sa saktong panahon sa 26 ka semana. Tungod kay natawo siya nga ang mga baga wala pa hingpit nga naporma, nagkinahanglan siya og respiratory nga suporta aron motabang kaniya sa pagginhawa.
Nakaiskedyul si Alexis nga mopauli human sa tulo ka bulan diha sa neonatal intensive care unit. Apan kalit nga migrabe ang kondisyon sa iyang panglawas sa dihang mitaas ang presyon sa iyang dugo diha sa mga ugat nga nagsuplay sa iyang mga baga, usa ka kondisyon nga nailhan nga pulmonary hypertension.
Ang adlaw nga milagom siya samtang nanglimbasog nga makaginhawa nagpabilin nga nakasilsil sa akong hunahuna. Usa kadto sa daghang makahadlok nga mga higayon nga among nasinati atol sa 12 ka bulan nga iyang gigahin diha sa ospital. Kana nga tuig akong bana ug ako adunay daghang malipayon kaayo nga mga higayon ug masulub-on kaayo nga mga higayon.
Ang among paglahi midugang sa among kabalaka. Tungod sa COVID-19 nga epidemya, nabulag ko gikan sa akong mga paryente. Usab, lisod alang sa akong bana ug kanako sa pagpangita og suporta sa gawas sa ospital. Ingon og gamay ra nga mga tawo ang nakasabot sa unsay among giagian. Mibati ko nga walay mahimo ug desperada, nahimong emosyonal ug mihilak sa pipila ka higayon diha sa ospital.
Mapasalamaton ko alang sa mga sister sa Relief Society nga mitabang sa akong pamilya sa panahon nga nagkinahanglan kami og tabang. Bag-o ko sa ward, bag-ohay lang nga mibalhin gikan sa Hong Kong ngadto sa Singapore. Daghang sister nga wala nako mailhi mihatod og pagkaon ug nangumusta kanako. Natandog ako sa ilang gugma ug mga pag-ampo alang sa akong pamilya.
Atol sa lisod nga mga higayon, midangop ako sa Dios. Siya wala dayon mitubag sa akong mga pag-ampo, apan nagpadayon ako sa pag-ampo. Ang akong bana, bisan og dili miyembro sa Simbahan, misuporta kanako pinaagi sa pag-apil sa akong mga pag-ampo. Nakalahutay kami sa matag adlaw inubanan sa hugot nga pagtuo diha sa among mga kasingkasing nga ang Dios mohatag sa tanan nga among gikinahanglan. Gihimo namo ang tanan nga among mabuhat alang sa among bililhon nga anak ug gitugyan ang among pagsalig sa kabubut-on sa Dios.
Uban sa giya sa Dios, nakakab-ot kami og desisyon nga nanglimbasog kami sulod sa pipila ka bulan. Gibati namo nga gigiyahan nga paoperahan si Alexis og tracheostomy. Ang mga tig-opera nagplano sa paghimo og hiwa sa atubangan sa iyang liog diha sa iyang trachea ug dayon mopasulod og usa ka tracheal nga tubo nga magtugot og direkta nga bentilasyon ngadto sa iyang mga baga. Si Alexis dayon makahimo sa pagginhawa nga dili mogamit sa iyang ilong o baba.
Usa ka Walay Kataposan nga Sabado
Samtang namalandong ako sa among kasinatian uban ni Alexis, maghunahuna ko mahitungod sa maulaong sakripisyo sa atong Manluluwas. Kitang tanan pamilyar sa Iyang Paglansang ug sa Iyang mahimayaong Pagkabanhaw. Ang panahon taliwala niining duha ka importante nga mga panghitabo wala kaayo mahisgoti diha sa mga kasulatan. Apan kana nga panahon adunay espesyal nga kamahinungdanon alang kanako, naghimo sa Pasko sa Pagkabanhaw nga labihan ka mahinungdanon.
Sama pananglit, ang Sabado usa ka adlaw sa kawalay kasegurohan. Ang mga disipulo sa Manluluwas wala kaayo makakita sa himaya nga moabot pa sa Dominggo. Ang Sabado, sama sa Biyernes, usa ka lisod nga adlaw nga ilang ilahutay.
Atol sa taas kaayo nga panahon sa pagkaospital sa among anak nga babaye, nagpuyo kami latas sa unsay ingon og mabati nga usa ka walay kataposan nga Sabado. Nag-atubang kami og dako kaayo nga kawalay kasegurohan nga dili namo makita kon unsay mahitabo sa sunod nga adlaw. Atol sa makahadlok nga mga higayon sa dihang ingon og tingali mamatay si Alexis, naglisod kami nga makakita nga mahimong mas maayo ang mga butang, wala gani kaayo mobati og paglaom.
Apan pinaagi sa among kasinatian, akong nakat-onan nga ang Langitnong Amahan ug ang Iyang Anak hingpit nga nahibalo kanamo ug sa among mga pagsulay. Mapasalamaton ko sa Manluluwas ug nahingangha sa Iyang Pag-ula. Pinaagi sa Iyang Pag-ula, makadawat kita og makanunayon nga tabang nga makalahutay sa mga Sabado sa atong kinabuhi samtang kita padayon nga magbaton og paglaom alang sa umaabot nga mga panalangin.
Malampuson ang operasyon ni Alexis. Bag-ohay lang siyang nagsaulog sa iyang ikatulo nga adlawng natawhan. Bisan pa man sa unsay iyang giagian, siya usa ka masadyaon nga bata kinsa ganahan nga mopahiyom ug makighimanat og bag-o nga mga tawo diha sa among parke sa kasilinganan. Ang iyang tracheal tube nagpugong kaniya sa pagsulti, apan ganahan siyang mosinyas og mga kolor ug mobasa og mga libro. Gibati namo nga bulahan nga makagahin sa matag nagmata nga higayon uban kaniya.