Digital Lamang
Pagtubo nga Mas Duol ngadto sa Dios pinaagi sa Tibuok Kinabuhi nga Pagkat-on
Ang edukasyon usa ka mahangturong tumong tungod kay ang mahimo nga sama sa Dios usa ka walay kataposan nga pagpaningkamot.
Ang paggradwar sa kolehiyo usa ka pakigbisog alang kanako. Dili tungod sa tanan nga akong kinahanglang isakripisyo nga mapadayon ang pag-eskwela, apan tungod sa bahin sa akong kaugalingon nga akong kinahanglang hunungon pinaagi sa pagbiya. Matag makalingaw nga lecture nga nagduso sa semana sa unahan o ang malampusong pagkahuman sa usa ka buwan nga gidugayon nga mga proyekto sa pagsiksik mihimo sa matag segundo sa pag-eskwela nga bililhon sa kataposan. Apan akong nakat-onan nga ang akong edukasyon––ug ang inyo––dili kinahanglang matapos diha sa gradwasyon.
Kon kita nakakuha na og degree sa milabay nga mga dekada o adunay trabaho nga kita nanghawod na, makahimo kita ug kinahanglan magpadayon sa pagkat-on, tungod kay aduna pay daghan sa edukasyon kaysa atong mahunahuna. Sa dihang si Presidente Henry B. Eyring, Ikaduhang Magtatambag sa Unang Kapangulohan, mieskwela og physics ug mathematics sa kolehiyo, gibati niya nga nasanapan. Ang iyang pagkanawad-an og kadasig misangpot sa iyang paghunong sa pagtuon ug sa paghunahuna mahitungod sa pag-undang sa pag-eskwela.
Apan usa ka gabii niana, iyang giistorya nga ang “tabang miabot isip usa ka tingog, usa ka tinuod nga tingog diha sa akong salabotan. Kini dili akong tingog. Kini usa ka hinay ug mahigugmaon nga tingog––apan ligdong. Ang mga pulong nga gisulti mao kini: Kon imong maamgohan kon kinsa ikaw sa tinuod, ikaw magmahay nga wala ka maninguha og mas maayo.’”1
Kini nga panabot migiya ni Presidente Eyring sa paghuman sa kolehiyo, mipadayon og pag-eskwela sa graduate school, ug wala madugay nahimong usa ka magtutudlo. Mahimong kontento kita kon hain kita karon sa atong edukasyon o sa panginabuhi, apan ang Dios makakita sa potensyal diha kanato nga gani bisan kita dili kanunay nga makakita. Wala kitay mawala ug makaangkon sa tanan pinaagi sa pag-apil diha sa tibuok kinabuhi nga pagkat-on.
Atong Responsibilidad sa Pagkat-on
Ang tibuok kinabuhi nga pagkat-on dili lamang usa ka butang nga kita makahimo sa pag-apil. Si Presidente Russell M. Nelson miingon, “Tungod sa atong sagradong pagtagad alang sa matag tawhanong salabotan, atong gihunahuna nga ang pagbaton og edukasyon usa ka relihiyosong responsibilidad.”2
Ngano kaha nga ang pagkahimong mas edukado mahimong usa ka relihiyosong responsibilidad? Diha sa Doktrina ug mga Pakigsaad 88:79–80, kita gitudloan nga ma-edukar sa daghang mga hilisgotan aron “nga kamo unta maandam diha sa tanan nga mga butang kon Ako mopadala kaninyo pag-usab aron sa pagpalambo sa balaan nga tawag diin Ako nagtawag kaninyo, ug sa misyon diin Ako nagsugo kaninyo.” Kita makahimo ug kinahanglang makagamit sa atong kahibalo sa pagpanalangin sa uban ug sa pagtabang og tukod sa gingharian sa Dios.
Dugang pa, ang Dios nahigugma kanato pag-ayo nga gusto Siya nga makakita kanato nga mouswag. Isip espiritu nga mga anak sa atong Langitnong Amahan, kita adunay kapasidad nga dili sama sa ubang nilalang dinhi sa yuta––nga mahimong sama Kaniya. Atong nakat-onan gikan sa mga kasulatan nga ang Dios “hingpit sa kahibalo” (Job 37:16), ug busa ang atong katuyoan nga mahimong hingpit kinahanglang maglakip sa pagpaningkamot padulong sa mas hingpit nga kahibalo.
Ang Alang sa Kalig-on sa mga Kabatan-onan nga booklet nag-ingon: “Kamo adunay temporal ug espirituhanonng mga rason sa pagpaningkamot ug paghigugma sa pagkat-on. Ang edukasyon dili lang mahitungod sa pagpangita og kwarta. Kini kabahin sa inyong mahangtoron nga tumong nga mahimong mas mahisama sa Langitnong Amahan.”3 Ang edukasyon usa ka mahangturong tumong tungod kay ang mahimo nga sama sa Dios usa ka walay kataposan nga pagpaningkamot.
Ang baroganan sa tibuok kinabuhi nga pagkat-on dili usa ka oportunidad nga kutob lamang ngadto niadtong kinsa makapadayon og edukasyon sa unibersidad. Si Elder Dieter F. Uchtdorf sa Korum sa Napulog Duha ka Apostoles miingon: “Kon ang pormal nga edukasyon wala diha, ayaw kana tugoti nga mopugong kaninyo gikan sa pagkuha sa tanan nga kahibalo nga inyong mahimo. Ubos sa ingon nga mga kahimtang, ang labing nindot nga mga basahon, maingon nato, mahimong inyong ‘unibersidad’—usa ka klasehanan nga kanunay abli ug modawat sa tanan nga mosulod.”6
Ang Doktrina ug mga Pakigsaad 88:118 nagtudlo: “Pangitaa ninyo gikan sa labing maayo nga mga basahon ang mga pulong sa kaalam, pangitaa ang pagtulon-an gani pinaagi sa pagtuon ug usab pinaagi sa hugot nga pagtuo.” Ang “labing maayo nga mga basahon” naglakip sa balaang kasulatan ug mga pagtulon-an sa buhing mga propeta. Ug sa pagkat-on og ubang mga kahanas ug kahibalo, kita usab kasagaran nagkinahanglan og mga panabot gikan sa ubang mga tinubdan, sama sa mga basahon sa librariya gikan sa sinaligang mga eksperto, mga himan sa pagtuon sa mga kolehiyo sa komunidad, online nga pang-edukasyon nga mga site, mga mantalaan sa balita, mga pista sa lokal nga kultura, ug uban pa. Sa tinuod, dili tanan nga mga kapanguhaan naglangkob og kamatuoran, busa ang inadlaw nga pagtuon sa pulong sa Dios makatabang kanato sa pagsabot sa kamatuoran diha sa ubang mga pagtuon. Ug kita makatinguha sa Espiritu ug makagamit sa kaalam sa pagtino hain nga mga tinubdan ang tun-an ug unsa gikan niini ang tinuod.
Pagmasusihon mahitungod sa kalibotan pinaagi sa pagpangutana. Pangita alang sa mga kakuti ug katahom sa inadlaw-adlaw nga kinabuhi. Si Presidente Dallin H.Oaks, Unang Magtatambag sa Unang Kapangulohan, ug ang iyang asawa si Kristen miingon: Ang “tibuok kinabuhi nga pagkat-on … naglakip sa maanindot nga mga panlimbasog. Kini naglakip usab sa mga kasinatian uban sa mga katawhan ug mga dapit: pakigsinultihanay uban sa mga kahigalaan, pagbisita og mga museum ug mga konsyerto, ug mga kahigayonan alang sa pagserbisyo. Kinahanglan natong patubuon ang atong mga kaugalingon ug magpahimulos sa biyahe.”7
Sa atong tanan nga pagkat-on ug kinaadman, kinahanglan kitang magtinguha og direksyon gikan sa Langitnong Amahan, tungod kay ang Iyang paggiya mohimo sa atong mga pagpaninguha og edukasyon nga mas mapuslanon. Si Presidente Eyring miingon, “Walay butang nga tinuod nga dili ninyo makat-onan, tungod kay Siya nasayod sa tanang kamatuoran.”8 Pagbaton og hugot nga pagtuo nga ang Dios (1) nasayod sa tanan ug (2) gustong makigbahin niana nga kahibalo uban kanato.
Ingon nga gitudlo ni Elder Jeffrey R. Holland sa Korum sa Napulog Duha ka Apostoles, ang atong Langitnong Amahan “sa dakong kahinam naghulat alang sa kahigayonan sa pagtubag sa inyong mga pag-ampo ug sa pagtuman sa inyong mga damgo,”9 ug kini naglakip sa atong mga damgo sa edukasyon. Salig nga ang Dios makatabang kanato sa paglampos ug nga Siya mogiya kanato ngadto sa mga tawo ug mga kapanguhaan nga kita nagtinguha ug nagkinahanglan sa hustong panahon samtang kita naningkamot ug naglihok diha sa pagpadayag.
Walay edad diin kita mohunong sa pagkat-on. Kanunay adunay butang pa nga ang Dios gusto nga itudlo kanato. Kita makahimo sa pagpaubos igo sa pag-amgo nga aduna pay daghan nga kita wala mahibalo, ug kita makapasalamat alang sa oportunidad nga mahimong Iyang mga estudyante.
Atong Responsibilidad ang Pagserbisyo sa Uban Gamit sa Atong Kahibalo
Usa ka paagi sa pagpakita sa Dios sa atong pagkamapasalamaton alang sa abilidad sa pagkat-on mao ang paggamit nianang naangkon nga kahibalo sa pagpanalangin sa uban. Kanunay nga adunay usa ka tawo kinsa makabenepisyo gikan sa atong kahibalo ug kasinatian, kana man tibuok kalibotan nga mga tigpaminaw sa social media o usa ka nanlimbasog nga pamilya nga atong silingan o usa ka sakop sa pamilya sa panimalay.
“Ang Dios gusto kanato sa pag-edukar sa atong mga salabotan, pagpalambo sa atong mga kahanas, ug sa paghingpit sa atong mga abilidad aron kita mahimong mas maayong impluwensiya alang sa kaayohan dinhi sa kalibotan, magsangkap sa atong mga kaugalingon, atong pamilya, ug niadtong nagkinahanglan, ug sa pagtukod sa gingharian sa Dios.”10 Tugoti nga ang Dios mohimo og mga panalangin pinaagi sa tanan nga inyong nakat-onan ug nagpadayon sa pagkat-on.
Ang Manluluwas miasoy og usa ka sambingay mahitungod sa usa ka agalon nga naghatag sa iyang tulo ka sulugoon og mga talanton sa wala pa ang usa ka panaw sa layo. Ang sulugoon nga may lima ka talanton ug ang usa nga may duha ka talanton matag usa midoble sa ilang mga talanton sa wala pa mobalik ang agalon. Hinoon, ang ikatulong sulugoon “milakaw ug nagkalot sa yuta, ug gilubong niya ang kwarta sa iyang agalon” (Mateo 25:18).
Sa dihang mibalik ang agalon, gidayeg niya ang duha ka matinud-anong mga sulugoon samtang gikasab-an ang tapolan nga sulugoon: “Kay matag usa nga adunay iya pagahatagan ug dugang pa, ug makabaton siya og kadagaya: apan siya nga walay iya pagakuhaan sa bisan unsa nga anaa kaniya” (Mateo 25:29).
Bisan unsa pa ka daghan nga kahibalo ang atong naangkon sa atong tibuok nga kinabuhi, kanunay nga adunay usa ka mas taas nga katuyoan nga kita kinahanglang mopanalangin sa uban pinaagi niini nga kahibalo. Si Presidente Nelson mitudlo, “Ang edukasyon mao ang kalainan tali sa pagpangandoy nga makatabang kamo sa ubang tawo ug sa pagkamakahimo sa pagtabang kanila.”11 Samtang atong gigamit unsay atong nakat-onan sa paglig-on sa atong kaigsoonan ug sa paghupot sa atong mga kaugalingon nga bukas ngadto sa pag-angkon pa og dugang nga kahibalo, ang atong kaugalingong kahibalo molapad ug ang atong kasinatian modako. Bisan pa niana, kon atong tagoan ang atong kahibalo ug tagoan kini alang sa atong mga kaugalingon, kini dili motabang kanato nga mahimong mas mahisama sa Langitnong Amahan ug ni Jesukristo.
Adunay daghang mga paagi nga makahimo kita sa pagpadayon og tibuok kinabuhi nga pagkat-on. Kita makatuon pa og daghan mahitungod sa mga bag-ong mga panghitabo sa atong komunidad o nasod sa paghimo og positibo nga lihok ingon nga gikinahanglan. Kon ang usa ka tawo nga atong gipangalagaran nakigbisog sa usa ka sakit nga kita gamay ra og nahibaloan, makasiksik kita niini sa paghatag og mas maayong suporta ug pagbati. Kita makagamit sa atong kahibalo sa ebanghelyo ug sa atong pagpamatuod ni Kristo sa pagdan-ag sa adlaw sa usa ka higala gamit ang text. Kon ang mas batan-ong mga sakop sa pamilya nanlimbasog sa usa ka subject sa eskwelahan, makahimo kita sa paggahin og panahon gikan sa atong iskedyul sa pagtudlo kanila.
Agi og dugang sa pagpaninguha sa pagkat-on sa tibuok natong mga kinabuhi, makasuporta usab kita sa uban sa pagbuhat og sama. Ang pagtabang sa uban diha sa ilang panaw sa tibuok kinabuhi nga pagkat-on wala magpasabot nga mahimong usa ka magtutudlo sa eskwelahan. Kini yanong nagpasabot sa pagdasig sa uban sa pagpadayon og kat-on pinaagi sa atong kadasig sa pagbuhat sa mao. Kini mahimong nagpasabot sa pagkat-on og bag-ong kahanas uban sa usa ka sakop sa pamilya tungod kay kini usa ka butang nga sila interesado, bisan og kita dili sagad maninguha sa pagkat-on mahitungod niana nga subject sa atong mga kaugalingon.
Kini mahimong nagpasabot sa pagpangita alang sa usa ka panginahanglan libot kanato ug pagkat-on kuyog ang uban kon unsaon pagsulbad niini. Kini nagpsabot sa pagkat-on sama sa gibuhat sa Manluluwas ug sa paningkamot sa pagpadayon diha niana nga pagkat-on sa tibuok natong mga kinabuhi tungod kay “kana nga gikan sa Dios mao ang kahayag, ug siya nga nakadawat sa kayahag, ug magpadayon diha sa Dios, makadawat og labaw pa nga kahayag” (Doktrina ug mga Pakigsaad 50:24).
Gidapit kita ni Presidente Nelson sa “pagpadayon sa inyong edukasyon … bisan unsaon ninyo sa pagtino nga kamo labing maayo nga makaserbisyo sa inyong pamilya ug katilingban.”12 Walay duha ka yutan-ong kasinatian o pang-edukasyon nga mga panaw nga managsama, apan samtang kita magpadayon sa pagkat-on ug pagtubo sa tibuok natong mga kinabuhi, makahimo kita og talagsaong impluwensiya nga walay usa nga makahimo.