“Ang Akong Kaguol Nahimong Pasalamat,” Liahona, Abr. 2023.
Mga Tingog sa mga Santos sa Ulahing mga Adlaw
Ang Akong Kaguol Nahimong Pasalamat
Diha sa pagkawalay paglaom ug grabe nga kaguol, nag-ampo ako ngadto sa Ginoo. Sa Iyang kalooy, Siya mitubag.
Litrato sa maayong kabubut-on sa tagsulat
Niadtong Septyembre 2021, ang among kinamanghoran nga anak nga lalaki, si Joey, namatay human nabuhi sulod sa mga duha ka bulan. Bisan sa mga pag-ampo, pagpuasa, mga panalangin sa pagkapari, ug sa hilabihan nga mga paningkamot sa pipila sa labing maayong mga doktor sa kalibotan, ang gamay nga lawas ni Joey wala motugot kaniya nga mabuhi.
Atol sa kataposang mga gutlo sa kinabuhi ni Joey, ang akong asawa ug ako mikugos kaniya. Samtang ako nagtan-aw kaniya sa iyang kataposan nga pagginhawa, gibati nako ang tumang kasubo. Diha sa pagkawalay paglaom ug grabe nga kaguol, nag-ampo ako ngadto sa Ginoo. Sa Iyang kalooy, Siya mitubag.
Diha-diha ang akong kaguol gipulihan sa tumang pagbati sa pasalamat nga lisod alang nako nga ihulagway sa mga pulong. Gibati nako nga gisanapan sa pasalamat nga ang Ginoo mihatag nako og talagsaon nga asawa, upat ka matahom nga mga anak, ug mga pakigsaad nga nagbugkos kanila ngari kanako sa kahangtoran. Gibati nako nga sama ni Alma ang Batan-on sa dihang siya nakasinati og hingpit nga kalipay nga labaw pa sa kasakit nga iyang gibati kaniadto (tan-awa sa Alma 36:20).
Samtang ako mitagamtam sa pagpasalamat ngadto sa Ginoo, ako nakadawat og halawom nga espirituhanon nga impresyon. Ang kaguol nga akong gibati tungod sa kamatayon sa akong anak nga lalaki nakatabang nako sa pagpasalamat sa kaguol nga gibati sa Langitnong Amahan sa dihang ang Iyang Anak namatay tungod kanako, ug alang sa tanang mga anak sa Dios, duha ka libo ka tuig ang milabay. Tungod kay si Jesukristo namatay alang kanato, ako nasayod nga makita nako pag-usab ang akong anak nga lalaki.
Diha sa gamay nga paagi, ako mas nakasabot sa sakripisyo nga gihimo sa Langitnong Amahan ug sa Iyang Anak. Sa makausa, ako mibati og pasalamat alang sa hilabihan nga gugma sa Dios.
Atol sa panahon nga milabay sukad sa kamatayon sa among anak nga lalaki, ako kanunay nga namalandong unsay akong gibati nianang adlawa. Ang kaguol, ang pasalamat, ug ang gamhanan nga espirituhanon nga mga impresyon nakapausab nako sa kahangtoran. Ako sa tinud-anay makapamatuod nga ang mga pagsulay sa kinabuhi mohatag nato og kasinatian ug alang sa atong kaayohan (tan-awa sa Doktrina ug mga Pakigsaad 122:7) kon kita motugot sa Ginoo nga malambigit sa atong mga kinabuhi ug magpadayon sa atong hugot nga pagtuo diha sa Manluluwas ug sa Iyang Pag-ula.