Elder Bednar: Ang Milagro sa Pilipinas Nagpadayon

Nakasaksi na ba ikaw og milagro?

Oo, tubag ni Elder David A. Bednar sa Korum sa Napulog Duha ka Apostoles, sa panapos sa usa ka makasaysayan nga napulo ka adlaw nga paglibot sa Area sa Pilipinas sa miaging Pebrero 17-26, 2023. “Tan-awa dinhi ug ang tibuok Pilipinas karon,” ang senior nga lider sa Simbahan namahayag, “usa kini ka milagro nga mas labaw pa sa pagtunga sa Pulang Dagat, ug magpadayon kini tungod sa debosyon, sa kamapahinungoron, sa kamatinud-anon sa mga miyembro.”

Atol sa tibuok area nga sibya gikan sa Aurora Meetinghouse sa Quezon City nga nakakuha og dul-an sa 112,000 ka magtatan-aw, si Elder Bednar misulti sa Pilipino nga mga miyembro nga ang talagsaong pagtubo sa Ang Simbahan ni Jesukristo sa mga Santos sa Ulahing mga Adlaw sa nasod “dili mahitungod sa gidaghanon sa mga templo… dili mahitungod sa gidaghanon sa mga miyembro,” kon dili, “mahitungod sa kalig-on sa hugot nga pagtuo sa mga Santos sa Ulahing mga Adlaw.”

Unya si Elder Bednar mipahayag sa unsay iyang balik-balik nga nasaksihan atol sa iyang pagbisita, sa ikaunom nga higayon nga siya nakaanhi sa nasod: “Inyong makita ug mabati nga ang hugot nga pagtuo lig-on kaayo.”

Plano sa mga biyahe ug kuyog nga mga lider

Si Elder Bednar ug ang iyang asawa nga si Sister Susan K. Bednar gikuyogan sa mga sakop sa kapangulohan sa Area sa Pilipinas: Sila si Elder Steven R. Bangerter, Elder Yoon Hwan Choi, ug Elder Carlos G. Revillo Jr.; ug ang ilang mga asawa, sila si Sister Susan A. Bangerter, Sister Bon Kyung Choi, ug Sister Marie F. Revillo.

Ang kuyog nila ni Elder ug Sister Bednar samtang nagbiyahe sila mao ang lainlaing mga Area Seventy, lakip na sila si Elder Julius F. Barrientos, Elder Jose Antonio San Gabriel, Elder Tomas S. Merdegia, Elder Martiniano S. Soquila Jr., Elder Aretemio C. Maligon, Elder Eduardo M. Argana, Elder Bartolome Madriaga, Elder Norman C. Insong, ug Elder Ernesto A. Deyro Jr., nga gikuyogan usab sa ilang mga asawa.

Sila si Elder ug Sister Bednar nakighimamat usab nila ni Presidente ug Sister Cabrito sa Manila Philippines Temple, Presidente ug Sister Alfornon, sa Cebu City Philippines Temple ug sa sobra sa usa ka libo nga mga ordinance worker nga matinud-anong nagserbisyo niini nga mga templo. Nakighimamat usab sila sa lainlaing mga lider sa misyon ug sa liboan nga mga misyonaryo sa MTC ug sa tibuok Pilipinas.

Tambag ngadto sa mga Santos

Atol sa iyang pagbisita, sila si Elder ug Sister Bednar namulong ngadto sa mga miyembro sa Makati, San Jose del Monte, San Pablo, Davao, Puerto Princesa, Tarlac, Angeles/San Fernando, ug Quezon City. Agi og dugang sa pag-apil sa tibuok area nga sibya, si Elder Bednar nakighimamat sa mga lider sa stake ug sa district, nagpasiugda sa pipila ka komperensiya ug mga debosyonal, nagtudlo sa mga misyonaryo ug sa mga nagtrabaho sa templo, ug nakighimamat sa mga lider sa politika ug relihiyon.

Ang panapos nga kalihokan mao ang tibuok area nga sibya nga adunay tema nga “Pagkahimong Usa ka Katawhan nga Andam alang sa Templo.” Atol sa sibya dul-an sa 50,000 ka miyembro ang miapil sa face-to-face ug sa online. Atol sa kalihokan, ang mga miyembro sa kapangulohan sa Area sa Pilipinas ug ang ilang mga asawa mipresentar nila ni Elder ug Sister Bednar sa mga hunahuna gikan sa mga lider ug mga miyembro sa Simbahan sa tibuok nasod nga mitambong sa lainlaing mga kalihokan diin ang mga Bednar namulong. Si Elder Bednar midapit niining mga lider ug mga miyembro sa pagpaambit og tulo ka butang: (1) Unsay ilang nadungog? (2) Unsay ilang nakat-onan? ug (3) Unsaon nga kini makatabang kanila nga mausab?

Gamit niining pamaagi, usa ka talagsaong pagbubo sa Espiritu nabati samtang ang Pilipino nga mga Santos nagkapundok aron magkat-on sa bag-ong pamaagi ug nalig-on pinaagi sa usa ka apostol sa karon nga panahon.

Si Elder Bednar mipahinumdom sa mga miyembro sa Simbahan nga “importante gayod kaayo” nga motutok sa sukaranang mga butang sa ebanghelyo. “Ang ebanghelyo ni Jesukristo yano kaayo, dili kini lisod sundon,” pamatuod ni Elder Bednar sa mga Santos. “Kita nagkat-on, kita naningkamot nga makasabot sa mga pagtulon-an sa Manluluwas, ug unya kita mohimo niini—mao kana ang gitawag og hugot nga pagtuo diha Kaniya.”

Unya si Elder Bednar mipasabot, nga “kon kita mohimo niana, ang atong mga problema dili mawala, ang atong mga problema dili masulbad para kanato.” Apan, “kita mapanalanginan og gahom sa pagkadiosnon sa atong kinabuhi, tungod kay konektado kita ngadto sa Amahan ug sa Anak pinaagi sa pakigsaad, ug ang Espiritu Santo mao ang atong kauban, ug bisan unsa nga kalisdanan nga atong giatubang sa kinabuhi, bisan unsa nga hagit, kita adunay kalig-on nga molahutay, nga magmapailobon, ug mopadayon sa unahan,” siya midugang.

Si Elder Bednar nakahibalo gayod sa mga hagit nga giatubang sa mga Pilipino, diin makita sa dihang adunay usa ka pangutana kalabot sa mga miyembro nga naglisod sa pagdesisyon kon mobiya ba o dili sa ilang mga pamilya aron magtrabaho sa gawas sa nasod. Si Elder Bednar miingon nga nakakita siya og daghang Pilipino nga nagtrabaho sa lainlaing mga dapit sama sa Saudi Arabia ug sa Hong Kong.

“Dili gyod ko mosulti ninyo unsay angayng buhaton,” ang apostol miingon, nagpasabot nga “kamo adunay inyong kabubut-on, kamo ang magbuot, kamo ang modesisyon.” Si Elder Bednar mitambag sa mga miyembro nga basahon isip usa ka pamilya ang sa Simbahan nga Pamahayag sa Pamilya, labi na ang mga bahin diin ang pamilya gihulagway isip gi-orden sa Dios ug ang tahas sa pamilya diha sa plano sa Langitnong Amahan alang sa Iyang mga anak. “I-ampo kini, pamalandongi kini, pangayo og tabang sa Ginoo, ug unya himoa ang inyong desisyon,” siya mitudlo.

Tambag ngadto sa mga misyonaryo

Ngadto sa full-time ug pangserbisyo nga mga misyonaryo, si Elder Bednar mipasabot og usab sa kaimportante sa pagpaminaw sa Espiritu. Ngadto sa nagpundok sa Missionary Training Center (MTC) sa Pilipinas, si Elder Bednar mihangyo sa mga misyonaryo sa pagpangandam nga ‘matudloan sa Espiritu’ pinaagi sa pagtuon sa lima ka artikulo. Imbes nga isulat lang ang unsay iyang isulti, si Elder Bednar midapit nila sa pagsulat sa ilang mga hunahuna sumala sa gihatag sa Espiritu. Samtang namulong siya ngadto kanila, siya midapit nila sa pagpangutana.

Si Sister Asis, nga madestino ngadto sa Japan Kobe Mission, nakaamgo nga ang ingon nga pagpangandam ug pagtuon importante kaayo sa pagdapit sa Espiritu sa wala pa magsugod ang debosyonal. “Kon wala pa magtuon sa iyang miaging mga pakigpulong,” siya miingon, “ang pagsabot sa tanan niyang gisulti lisod unta kaayo.” Si Elder Ruiz sa Philippines Iloilo Mission nakaangkon og mas lawom nga pagsabot sa pulong nga pagkakabig: “Isip usa ka misyonaryo, kon ako nakabig, ako makahimo sa pagsunod sa Mga Sumbanan sa Misyonaryo ug sa ehemplo [sa Manluluwas] ug mosalig sa akong pagpamatuod sa pagtudlo pinaagi sa Espiritu.”

Sa susama nga debosyonal sa makasaysayan nga Buendia Chapel uban sa mga misyonaryo gikan sa upat ka misyon (Philippines Antipolo, Philippines Manila, Philippines Quezon City ug Philippines Quezon City North), si Elder Bednar mihangyo sa mga Elder ug mga Sister sa pagpangandam sa ilang kaugalingon ug sa pagkat-on pinaagi sa Espiritu—sa pagpaminaw dili lang sa unsay gisulti apan sa unsay gitudlo usab nganha kanila sa Espiritu Santo sa tinagsa-tagsa.

Mga kasinatian ni Sister Bednar

Sa iyang bahin, si Sister Bednar mipasabot sa kaimportante sa Alang sa Kalig-on sa mga Kabatan-onan nga giya, mihinumdom kon sa unsang paagi nga siya ug si Elder Bednar mipakigbahin sa dinasig niini nga tambag ngadto sa dili miyembro nga mga higala sa ilang tulo ka anak samtang nagtubo sila. “Ang akong bana ug ako nakakita nga kon kamo magpuyo sa mga lugar nga diyutay ra kaayo ang mga miyembro sa Simbahan,” siya miingon, “mas sayon alang sa among mga anak ug… sa inyong mga anak ang pagpanghatag sa Alang sa Kalig-on sa mga Kabatan-onan nga pampleta… nindot kini nga himan sa misyonaryo.” Unya iyang gisaysay kon giunsa niya ug ni Elder Bednar pagpadako ang ilang mga anak subay sa mga hiyas sa ebanghelyo.

“Sa dihang naghisgot si Sister Bednar mahitungod sa pagbutang og litrato ni Jesukristo sa mga bungbong sa ilang mga anak, nakahinumdom ko sa akong pamilya nga pagtuon sa kasulatan diin ang akong amahan naghisgot og duha ka kinaiya ni Jesukristo diha sa Juan 2 diin iyang gilimpyohan ang templo,” mihinumdom si Sister Laneah Benigno sa Cubao Ward, Quezon City South Stake. “Karon nga ako adunay hulagway usab Kaniya, akong makita ug mahinumdoman dili lang ang Iyang mga kinaiya apan ang Iyang mga pagtulon-an usab nga nakaimpluwensya sa akong kinabuhi.”

“Sila si Elder ug Sister Bednar naghisgot kon sa unsang paagi nga ang mga hulagway ni Jesus ug sa templo sa mga kwarto sa ilang mga anak nga lalaki nakapahinam nila nga moadto sa templo,” mipakigbahin ang nuybe anyos nga si Kaylee Sophia Lopez sa Quirino 1st ward, Quezon City South Stake. “Mahinamon usab ako nga moadto sa templo, apan kinahanglan pa ko nga maghulat hangtod magdose ko.”

Pagtabang

Atol sa iyang pagbisita, si Elder Bednar, gikuyogan ni Elder Bangerter, nakighimamat ni presidente Rodrigo R. Duterte ug Senador Rolando “Bong” Go didto sa Parañaque City. Si Elder Bednar misulti sa duha ka lider bahin sa kahimtang sa Philippines Davao Temple, nga sa pagkakaron gitukod pa ug unya mipaabot og mainiton nga pagdapit ngadto kanila nga motambong sa makasaysayan nga open house sa templo kon mahuman na kini. Ang mga lider sa Simbahan ug si Senador Go naghisgot usab sa nagkalainlaing mga inisyatibo sa Simbahan nga nagpadayon sa pagpanalangin sa mga kinabuhi sa Pilipino nga mga pamilya ug mga komunidad.

Si Elder Bednar miapil usab sa usa ka kalihokan sa lainlaing relihiyon didto sa San Carlos Pastoral Formation Complex sa Makati, diin gihangop siya ni Fr. Richard Babao, dean sa Holy Apostles Senior Seminary and Assistant Minister for Ecumenical and Interfaith Affairs of the Archdiocese of Manila. Si Elder Bednar mihatag ni Padre Babao og maanindot nga istatuwa nga Christus ug mipamatuod sa mahinungdanong tahas sa Manluluwas diha sa doktrina sa Simbahan. Si Elder Bangerter Mihatag ni Padre Babao og pinatuyo og himo nga kopya sa Basahon ni Mormon ug sila mihisgot sa katinuod niini isip usa ka pagpamatuod ni Jesukristo. Panahon sa pangutana-ug-tubag nga sesyon uban sa Katoliko nga mga seminarista sa complex nga Holy Apostles Senior Seminary, si Elder Bednar mipahibalo nga ang iyang mga paryente mga Katoliko usab ug Ang Simbahan ni Jesukristo sa mga Santos sa Ulahing mga Adlaw aktibong nag-ugmad og panaghigalaay sa tanang tinuohan sa tibuok kalibotan, samtang nakig-uban kanila sa pagpangalagad ngadto sa makitawhanong mga panginahanglan ug mga problema.

Panalangin sa usa ka Apostol

Sa adlaw nga wala pa siya ug si Sister Bednar molarga, si Elder Bednar mihatag og apostolikanhong panalangin sa sobra sa 850,000 ka miyembro sa Simbahan sa Pilipinas. “Ako mohatag niini nga panalangin nga ang kahayag sa pagkamatarong magpadayon sa pagkatap niini nga nasod,” siya mainampoong namulong, “diha sa tinagsa-tagsa nga kinabuhi, diha sa mga pamilya, diha sa mga komunidad, ug niini nga nasod.” Siya misangpit usab sa kalangitan sa pagpanalangin sa Pilipino nga katawhan, nga sila makabaton og “mas dakong tinguha sa pagkat-on mahitungod sa pakigsaad ug mga ordinansa sa ebanghelyo sa Manluluwas.”

Sa kataposan, isip usa ka espesyal nga saksi ni Ginoong Jesukristo, si Elder Bednar mihatag sa iyang pagpamatuod diin sa makausa pa siya mipaniguro sa mga miyembro sa Simbahan sa tibuok Pilipinas bahin sa tahas sa Manluluwas sa ilang kinabuhi: “Siya nabanhaw. Siya buhi. Kita makasangon ngadto ug uban kaniya pinaagi sa mga pakigsaad ug mga ordinansa sa Iyang gipahiuli nga ebanghelyo. Ako mosaksi nga kana tinuod ug maanaa sa matag usa nga miyembro niini nga Simbahan nga nakadawat sa mga pakigsaad ug naningkamot sa paghinumdom ug pagtahod niini.”