“Dili Makalimtan nga Kasinatian”: Si Elder Bednar Nagdasig sa Batan-Ong Pilipino nga mga Santos sa Ulahing mga Adlaw

“Ang nakat-onan nako mao nga bisan og lahi ang ilang kaliwatan, nindot gihapon kaayo ang ilang pagdawat nato sa Simbahan, nga bisan og wala nako masabti ang uban nilang mga pulong, nakita gihapon nako ang kamaya diha sa ilang mga mata.”

Kining mga pulong sa diseotso anyos nga si John Lexis Acuña, bag-ong miyembro sa Francisco Homes Ward, San Jose del Monte Stake, hingpit nga naghulagway sa unsay gibati ug nasinati sa daghang batan-on nga mga Young Single Adult (YSA) samtang miadto ug naminaw sila ni Elder David A. Bednar sa Korum sa Napulog Duha ka Apostoles ug sa iyang asawa, si Sister Susan K. Bednar.

“Nakadungog ko og daghang tambag, sama sa pagpadayon ug pagpabilin sa atong kaugalingon diha sa dalan sa pakigsaad pinaagi sa pagbaton ug pagsunod sa mga baroganan sa ebanghelyo nga gitudlo sa mga kasulatan ug sa buhing mga propeta,” mipakigbahin si Hannah Mae Cresel Calastre, nga gikan usab sa San Jose Del Monte Stake. “Akong nakat-onan nga pinaagi sa pagpadayon diha sa dalan sa pakigsaad,” ang secretary sa klase sa Young Women miingon, “kita makaangkon og tinuod nga kalipay ug kita kinahanglang mobukas sa atong mga kasingkasing aron mausab ang atong mga kahimtang sa kinabuhi.”

Gawas sa pagpadayon diha sa dalan sa pakigsaad, si Elder Bednar mipasabot usab sa kaimportante sa personal nga pagpadayag, nga nakamugna og malungtaron nga pagbati ni Hailey Villanueva, 15. “Kadto usa ka nindot nga kasinatian nga makahibalo pa og dugang mahitungod sa pagdawat og personal nga pagpadayag, sa kaimportante sa Espiritu Santo, ug pagtuman sa atong mga pakigsaad ug pagpahigayon sa mga ordinansa aron magpadayon nga konektado sa Langitnong Amahan ug ni Jesukristo,” siya midugang.

Si Hailey, sa Quirino 2nd Ward, Quezon City South Stake, misulti kon sa unsang paagi nga ang mensahe sa apostol nakatabang niya nga makakat-on sa kaimportante sa mga sumbanan sa Alang sa Kalig-on sa mga Kabatan-onan (AKK) ug sa unsang paagi nga nagsilbi kini nga giya alang nila aron magpuyo nga matarong. “Ang iyang mensahe nakapalig-on sa akong pagpamatuod kon sa unsang paagi nga ang Dios nahibalo sa unsay labing maayo alang kanato, ug Siya mohatag niini nato sa tukmang panahon.”

Alang ni Nathan Benson Angeles sa Tala Ward, San Jose del Monte Stake, ang oportunidad nga mahimamat ang apostol sa ulahing mga adlaw sa personal usa gayod ka makapausab sa kinabuhi ug dili makalimtan nga kasinatian. “Kini nakatabang gayod nako nga mabuntog ang mga pagsulay ug mga hagit nga akong nasinati,” siya miingon, “ug nakatabang nako nga mas magpaduol ngadto sa Langitnong Amahan ug ni Jesukristo ug mahimong mas espirituhanon, ug ganahan ko nga mobati niana kanunay.”

Si Nathan, usa ka naghupot sa Aaronic nga pagkapari nga nagserbisyo isip presidente sa iyang korum sa mga priest, dili usab makalimot sa higayon sa dihang si Elder Bednar mihatag sa iyang apostolikanhong panalangin. Kini “nakapatandog gayod” siya miingon, isip apostol, nga nagserbisyo isip usa ka espesyal nga saksi sa Manluluwas, “mipanalangin nato nga kita makabaton og kalig-on nga mas magpaduol ngadto sa Langitnong Amahan ug ni Jesukristo.”

Sa kataposan, sa dihang si Elder Bednar mitudlo nga “ang tanang butang nga maayo nagagikan sa Dios,” si Jayden Keith Lopez naghunahuna sa mga higayon sa dihang siya magluhod ug mag-ampo. “Kon mag-ampo ko nindot ang akong bation,” ang dose anyos nga miyembro sa Young Men karon nakasabot na, “Ako nasayod nga ang Langitnong Amahan maminaw sa akong pag-ampo.”