Sama sa Unsa Kaha nga Motabang og Usa ka Apostol?

Sigurado gayod nga adunay daghang pag-organisar nga mahitabo sa dili pa mobisita ang usa ka sakop Korum sa Napulog Duha ka Apostoles ngadto sa layo kaayo nga nasod sama sa Pilipinas.

Pagplano sa mga pagdumala, pagsiguro sa seguridad, ug paghatag og pagtagad sa matag gagmay nga detalye sama sa pagkaon nga itanyag, tanan importante. Kadtong gisangonan niini nga mga buluhaton hilom nga naglihok ug layo sa panan-aw sa publiko. Nagpahinumdom kini bahin sa itik nga kalma nga naglangoy sa tubig, nga iyang mga tiil paspas nga nagkapaykapay sa ilawom.

Ania ang pipila ka mubong asoy nga samtang naghupot siya og sagrado nga calling, si Elder David A. Bednar ug ang iyang kapikas nga si Sister Susan K. Bednar pareho ra nato nga mga Santos sa Ulahing mga Adlaw sa inadlaw-adlaw: mainiton, malumo, komedyante, ug mahigalaon.

Si Wilmer Buenconsejo nalipay nga nahimong usa sa mga drayber nga nagdala nila ni Elder ug Sister Bednar ngadto sa ilang mga adtoan, apan nakuyawan usab siya. Kinahanglan niyang ibalanse ang tali sa pagdrayb sa luwas nga paagi ug pagsiguro nga ang apostol sa Ginoo dili maulahi sa iyang mga buluhaton sa pagpakigpulong. “Ang kalma ug nindot nga kinaiya ni Elder Bednar nakahupay sa akong mga kabalaka ug buotan siya nga nakigsulti nako,” siya mipaambit. “Human nga kami miabot sa lugar nga nag-una sa eskedyul, mipahiyom siya nako ug miingon ‘salamat.’”

Si Sister Bednar malipayon nga anaa si Gretchen Berido gikan sa Philippines Area Office isip guwardiya nga gisangon nga motabang niya. Nailhan ni Sister Berido si Sister Bednar nga buotan ug mapaubsanon kaayo—ug nangayo og praktikal nga tambag bahin sa pagpili og mga smartphone. “Mangayo siya og mga sugyot mahitungod sa mga gasa alang sa iyang mga apo nga babaye ug sa mga bintaha sa mga android phone itandi sa mga iPhone,” siya miingon, “ug kanunayng magsusi kon komportable ra ba ko samtang magbiyahe kami.”

Ang bugtong higayon nga si Gretchen mibiya ni Sister Bednar mao kadtong didto sa Tarlac sa dihang iyang gidali pagdala ang mabdos nga sister ngadto sa ospital human nga siya nakuhaan didto sa meetinghouse. Usa kadto ka talandogon nga pagmabdos, apan ang sister miinsister nga mobiyahe gikan sa iyang panimalay sa Bulacan ngadto sa Tarlac tungod kay gusto gayod siya nga maminaw sa mensahe nila ni Elder ug Sister Bednar.

Si Julius Tirazona, laing sakop sa lokal nga guwardiya alang nila ni Elder ug Sister Bednar, mibati nga makapakalma nga makita ang mas makalingaw ug relaks nga bahin ni Elder Bednar samtang nagkomedya siya niadtong nagbiyahe kuyog niya. “Nalingaw ko nga nahinumdom sa dihang si Elder Bednar namulong didto sa Tarlac,” siya mihinumdom. “Si Sister Bednar kalit nga miduol niya sa pulpito kay mireak sa iyang gisulti ug sa wala pa siya molingkod og balik gihagkan niya si Elder Bednar sa ngabil.” Ang mga miyembro sa kongregasyon nahugyaw ug nangatawa, nga nakapaaghat ni Sister Bednar sa pagbarog pag-usab ug nangayo og pasaylo, diin si Elder Bednar makomedyahong mitubag: “‘Ayaw pangayo og pasaylo tungod sa imong paghalok sa imong kapikas,’ si Elder Bednar misulti niya nga nagpahiyom.”

Sila si Elder ug Sister Bednar mipahayag sa ilang pasalamat sa tanan nga mitabang nila atol sa ilang ikaunom nga pagbisita sa nasod. Gani nagkomedya sila nga mamahimong sinagop nga mga Pilipino sa sunod nilang pagbalik.

Pagkagabii sa wala pa sila molarga, ang personal nga guwardiya ni Elder Bednar nga si Bryan Palmer misulti kang Elder Steven R. Bangerter sa Kapangulohan sa Area sa Pilipinas ug midayeg kon giunsa sa Pilipino nga mga Santos sa Ulahing mga Adlaw pagpakita og ingon ka mahigugmaon, mabination nga mga kasingkasing. “Matag detalye sa pagbisita sa Apostol hingpit nga giplano, ug ang mga tawo sayon ra kaayo nga midawat sa kataposang minuto nga mga kausaban o gani sa unsay gustong buhaton ni Elder Bednar niana dayong higayona,” siya miingon. “Nahingangha ko sa kabuotan sa mga Pilipino.”