Ang Labing Nindot nga Istorya sa Pasko sa Pagkabanhaw nga Sukad Nasugilon
Hunahunaa ang Basahon ni Mormon sa bag-o nga paagi ug ikonsiderar ang talagsaon nga saksi nga gihatag niini sa katinuod sa nabanhaw nga Kristo.
Sulat sa Unang Kapangulohan sa Pasko sa Pagkabanhaw
Kamo lagmit nakahinumdom nga nakadungog og usa ka sulat gikan sa Unang Kapangulohan nga gibasa sa inyong ward o branch pipila ka semana ang milabay. Kana nga sulat mipahibalo nga sunod Dominggo—Dominggo sa Pasko sa Pagkabanhaw—tanang ward ug mga branch magtigom alang sa miting sa sakramento lamang, maghatag og dugang nga panahon alang sa pagsimba sa panimalay samtang ang mga pamilya magsaulog niining labing importante nga holiday.1
Ang sulat sa Unang Kapangulohan nakakuha sa akong atensiyon, ug kini nakapahimo kanako nga mamalandong sa paagi nga ang among pamilya misaulog sa Pasko sa Pagkabanhaw sa katuigan. Sa akong paghunahuna og maayo sa among mga kasaulogan, mas nakaplagan nako ang kaugalingon nga naghunahuna kon kita ba sa wala gituyo nga paagi naghikaw sa atong kaugalingon sa pagsabot sa tinuod nga kahulogan niini nga holiday, nga importante kaayo sa tanang tumutuo ni Jesukristo.
Mga Tradisyon sa Pasko ug sa Pasko sa Pagkabanhaw
Kadto nga mga hunahuna migiya kanako sa pagpamalandong sa kalainan tali sa paagi nga kami misaulog sa Pasko kon itandi sa Pasko sa Pagkabanhaw. Atol sa Disyembre, kami makahimo sa paglakip sa kalingaw sa “Jingle Bells,” mga sa medyas sa Pasko, ug sa mga regalo kuyog sa ubang, mas mahunahunaon nga mga tradisyon—sama sa pag-atiman alang niadtong nanginahanglan, pagkanta sa among paborito nga mga daygon ug mga himno sa Pasko, ug siyempre ang pagbukas sa mga kasulatan ug pagbasa sa istorya sa Pasko diha sa Lucas 2. Matag tuig samtang mobasa kami niining minahal nga istorya gikan sa usa ka dakong karaan nga Biblia, ang among pamilya mobuhat sa lagmit buhaton sa inyong pamilya—nagsul-ob og mga tualya diha sa among mga ulo ug mga abaga ug nagsinina og mga bathrobe sa pagrepresentar ni Jose, Maria, ug sa daghang tawo kinsa miabot aron sa pagsimba sa masuso nga si Jesus, kami modrama sa gimahal nga istorya sa Pasko sa pagkatawo sa Manluluwas.
Ang among mga pagsaulog sa pamilya atol sa Pasko sa Pagkabanhaw, hinuon, nahimong medyo lahi. Akong nabati nga ang among pamilya mas nagsalig sa “pagsimba” aron sa paghatag sa mahinungdanon, nakasentro kang Kristo nga bahin sa Pasko sa Pagkabanhaw; ug dayon isip usa ka pamilya, kami nagpundok aron sa pagpakigbahin sa ubang mga tradisyon nga may kalabotan sa Pasko sa Pagkabanhaw. Ganahan kong nagtan-aw sa among mga anak ug karon sa among mga apo nga mangita og mga itlog sa Pasko sa Pagkabanhaw ug mahinamong mokaykay sa ilang mga bukag sa Pasko sa Pagkabanhaw.
Apan ang sulat sa Unang Kapangulohan usa ka pahigmata. Wala lamang sila midapit kanatong tanan sa pagseguro nga ang atong pagsaulog sa labing importante nga panghitabo nga nahitabo sukad dinhi niini nga yuta—ang Pag-ula ug Pagkabanhaw ni Jesukristo—naglakip sa balaan nga katahoran ug pagtahod nga angayan ang Ginoo, sila usab mihatag kanato og dugang nga panahon uban sa atong mga pamilya ug mga higala atol sa Dominggo sa Pasko sa Pagkabanhaw aron sa pagbuhat sa ingon.
Kini nga mga pulong ni Propeta Joseph Smith nagpuno og dugang nga konteksto sa kamahinungdanon sa panghitabo palibot sa Pasko sa Pagkabanhaw: “Ang sukaranan nga mga baroganan sa atong relihiyon mao ang pagpamatuod sa mga Apostoles ug sa mga Propeta, mahitungod ni Jesukristo, nga Siya namatay, gilubong, ug mibangon sa ikatulong adlaw, ug mikayab ngadto sa langit; ug sa ubang mga butang nga may kalabotan sa atong relihiyon sumpay lamang niini.”2
Si Lesa ug ako naghisgot og mga paagi nga ang among pamilya makahimo og mas maayo atol sa panahon sa Pasko sa Pagkabanhaw. Tingali ang pangutana nga among gipangutana sa among kaugalingon mao ang usa nga kitang tanan makapamalandong: unsaon nato pagtudlo ug pagsaulog ang Pagkabanhaw ni Jesukristo, ang istorya sa Pasko sa Pagkabanhaw nga may samang paningkamot, kalipay, ug pagsaulog sa mga tradisyon sa pagkatawo ni Jesukristo, ang istorya sa Pasko?
Ingon og kitang tanan naningkamot. Nakabantay ko og nagkadako nga paningkamot taliwala sa mga Santos sa Ulahing mga Adlaw ngadto sa usa ka mas nakasentro kang Kristo nga Pasko sa Pagkabanhaw. Kini naglakip og mas dako ug mas mahunahunaon nga pag-ila sa Dominggo sa Lukay ug Biyernes Santo sama sa gibuhat sa pipila sa ubang Kristiyano nga mga relihiyon. Mahimong mosagop usab kita og tukma nga nakasentro kang Kristo nga mga tradisyon sa Pasko sa Pagkabanhaw nga makita diha sa mga kultura ug mga binuhatan sa mga nasod sa tibuok kalibotan.
Ang eskolar sa Bag-ong Tugon nga si N. T. Wright misugyot: “Kinahanglan mohimo kita og mga lakang sa pagsaulog sa Pasko sa Pagkabanhaw sa mamugnaon nga mga paagi: sa art, literatura, mga dula sa mga bata, pamalak, musika, sayaw, mga kapistahan, mga kampanilya, espesyal nga mga konsiyerto. … Kini mao ang atong kinadak-an nga kapistahan. Kuhaa ang Pasko, ug diha sa Biblia mawad-an kamo og duha ka kapitulo sa sinugdanan sa Mateo ug Lucas, wala nay lain pa. Kuhaa ang Pasko sa Pagkabanhaw, ug kamo walay Bag-ong Tugon; kamo walay Kristiyanismo.”3
Pasko sa Pagkabanhaw, ang Biblia, ug ang Basahon ni Mormon
Atong gimahal ang Biblia alang sa tanang gitudlo niini mahitungod sa pagkatawo, pangalagad, Paglansang, ug Pagkabanhaw ni Jesukristo. Walay laing duha ka pulong nga nagpahayag og dugang nga paglaom ug mahangtoron nga sangpotanan alang sa tanang katawhan kay sa niadtong gipamulong sa usa ka langitnon nga anghel sa kabuntagon sa Pasko sa Pagkabanhaw diha sa Tanaman nga Lubnganan: “Nabanhaw siya.”4 Mapasalamaton kaayo kita sa kasulatan sa Bag-ong Tugon nga nagpreserbar sa istorya sa Pasko sa Pagkabanhaw ug sa Pasko sa Pagkabanhaw nga pangalagad sa Manluluwas didto sa Judea ug Galilea.
Samtang si Lesa ug ako nagpadayon sa pagpamalandong ug pagtinguha og mga paagi sa pagpalapad sa pagsaulog sa among pamilya sa Pasko sa Pagkabanhaw aron mahimong mas nakasentro kang Kristo, kami naghisgot kon unsa nga tradisyon sa pagbasa sa kasulatan ang mahimo namong ipaila ngadto sa among pamilya—ang Lucas 2 nga tugbang sa Pasko sa Pagkabanhaw, kon inyong hunahunaon.
Ug dayon kami adunay kalit nga langitnong pagsabot [epiphany]: Agig dugang sa importante nga mga bersikulo mahitungod sa Pasko sa Pagkabanhaw diha sa Bag-ong Tugon, kita isip mga Santos sa Ulahing mga Adlaw gipanalanginan og labing mahinungdanon nga gasa sa Pasko sa Pagkabanhaw! Usa ka gasa sa talagsaon nga saksi, laing tugon sa milagro sa Pasko sa Pagkabanhaw nga naglangkob tingali sa labing talagsaon nga mga kasulatan sa Pasko sa Pagkabanhaw sa tibuok Kristiyanismo. Ako nagpasabot siyempre sa Basahon ni Mormon ug, mas piho, ngadto sa asoy ni Jesukristo nga nagpakita diha sa Iyang nabanhaw nga himaya ngadto sa mga lumulupyo didto sa Bag-ong Kalibotan.
Si Propeta Joseph Smith mihulagway sa Basahon ni Mormon isip “ang labing tukma sa bisan hain nga basahon,”5 ug sugod sa 3 Nephi 11, kini nagsulti sa talagsaon nga istorya sa pagbisita sa nabanhaw nga Kristo ngadto sa mga Nephite, ang Pasko sa Pagkabanhaw nga pangalagad sa Manluluwas. Kini nga mga kasulatan sa Pasko sa Pagkabanhaw nagpamatuod sa Pagkabanhaw ni Ginoong Jesukristo.
Dinhi niini nga mga kapitulo, si Kristo nagtawag og napulog duha ka disipulo, nagtudlo sama sa Iyang pagtudlo didto sa Iyang Wali ibabaw sa Bungtod, nagpahibalo nga Iyang natuman ang balaod ni Moises, ug nanagna mahitungod sa ulahing mga adlaw nga pagpundok sa Israel. Siya miayo sa mga masakiton ug nag-ampo alang sa mga tawo sa ingon kamahimayaon kaayo nga paagi nga “walay dila nga makalitok, ni may ikasulat si bisan kinsa nga tawo, ni mga kasingkasing sa mga tawo makasabot niini nga mahinungdanon ug kahibulongan nga mga butang nga among nakita ug nadungog nga gipamulong ni Jesus; ug walay usa nga nakasabot sa kalipay nga mipuno sa among mga kalag sa panahon nga kami nakadungog kaniya nga nag-ampo alang kanamo ngadto sa Amahan.”6
Niining Pasko sa Pagkabanhaw, ang among pamilya motutok sa unang 17 ka bersikulo sa 3 Nephi 11, diin kamo pamilyar. Inyong mahinumdoman ang dakong pundok sa mga tawo nga nagpalibot sa templo diha sa yuta sa Bountiful kinsa nakadungog sa tingog sa Dios nga Amahan ug nakakita ni Jesukristo nga mikunsad sa langit aron sa paghatag sa labing matahom nga pagdapit sa Pasko sa Pagkabanhaw:
“Tindog ug duol kamo ngari kanako, aron … kamo mobati sa mga agi sa lansang sa akong mga kamot ug sa mga tiil, nga kamo masayod nga Ako mao … ang Dios sa tibuok yuta, nga gipatay tungod sa mga sala sa kalibotan.
“Ug … ang pundok sa mga katawhan miduol ngadto kaniya, … tagsa-tagsa … ug nakakita uban sa ilang mga mata ug mibati uban sa ilang mga kamot, … ug nagpamatuod, nga kini mao siya. …
“Ug …sila naghiusa sa pagsinggit, nag-ingon:
“Hosanna! Bulahan ang ngalan sa Labing Halangdon nga Dios! Ug sila nangluhod sa tiilan ni Jesus, ug nagsimba kaniya.”7
Hunahunaa: ang mga Nephite didto sa templo nakahikap gayod sa mga kamot sa nabanhaw nga Ginoo! Kami naglaom sa paghimo niini nga mga kapitulo diha sa 3 Nephi nga kabahin gayod sa among tradisyon sa Pasko sa Pagkabanhaw ingon nga ang Lucas 2 kabahin sa among tradisyon sa Pasko. Sa pagkatinuod, ang Basahon ni Mormon nagpakigbahin sa labing nindot nga istorya sa Pasko sa Pagkabanhaw nga sukad nasugilon. Ayaw kini itugot nga mahimong ang labing nindot nga istorya sa Pasko sa Pagkabanhaw nga sukad wala nasugilon.
Dapiton ko kamo sa paghunahuna sa Basahon ni Mormon sa bag-o nga paagi ug sa pagkonsiderar sa talagsaon nga saksi nga gihatag niini sa katinuod sa nabanhaw nga Kristo ingon man sa kabuhong ug kalawom sa doktrina ni Kristo.
Ang Basahon ni Mormon Nagpamatuod ni Jesukristo
Tingali kita mangutana, Sa unsang paagi ang pagbasa sa mga kasulatan sa Basahon ni Mormon atol sa Pasko sa Pagkabanhaw mopanalangin sa atong mga kinabuhi ug niadtong atong mga minahal sa usa ka makahuloganon nga paagi? Labaw pa tingali sa maamgohan ni bisan kinsa. Bisan kanus-a nga kita mobasa ug magtuon gikan sa Basahon ni Mormonm, kita makalaom og talagsaon nga mga sangpotanan.
Bag-ohay lang, si Lesa ug ako mitambong sa haya sa usa ka minahal nga higala, usa ka matinud-anon nga babaye nga sayo nga namatay tungod sa sakit. Kami mipundok uban sa iyang pamilya ug suod nga mga higala, nagbinayloay ug nindot nga mga handomanan niining matahom nga kalag kinsa nakapalambo sa among mga kinabuhi.
Samtang nagbarog nga adunay distansiya gamay gikan sa lungon, samtang nakig-istorya sa uban, nakabantay ko og duha ka batang babaye nga Primary ang pangedaron nga miduol sa lungon ug mikinto—igo lang nga makakita sa sulod sa lungon—aron sa pagpanamilit sa kataposang higayon sa ilang minahal nga iyaan. Tungod walay laing tawo sa duol, si Lesa miduol ug mihupo sa ilang kilid aron sa pagtanyag og kahupayan ug pagtulon-an. Nangutana siya kon kumusta sila ug kon sila nasayod kon asa na karon ang ilang iyaan. Sila mipakigbahin sa ilang kaguol, apan dayon kining bililhon nga mga anak nga babaye sa Dios, nga may pagsalig nga naghingapin diha sa ilang mga mata, miingon nga sila nasayod nga ang ilang iyaan malipayon na karon ug nga siya mahimong kuyog ni Jesus.
Sa sayong pangedaron, sila nakakaplag og kalinaw diha sa mahinungdanon nga plano sa kalipay ug, sa ilang sama sa bata nga paagi, nagpamatuod sa talagsaon nga reyalidad ug yano nga katahom sa Pagkabanhaw sa Manluluwas. Sila nasayod niini sa ilang mga kasingkasing tungod sa mahunahunaon nga mga pagtulon-an sa mahigugmaon nga mga ginikanan, pamilya, ug mga lider sa Primary nga nagtanom og usa ka binhi sa hugot nga pagtuo ni Jesukristo ug kinabuhing dayon. Mas maalamon kay sa ilang pangedaron, kining batang mga babaye nakasabot sa mga kamatuoran nga miabot kanato pinaagi sa mensahe sa Pasko sa Pagkabanhaw ug sa pangalagad sa nabanhaw nga Manluluwas ug sa mga pulong sa mga propeta ingon nga gisugilon diha sa Basahon ni Mormon.
Akong naobserbahan nga kon si Presidente Russell M. Nelson mohatag og gasa sa Basahon ni Mormon ngadto sa usa ka tawo nga dili sa atong tinuohan, lakip sa mga lider sa kalibotan, siya sa kasagaran moabli ngadto sa 3 Nephi ug mobasa mahitungod sa pagpakita sa nabanhaw nga Kristo ngadto sa mga Nephite. Sa pagbuhat sa ingon, ang buhi nga propeta sa pagkatinuod naghatag og saksi sa buhi nga Kristo.
Kita dili makabarog ingon nga mga saksi ni Jesukristo hangtod nga kita makahatag og saksi Kaniya. Ang Basahon ni Mormon mao ang laing saksi ni Jesukristo tungod sa tibuok nga sagrado nga mga pahina niini, usa ka propeta human sa laing propeta nagpamatuod dili lamang nga si Kristo moabot apan nga Siya miabot gayod.
Tungod Kaniya
Ako nagkupot og kopya sa unang edisyon sa Basahon ni Mormon. Ang pagbuhat sa ingon kanunayng makapatandog kanako. Alang sa kadaghanan sa akong hamtong nga kinabuhi, ako nadani, nabihag, ug nakabig sa unsay gibuhat sa batan-ong Joseph Smith aron mahubad ug mamantala kining sagrado nga basahon sa kasulatan. Ang mga milagro nga kinahanglang mahitabo makapahingangha nga hunahunaon.
Apan dili kana ang rason kon ngano nga kini nga basahon nakapatandog kanako. Kini tungod kay kini nga basahon, labaw pa sa bisan unsang basahon nga namantala gayod dinhi niini nga yuta, naghatag og saksi sa kinabuhi, sa pangalagad, sa mga pagtulon-an, sa Pag-ula, ug sa Pagkabanhaw ni Jesukristo. Akong minahal nga mga kaigsoonan, ang makanunayon nga pagtuon gikan niini nga basahon mahitungod ni Jesukristo mousab sa inyong kinabuhi. Kini mobukas sa inyong mga mata ngadto sa bag-o nga mga posibilidad. Kini modugang sa inyong paglaom ug mopuno kaninyo sa gugma nga putli. Labaw sa tanan, kini mopalambo ug mopalig-on sa inyong hugot nga pagtuo ni Jesukristo ug mopanalangin kaninyo og segurado nga kahibalo nga Siya ug ang atong Amahan nakaila kaninyo, nahigugma kaninyo, ug gusto nga kamo makakaplag sa inyong agianan pauli sa panimalay, nga may dako nga letrang P.
Minahal nga mga kaigsoonan, ang panahon miabot na, gipanagna sa mga propeta sa karaan, “diin ang kasayoran sa usa ka Manluluwas mokaylap sa matag nasod, kaliwat, pinulongan, ug mga katawhan.”8 Kita nakakita sa katumanan niini nga panagna sa atong kinabuhi gayod karon, pinaagi sa saksi bahin ni Jesukristo nga makita diha sa Basahon ni Mormon.
Walay laing basahon nga nagbuhat og labaw pa sa pagpakita niana:
-
Tungod ni Jesukristo, ang tanan nausab.
-
Tungod Kaniya, mas maayo ang tanan.
-
Tungod Kaniya, makaya ang kinabuhi—ilabi na sa masakit nga mga higayon.
-
Tungod Kaniya, posible ang tanan.
Ang iyang pagbisita isip usa ka nabanhaw nga Manluluwas, gipaila sa Dios nga Amahan, mao ang labing mahimayaon ug madaogon nga mensahe sa Pasko sa Pagkabanhaw. Kini motabang sa atong mga sakop sa pamilya nga makaangkon og usa ka personal nga pagpamatuod ni Jesukristo isip atong Manluluwas ug Manunubos, kinsa mibugto sa mga higot sa kamatayon.
Ako motapos uban sa akong pagpamatuod sa katinuod sa Basahon ni Mormon ug ni Jesukristo isip ang Anak sa buhi nga Dios. Sa ngalan ni Jesukristo, amen.