Gamita Gayod ang Tanang Kahigayonan nga Makapamatuod kang Kristo
Ang tinuod nga kalipay anaa sa atong kagustohan nga mas mopaduol ni Kristo ug mosaksi sa atong kaugalingon.
Lima ka tuig ang miagi karon, atong giisa ang atong mga kamot aron paluyohan ang atong pinalanggang propeta, si Presidente Russell M. Nelson, isip Pangulo sa Ang Simbahan ni Jesukristo sa mga Santos sa Ulahing mga Adlaw―ang tigpamaba sa Ginoo niining mahinungdanon kaayo nga panahon sa paglambo ug pagpadayag. Pinaagi kaniya, kita nakadawat og dili maihap nga mga pagdapit ug gisaaran og mahimayaong mga panalangin kon atong isentro ang atong mga kinabuhi diha sa atong Manluluwas, si Jesukristo.
Niadtong 2011, samtang ako nagserbisyo kauban sa akong bana isip mga lider sa misyon sa matahom nga Curitiba, Brazil, ang akong cellphone mibagting atol sa miting. Nagdali aron sa pagpahilom niini, akong nabantayan nga ang tawag gikan sa akong amahan. Dalidali nako nga gibiyaan ang miting ug mitubag: “Kumusta, Pa!”
Wala damha, ang iyang tingog napuno sa emosyon: “Kumusta, Bonnie. Naa koy kinahanglan nga isulti nimo. Gidayagnos ko nga adunay ALS.”
Naglibog kaayo ko, “Huwat usa! Unsa man ang ALS?”
Gipasabot na dayon ni Papa, “Ang akong hunahuna magpabilin nga abtik samtang ang akong lawas hinay-hinay nga maluya.”
Gibati nako nga dako gayod ang mahimong kausaban niini sa akong kinabuhi samtang nagsugod ko sa pagpakigbisog sa unsay mahimong mga sangpotanan niining makapasubo nga balita. Apan nianang dili malimtan nga adlaw, ang iyang kataposan nga gipamulong ang adunay dako kaayo nga impluwensiya ug kanunay nakong mahinumdoman. Ang akong pinalanggang amahan misulti nga may pagkadinalian, “Bonnie, gamita gayod ang tanang kahigayonan nga makapamatuod kang Kristo.”
Akong gihinuktokan ug giampo ang tambag ni Papa. Kanunay nakong gipangutana ang akong kaugalingon kon hingpit ba gayod nakong nahibaloan unsay gipasabot sa dili mohunong sa paggamit sa tanang kahigayonan aron makapamatuod ni Jesukristo.
Sama ninyo, naay mga higayon nga ako mibarog sa unang Dominggo sa bulan ug mihatag og pagsaksi ni Kristo. Daghang higayon nga ako mipamatuod sa mga kamatuoran sa ebanghelyo isip kabahin sa usa ka leksiyon. Ako maisogon nga nagtudlo sa kamatuoran ug mipahayag sa kabalaanon ni Kristo isip usa ka misyonaryo.
Apan kini nga hangyo mabati nga mas personal! Mura og siya nag-ingon, “Bonnie, ayaw tugoti nga ikaw madani sa kalibotanong mga butang! Pagpabilin nga matinud-anon sa imong mga pakigsaad uban sa Manluluwas. Tinguhaa nga masinati ang Iyang mga panalangin matag adlaw, ug makapamatuod pinaagi sa Espiritu Santo sa Iyang gahom ug presensiya sa imong kinabuhi!”
Kita nagpuyo sa usa ka napukan nga kalibotan, nga adunay mga pag-agni nga motutok kita sa kalibotanong mga butang imbes nga sa espirituhanong mga butang. Sama kaayo sa mga Nephite diha sa 3 Nephi 11, kita nagkinahanglan ni Jesukristo. Imo bang mahunahuna ang imong kaugalingon nga naa didto, taliwala sa katawhan nga nakasinati og tumang kagubot ug kalaglagan? Unsa kaha ang pamati nga makadungog sa personal nga pagdapit sa Ginoo:
“Tindog ug duol kamo ngari kanako, aron kamo mohikap pinaagi sa inyong kamot sa akong kilid, ug usab kamo mobati sa mga agi sa lansang sa akong mga kamot ug sa mga tiil, nga kamo masayod nga Ako mao … ang Dios sa tibuok yuta, nga gipatay tungod sa mga sala sa kalibotan.
“Ug … ang pundok sa katawhan miduol ngadto … tagsa-tagsa … ug nakakita uban sa ilang mga mata ug mibati uban sa ilang mga kamot, ug nasayod … ug nakasaksi sa ilang kaugalingon.”1
Kini nga mga Nephite maikagon nga miduol sa atubangan aron mohikap sa ilang mga kamot ngadto sa Iyang kilid ug mabati ang mga agi sa mga lansang sa Iyang mga kamot ug mga tiill, aron sila makasaksi sa ilang kaugalingon nga kini mao ang Kristo. Sa gihapon, daghang matinud-anon nga katawhan nga atong gitun-an diha sa Bag-ong Tugon niining tuiga mahinamon nga nagpaabot sa pag-abot ni Kristo. Dayon sila mibiya sa ilang mga umahan, mga trabahoan, ug mga kan-anan ug misunod Kaniya, nanagdotdot Kaniya, nagpunsisok Kaniya, ug milingkod uban Kaniya. Kita ba sama ka mahinamon sa pagsaksi sa atong kaugalingon sa mga pundok sa katawhan diha sa mga kasulatan? Ang mga panalangin ba nga atong gitinguha di kaayo kinahanglanon kay sa ilaha?
Sa dihang si Kristo mibisita sa pisikal nga paagi sa mga Nephite diha sa ilang templo, ang Iyang pagdapit dili ang pagbarog sa layo ug motan-aw ngadto Niya, kondili ang paghikap Kaniya, aron sa pagbati sa ilang kaugalingon sa katinuod sa Manluluwas sa katawhan. Unsaon nato sa pagduol og maayo aron makabaton og personal nga pagsaksi kang Jesukristo? Tingali kini kabahin sa unsay gusto nga itudlo sa akong amahan kanako. Samtang wala tingali nato matagamtam ang sama nga pisikal nga kaduol niadtong kinsa milakaw uban ni Kristo atol sa Iyang mortal nga pangalagad, pinaagi sa Espiritu Santo kita makasinati sa Iyang gahom matag adlaw! Kutob sa atong gikinahanglan!
Ang mga batan-ong babaye sa tibuok kalibotan daghan kaayo og natudlo kanako kabahin sa pagtinguha kang Kristo ug pagbaton og inadlaw, personal nga pagsaksi Kaniya. Tugoti ko nga ipakigbahin ang kaalam sa duha kanila:
Si Livvy nagtan-aw sa kinatibuk-ang komperensiya sa tibuok niyang kinabuhi. Gani, sa ilang panimalay ilang naandan nga motan-aw sa tanang lima ka sesyon isip pamilya. Sa nangagi, ang komperensiya alang kang Livvy nagpasabot og pagwiris-wiris og sulat o wala tuyoa nga pagkatulog og kadiyot usahay. Apan niining milabay nga Oktubre, ang kinatibuk-ang komperensiya lahi. Nahimo kining personal.
Niining higayona, si Livvy midesisyon nga mahimong aktibo nga tig-apil. Iyang gi-silent ang mga notification sa iyang cellphone ug naghimo og mubo nga mga sulat sa mga impresyon gikan sa Espiritu. Siya nahingangha samtang iyang gibati ang piho nga mga butang nga gusto sa Dios nga iyang madungog ug buhaton. Kini nga desisyon nakahimo og kalainan sa iyang kinabuhi hapit dihadiha dayon.
Mga pila lang ka adlaw human niana ang iyang mga higala midapit niya sa usa ka dili maayo nga salida sa sine. Siya namalandong, “Akong gibati nga ang mga pulong ug ang espiritu sa komperensiya mibalik sa akong kasingkasing, ug nasayod ko nga kinahanglan nako nga mobalibad.” Siya usab adunay kaisog nga mopaambit sa iyang pagpamatuod sa Manluluwas diha sa iyang ward.
Human niini nga mga panghitabo siya miingon, “Ang makapahingangha mao, sa higayon nga madungog nako ang akong kaugalingon nga magpamatuod nga si Jesus mao ang Kristo, akong gibati ang Espiritu Santo nga mikompirmar niini pag-usab kanako.”
Si Livvy naningkamot nga makakat-on og maayo atol sa kataposan sa semana sa komperensiya; iyang gibuhat ang tanan, hunahuna ug espiritu, ug nakaplagan ang Manluluwas didto.
Ug dayon naa pa si Maddy. Sa dihang ang iyang pamilya mihunong sa pagtambong sa simbahan, si Maddy naglibog ug dili segurado kon unsa ang buhaton. Iyang naamgohan nga may usa ka importanteng butang nga kulang. Mao nga sa edad nga 13, si Maddy nagsugod og tambong sa simbahan nga mag-inusara. Bisan tuod kon ang pag-inusara usahay lisod ug dili komportable, siya nakahibalo nga iyang makaplagan ang Manluluwas sa simbahan ug ganahan siya nga maanaa kon asa Siya. Siya miingon, “Sa simbahan ang akong kalag mobati nga murag naa sa panimalay.”
Si Maddy nahupay sa kahibalo nga ang iyang pamilya nabugkos alang sa kahangtoran. Siya misugod sa pagdala sa iyang manghod nga mga lalaki uban niya ngadto sa simbahan ug sa pagtuon sa mga kasulatan uban nila diha sa panimalay. Sa kataposan ang iyang mama misugod sa pagkuyog nila. Si Maddy misulti sa iyang mama sa iyang tinguha nga moserbisyo og misyon ug nangutana kon ang iyang mama makaandam ba sa pagtambong sa templo uban niya.
Karon si Maddy anaa sa MTC. Siya nagserbisyo. Siya nagpamatuod kabahin ni Kristo. Ang iyang ehemplo nakatabang nga mogiya sa iyang duha ka ginikanan pabalik sa templo ug pabalik ni Kristo.
Sama ni Livvy ug Maddy, samtang kita mopili sa pagtinguha kang Kristo, ang Espiritu mosaksi bahin Kaniya sa daghang nagkalain-laing mga sitwasyon. Kini nga mga pagkasaksi sa Espiritu moabot samtang kita nagpuasa, nag-ampo, naghulat, ug nagpadayon sa unahan. Ang atong pagkasuod ni Kristo molambo pinaagi sa pagsimba kanunay diha sa templo, paghinulsol matag adlaw, pagtuon sa mga kasulatan, pagtambong sa simbahan ug seminary, pagpamalandong sa atong patriyarkal nga mga panalangin, pagkatakos nga modawat sa mga ordinansa, ug pagtahod sa sagrado nga mga pakigsaad. Kining tanan modapit sa Espiritu sa paglamdag sa atong mga hunahuna, ug kini magdala og dugang nga kalinaw ug panalipod. Apan ato ba kining gitahod isip sagrado nga mga kahigayonan sa pagpamatuod ni Kristo?
Ako nakatambong sa templo sa daghang higayon, apan kon ako mosimba diha sa balay sa Ginoo, kini nakapausab kanako. Usahay samtang nagpuasa, makaplagan nako ang akong kaugalingon nga basta gigutom lang, apan sa ubang higayon, ako magbusog sa Espiritu nga adunay katuyoan. Ako usahay adunay iyamyam nga mga pag-ampo nga binalik-balik ug naandan na, apan ako usab mahinamon nga makadawat og tambag sa Ginoo pinaagi sa pag-ampo.
Adunay gahom sa paghimo niining balaan nga mga gawi nga dili kaayo usa ka listahan nga kinahanglang buhaton ug mas buhaton kini isip pagsaksi. Ang proseso hinay-hinay apan molambo sa inadlaw, aktibo nga pag-apil ug puno sa katuyoan nga mga kasinatian uban ni Kristo. Samtang kita makanunayon nga mobuhat sa Iyang panudlo, kita makabaton og pagpamatuod bahin Kaniya; kita makaugmad og relasyon uban Niya ug sa atong Langitnong Amahan. Kita magsugod nga mahisama Kanila.
Ang kaaway mobuhat og daghang kasamok aron nga mahimong lisod ang pagpaminaw sa tingog sa Ginoo. Ang atong kalibotan, atong mga hagit, atong mga kahimtang dili mahimong mas hilom, apan mahimo kita ug kinahanglan nga adunay dakong kagustohan alang sa mga butang ni Kristo aron klaro nga “maminaw Kaniya”.2 Kita ganahan nga maghimo og mga gawi sa pagkadisipulo ug pagpamatuod nga motutok sa atong pagsalig diha sa atong Manluluwas matag adlaw.
Ang akong amahan namatay sobra na sa 11 ka tuig karon, apan ang iyang mga pulong buhi pa gihapon ngari kanako. “Bonnie, gamita gayod ang tanang kahigayonan nga makapamatuod kang Kristo.” Ako modapit kaninyo nga moapil nako sa pagdawat niini nga pagdapit. Pangitaa si Kristo bisan asa―ako mosaad nga Siya anaa!3 Ang tinuod nga kalipay anaa sa atong kagustohan nga mas mopaduol ni Kristo ug mosaksi sa atong kaugalingon.
Nakahibalo kita nga sa umaabot nga adlaw, “ang matag tuhod moluhod, ug matag dila mokompisal”nga si Jesus mao ang Kristo.4 Ako nag-ampo nga kini nga pagsaksi mahimong normal ug natural nga kasinatian alang kanato karon—nga kita mopahimulos sa matag kahigayonan nga malipayong mosaksi: si Jesukristo buhi!
Ah, unsa nako Siya ka gihigugma. Dako kaayo ang atong pasalamat alang sa Iyang walay kataposan nga Pag-ula, nga “naghimong posible sa kinabuhing dayon ug sa reyalidad sa pagka-imortal alang [kanatong] tanan.”5 Ako nagpamatuod sa kaayo ug dakong himaya sa Manluluwas diha sa Iyang sagrado nga ngalan, gani si Jesukristo, amen.