Pagpangalagad
Motabang kita ug moalima sama sa pagabuhaton sa atong Manluluwas, ilabi na ngadto sa mga tawo diin may kahigayonan kita sa pagbuhat pinaagi sa gugma ug buluhaton sa pagpangalagad.
Minahal kong mga kaigsoonan, welcome sa kinatibuk-ang komperensiya!
Human sa kinatibuk-ang komperensiya sa miaging Oktubre, si Sister Gong ug ako milakaw agi sa Conference Center aron makatimbaya ug makapangumusta ug makapaminaw sa inyong mga kasinatian sa ebanghelyo.
Ang atong mga miyembro sa Mexico miingon, “Hoy es el tiempo de Mexico [Karon na ang panahon sa Mexico].”
Among nahibaloan nga si Gilly ug Mary managhigala nga taga-England. Dihang si Mary nagpasakop sa Simbahan, nawad-an siya sa iyang dapit nga kapuy-an. Si Gilly walay pagpanuko nga midapit ni Mary sa pag-adto ug mopuyo uban niya. Puno sa pagtuo, si Gilly miingon, “Wala gyod ko magduhaduha nga ang Ginoo akong kauban.” Sa komperensiya, si Gilly dunay makalipay nga panagkita sa sister missionary nga nakabunyag kaniya 47 ka tuig nang milabay.
Si Jeff ug iyang asawa, si Melissa, nagtambong og kinatibuk-ang komperensiya sa una niyang higayon. Si Jeff modula og propesyonal nga baseball (usa siya ka catcher) ug karon usa ka doktor nga anesthesiologist. Giingnan ko niya, “Sa dako nakong katingala, nangandam ko sa akong bunyag kay ingon og pinakatinuod kini ug tinuorayng paagi sa pagpakabuhi.”
Bag-o lang, si Melissa nangayo og pasaylo sa na-assign nga tigpangalagad nga brother ni Jeff, “Si Jeff dili ganahan og ‘mga tawo nga magpolo og puti’ sa among balay.” Ang tigpangalagad nga brother miingon, “mangita ko’g paagi.” Karon siya ug si Jeff managhigala na kaayo. Atol sa bunyag ni Jeff, nakahimamat ko og kongregasyon sa mga Santos sa Ulahing mga Adlaw nga gimahal ni Jeff, Melissa, ug sa ilang anak nga babaye.
Isip mga sumusunod ni Jesukristo, tinguha nato nga makaalagad sa uban sama sa Iyang pagabuhaton kay dunay mga kinabuhi nga naghulat aron mausab.
Dihang gisultihan ko ni Peggy nga ang iyang bana, nga si John, human sa 31 ka tuig nga kaminyoon, bunyaganan na, nangutana ko unsay nausab.
Miingon si Peggy, “Si John ug ako nagtuon sa Bag-ong Tugon sa Dali, Sunod Kanako, ug nangutana si John mahitungod sa doktrina sa Simbahan.”
Miingon si Peggy, “Dapiton nato ang mga misyonaryo.”
Miingon si John, “Dili ko og mga misyonaryo—gawas kon mokuyog ang akong higala.” Sobra sa 10 ka tuig, ang tigpangalagad nga brother ni John nahimo nga kasaligan niyang higala. (Naghunahuna ko, unsa kaha kon ang tigpangalagad nga brother ni John mihunong sa pag-adto human sa usa, duha, o siyam ka tuig?)
Si John naminaw. Gibasa niya ang Basahon ni Mormon uban sa tinuod nga katuyoan. Dihang gidapit si John sa mga misyonaryo nga magpabunyag, miingon siya oo. Miingon si Peggy “dili gyod ko makatuo ug misugod ko sa paghilak.”
Miingon si John, “Nausab ko dihang nagpaduol ko sa Ginoo.” Wala madugay, si John ug Peggy nasilyo sa balaan nga templo. Sa milabayng Disyembre, si John namatay sa edad nga 92. Miingon si Peggy, “Si John kanunay nga buotang tawo, apan lahi na siya sa maayong paagi human sa iyang bunyag.”
Si Sister Gong ug ako nakahimamat ni Meb ug Jenny pinaagi sa video atol sa COVID nga pandemya. (Nakahimamat kami og daghang talagsaon nga magtiayon ug mga indibidwal pinaagi sa video atol sa COVID, matag usa mainampoon nga gipailaila sa ilang mga stake president.)
Si Meb ug Jenny mapaubsanong mihisgot og mga kabalaka sa ilang kinabuhi nakapahunahuna kanila kon kadtong ilang kasal sa templo mahimo bang isalbar, ug kon oo, unsaon. Mituo sila nga ang Pag-ula ni Jesukristo ug ang ilang mga pasalig sa pakigsaad makatabang nila.
Hunahunaa ang akong kalipay dihang si Meb ug Jenny nakadawat og bag-ong mga rekomend sa templo ug nagkuyog sa pagbalik ngadto sa balay sa Ginoo. Wala madugay si Meb hapit mamatay. Kadakong panalangin nga napahiuli kang Meb ug Jenny ang mga relasyon sa pakigsaad ngadto sa Ginoo ug sa usag usa, ug mibati sa gugma sa pagpangalagad sa daghan nga naglibot kanila.
Bisan asa ko moadto, mapasalamaton ko sa mga nangalagad ug nag-amuma sama sa pagabuhaton sa atong Manluluwas.
Sa Peru, si Sister Gong ug ako nakahimamat ni Salvador ug sa iyang mga igsoon.1 Si Salvador ug ang iyang mga igsoon wala nay mga ginikanan. Birthday kadto ni Salvador. Ang mga lider sa Simbahan ug mga miyembro kinsa matinud-anong nangalagad niini nga pamilya nakadasig kanako. “Ang putli ug matuod nga tinuohan … mao kini, Ang pag-atiman sa mga ilo ug mga biyuda,”2 “motabang sa maluyahon, ipataas ang mga kamot sa nawad-an og paglaom, … ug lig-onon ang mga tuhod nga mahuyang.”3
Didto sa Hongkong, usa ka presidente sa korum sa mga elder mapaubsanong mipakigbahin giunsa nga padayong 100 ka porsento ang gihimong mga interbiyo sa pagpangalagad. “Mainampoon namong giorganisar ang managkompanyon aron ang tanan makaatiman og usa ka tawo ug maatiman,” miingon siya. “Regular namong pangutan-on ang matag kompanyon mahitungod niadtong ilang gipangalagaran. Wala kami magtsek og mga kahon; nangalagad kami sa mga tigpangalagad kinsa nagpakabana sa among katawhan.”
Sa Kinshasa, Democratic Republic sa Congo, si Presidente Bokolo mipakigbahin sa unsang paagi siya ug ang iyang pamilya mipasakop sa Simbahan sa France. Usa ka adlaw, samtang nagbasa siya sa iyang patriyarkal nga panalangin, ang Espiritu midasig kang Brother Bokolo nga mamalik uban sa iyang pamilya ngadto sa DR Congo. Nasayod si Brother Bokolo nga mag-atubang sila og daghang hagit kon mamalik sila didto. Ug ang ilang simbahan, Ang Simbahan ni Jesukristo sa mga Santos sa Ulahing mga Adlaw, wala pa maestablisar sa Kinshasa.
Bisan pa, pinaagi sa hugot nga pagtuo, nga anaa usab sa daghan, gisunod sa mga Bokolo ang Espiritu sa Ginoo. Sa Kinshasa, nangalagad sila ug mipanalangin sa mga tawo nga nanaglibot kanila, mibuntog sa mga hagit, nakadawat og espirituwal ug temporal nga mga panalangin. Karon, nagmaya sila sa pagkaaduna nay balay sa Ginoo sa ilang nasod .4
Usa ka kinabig napangalagaran pinaagi sa personal nga ehemplo. Isip batan-ong lalaki, miingon siya nga gigahin niya ang iyang mga adlaw nga magpahayahay sa baybayon. Usa ka adlaw, miingon siya, “nakakita ko og madanihon nga babaye nga nagsul-ob og tarong nga swimsuit.” Natingala, giduol niya ug gipangutana nganong ang usa ka madanihon nga babaye magsul-ob og ingon ka tarong nga swimsuit. Miyembro siya sa Ang Simbahan ni Jesukristo sa mga Santos sa Ulahing mga Adlaw, ug nangutana nga nagpahiyom, “Gusto ka bang moadto sa simbahan inig ka Dominggo?” Miingon siya og oo.
Mga tuig nang milabay, samtang nagkuyog kami sa usa ka buluhaton, si Elder L. Tom Perry mipakigbahin kon giunsa niya ug sa iyang kompanyon sa paghimo ang regular nga pagpangalagad ngadto sa sister kinsa nag-inusarang nagpuyo sa lisod nga dapit sa Boston. Dihang si Elder Perry ug iyang kompanyon miabot, ang sister mainampingong misugo nga, “I-slide sa ilawom sa pultahan ang inyong rekomend sa templo.” Human lamang makita ang mga rekomend sa templo ablihan sa babaye ang daghang lock ug moabli sa pultahan.5 Wala ko mag-ingon nga ang tigpangalagad nga mga managkompanyon magkinahanglan og mga rekomend sa templo. Apan ganahan ko sa ideya nga samtang kadtong nagtahod sa mga pakigsaad mangalagad, maablihan ang mga panimalay ug mabuksan ang mga kasingkasing.
Si Elder Perry mihalad usab og praktikal nga tambag. Miingon siya, “Hatagi ang mga managkompanyon og igong gidaghanon sa mga buluhaton, nga pilion sa mainampoong paagi, igrupo nga magdug-ol ra ang mga adtoong mga balay aron ang oras sa pagbiyahe magamit og tarong.” Mitambag siya “Sugdi ngadto sa mga tawo nga nagkinahanglan kaayong bisitahan. Unahon kadtong lagmit kaayong modawat ug mosanong sa mga pagbisita.” Iyang gitapos nga, “Ang matinud-anong pagpadayon magdala og mga milagro.”
Ang mas taas ug mas balaan nga pangalagad6 moabot kon mag-ampo kita alang sa “tiunay nga gugma ni Kristo”7 ug mosunod sa Espiritu. Moabot usab kini kon ang mga kapangulohan sa korum sa mga elder ug sa Relief Society, ubos sa pagdumala sa bishop, mosusi sa mga paningkamot sa pagpangalagad, lakip ang pag-assign og mga managkompanyon sa pagpangalagad. Palihog hatagi ang atong young men ug young women sa gikinahanglan nga oportunidad nga makakuyog ug magiyahan pinaagi sa sinati nga tigpangalagad nga mga brother ug mga sister. Ug palihog tugoti nga ang atong nagtubo nga batan-ong henerasyon modasig sa mga managkompanyon nga tigpangalagad nga brother ug sister.
Sa ubang dapit sa Simbahan, duna kitay problema sa pagpangalagad. Mas daghan ang moingon nga nangalagad sila kay sa sila ang gipangalagaran. Dili kita gusto nga mahasol sa tseklist. Apan sa kasagaran nagkinahanglan kita og labaw pa kay sa tinuoray nga pagpangumusta diha sa mga hall o kaswal nga pag-ingon og “Pwedeng motabang nimo?” diha sa parkinganan. Sa daghang dapit, makatabang kita, mosabot sa uban bisan asa man sila, ug mopalambo og mga relasyon sa atong regular nga pagbisita og mga miyembro sa ilang mga panimalay. Ang dinasig nga mga pagdapit makausab og mga kinabuhi. Kon ang mga pagdapit makatabang aron kita makahimo ug makatuman og sagradong mga pakigsaad, mahiduol kita sa Ginoo ug sa usag usa.
Ginaingon nga kadtong nakasabot sa tinuod nga diwa sa pagpangalagad makahimo og mas labaw pa kay sa una, samtang kadtong wala makasabot gamay ra og mahimo. Magbuhat kita og daghan, sama sa atong Manluluwas. Sama sa giingon sa atong himno, “usa ka panalangin nga makatabang sa uban.”8
Mga konseho sa ward, mga korum sa mga elder, ug mga Relief Society, palihog patalinghogi ang Maayong Magbalantay ug tabangi Siya, “pangitaon kadtong nawala, … pabalikon pag-usab kadtong ginapatibulaag sa halayo, … bugkosan kadtong nabunggoan sa bukog, … palig-onon kadtong nagmasakiton.”9 Tingali atong maabi-abi ang wala “hibaloi nga mga anghel”10 kon mohimo kita og lawak nga Iyang kapuy-an alang sa tanan.11
Ang dinasig nga pagpangalagad mopanalangin sa mga pamilya ug mga indibidwal, molig-on usab kini sa mga ward ug mga branch. Hunahunaa ang inyong ward o branch nga usa ka espirituhanong palibot. Sa diwa sa sambingay diha sa Basahon ni Mormon bahin sa mga kahoy nga oliba, ang Ginoo sa ubasan ug ang iyang mga sulugoon nagdala og bililhong mga bunga ug maglig-on sa matag kahoy pinaagi sa pagbugkos sa mga kalig-on ug mga kahuyang sa tanan nga kahoy.12 Ang Ginoo sa ubasan ug ang Iyang mga sulugoon balik-balik nga nangutana, “Unsa pa ang akong mahimo?”13 Sa pagtambayayong, sila makapanalangin sa mga kasingkasing ug mga panimalay, mga ward ug mga branch, pinaagi sa dinasig, padayon nga pagpangalagad.14
Ang pagpangalagad—ang pagkamagbalantay—maghimo sa atong ubasan nga “usa ka lawas”15—usa ka sagradong kakahoyan. Ang matag kahoy sa atong kakahoyan usa ka buhi nga kahoy sa pamilya. Mga gamot ug mga sanga magkalambid. Ang pagpangalagad mopanalangin sa mga henerasyon. Kon ang serbisyo gikinahanglan, ang maalamong mga bishop, mga kapangulohan sa korum sa mga elder ug sa Relief Society mangutana, “Kinsa ang managkompanyon sa pagpangalagad?” Ang mga konseho sa ward ug mga interbiyo sa pagpangalagad dili lang mangutana bahin sa mga hagit o mga problema apan mosabot sa kahimtang aron magmaya sa daghang malumo nga kaluoy sa Ginoo sa atong kinabuhi samtang mangalagad kita sama sa Iyang pagabuhaton.
Ang atong Manluluwas maoy atong hingpit nga panig-ingnan.16 Kay Siya maayo man, Siya makaadto aron maghimog maayong mga butang .17 Panalanginan Niya ang usa ug ang 99. Tanan nga Iyang gihimo usa ka pagpangalagad. Mas mahisama kita ni Jesukristo kon kita mohimo “sa … usa sa labing ubos niini” sama sa atong buhaton ngadto Kaniya,18 kon kita mohigugma sa atong isigkatawo sama sa atong kaugalingon,19 kon kita “maghigugmaay ingon nga ako nahigugma kaninyo,”20 ug kon “usa kaninyo gustong ilhon nga dako kinahanglan nga mag-alagad siya sa tanan.”21
Si Jesukristo nangalagad. Ang mga anghel nangalagad.22 Ang mga sumusunod ni Jesukristo “nangalagad sa usag usa,”23 “paglipay kamo uban sa naglipay ug hilak uban sa naghilak,”24 “[mag]bantay [ug] … [m]ag-amuma [sa katawhan] sa mga butang kabahin sa pagkamatarong,”25 “hinumdomi … ang kabos ug ang timawa, ang masakiton ug ang nag-antos,”26 hibaloan ang Iyang ngalan pinaagi sa atong pagpangalagad.27 Kon kita mangalagad sama sa Iyang pagabuhaton, masaksihan nato ang Iyang mga milagro ug mga panalangin.28 Madawat nato ang “parianong katungdanan nga mas halangdon pa kaayo.”29
Tingali sa pisikal maluya kita. Apan sa pagserbisyo Kaniya “ayaw kamo pagtapol sa pagbuhat og maayo.”30 Magkugi kita sa paghimo sa labing maayo kutob sa mahimo, dili modagan labaw kay sa atong kusog,31 apan mosalig, sama sa gitudlo ni Apostol Pablo, nga ang “Dios nahigugma sa malipayong naghatag.”32 Kay ang Dios kinsa “naghatag og binhi ngadto sa magpupugas ingon man sa pan aron kan-on, maghatag usab kaninyo sa binhi nga inyong gikinahanglan.”33 Sa lahi nga pagkasulti, ang Dios mopabuhong sa “madagayaon sa tanan nga butang.”34 Sila nga “nagpugas og daghan, mag-anig daghan.”35
Bisan asa man kita niini nga panahon sa Pasko sa Pagkabanhaw, motabang kita ug moalima sama sa pagabuhaton sa atong Manluluwas, ilabi na ngadto sa mga tawo diin may kahigayonan kita sa pagbuhat pinaagi sa gugma ug buluhaton sa pagpangalagad. Sa paghimo niini, hinaot nga kita magpaduol kang Jesukristo ug sa usag usa, mas mahisama Kaniya ug sa mga sumusunod ni Jesukristo nga gusto Niya nga atong maabot. Sa Iyang sagrado nga ngalan, nga mao si Jesukristo, amen.