Siya Makaayo Kanako!
Ang makaayo ug matubsanon nga gahom sa Manluluwas magamit ngadto sa wala damha nga mga sayop, dili maayo nga mga desisyon, mga hagit, ug mga pagsulay sa matag matang––ingon man sa atong mga sala.
Si Moroni misaad nga kon kita mobasa sa Basahon ni Mormon ug dayon mangutana sa Dios ang Amahan sa Kahangtoran, sa kinasingkasing, uban sa tinuod nga katuyoan, nga may hugot nga pagtuo kang Kristo kon kini tinuod, ang Dios mopakita sa kamatuoran niini pinaagi sa gahom sa Espiritu Santo.1 Minilyon ka mga tawo ang mibuhat niiini nga saad ug nakadawat og makapaneguro nga pagsaksi sa Pagpahiuli sa kahingpitan sa ebanghelyo ni Jesukristo.
Si Moroni miawhag kanato, samtang kita nagbasa sa Basahon ni Mormon, aron “mahinumdom kon unsa ka maloloy-on ang Ginoo ngadto sa mga katawhan, gikan sa paglalang ni Adan bisan hangtod [niini] nga panahon, … ug palandongon [kini] sa atong mga kasingkasing.” 2 Ang mga istorya ug mga pagtulon-an diha sa Basahon ni Mormon nagpahinumdom kanato ug nagpamatuod sa gugma, kapuangod, ug kaluoy sa Manluluwas.
Ang akong amahan namatay niadtong Abril 2013. Samtang ako nag-andam sa pagpamulong sa iyang lubong, nakaamgo ko unsa ko ka bulahan nga nahibalo ug ganahan ko sa iyang paborito nga mga kasulatan. Iya kining gipakigbahin sa mga panagpundok sa pamilya, ug iya kining basahon uban nako kon ako nagkinahanglan og tambag, giya, o pagpalig-on sa akong hugot nga pagtuo. Ako nakadungog kaniya nga gipakigbahin kini diha sa mga pakigpulong ug sa mga buluhaton. Wala lamang ako mahibalo kanila, apan makahinumdom pa ako sa iyang tingog ug sa espirituwal nga mga pagbati nga anaa ako samtang siya mipakigbahin kanila. Pinaagi sa pagpakigbahin sa mga kasulatan ug mga pagbati, ang akong amahan mitabang kanako sa pagtukod og lig-on nga pundasyon sa hugot nga pagtuo diha ni Ginoong Jesukristo.
Ang akong amahan ganahan gayod kaayo sa asoy sa pagbisita sa Manluluwas sa katawhan sa Nephi.3 Kining sagrado nga asoy mao ang sa nabanhaw ug nahimaya nga si Ginoong Jesukristo. Siya miinom sa mapait nga kopa ug miantos sa tanang mga butang aron kita dili mag-antos kon kita maghinulsol.4 Siya mibisita sa kalibotan sa mga espiritu ug miorganisar sa pagsangyaw sa ebanghelyo didto.5 Siya nabanhaw gikan sa mga patay, ug Siya uban ug nakadawat sa mga sugo nga gikan sa Amahan sa pagpakigbahin sa mga kasulatan ngadto sa mga Nephite nga makapanalangin sa umaabot nga mga henerasyon.6 Siya nahimaya ug anaa ang tanan Niyang mahangturong gahom ug kapasidad. Kita makakat-on sa tanang detalye sa Iyang mga pagtulon-an.
Diha sa 3 Nephi 11, atong mabasa kon giunsa sa Manluluwas pagkunsad gikan sa langit aron sa pagtudlo sa mga Nephite nga Siya mao si Jesukristo, kinsa ang mga propeta mipamatuod nga moabot sa kalibotan. Siya mipahayag nga Siya mao ang Kahayag sa Kalibotan ug nga Siya mihimaya sa Amahan sa pagkuha sa mga sala sa kalibotan. Siya midapit sa katawhan sa pagduol aron sa paghikap sa ilang mga kamot ngadto sa Iyang kilid ug bation ang mga marka sa mga lansang sa Iyang mga kamot ug sa Iyang tiil. Siya gusto nga sila mahibalo nga Siya mao ang Dios sa Israel, kinsa gipatay alang sa mga sala sa kalibotan. Ang katawhan malipayon nga misanong, tagsa-tagsang miduol hangtod nga silang tanan nakakita ug mibati nga kini mao gayod Siya kinsa mao ang gikasulat sa mga propeta nga moabot.7
Si Jesus mitudlo sa mga Nephite bahin sa kaimportante sa paghinulsol, bahin sa pagkahisama sa usa ka gamayng bata, ug bahin sa panginahanglan nga mabunyagan pinaagi sa usa nga adunay Iyang awtoridad. Siya dayon mitudlo og daghan bahin sa doktrina nga atong gitun-an karong tuiga diha sa Bag-ong Tugon.
Diha sa 3 Nephi 17, atong mabasa nga si Jesus misulti sa katawhan nga panahon na aron Siya mobalik ngadto sa Amahan ug magpakita usab sa Iyang Kaugalingon ngadto sa nawala nga mga tribo sa Israel.8 Samtang Siya milibot sa Iyang mga mata ngadto sa katawhan, Siya nakabantay nga sila naghilak, nagtan-aw pag-ayo Kaniya ingon og nagpasabot nga sila mohangyo Kaniya sa pagpabilin og diyutay pa nga panahon uban kanila.9
Ang tubag sa Manluluwas ngadto sa mga Nephite parehas nga makapatandog ug mapanudloon. Siya miingon,”Tan-awa, ang akong kasingkasing napuno sa kapuangod diha kaninyo.”10
Ako nagtuo nga ang Iyang kaluoy labaw pa kay sa tubag sa mga luha sa katawhan. Daw makita Niya sila sa mata sa Iyang maulaon nga sakripisyo. Siya nakakita sa ilang matag kasakit, pag-antos, ug pagtintal. Iyang nakita ang ilang mga sakit. Iyang nakita ang ilang kahuyang, ug Siya nasayod gikan sa Iyang maantosong kasakit sa Getsemani ug sa Golgota unsaon pagtabang kanila sumala sa ilang mga kahuyang.11
Sa samang paagi, sa dihang ang atong Manluluwas, si Jesukristo, magtan-aw kanato, Iyang makita ug masabtan ang kasakit ug kabug-at sa atong mga sala. Iyang makita ang atong mga adiksiyon ug mga hagit. Iyang makita ang atong mga panglimbasog ug mga kasakit sa bisan unsa nga matang––ug Siya napuno sa kaluoy nganhi kanato.
Ang Iyang maanindot nga pagdapit ngadto sa mga Nephite nagsunod: “Aduna ba kamo dihay mga masakiton? Dad-a sila ngari. Aduna ba kamo dihay bakol, o buta, o pungkol, o angol, o sanglahon, o dili makalihok, o mga bungol, o gitakboyan sa bisan unsang sakit? Dad-a sila ngari ug Ako moayo kanila, kay Ako adunay kaluoy diha kaninyo; ang akong kasingkasing napuno sa kaluoy.”12
Ug ang mga tawo miduol “tanan kanila nga gitakbuyan sa tanan nga matang sa sakit; ug siya miayo kanila matag usa kanila nga gidala ngadto kaniya.”13
Niadtong 1990, kami nagpuyo sa gamay nga lungsod sa Sale, sa Victoria, Australia. Kami malipayon nga nalingaw sa mga buluhaton sa pamilya, sa Simbahan, ug sa mga buluhaton sa trabahoan. Usa ka maanindot nga Sabado sa ting-init sa wala pa gayod ang Pasko, kami nakahukom sa pagbisita og pipila ka parke ug usa ka paborito nga dagat. Human malingaw sa usa ka maanindot nga adlaw sa pagdula isip usa ka pamilya, among gipasulod ang tanan ngadto sa sakyanan ug mipauli. Samtang nagmaniho, daklit kong nakatulog ug maoy nakaingon sa aksidenting pagkabangga sa sakyanan. Human sa pipila ka gutlo gikan sa pagkaulian, mitan-aw ko sa sulod sa sakyanan. Akong asawa, si Maxine, adunay bali sa tiil ug naglisod og ginhawa. Aduna siyay bali sa dughan. Ang among tulo ka anak nga babaye nakuyawan apan salamat daw OK ra. Ako adunay gagmay nga mga angol. Apan ang among lima ka bulan nga anak nga lalaki walay panimuot.
Taliwala sa kaguol ug kalibog niadtong nahitabo nga aksidente, ang among kinamagulangan nga anak, 11 anyos nga si Kate, dinalian nga miingon, “Dad, kinahanglan nga imong hatagan og panalangin si Jarom.” Human sa pipila ka panglimbasog, ang akong mga anak nga babaye ug ako nakagawas sa sakyanan. Si Maxine dili mahimong malihok. Mainampingon nakong gikuha si Jarom, dayon samtang naghigda sa yuta, akong hinay nga gibutang siya sa akong dughan ug mihatag kaniya og panalangin sa pagkapari. Sa higayon nga miabot ang ambulansiya mga 40 minutos ang milabay, si Jarom naa nay panimuot.
Niadtong gabhiona akong gibilin ang tulo ka sakop sa pamilya sa ospital ug daling misakay sa taxi pauli uban sa duha nako ka anak nga babaye. Latas sa taas nga kagabhion, ako naghangyo sa Langitnong Amahan nga ang akong pamilya ug kadtong naangol sa lain nga sakyanan mamaayo. Sa maloloy-ong paagi, ang akong mga pag-ampo ug ang kinasingkasing nga gihalad nga pag-ampo sa daghan pang lain natubag. Ang tanan naayo latas sa panahon, usa ka dako nga panalangin ug malumo nga kaluoy.
Apan padayon ko nga adunay lawom nga pagbati nga sad-an ug pagbasol tungod kay maoy nakaingon sa sama ka grabe nga aksidente. Momata ko sa gabii ug mahinumdom sa makahahadlok nga mga panghitabo. Nag-antos ko sulod sa mga katuigan aron sa pagpasaylo sa akong kaugalingon ug sa pagkaplag og kalinaw. Dayon, isip usa ka lider sa pagkapari, samtang nagtabang sa uban sa paghinulsol ug nagtabang kanila nga mobati sa kapuangod, kaluoy, ug gugma sa Manluluwas, ako nakaamgo nga Siya makaayo kanako.
Ang makaayo ug matubsanon nga gahom sa Manluluwas magamit ngadto sa wala damha nga mga sayop, dili maayo nga mga desisyon, mga hagit, ug mga pagsulay sa matag matang––ingon man sa atong mga sala. Samtang ako midangop Kaniya, ang akong pagbati nga sad-an ug pagbasol hinay-hinay nga napulihan og kalinaw ug kapahulayan.
Si Presidente Russell M. Nelson mitudlo: “Sa dihang ang Manluluwas mitubos sa tanang katawhan, Siya miabli og usa ka dalan diin kadtong mosunod Kaniya makagamit sa Iyang makaayo, makalig-on ug matubsanon nga gahom. Kini nga espirituhanong mga kahigayonan maanaa sa tanan kinsa magtinguha sa pagpaminaw Kaniya ug pagsunod Kaniya.”14
Mga igsoon, bisan kon kamo nagpas-an sa gibug-aton sa wala masulbad nga sala, ang pag-antos tungod sa kaligotgot nga dugay na kaayo, o nanglimbasog sa pagpasaylo sa inyong kaugalingon sa wala tuyoa nga sayop, kamo makagamit sa makaayo ug matubsanon nga gahom sa Manluluwas nga si Jesukristo.
Mopamatuod ko nga Siya buhi. Siya ang atong Manluluwas ug Manunubos. Siya nahigugma kanato. Siya adunay kapuangod alang kanato, Siya puno sa kaluoy, ug Siya makaayo kaninyo. Sa ngalan ni Jesukristo, amen.