’Ua ti’a iāna e fa’aora iā’u !

Nā Elder Peter F. Meurs

Nō te Hitu ’Ahuru

Tē parau fafau nei Moroni ē, mai te mea e tai’o tātou i te Buka a Moromona ’e e ani tātou i te Atua te Metua mure ’ore, ma te ’ā’au hina’aro mau, ’e ma te fa’aro’o i te Mesia e parau mau ānei, e fa’a’ite mai te Atua i tō te reira parau mau nā roto i te mana o te Vārua Maita’i.¹ E rave rahi miriōni ta’ata tei fa’a’ohipa i te reira parau ’e ’ua fāri’i i te hō’ē ’ite pāpū nō te Fa’aho’i-fa’ahou-ra’a mai o te ’īra’a o te ’evanelia a Iesu Mesia.

Tē a’o nei Moroni ia tātou, ’ia tai’o tātou i te Buka a Moromona, ’ia « ha’amana’o ’outou i tō te Fatu aroha i te mau tamari’i a te ta’ata nei, mai te hāmanira’ahia mai o Adamu ē tae roa mai i [teienei] […] ’e ’ia feruri hōhonu i te reira i roto i tō [tātou] ’ā’au. »² Tē fa’aha’amana’o nei te mau ’ā’amu ’e te mau ha’api’ira’a i roto i te Buka a Moromona ia tātou, ma te fa’a’ite pāpū ato’a, i te here o te Fa’aora, tōna aumihi ’e tōna aroha.

’Ua fa’aru’e mai tō’u metua tāne i te ’āva’e ’Ēperēra 2013. Tē fa’aineine ra vau nō te paraparau i tōna ’ōro’a hunara’a, ’ite atu ra vau i tō’u ha’amaita’ira’a ’ia ’ite ’e ’ia here i tāna mau ’īrava pāpa’ira’a mo’a au roa a’e. I fa’a’ite mai ’oia i te reira i roto i te mau putuputura’a ’utuāfare, ’e ’ua tai’o ’oia i te reira nā muri iā’u i te taime ’ua tītauhia te parau a’o ’e te arata’ira’a, ’aore rā nō te ha’apūai i tō’u fa’aro’o. ’Ua fa’aro’o vau iāna i te fa’a’itera’a i te reira i roto i tāna mau a’ora’a ’e mau fa’auera’a ’ohipa. ’Ua mau iā’u te reira, hau atu rā, e nehenehe tā’u e ha’amana’o i te ta’ira’a o tōna reo ’e te putapūra’a vārua i roto iā’u i te fa’a’itera’a ’oia i te reira. Nā roto i te fa’a’itera’a i te mau ’īrava pāpa’ira’a mo’a ’e tōna mau mana’o, i tauturu ai tō’u metua tāne iā’u ’ia ha’amau i te hō’ē niu pāpū nō te fa’aro’o i te Fatu ia Iesu Mesia.

E mea au ta’a ’ē nā tō’u metua tāne te fa’ati’ara’a nō ni’a i te tere o te Fa’aora i rotopū i te mau ta’ata o Nephi.³ E fa’ati’ara’a mo’a nō ni’a i te Fatu ra Iesu Mesia tei ti’afa’ahou mai ’e tei fa’ateiteihia. I inu ’oia i te ’āu’a maramara ’e ’ua mamae i te mau mea ato’a ’ia ’ore tātou ’ia mamae mai te peu e tātarahapa tātou.⁴ I haere ’oia i roto i te ao vārua ’e ’ua fa’anahonaho i te porora’a ’evanelia i reira.⁵ I ti’a mai ’oia mai roto mai i te pohe, ’e tei pīha’i iho ’oia i te Metua ’e ’ua fāri’i ho’i i tāna fa’auera’a ’ia fa’a’ite i te mau ’āti Nephi i te mau ’īrava pāpa’ira’a mo’a, ’o tē ha’amaita’i i te mau u’i nō ananahi.⁶ I fa’ateiteihia ’oia ’e ’ua mau ’oia te tā’āto’ara’a o tōna mana mure ’ore ’e te ’aravihi. E nehenehe tātou e ’apo i te ha’api’ira’a i roto i te mau tuha’a ato’a o tāna mau ha’api’ira’a.

I roto i te 3 Nephi 11, tē tai’o nei tātou i tōna poura’a mai mai te ra’i mai nō te ha’api’i i te mau ’āti Nephi ē, ’o ’oia Iesu Mesia, tā te mau peropheta i fa’a’ite pāpū ē, e tae mai i te ao nei. I fa’a’ite ’oia ē, ’o ’oia te Māramarama o te ao, ’e ’ua fa’ahanahana ’oia i te Metua nā roto i te ravera’a i ni’a iāna te mau hara o te ao nei. I ani ’oia i te mau ta’ata ’ia haere mai e tu’u i tō rātou rima i tōna ’ao’ao ’e ’ia fāfā i te puta naero i ni’a i tōna nā rima ’e tōna nā ’āvae. I hina’aro ’oia ia rātou ’ia ’ite ē, ’o ’oia te Atua o ’Īserā’ela, tei taparahihia nō te mau hara o te ao nei. ’Ua pāhono te ta’ata ma te ’oa’oa, ’e ’ua haere hō’ē hō’ē atu ra ē tae noa atu ’ua ’ite pā’āto’a ’e ’ua fāfā ho’i ē, ’o ’oia mau iho ā, ’o tei pāpa’ihia e te mau peropheta ē e tae mai.⁷

’Ua ha’api’i Iesu i te mau ’āti Nephi i te faufa’a rahi nō te tātarahapara’a, nō ni’a i te rirora’a ’ei tamari’i ri’i, ’e nō ni’a i te tītaura’a ’ia bāpetizohia e te hō’ē tei iāna ra te ha’amanara’a. ’E i ha’api’i ihora ’oia i te rahira’a o te ha’api’ira’a tumu tā tātou e tuatāpapa nei i teie matahiti i roto i te Faufa’a ’Āpī.

I roto i te 3 Nephi 17, tē tai’o nei tātou ē, i parau Iesu i te mau ta’ata ē, ’ua tae i te taime nōna nō te haere i te Metua ra ’e nō te fa’a’ite ato’a iāna i te mau ’ōpū mo’e nō ’Īserā’ela.⁸ ’A hi’o ai tōna mata i te naho’a rahi, ’ite a’era ’oia ē, tē tahe ra tō rātou roimata, ma te hi’o tāmau i ni’a iāna mai te huru ē, tē ani ra iāna ’ia fa’aea ri’i mai ā.⁹

E pāhonora’a putapū rahi ’e te māramarama rahi tā te Fa’aora i hōro’a i te mau ’āti Nephi. I parau ’oia : « Inaha, ’ua ’ī tō’u ’ā’au i te aroha ia ’outou. »¹⁰

Pāpū iā’u ē, ’ua hau atu tāna aumihi i te pāhonora’a i te roimata a te ta’ata. Mai te huru ra ē, ’ua ti’a iāna ’ia hi’o ia rātou nā roto i te mata o tāna tusia tāra’ehara. ’Ua ’ite ’oia i tō rātou mau māuiui, tō rātou mau ’ati ’e tō rātou mau fa’ahemara’a ato’a. ’Ua ’ite ’oia i tō rātou ma’ima’i. ’Ua ’ite ’oia i tō rātou paruparu, ’e ’ua ’ite ’oia nō tōna maemae ’e te ahoaho i Getesemane ’e i Golagota e nāhea i te tauturu ia rātou mai te au i tō rātou paruparu.¹¹

Mai te reira ato’a ’ia hi’o ana’e tō tātou Fa’aora Iesu Mesia ia tātou, tē ’ite nei ’oia ’e tē māramarama nei ho’i i te māuiui ’e te hōpoi’a o tā tātou mau hara. Tē ’ite nei ’oia i tō tātou ma’i fa’atītī ’e tō tātou mau fifi. Tē ’ite nei ’oia i tō tātou mau tāfifira’a ’e tō tātou mau ’ati huru rau—’e ’ua ’ī ho’i ’oia i te aumihi nō tātou.

’O teie atu ra ïa tāna anira’a marū i te mau ’āti Nephi : « Tē vai ra ānei te feiā ma’i i rotopū ia ’outou ? ’A hopoi mai ia rātou i’ō nei. E piri’o’i ānei tō rotopū ia ’outou, e matapō ānei, e feiā paruparu ānei, e lēpera ānei, e feiā hāpepa ānei, e tari’a turi ānei, e feiā ro’ohia ānei i te tahi atu mau huru ’ati ? ’A hōpoi mai ia rātou i’ō nei, ’e e fa’aora vau ia rātou, e aroha ho’i tō’u ia ’outou na ; ’ua ’ī ho’i tō’u ’ā’au i te aroha. »¹²

Haere mai ra te mau ta’ata « te mau ta’ata ato’a i ro’ohia i te mau huru ’ati ato’a ; ’e ’ua fa’aora ’oia ia rātou tāta’itahi ’a hōpoihia mai ai rātou iāna ra. »¹³

I te matahiti 1990, tē ora ra mātou i te ’oire na’ina’i nō Sale, i Victoria, i Auterāria. E mea ’oa’oa mātou ’e ’ua rahi maita’i te ’ohipa, i roto i te ’utuāfare, te ’Ēkālesia ’e te ’ohipa. I te hō’ē mahana mā’a nehenehe, nā mua a’e i te Noela, ’ua fa’aoti mātou e haere i te tahi mau ’āua rā’au tanu ’e i te hō’ē pae tahatai au roa a’e. Hope te au terā mahana ha’utira’a nō te ’utuāfare, ē pa’uma atu ra mātou i roto i te pere’o’o ’e ’ua ho’i atu ra i te fare. Nā’u i fa’ahoro, vare’a ta’oto atu ra ’e ’ua fa’aū mātou i te hō’ē pere’o’o tei tere mai i mua ia mātou. Ē i muri ri’i mai, ’ua hi’o vau i rapae i te pere’o’o. ’Ua fati maita’i te ’āvae o tā’u vahine ia Maxine, ’e tē fifi ra ’ōna i te huti i te ao. ’Ua fati tōna rei ’ōuma. ’Ua ri’ari’a rahi tā māua e toru tamāhine, ’aua’a a’e rā, ’aita e fifi. ’Ua pēpē ri’i noa vau. ’O tā māua rā tamaiti e pae ’āva’e, ’aita e hā’uti’uti ra.

I roto i te urupu’upu’u ’e te ’āhuehue o terā ’ati, ’ua parau rū tā māua matahiapo ra ia Kate, 11 matahiti : « E Pāpā, e hōro’a i te ha’amaita’ira’a ia Jarom. » ’Ua fifi ri’i māua tā’u tamāhine i te haere i rāpae i te pere’o’o, ’ua tae rā ia māua. E’ita e nehenehe e ha’uti ia Maxine. ’Ua rave marū mai au ia Jarom ; tīraha a’era i raro, ’e ’ua tu’u marū iāna i ni’a i tō’u ’ōuma ’e ’ua hōro’a atu ra i te hō’ē ha’amaita’ira’a autahu’ara’a. I te taera’a mai te pere’o’o ma’i e 40 minuti i muri mai, tē ora noa ra ’o Jarom.

I terā pō, ’ua fa’aru’e au e toru o te ’utuāfare i te fare ma’i ’e ’ua nā ni’a mātou e piti tamāhine i te taxi nō te ho’i i te fare, ’ua vai mū noa. I terā ra pō, ’ua tāparu vau i te Metua i te ao ra ’ia ora mai tō’u ’utuāfare ’e rātou ato’a i roto i te tahi atu pere’o’o. ’Aua’a a’e rā, ’ua pāhonohia tā’u mau pure ’e te pure tu’utu’u ’ore o te tahi atu mau ta’ata. ’Ua ora pauroa mai i muri iho, e ha’amaita’ira’a rahi ’e te aroha rahi.

Noa atu rā, ’ua tāmau noa tō’u mau mana’o fa’ahapa ’e te ha’amā nō te fa’atupura’a i te reira ’ati ri’ari’a. E ara vau i te pō ’e e ho’i fa’ahou mai terā ’ati ahoaho rahi. E rave rahi matahiti te maoro tō’u ’āehuehura’a i te fa’a’orera’a vau iho i tā’u hapa ’e te ’imira’a i te hau. I muri iho, i te tauturura’a vau, ’ei ta’ata fa’atere autahu’ara’a, i te tahi atu mau ta’ata ’ia tātarahapa ’e ’ia putapū i te aumihi ’e te aroha ’e te here o te Fa’aora, tō’u pāpūra’a ē, e ti’a iāna ’ia fa’a’ora i tō’u māuiui.

E tano te mana fa’aora ’e te mana tāra’ehara a te Fa’aora nō te mau hape hina’aro-’ore-hia, te mau fa’aotira’a hape, te mau fifi ’e te mau tāmatara’a rau—nā reira ato’a nō tā tātou mau hara. I te fāriura’a vau i ni’a iāna tō’u mana’o fa’ahapa ’e te ha’amā i te mono-marū-ra’a-hia i te hau ’e te fa’aeaeara’a.

’Ua ha’api’i te peresideni Russel M. Nelson : « ’A fa’atusia ai te Fa’aora nō te mau ta’ata ato’a, ’ua ’īriti ’oia i te hō’ē haere’a e ti’a i te feiā e pe’e iāna ’ia fāri’i i tōna mana fa’aorara’a, tōna mana ha’apūai ’e tōna mana tāra’ehara. E roa’a teie mau maita’i pae vārua i te mau ta’ata ato’a e ’imi ’ia fa’aro’o iāna ’e ’ia pe’e iāna. »¹⁴

Te mau taea’e ’e te mau tuahine, tē amo ra ānei ’outou i te hōpoi’a nō te hara ’aita i fa’a’āfarohia, tē mamae ra ānei nō te hō’ē hapa i ravehia i ni’a ia ’outou e mea maoro i teienei, ’aore rā tē tāfifi ra ānei i te fa’a’orera’a i tā ’outou iho hapa nō te hō’ē hape hina’aro-’ore-hia, ’ua matara ïa te ’ē’a nō ’outou i te mana fa’aora ’e te mana tāra’ehara a te Fa’aora Iesu Mesia.

Tē parau pāpū nei au ē tē ora nei ’oia. ’O ’oia tō tātou Fa’aora ’e te Tāra’ehara. ’Ua here ’oia ia tātou. E aroha tōna nō tātou, ’ua ’ī ’oia i te aroha, ’e e nehenehe tāna e fa’aora ia ’outou. I te i’oa o Iesu Mesia, ’āmene.