Ang Inyong Patriyarkal nga Panalangin—Dinasig nga Direksiyon gikan sa Langitnong Amahan
Ang akong patriyarkal nga panalangin nakatabang kanako nga nasabtan ang akong tinuod nga mahangturon nga pagkatawo—kon si kinsa gayod ako ug kon si kinsa ako mamahimo.
Gipadako ako sa buotan nga mga ginikanan nga nagmahal ug matinud-anong nagmatuto sa ilang mga anak sa ebanghelyo. Subo lang, ang akong pinalangga nga mga ginikanan nanglimbasog sa ilang kaminyoon sa daghang kautigan. Primary pa ako sa dihang gisultihan ko nga sila lagmit magdeborsiyo sa umaabot ug ang akong mga igsoon ug ako tingali kinahanglan mopili kon hain sa ginikanan ang ubanan sa pagpuyo. Agig resulta, ako nakasinati og dakong kabalaka; bisan pa man, usa ka gasa gikan sa akong Langitnong Amahan nga sa kataposan nakatabang sa tanang butang alang kanako—ang akong patriyarkal nga panalangin.
Sa edad nga 11, nagkadako ang akong kabalaka sa relasyon sa akong mga ginikanan, matinguhaon kaayo ko sa akong patriyarkal nga panalangin. Ako nasayod nga ang akong Langitnong Amahan hingpit nga nakaila kanako ug nasayod sa akong piho nga kahimtang. Ug ako nasayod usab nga ako makadawat og direksiyon gikan Kaniya. Human sa akong ika-12 nga adlawng natawhan diha-diha dayon, akong nadawat ang akong patriyarkal nga panalangin. Kapin na kadto sa tunga sa siglo ang milabay, apan tataw nakong mahinumdoman kadto nga sagradong kasinatian.
Mapasalamaton gayod, nga kita adunay dinasig nga direksiyon mahitungod sa patriyarkal nga mga panalangin diha sa Kinatibuk-ang Tamdanan nga Basahon sa Simbahan:
“Ang matag takos, nga miyembro nga nabunyagan angayan nga modawat og patriyarkal nga panalangin, diin naghatag og dinasig nga direksiyon gikan sa Langitnong Amahan.”
Ang usa ka miyembro kinahanglan mahimong “igo na ang kahingkod aron masabtan ang kahulugan ug sagradong matang sa panalangin” ug “makasabot sa sukaranang doktrina sa ebanghelyo.”
“Mas nindot gyod nga ang miyembro kinahanglang igo ang kabatan-on nga daghan pang importante nga mga desisyon sa kinabuhi ang umaabot pa. … Ang mga lider sa pagkapari kinahanglang dili moestablisar og minimum nga pangidaron alang sa miyembro sa pagdawat og patriyarkal nga panalangin. …
“Ang matag patriyarkal nga panalangin sagrado, kompidensyal, ug personal. …
“Ang tawo nga modawat og patriyarkal nga panalangin kinahanglang mohatag og bili sa mga pulong, mamalandong niini, ug magpuyo nga takos nga modawat sa gisaad nga mga panalangin niini nga kinabuhi ug sa kahangtoran.”1
Ang atong pinalangga nga Presidente Russell M. Nelson balik-balik nga nagtudlo mahitungod sa kaimportante sa usa ka patriyarkal nga panalangin,2 nga kini naghatag sa matag modawat og “usa ka pagpadayag sa kaliwatan balik ngadto ni Abraham, Isaac, ug Jacob”3 ug “mao ang personal nga kasulatan nganha kanimo.”4
Ang akong patriyarkal nga panalangin hilabihan ka importante kanako sa dihang batan-on pa ko sa daghang rason. Una, ang akong patriyarkal nga panalangin nakatabang kanako nga nasabtan ang akong tinuod nga mahangturon nga pagkatawo—kon si kinsa gayod ako ug kon si kinsa ako mamahimo. Kini nakatabang kanako nga masayod, sama sa gitudlo ni Presidente Nelson, nga ako mao ang “usa ka anak nga lalaki sa Dios,” “usa ka [anak] sa pakigsaad,” ug “usa ka disipulo ni Jesukristo.”5 Ako nasayod nga ako nailhan ug gimahal sa akong Langitnong amahan ug sa akong Manluluwas ug nga Sila personal nga nalambigit sa akong kinabuhi. Kini nakatabang kanako nga magtinguha nga mas maduol pa ngadto kanila ug madugangan ang akong hugot nga pagtuo ug pagsalig diha kanila.
Usa ka minahal nga higala kinsa mipasakop sa Simbahan sa young adult pa mipakigbahin: “Sa dihang ang patriyarka mipandong sa iyang mga kamot sa akong ulo ug militok sa akong ngalan, ang tanang butang nausab … dili lang kaniadto apan sa tibuok kong kinabuhi. Diha-diha dayon akong nabatyagan nga—pinaagi sa gahom diin siya namulong—ako nailhan sa suod ug lawom nga paagi. Ang mga pulong nga iyang gipamulong midulot sa tibuok kong galamhan. Ako nasayod nga ang Langitnong Amahan nakaila kanako, sulod ug gawas.”
Ang masayod kon si kinsa gayod ako nakatabang kanako nga masabtan ug magtinguha sa pagbuhat kon unsa ang gilaoman sa Dios ngari kanako.6
Kini migiya kanako sa pagtuon sa mga pakigsaad nga akong gihimo ug sa gisaad nga mga panalangin diha sa pakigsaad sa Dios ngadto ni Abraham.7 Kini nakahatag kanako og mahangtoron nga panglantaw nga nagdasig kanako nga mas hingpit nga motuman sa akong mga pakigsaad.
Akong gitun-an ang akong patriyarkal nga panalangin sa kanunay, kasagaran kada adlaw, nga nakatabang kanako nga mabati ang makahupay, naggiya nga impluwensiya sa Espiritu Santo, kinsa nakatabang kanako nga maminusan ang akong kabalaka sa dihang akong gisunod ang Iyang mga pag-aghat. Kini nakapadugang sa akong tinguha aron aktibong modapit sa kahayag, kamatuoran, ug sa Balaang Espiritu pinaagi sa akong pagtuon sa akong kasulatan ug mag-ampo kada adlaw ug maningkamot nga mas makugihon sa pagtuon ug pagsunod sa mga pagtulon-an sa propeta sa Dios ug mga apostoles. Ang akong patriyarkal nga panalangin nakatabang usab kanako nga magtinguha nga mahimong mas masugtanon ngadto sa kabubut-on sa akong Langitnong Amahan, ug kana nga pagtutok nakatabang nako nga makasinati og hingpit nga kalipay, bisan pa man sa akong personal nga mahagiton nga mga kahimtang.8
Ako nakadawat og espirituhanon nga kalig-on sa matag higayon nga ako magtuon sa akong patriyarkal nga panalangin. Sa dihang sa kataposan nagdeborsiyo ang akong mga ginikanan, ang akong patriyarkal nga panalangin, sama sa gitudlo ni Presidente Thomas S. Monson, nahimong “usa ka bililhon ug mahalon nga personal nga bahandi,” gani “usa ka personal nga Liahona.”9
Karon, palihog ayaw saypa sa pagsabot. Ako dili hingpit. Ako nakahimo og tanang matang sa kasaypanan. Ang akong mahangtoron nga kapikas mokompirmar nga ako masayop gihapon. Apan ang akong patriyarkal nga panalangin nakatabang kanako ug padayon nga nagtabang kanako nga magtinguha sa pagbuhat og mas maayo ug mahimong mas maayo.10 Ang kanunay nga pagtuon sa akong patriyarkal nga panalangin nakapalambo sa akong tinguha sa pagsugakod sa tintasyon. Kini mitabang kanako sa pagbaton og tinguha ug kaisog sa paghinulsol, ug ang paghinulsol nagkadako nga nahimong usa ka malipayon nga proseso.
Kini mahinungdanon alang kanako sa pagdawat sa akong patriyarkal nga panalangin samtang ako batan-on pa ug samtang ang akong pagpamatuod nagtubo pa. Ug Ako hangtod sa kahangtoran mapasalamaton nga ang akong mga ginikanan ug ang bishop nakasabot nga ang akong tinguha nagpakita nga ako andam na.
Sa dihang 12 na ko, ang kalibotan dili pa kaayo makapalibog ug makabalda kay sa kalibotan karon. Si Presidente Nelson mihulagway sa karon isip usa ka “labing komplikado nga panahon sa kasaysayan sa kalibotan,” usa ka kalibotan nga “puno sa sala” ug “nakasentro sa kaugalingon,.”11 Maayo na lang ang atong kabatan-onan karon mas hingkod na kaayo kay sa kanako sa 12 pa, ug sila usab adunay kritikal nga importante kaayo nga mga desisyon nga himoon samtang sila batan-on pa! Sila usab nagkinahanglan nga masayod kon si kinsa gayod sila ug nga ang Dios nahigugma kanila ug hingpit nga nakahibalo kanila!
Dili tanan magtinguha sa ilang patriyarkal nga panalangin sama nako. Apan ako nag-ampo nga ang mga miyembro kinsa wala pa makadawat sa ilang patriyarkal nga panalangin mainampoon nga magtinguha nga masayod kon sila andam na ba. Ako mosaad nga kon kamo mangandam sa espirituhanong paagi, ang inyong kasinatian, sama nako, mahimong sagrado nganha kaninyo. Ako usab nag-ampo nga kadtong kinsa nakadawat na sa ilang patriyarkal nga panalangin magtuon ug mobahandi niini. Ang pagpangga sa akong patriyarkal nga panalangin mipanalangin samtang ako batan-on pa nakapanalangin kanako og kaisog sa kon ako nawad-an og kadasig, naghupay kanako kon ako nagmahadlokon, kalinaw kon ako mibati og kabalaka, paglaom kon ako mibati og kawalay paglaom, ug kalipay kon ang akong kalag nagkinahanglan kaayo niini. Ang akong patriyarkal nga panalangin nakatabang kanako nga mousbaw ang akong hugot nga pagtuo ug mosalig sa akong Langitnong Amahan ug sa akong Manluluwas. Kini nakapadugang usab sa akong gugma alang Kanila—ug kini nagpadayon gihapon.12
Ako mopamatuod nga ang patriyarkal nga mga panalangin tinuod nga nagsangkap og dinasig nga direksiyon gikan sa Langitnong Amahan. Ako mohatag sa akong pagsaksi sa buhi nga reyalidad sa atong Amahan sa Langit ug sa Iyang Anak—nga atong Manluluwas, si Jesukristo—kinsa nakaila kanato, nagmahal kanato, ug nagtinguha sa pagpanalangin kanato. Nasayod usab ako uban sa kasegurohan nga si Presidente Russell M. Nelson mao ang propeta sa Dios sa yuta karon. Sa ngalan ni Jesukristo, amen.