Magpunting kang Jesukristo

Ni Brother Milton Camargo

Unang Magtatambag sa Kinatibuk-ang Kapangulohan sa Sunday School

Si Ginoong Jesukristo mao ang kasulbaran sa atong mga problema, apan kinahanglan kita nga mohangad ug motutok aron makakita Kaniya.

Ang akong papa sauna misulti kanako, “Ayaw pagpunting pag-ayo sa imong mga problema nga dili ka na makakita sa solusyon.”

Ako mopamatuod nga si Ginoong Jesukristo mao ang solusyon bisan gani sa atong labing lisod nga mga problema. Sa pihong pagkasulti, Siya nakabuntog sa upat ka problema nga giatubang sa matag usa kanato ug nga walay bisan usa kanato ang makasulbad pinaagi sa atong kaugalingon lamang:

Ang unang problema mao ang pisikal nga kamatayon. Mahimo nato kining sulayan sa pagpadugay o ibaliwala kini, apan dili nato kini mabuntog sa atong kaugalingon lang. Si Jesukristo, hinoon, mibuntog sa kamatayon alang kanato, ug isip sangpotanan, kita mabanhaw sa umaabot nga adlaw.¹
Ang ikaduha nga problema naglakip sa mga kalisdanan, lisod nga mga kasinatian, kagul-anan, kasakit, ug kawalay kaangayan niini nga kalibotan. Si Jesukristo mibuntog niining tanan. Alang niadtong naningkamot sa pagsunod Kaniya, Siya sa umaabot nga adlaw “mopahid sa tanang luha” ug mopahiuli pag-usab sa mga butang.² Sa samang higayon, Siya makapalig-on kanato aron sa pagbuntog sa atong mga pagsulay nga adunay pagsalig, pagmaya, ug kalinaw.³
Ang ikatulo nga problema mao ang espirituwal nga kamatayon tungod sa sala. Si Jesukristo mibuntog niini nga problema pinaagi sa pagdala diha sa Iyang kaugalingon sa “kastigo nga maoy nakaluwas kanato.”⁴ Tungod sa Iyang maulaong sakripisyo, kita mahimong gawasnon sa mga sangpotanan sa atong mga sala kon kita adunay hugot nga pagtuo diha sa atong Manluluwas, kinasingkasing nga maghinulsol, modawat sa pakigsaad nga gitanyag sa Amahan kanato pinaagi sa mahinungdanon nga mga ordinansa sama sa bunyag, ug sa paglahutay hangtod sa kataposan.⁵
Ang ika-upat nga problema mao ang atong limitado, dili hingpit nga kinaiyahan. Si Jesukristo adunay kasulbaran usab niini nga problema. Siya dili lang mopapas sa atong mga sayop ug himoon kitang inosente og balik. Siya makahimo og “dako nga kausaban diha … sa atong mga kasingkasing, nga kita wala nay hilig sa pagbuhat og dautan, apan sa pagbuhat og maayo sa kanunay.”⁶ Kita mahingpit pinaagi sa grasya ni Kristo ug sa umaabot nga adlaw mahimong sama Kaniya.⁷

Subo lang, kasagaran kaayo kita nga magpunting pag-ayo sa atong kaugalingon nga mga problema nga dili na hinoon kita makakita sa solusyon, ang atong Manluluwas nga si Jesukristo. Unsaon nato paglikay niana nga kasaypanan? Ako nagtuo nga ang tubag anaa sa mga pakigsaad nga kita gidapit sa paghimo uban Kaniya ug sa atong Amahan sa Langit.

Magpunting ngadto kang Jesukristo pinaagi sa mga Pakigsaad

Ang atong mga pakigsaad magtabang kanato sa pagpunting sa atong atensiyon, sa atong mga hunahuna, sa atong mga aksiyon diha kang Kristo. Samtang kita “[mo]hupot sa pakigsaad nga [kita] mihimo,” sayon kitang makaila sa mga “butang niini nga kalibotan” nga gikinahanglan kita “mosalikway” ug “ang mga butang nga maayo” nga gikinahanglan natong makugihon nga tinguhaon.⁸

Kana mao ang gibuhat sa katawhan ni Ammon diha sa Basahon ni Mormon. Sa dihang sila nakaila ni Jesukristo ug nagsugod sa pagpunting sa ilang kinabuhi ngadto Kaniya, sila nasayod nga kinahanglan nila nga ilubong ang ilang mga hinagiban sa gubat ug mahimong hingpit nga matinuoron ug “[m]ailhan tungod sa ilang kasibot ngadto sa Dios.”⁹

Ang paghupot sa pakigsaad mogiya kanato sa pagtinguha sa bisan unsa nga nagdapit sa impluwensiya sa Espiritu ug sa pagsalikway sa bisan unsa nga nag-abog niana nga impluwensiya sa pagpalayo—”kay nasayod kita nga kon makahimo kita sa pagpakatakos sa presensya sa Espiritu Santo, makahimo usab kita sa pagpakatakos sa pagpuyo diha sa presensya sa Langitnong Amahan ug sa Iyang Anak, si Jesukristo.”¹⁰ Kini mahimong magpasabot nga kinahanglan nga usbon nato ang atong sinultihan, mogamit og mas mabination nga mga pulong. Kini mahimong magpasabot nga ilisan ang dili maayo nga espirituhanong mga kinaiya og bag-o nga mga kinaiya nga makapalig-on sa atong relasyon uban sa Ginoo, sama sa matag-adlaw nga pag-ampo ug pagtuon sa kasulatan, nga mag-inusara og uban sa atong pamilya.

Si Presidente Russell M. Nelson miingon nga “ang matag tawo nga mohimo og mga pakigsaad diha sa mga bunyaganan ug diha sa mga templo—ug motuman niini—nakapadugang og agianan ngadto sa gahom ni Jesukristo. …

“Ang ganti sa pagtuman sa mga pakigsaad sa Dios mao ang langitnong gahom—gahom nga mas makapalig-on kanato sa pagpakigbatok sa atong mga pagsulay, mga tintasyon, ug mga kasakit.”¹¹

Ang pagbag-o sa atong mga pakigsaad atol sa sakramento matag Dominggo usa ka dako nga oportunidad aron sa pagsusi sa atong kaugalingon¹² ug magpunting pag-usab sa atong kinabuhi kang Jesukristo. Pinaagi sa pag-ambit sa sakramento, kita mipahayag nga kita “kanunay mohinumdom kaniya.”¹³ Ang pulong kanunay importante kaayo. Kini mopaabot sa impluwensiya sa Manluluwas ngadto sa tanang bahin sa atong kinabuhi. Kita dili mohinumdom lamang Kaniya diha sa simbahan o atol lang sa atong mga pag-ampo sa buntag o sa higayon lang nga kita anaa sa kabalaka ug adunay panginahanglan.

Oo, kita usahay mabalda. Kita makalimot. Kita malipat. Apan ang pagbag-o sa atong mga pakigsaad nagpasabot nga kita gusto nga kanunay makahinumdom sa Manluluwas, nga kita mosulay sa pagbuhat sa ingon sa tibuok semana, ug nga kita mopasalig pag-usab ug magpunting pag-usab Kaniya sa pag-ambit sa sakramento sa sunod semana.

Magpunting kang Jesukristo diha sa Atong mga Panimalay

Tataw lang, ang pagpunting kang Jesukristo kinahanglan nga labaw pa sa usa ka Dominggo, sa kalihokan sa simbahan. Sa dihang si Presidente Nelson mipaila sa Dali, Sunod Kanako sa 2018, siya miingon, “Panahon na alang sa nakasentro sa panimalay nga Simbahan.”¹⁴ Siya miingon nga kita kinahanglan “mousab sa [atong] panimalay ngadto sa usa ka santuwaryo [sanctuary] sa hugot nga pagtuo” ug “usa ka sentro sa pagkat-on sa ebanghelyo.” Ug siya mihimo og upat ka maanindot nga mga saad kanato kon kita mobuhat sa ingon.¹⁵

Ang unang saad: Ang “inyong mga adlaw nga Igpapahulay mahimong ikahimuot.” Kini mahimong usa ka adlaw nga kita mapaduol ngadto sa atong Manluluwas. Sa giingon pa sa usa ka batan-ong babaye nga gikan sa Peru, “Ang adlaw sa Ginoo mao ang adlaw nga ako makadawat og labing daghang tubag gikan sa Ginoo.”

Ang ikaduhang saad: “Ang inyong mga anak magmahinamon sa pagkat-on ug pagsunod sa mga panudlo sa Manluluwas.” Mao na nga “kita naghisgot mahitungod kang Kristo, kita nalipay diha kang Kristo, kita nagsangyaw mahitungod kang Kristo, … nga ang atong mga anak mahimo nga masayod sa unsa nga tinubdan sila mahimo nga mangita alang sa kapasayloan sa ilang mga sala.”¹⁶

Kita mobuhat niini aron usa ka adlaw, sa dihang ang atong anak molakaw aron sa pagtrabaho o sa paglakaw-lakaw ngadto sa kabukiran o mangayam sa kalasangan, sama sa gibuhat ni Enos, iyang mahinumdoman unsay atong gitudlo kaniya bahin ni Kristo ug bahin sa kalipay sa pagsunod sa ebanghelyo. Ug kinsay magdahom? Tingali kini na ang adlaw nga siya sa kataposan mobati sa espirituwal nga kagutom nga makapadangop niya ngadto ni Jesukristo aron siya makadungog sa tingog sa Ginoo nga nag-ingon kaniya, “Ang imong mga sala gipasaylo na, ug ikaw panalanginan.”¹⁷

Ang ikatulo nga saad: “Ang impluwensiya sa kaaway sa inyong kinabuhi ug sa inyong panimalay mokunhod.” Ngano? Tungod kay kon mas magpunting kita kang Jesukristo, mas dili na kita ganahan magbuhat og sala.¹⁸ Ang atong mga panimalay mapuno sa kahayag sa Manluluwas, magkagamay ang luna alang sa kangitngit sa kaaway.

Ang ika-upat nga saad: “Ang mga kausaban sa inyong pamilya dako ug magpadayon.” Ngano? Tungod kay ang kausaban nga dala ni Jesukristo usa ka “dako nga kausaban.”¹⁹ Siya mousab sa atong kinaiyahan, mamahimo kitang “bag-o nga mga linalang.”²⁰ Kita sa hinay-hinay mamahimong mas mahisama sa Manluluwas, puno sa Iyang gugma nga putli alang sa tanang anak sa Dios.

Kinsay dili ganahan niini nga mga saad nga matuman diha sa ilang kinabuhi ug sa ilang mga pamilya? Unsa ang gikinahanglan natong buhaton aron maangkon kini? Ang tubag mao ang pag-usab sa atong mga panimalay ngadto sa usa ka santuwaryo [sanctuary] sa hugot nga pagtuo ug usa ka sentro sa pagkat-on sa ebanghelyo. Ug unsaon man nato sa paghimo niana? Pinaagi sa pagpunting sa Langitnong Amahan ug ni Jesukristo, himuon Sila nga sentro sa kinabuhi sa atong pamilya, ang labing importante nga impluwensiya sa atong panimalay.

Makasugyot ba ko nga kamo magsugod sa pulong nga Kristo nga makita diha sa mga kasulatan nga mahimong usa ka bahin sa inyong kinabuhi matag adlaw? Walay gisugyot nga paagi alang sa perpekto nga pagtuon sa kasulatan. Mahimo kining 5 o 10 ka minuto matag adlaw––o sobra pa kon makahimo ka. Mahimo kining usa ka kapitulo o pipila ka bersikulo matag adlaw. Ang pipila ka pamilya mas ganahan magtuon sa buntag sa dili pa mobiya padulong sa eskwelahan o trabaho. Ang uban mas ganahan nga magbasa sa gabii sa dili pa matulog. Pipila ka batan-ong magtiayon misulti kanako nga sila indibidwal nga magtuon padulong sa trabaho ug dayon mopakigbahin og mga panghunahuna sa usag usa pinaagi sa text aron ang ilang mga komentaryo ug panagsultihanay narekord.

Ang Dali, Sunod Kanako naghatag og daghang mga sugyot sa kalihokan ug mga kapanguhaan nga makatabang sa mga indibidwal ug mga pamilya nga makakat-on sa mga baroganan sa ebanghelyo gikan sa mga kasulatan. Ang mga bidyo sa Biblia ug ang mga bidyo sa Basahon ni Mormon bililhon usab nga mga himan aron sa paghimo sa mga kasulatan nga mas magamit sa inyong pamilya. Ang kabatan-onan ug kabataan kasagaran madasig sa mga halandomong mga istorya diha sa mga kasulatan. Kini nga mga istorya, ug ang mga baroganan sa ebanghelyo nga ilang itudlo magpabilin sa inyong mga anak, sama sa kasaligan nga mga higala, kon sila magkinahanglan og maayo nga ehemplo sa pagserbisyo, hiyas, kamasulondon, pailob, paglahutay, personal nga pagpadayag, gugmang putli, pagpaubos, ug hugot nga pagtuo diha kang Jesukristo. Paglabay sa panahon, ang inyong pagkamakanunayon sa pagbusog diha sa pulong sa Dios makatabang sa inyong mga anak nga mag-anam kaduol ngadto sa Manluluwas. Sila mas makaila Kaniya nga wala pa sukad.

Si Ginoong Jesukristo buhi karon. Siya mahimong aktibo, matag adlaw anaa sa atong kinabuhi. Siya mao ang kasulbaran sa atong mga problema, apan kinahanglan kita nga mohangad ug motutok aron makakita Kaniya. Siya miingon, “Paghunahuna ngari kanako sa matag hunahuna; ayaw pagduha-duha, ayaw kahadlok.”²¹ Samtang kita magpunting Kaniya ug sa atong Amahan sa Langit, maghimo ug magtuman sa mga pakigsaad uban Kanila, ug himuon Sila nga ang labing importante nga impluwensiya sa atong panimalay ug pamilya, kita mamahimo nga sama sa katawhan nga gipanglantawan ni Presidente Nelson: “usa ka katawhan kinsa makahimo, andam, ug takos sa pagdawat sa Ginoo kon Siya moabot pag-usab, usa ka katawhan kinsa mipili na ni Jesukristo kay sa niining napukan nga kalibotan; usa ka katawhan kinsa nagmaya sa ilang kabubut-on sa pagsunod sa mas taas, mas balaan nga mga balaod ni Jesukristo.”²² Sa ngalan ni Jesukristo, amen.