Napasaylo Na Ba Gayod Ako?
Ang saad alang sa kompleto ug hingpit nga kapasayloan gihimo alang sa tanan—diha ug pinaagi sa walay kinutoban nga Pag-ula ni Jesukristo.
Daghang tuig nang milabay, si Sister Nattress ug ako mibalhin sa Idaho, diin didto nag-abli mi og bag-ong negosyo. Taas nga oras ang among igahin adlaw ug gabii sa opisina. Maayo na lang, nagpuyo mi nga duol ra gikan sa trabahoan. Matag semana, si Shawna ug ang among tulo ka anak nga babaye—tanan nag-edad og ubos sa sayis anyos—moadto sa opisina alang sa dungan nga pagpaniudto.
Usa niana ka adlaw human sa among pamilya nga paniudto, nakabantay ko nga ang among singko anyos nga anak, si Michelle, mibilin kanako og personal nga mensahe, gisulat sa Post-it nga Papel ug gipapilit sa telepono sa akong opisina.
Mabasa kini nga, “Pa, hinumdomi ang paghigugma kanako. Nagmahal, Michelle.” Usa kini ka gamhanang pahinumdom alang sa batan-ong amahan bahin sa mga butang nga labing mahinungdanon.
Mga kaigsoonan, mopamatuod ko nga ang atong Langitnong Amahan kanunay nga nahinumdom kanato ug nga Siya nahigugma kanato sa hingpit. Ang akong pangutana mao kini: Kita ba nahinumdom Kaniya? Ug kita ba nahigugma Kaniya?
Mga tuig ang milabay, nagserbisyo ko isip lokal nga lider sa Simbahan. Usa sa among batan-ong lalaki, si Danny, labihan ka maayo sa tanang paagi. Masulondon siya, buotan, ug may talagsaong kasingkasing. Apan, dihang migradwar siya sa high school, nagsugod siya nga makig-uban sa dili maayong mga tawo. Nalambigit na siya sa drugas, ilabi na sa methamphetamine, ug nadakin-as na sa dangog nga bakilid sa pagkaadik ug kalaglagan. Wala magdugay, hingpit nang nausab ang iyang panagway. Lisod na siyang ilhon. Ang dako kaayog pagkausab mao ang iyang mga mata—ang kahayag sa iyang mga mata miawop na. Daghang higayon nga nakig-istorya ko niya, apan wala mosalir. Dili siya interesado.
Lisod nga sud-ongon kining talagsaon nga batan-ong lalaki nga mag-antos ug magpakabuhi nga dili na siya mao kaniadto! Siya adunay daghan pa unta nga mahimo.
Dayon usa ka adlaw, ang milagro kaniya nagsugod.
Mitambong siya og miting sa sakramento diin ang iyang manghod nga lalaki mipakigbahin sa iyang pagpamatuod sa wala pa molarga alang sa misyon. Atol sa miting, mibati si Danny og butang nga wala niya mabatyagi sulod sa dugay nang panahon. Gibati niya ang gugma sa Ginoo. Sa kataposan nakaangkon siya og paglaom.
Bisan og duna siyay tinguha nga mausab, ang pag-usab lisod alang ni Danny. Ang iyang pagkaadik ug ang nag-uban nga pagbati nga sad-an lisod kaayo niyang sagubangon.
Usa ka piho nga kahaponon, dihang nag-mower ko sa among tugkaran, mipahunong si Danny sa iyang sakyanan nga wala magpahibalo. Hilabihan ang iyang panglimbasog. Gipalong nako ang mower, ug nanglingkod kami sa landong nga hagdanan sa may pultahan. Didto nagsugod nga gipakigbahin niya ang iyang mga pagbati sa iyang kasingkasing. Tinuoray siyang gusto nga mobalik. Hinoon, ang pagtalikod gikan sa iyang pagkaadik ug estilo sa kinabuhi hilabihan kalisod. Dugang pa niini, mibati siya nga sad-an kaayo, labihang naulaw kay siya lahi na kaayo. Nangutana siya, “Ako mapasaylo ba gayod? May paagi ba gayod nga makabalik?”
Human nga iyang gibubo ang iyang kasingkasing bahin niini nga mga kabalaka, dungan namong gibasa ang Alma kapitulo 36:
“Oo, ako nahinumdom sa tanan kong mga sala. …
“Oo, … ang paghunahuna sa pagsulod ngadto sa atubangan sa akong Dios misakit sa akong kalag uban ang dili matukib nga kahadlok” (mga bersikulo 13–14).
Human niadto nga mga bersikulo, miingon si Danny, “Mao gayod kini ang akong gibati!”
Among gipadayon:
“Samtang ako gisamok sa panumdoman sa akong daghang mga sala, tan-awa, ako nakahinumdom usab nga nakabati sa akong amahan nga nanagna mahitungod sa pag-anhi sa usa ka Jesukristo, usa ka anak sa Dios, aron sa pag-ula sa iyang dugo alang sa mga sala sa kalibotan. …
“Ug, unsa nga hingpit nga kalipay, ug unsa ka kahibulongan nga kahayag ang akong nakita” (mga bersikulo 17, 20).
Samtang nagbasa kami niini nga mga tudling, ang mga luha nagsugod sa pagdagayday. Ang kalipay ni Alma mao ang kalipay nga iyang gipangita!
Among gihisgotan nga si Alma hilabihan gayod kadaotan. Apan, dihang naghinulsol siya, padayon na siyang mihimo og maayo. Nahimo siyang mapahinungoron nga disipulo ni Jesukristo. Nahimo siyang usa ka propeta! Mibuka og dako ang mga mata ni Danny. “Usa ka propeta?” miingon siya.
Yano ko nga mitubag, “Oo, usa ka propeta. Kaya nimo na!”
Among gihisgotan nga samtang ang iyang mga sala wala mahisama sa kang Alma, ang susama nga saad alang sa kompleto ug hingpit nga kapasayloan gihimo alang sa tanan—diha ug pinaagi sa walay kinutoban nga Pag-ula ni Jesukristo.
Karon nakasabot na si Danny. Nasayod na siya unsay angay niyang buhaton: nagkinahanglan siyang magsugod sa iyang panaw pinaagi sa pagsalig sa Ginoo ug pagpasaylo sa iyang kaugalingon!
Ang dako nga kausaban sa kasingkasing ni Danny milagro ra ang makahimo. Paglabay sa panahon, nausab ang iyang panagway, ug ang kasanag sa iyang mga mata nahibalik na. Nahimo siyang takos sa templo! Sa kataposan nahibalik na siya!
Human sa pipila ka bulan, gipangutana nako si Danny kon ganahan ba siyang mosumiter og aplikasyon aron moserbisyo og full-time nga misyon. Ang iyang tubag usa nga makapakugang ug makatingala.
Miingon siya, “Ganahan kong moserbisyo og misyon, apan nahibalo ka sa nahitabo kanako ug sa mga butang nga akong nahimo! Sa akong pagtuo dili ko kwalipikado.”
Mitubag ko nga, “Posibling eksakto ka. Apan, walay butang nga nagpugong nato sa paghangyo. Kon dili ka paadtoon, ang importante nahibalo ka nga mipahayag ka og tinuoray nga tinguha aron moserbisyo sa Ginoo.” Misanag ang iyang mga mata. Mahinamon siya niini nga ideya. Para niya imposible kining mahitabo, apan usa kini ka kahigayonan nga andam niyang lihokon.
Pipila ka semana ang milabay, ug sa iyang katingala, lahi nga milagro ang nahitabo. Nakadawat si Danny og tawag nga moserbisyo og full-time nga misyon.
Pipila ka bulan human sa pag-abot ni Danny sa natad sa misyon, nakadawat ko og tawag sa telepono. Ang iyang presidente yanong miingon,“Unsay anaa niining batan-on nga lalaki? Siya ang labing talagsaon nga misyonaryo nga sukad akong nakita!” Tan-awa, kini nga presidente nakadawat og modernong Alma nga Batan-on.
Duha ka tuig ang milabay, nauli na si Danny nga madungganon, nga nakaserbisyo sa Ginoo sa tibuok niyang kasingkasing, gahom, hunahuna, ug kusog.
Human sa iyang misyonaryo nga report sa miting sa sakramento, mipauli ko, diin didto madungog ang tuktok sa atubangan nakong pultahan. Didto nagbarog si Danny nga may mga luhang nanglugmaw sa iyang mga mata. Miingon siya, “Pwede ba tang mag-istorya og kadiyot?” Nanggawas mi ngadto sa mao gihapong hagdanan sa may pultahan.
Miingon siya, “President, sa imong hunahuna napasaylo na ba gayod ako?”
Karon ang akong mga luha midungan sa iyaha. Sa akong atubangan nagbarog ang mapahinungoron nga disipulo ni Jesukristo kinsa mihatag sa iyang tanan sa pagpanudlo ug pagpamatuod mahitungod sa Manluluwas. Siya ang tawo nga nagrepresentar sa makaayo ug makalig-on nga gahom sa Pag-ula sa Manluluwas.
Miingon ko, “Danny! Nakapanamin ka na ba? Nakita ba nimo ang imong mga mata? Puno kini sa kahayag, ug nagsanag diha kanimo ang Espiritu sa Ginoo. Siyempre, ikaw napasaylo na! Talagsaon ikaw! Karon ang angay nimong buhaton mao ang pagpadayon sa imong kinabuhi. Ayaw sublia ang kagahapon! Tan-aw sa unahan uban sa hugot nga pagtuo ngadto sa sunod nga ordinansa.”
Ang milagro kang Danny nagpadayon gihapon karon. Nagminyo siya sulod sa templo ug mibalik sa pag-eskwela, diin nakadawat siya og master’s degree. Padayon siyang nagserbisyo sa Ginoo nga may pasidungog ug dignidad sa iyang mga calling. Labi pang importante, nahimo siyang usa ka talagsaon nga bana ug matinud-anon nga amahan. Usa siya ka mapahinungoron nga disipulo ni Jesukristo.
Si Presidente Russell M. Nelson mitudlo, “Kon wala ang walay kataposang Pag-ula sa [Manluluwas], siguradong mahisalaag sa hangtod ang tanang katawhan.”1 Si Danny wala mawala, ug kita usab ngadto sa Ginoo. Nagbarog Siya sa may pultahan sa pagbayaw kanato, sa paglig-on kanato, ug pagpasaylo kanato. Kanunay Siya nga mahinumdom sa paghigugma kanato!
Ang usa ka talagsaon nga pagpakita sa gugma sa Manluluwas alang sa mga anak sa Dios narekord sa Basahon ni Mormon: “Human si Jesus nakapamulong, siya milibot sa iyang mga mata pag-usab ngadto sa pundok sa mga katawhan, ug nakakita nga sila naghilak, ug nagtan-aw kaniya ingon og nagpasabot nga sila mohangyo kaniya sa pagpabilin og diyotay pa nga panahon uban kanila ” (3 Nephi 17:5).
Ang Manluluwas nakagahin na og tibuok adlaw nga pagpangalagad sa katawhan. Bisan pa may daghan pa Siyang buhaton—Kinahanglan bisitahan Niya ang Iyang uban nga karnero; Kinahanglan nga moadto Siya sa Iyang Amahan.
Bisan pa niini nga mga obligasyon, Iyang nakita nga ang katawhan nagtinguha nga Siya magpabilin pa og taud-taod. Dayon, kay ang kasingkasing sa Manluluwas napuno sa kaluoy, usa sa pinakatalagsaong mga milagro sa kasaysayan sa kalibotan nahitabo:
Nagpabilin Siya.
Gipanalanginan Niya sila.
Gipangalagaran Niya ang ilang mga anak sa tinagsatagsa.
Nag-ampo Siya alang kanila; mibakho Siya uban kanila.
Ug Siya miayo kanila. (Tan-awa sa 3 Nephi 17.)
Ang Iyang saad mahangtoron: Siya moayo kanato.
Alang niadtong nahisalaag gikan sa dalan sa pakigsaad, palihog hibaloi nga sa kanunay adunay paglaom, sa kanunay adunay pagpang-ayo, ug sa kanunay adunay paagi nga makabalik.
Ang mahangtoron Niya nga mensahe sa paglaom mao ang makaayo nga tambal sa tanan nga nagpuyo sa samok nga kalibotan. Ang Manluluwas miingon, “Ako mao ang dalan, ang kamatuoran, ug ang kinabuhi” (Juan 14:6).
Mga kaigsoonan, hinumdoman nato ang pagtinguha Kaniya, ang paghigugma Kaniya, ug paghinumdom Kaniya.
Mopamatuod ko nga ang Dios buhi ug Siya nahigugma kanato. Modugang ko sa pagpamatuod nga si Jesukristo ang Manluluwas ug Manunubos sa kalibotan. Siya ang gamhanan nga tig-ayo. Nasayod ko nga ang akong Manunubos buhi! Sa ngalan ni Jesukristo, amen.