Si Ginoong Jesukristo Nagtudlo Kanato sa Pagpangalagad
Pinaagi sa tabang sa atong Manluluwas, kita mahimong mohigugma sa Iyang bililhon nga mga karnero ug mangalagad nila sama sa Iyang buhaton.
Si Ginoong si Jesukristo miingon:
“Ako ang maayong magbalantay sa mga karnero: ang maayong magbalantay andam sa pagpakamatay alang sa mga karnero. …
“Sama nga ang Amahan nakaila kanako ug ako nakaila sa Amahan: Ug ako andam sa pagpakamatay alang sa akong mga karnero.”1
Sa Griyego nga bersiyon niini nga kasulatan, ang pulong nga maayo nagpasabot usab og “maanindot, talagsaon.” Mao nga karon, gusto ko nga mamulong bahin sa Maayong Magbalantay, sa Maanindot nga Magbalantay, sa Talagsaon nga Magbalantay, gani si Jesukristo.
Sa Bag-ong Tugon, gitawag Siya og “gamhanang magbalantay,”2 ang “pangulong Magbalantay,”3 ug “ang Magbalantay ug Tig-atiman sa [atong] kalag.4
Sa Daang Tugon, si Isaias misulat nga “siya magapasibsib sa iyang panon sama sa usa ka magbalantay sa karnero.”5
Sa Basahon ni Mormon, gitawag Siya og “ang maayo nga magbalantay”6 ug “ang halangdon ug tinuod nga magbalantay.”7
Sa Doktrina ug mga Pakigsaad, Siya namahayag, “Busa, anaa ako sa inyong taliwala, ug Ako ang maayo nga magbalantay.”8
Sa atong panahon, si Presidente Russell M. Nelson namahayag: “Ang Maayong Magbalantay mahigugmaong nag-atiman sa tanang karnero sa Iyang panon, ug kita mao ang Iyang tinuod nga mga gitugyanan nga magbalantay sa karnero. Ang atong pribilehiyo mao ang pagdala sa Iyang gugma ug pagdugang sa atong kaugalingong gugma ngadto sa mga higala ug mga silingan—magpakaon, mag-atiman, ug mag-amuma kanila—sama sa gustong ipabuhat sa Manluluwas kanato.”9
Bag-ohay lang, si Presidente Nelson miingon: “Ang timailhan sa tinuod ug buhi nga Simbahan sa Ginoo kanunay mao ang organisado, gidumala nga paningkamot sa pagpangalagad ngadto sa indibidwal nga mga anak sa Dios ug ilang mga pamilya. Tungod kay kini Iyang Simbahan, kita isip Iyang mga sulugoon mangalagad ngadto sa usa, sama sa Iyang gibuhat. Mangalagad kita sa Iyang ngalan, uban sa Iyang gahom ug awtoridad, ug uban sa Iyang mahigugmaong pagbati.”10
Sa dihang ang mga Pariseo ug mga magtutudlo sa balaod nagbagulbol batok sa Ginoo, “nag-ingon, Kining tawhana nag-abiabi sa mga makasasala ug nakigsalo pa gani kanila sa pagpangaon,”11 Siya mitubag pinaagi sa pagpresentar og tulo ka maanindot nga mga istorya nga atong nailhan nga ang sambingay sa nawala nga karnero, ang sambingay sa salapi nga nawala, ug ang sambingay sa anak nga nawala.
Nindot nga timan-an nga sa dihang si Lucas, ang tagsulat sa Ebanghelyo, mipahibalo sa tulo ka istorya, naggamit siya og pulong nga sambingay sa tinagsa, dili sa dinaghan.12 Makita nga ang Ginoo nagtudlo og usa ka talagsaong leksiyon uban sa tulo ka istorya—mga istorya nga nagpakita og lainlaing numero: 100 ka karnero, 10 ka salapi, ug 2 ka anak nga mga lalaki.
Ang mahinungdanong numero sa matag usa niini nga mga istorya, mao ang numero nga usa. Ug ang leksiyon nga atong makuha niana nga numero mao nga kita mahimong gitugyanan nga mga magbalantay sa karnero alang sa 100 ka elder ug umaabot nga mga elder sa inyong korum sa mga elder o tigtambag sa 10 ka batan-ong babaye o magtutudlo sa 2 ka bata sa Primary, apan kamo sa kanunay, sa kanunay mangalagad nila, moatiman nila, ug mohigugma nila sa tinagsa-tagsa. Kamo dili gayod moingon, “Pagkayabag nga karnero” o “Hinoon, wala man ko magkinahanglan niana nga salapi” o “Pagkamasinupakon nga anak.” Kon kamo ug ako adunay “tiunay nga gugma ni Kristo,”13 kita, sama sa tawo diha sa istorya bahin sa nawala nga karnero, “biyaan ang 99 … pangitaon niya ang nawala nga karnero hangtod, [… hangtod, … hangtod nga kini atong] makit-an.”14 O, sama sa babaye diha sa istorya bahin sa salapi nga nawala, kita “magdagkot og suga ug manilhig sa balay ug ato gayod kining pangitaon, [… pangitaon gayod] hangtod, [… hangtod, … hangtod nga kini atong] makit-an.”15 Kon kita adunay “tiunay nga gugma ni Kristo,” kita mosunod sa ehemplo sa amahan diha sa istorya bahin sa anak nga nawala, kinsa, sa dihang ang anak “layo pa gani kaayo siya sa ilang balay, … nakakita na [siya] kaniya. Naluoy siya sa iyang anak ug midagan aron pagtagbo kaniya ug unya migakos ug mihalok kaniya.”16
Makita ba nato ang kadinalian diha sa kasingkasing sa tawo nga nawad-an og usa ka karnero? O ang kadinalian diha sa kasingkasing sa babaye nga nawad-an og usa lang ka salapi? O ang dakong gugma ug kaluoy diha sa kasingkasing sa amahan sa nawala nga anak?
Ang akong asawa, si Maria Isabel, ug ako nagserbisyo sa Central America, gidestino sa Siyudad sa Guatemala. Didto ako adunay oportunidad nga mahimamat si Julia, usa ka matinud-anong miyembro sa Simbahan. Mibati ko nga mangutana bahin sa iyang pamilya. Ang iyang inahan namatay sa kanser niadtong 2011. Ang iyang amahan nahimong matinud-anong lider sa iyang stake, nagserbisyo isip bishop ug magtatambag sa iyang presidente sa stake sulod sa pipila ka tuig. Siya kaniadto usa ka matinud-anong gitugyanan nga magbalantay sa karnero sa Ginoo. Si Julia misulti nako bahin sa iyang walay kakapoy nga mga paningkamot sa pagbisita, sa pagpangalagad, ug sa pagserbisyo. Siya malipayon gayod sa pagpakaon ug pag-atiman sa bililhon nga mga karnero sa Ginoo. Naminyo siya pag-usab ug nagpabiling aktibo sa Simbahan.
Pipila ka tuig ang milabay, nadiborsiyo siya, ug unya nag-inusara na usab siya nga motambong sa simbahan. Mibati siya nga wala mahisakop ug mibati usab nga ang ubang tawo nanaway niya tungod sa iyang diborsiyo. Mihunong siya sa pagtambong sa simbahan kay ang negatibo nga espiritu mipuno sa iyang kasingkasing.
Si Julia mapasigarbohon nga naghisgot bahin niining talagsaon nga gitugyanan nga magbalantay sa karnero, kinsa kugihan, mahigugmaon, ug maluloy-on nga tawo. Klaro kaayo sa akong panumdoman nga ang pagbati sa kadinalian miabot nako samtang naghulagway siya kaniya. Gusto lang ko nga adunay buhaton alang niana nga tawo, usa ka tawo nga daghan kaayo og nabuhat alang sa kadaghanan niadtong katuigan.
Gihatagan ko niya sa numero sa selpon sa iyang papa, ug gitawagan nako siya, nanghinaot nga adunay kahigayonan nga mailaila siya sa personal. Human sa pipila ka semana ug daghan, daghan pang mga pagtawag apan wala molampos, usa ka adlaw gitubag ra gyod niya ang tawag.
Giingnan nako siya nga nagkaila kami ni Julia, iyang anak, ug natandog ko sa paagi sa iyang pagserbisyo, pagpangalagad, ug paghigugma sa bililhon nga mga karnero sa Ginoo sulod sa daghang katuigan. Wala siya magdahom og komentaryo nga sama niana. Giingnan nako siya nga gusto gyod ko nga makaistorya siya nga magkakita, ug magkaatubang kami. Nangutana siya kon unsay akong tuyo sa pagtanyag niana nga panagkita. Mitubag ko, “Ganahan gyod ko nga mahimamat ang amahan sa ingon ka talagsaon nga babaye.” Dayon sa pipila ka segundo adunay kahilom diha sa pagtawag—pipila ka segundo nga alang nako morag walay kataposan. Siya yanong miingon, “Kanus-a ug asa man?”
Sa adlaw nga nahimamat nako siya, gidapit nako siya nga mopakigbahin nako sa pipila sa iyang mga kasinatian sa pagbisita, pagpangalagad, ug pagserbisyo sa bililhon nga mga karnero sa Ginoo. Samtang nagsaysay siya sa pipila ka makapatandog nga mga istorya, akong namatikdan nga ang tono sa iyang tingog nausab ug ang sama nga espiritu nga iyang gibati sa daghan kaayong higayon isip gitugyanan nga magbalantay sa mga karnero mibalik. Karon ang iyang mga mata napuno sa mga luha. Nasayod ko nga mao na kini ang saktong panahon alang nako, apan akong namatikdan nga wala ko kahibalo unsay isulti. Nag-ampo ko sa akong hunahuna, “Amahan, tabangi ko.”
Sa kalit lang, nakadungog ko sa akong kaugalingon nga nag-ingon, “Brother Florian, isip sulugoon sa Ginoo, pasensya kaayo nga wala kami dihang nanginahanglan ka namo. Palihog, pasayloa kami. Hatagi kami og laing higayon nga among mapakita nimo nga kami nahigugma nimo. Nga kami nagkinahanglan nimo. Nga importante ka namo.”
Pagkasunod Dominggo mibalik siya. Siya nakig-istorya og dugay sa iyang bishop ug nagpabiling aktibo. Pipila ka bulan ang milabay namatay siya—apan nahibalik siya. Nahibalik na siya. Ako mopamatuod nga uban sa tabang sa Manluluwas, kita mahimong mohigugma sa Iyang bililhon nga mga karnero ug mangalagad nila sama sa Iyang buhaton. Ug mao nga, si Ginoong Jesukristo midala og balik didto sa Siyudad sa Guatemala og usa ka bililhong karnero ngadto sa Iyang panon. Ug gitudloan ko Niya og leksiyon sa pagpangalagad nga dili nako makalimtan. Sa ngalan sa Maayong Magbalantay, sa Maanindot nga Magbalantay, sa Talagsaon nga Magbalantay, gani si Ginoong Jesukristo, amen.