Si Jesukristo Mao ang Kahupayan

Ni Presidente Camille N. Johnson

Kinatibuk-ang Presidente sa Relief Society

Kita mahimong makig-uban sa Manluluwas sa pagtabang nga mahatagan og temporal ug espiritwal nga kahupayan kadtong mga nanginahanglan—ug sa proseso makakaplag sa atong kaugalingong kahupayan.

Uban sa hugot nga pagtuo ni Jesukristo ug paglaom sa unsay ilang nadungog kabahin sa Iyang mga milagro, ang mga tig-atiman sa tawo nga paralitiko midala kaniya ngadto kang Jesus. Sila mapaningkamoton sa pagpangita og paagi sa pagdala kaniya didto—giukab ang atop ug gipaubos ang tawo, nga naa sa iyang higdaanan, ngadto sa dapit diin nagtudlo si Jesus. Sa dihang si Jesus “nakakita sa kadako sa ilang pagsalig kaniya, miingon siya sa [tawo nga paralitiko], gipasaylo na ang imong mga sala.”¹ Ug dayon, “Bangon, dad-a ang imong higdaanan, ug pauli sa inyo.”² Ug dihadiha mitindog ang paralitiko ug gikuha niya ang iyang higdaanan ug mipauli, “nagdayeg sa Dios.”³

Unsa pa ang atong nahibaloan kabahin sa mga higala nga naghatag og pagpakabana sa tawo nga paralitiko? Nakahibalo kita nga ang Manluluwas miila sa ilang hugot nga pagtuo. Ug human nga nakakita ug nakadungog sa Manluluwas ug nahimong saksi sa Iyang mga milagro, sila “natingala” ug “gidayeg ang Dios.”⁴

Si Jesukristo mihatag sa gilaoman nga pagkaayo—pisikal nga kahupayan gikan sa sakit ug makabakol nga mga sangpotanan sa nagbalik-balik nga sakit. Labing mahinungdanon, ang Manluluwas naghatag usab og espiritwal nga kahupayan sa paglimpyo sa tawo gikan sa sala.

Ug ang mga higala—sa ilang mga paningkamot sa pag-atiman sa usa ka tawo nga nanginahanglan, ilang nakaplagan ang tinubdan sa kahupayan; ilang nakaplagan si Jesukristo.

Mopamatuod ko nga si Jesukristo mao ang kahupayan. Pinaagi sa Pag-ula ni Jesukristo, kita mahimong makalingkawas sa kabug-at ug sa mga sangpotanan sa sala ug matabangan sa atong mga kahuyang.

Ug tungod kay nahigugma kita sa Dios ug mipakigsaad sa pagserbisyo Kaniya, kita mahimong makig-uban sa Manluluwas sa pagtabang nga mahatagan og temporal ug espiritwal nga kahupayan kadtong mga nanginahanglan—ug sa proseso makakaplag sa atong kaugalingong kahupayan diha ni Jesukristo.⁵

Ang atong pinalanggang propeta, si Presidente Russell M. Nelson, midapit kanato sa pagbuntog sa kalibotan ug pagkaplag og kapahulayan.⁶ Iyang gipasabot ang “tinuod nga kapahulayan” isip “kahupayan ug kalinaw.” Si Presidente Nelson miingon, “Tungod sa Manluluwas, pinaagi sa Iyang walay kinutoban nga Pag-ula, mitubos sa matag usa nato gikan sa kahuyang, mga sayop, ug sala, ug tungod kay Siya nakasinati sa matag sakit, kabalaka, ug palas-anon nga inyong nasinati sukad, nan, samtang kamo tinud-anay nga maghinulsol ug mangayo sa Iyang panabang, kamo makabuntog sa mga hagit sa walay kasegurohan nga kalibotan karon.”⁷ Mao kana ang kahupayan nga gitanyag ni Jesukristo kanato!

Matag usa kanato nagdala og mapasumbingayon nga backpack. Mahimong kini usa ka basket nga gibalanse sa imong ulo o usa ka bag o usa ka putos sa mga butang nga gibugkos sa panapton ug gipatong sa imong abaga. Apan sa atong panghunahuna, ato kining tawagon og backpack.

Kini nga mapasumbingayon nga backpack maoy atong gikargahan sa mga palas-anon sa pagpuyo diha sa usa ka napukan nga kalibotan. Ang atong mga palas-anon sama sa mga bato diha sa backpack. Sa kasagaran, adunay tulo ka klase:

Mga bato nga anaa gumikan sa atong kaugalingong binuhatan tungod sa sala.
Mga bato diha sa atong backpack tungod sa dili maayo nga mga desisyon, dili maayong gawi, ug pagkadili mabination sa uban.
Ug mga bato nga atong gipas-an tungod kay kita nagpuyo sa usa ka napukan nga kahimtang. Kini naglakip sa mga bato sa sakit, mga kasakit, nagbalik-balik nga sakit, kaguol, pagkadismaya, pag-inusara, ug mga epekto sa kinaiyanhon nga mga katalagman.

Ako malipayon nga mopahayag nga ang atong mortal nga mga palas-anon, kining mga bato sa atong mapasumbingayon nga backpack, dili kinahanglan nga bug-at.

Si Jesukristo makapagaan sa atong karga.

Si Jesukristo makaalsa sa atong mga palas-anon.

Si Jesukristo naghatag og paagi kanato aron makalingkawas sa gibug-aton sa sala.

Si Jesukristo mao ang atong kahupayan.

Miingon Siya:

“Duol kanako, kamong tanan nga nagbudlay ug nabug-atan, ug papahulayon ko kamo [kana, mao ang kahupayan ug kalinaw].

“Isangon ninyo ang akong yugo diha kaninyo, ug pagtuon kamo gikan kanako; kay ako maaghop ug mapaubsanon sa kasingkasing: ug makakaplag kamog pahulay alang sa inyong mga kalag.

“Kay masayon ang akong yugo, ug magaan ang akong luwan.”⁸

Nga ang yugo sayon ug ang luwan gaan nagpasabot nga kita mipas-an sa yugo kauban sa Manluluwas, nga kita nakigbahin sa atong mga palas-anon uban Niya, nga ato Siyang gitugotan nga moalsa sa atong karga. Kana nagpasabot sa pagsulod ngadto sa usa ka relasyon sa pakigsaad uban sa Dios ug pagsunod niana nga pakigsaad, nga, sama sa gipasabot ni Presidente Nelson, “makahimo sa tanan mahitungod sa kinabuhi nga mas sayon.” Siya miingon, “Ang pagpakigtambayayong sa Manluluwas nagpasabot nga kamo makagamit sa Iyang kusog ug matubsanon nga gahom.”⁹

Mao nga nganong kuripot man kaayo kita sa atong mga bato? Ngano man nga ang usa ka gikapoy nga tig-itsa sa bola [pitcher] sa baseball mobalibad sa pagbiya sa iyang puwesto kon ang usa ka tigrelibo naa andam sa pagtiwas sa dula? Nganong ako mo-insister nga mag-inusarang magpabilin sa akong puwesto kon ang Tigrelibo anaa andam sa pagpadayon niini uban nako?

Si Presidente Nelson nagtudlo, “[Si] Jesukristo … nagbarog nga andam mogakos, malaomon ug andam nga moalim, mopasaylo, mohugas, mopalig-on, molimpyo, ug mobalaan kanato.”¹⁰

Mao nga nganong mo-insister man kita nga mag-inusara sa pagdala sa atong mga bato?

Kini gituyo isip usa ka personal nga pangutana alang sa matag usa kaninyo sa pagkonsiderar.

Alang kanako, kini mao ang garbo nga miimpluwensiya sa mga tawo sa tibuok kasaysayan. “Kaya nako kini,” moingon ko. “Ayaw kabalaka; Ako kining humanon.” Kini mao ang labing dako nga mangingilad kinsa gusto nga ako motago gikan sa Dios, sa pagtalikod Kaniya, sa pagsulay og himo niini nga mag-inusara.

Mga kaigsoonan, dili ko kini mahimo nga mag-inusara, ug wala kinahanglana nga mag-inusara ko, ug dili gayod ako. Ang pagpili nga mabugkos ngadto sa akong Manluluwas, si Jesukristo, pinaagi sa mga pakigsaad nga akong gihimo uban sa Dios, “May kalig-on ako sa pagsagubang sa tanan tungod sa gahom nga gihatag kanako ni Kristo.”¹¹

Ang mga tighupot sa pakigsaad mapanalanginan sa kahupayan sa Manluluwas.

Ikonsiderar kini nga sanglitanan diha sa Basahon ni Mormon: Ang katawhan ni Alma giabusaran pinaagi sa “mga buluhaton diha kanila, ug … mga kapatas ibabaw kanila.”¹² Gidid-an sa pag-ampo og kusog, sila “mibu-bo sa ilang mga kasingkasing ngadto sa [Dios]; ug siya nasayod sa mga hunahuna sa ilang mga kasingkasing.”¹³

Ug ang “tingog sa Ginoo miabot ngadto kanila sa ilang mga kasakit, nag-ingon: Ihangad ang inyong mga ulo ug pagmadasigon, kay Ako nasayod sa pakigsaad diin kamo mihimo ngari kanako; ug Ako makigsaad uban sa akong mga katawhan ug moluwas kanila gikan sa pagkaulipon.

“Ug Ako usab mopagaan sa mga alantoson diin anaa gitungtong diha sa inyong mga abaga, gani kamo dili makabati kanila diha sa inyong mga buko-buko.”¹⁴

Ug ang ilang mga alantoson “gihimo nga magaan,” ug “ang Ginoo mipalig-on kanila nga sila makadaog sa ilang mga alantoson uban sa kasayon, ug sila mitugyan sa maayo nga buot ug uban sa pailob ngadto sa tanan nga kabubut-on sa Ginoo.”¹⁵

Kadto nga mga tigtuman sa pakigsaad nakadawat og panabang pinaagi sa paghupay, dugang nga pailob ug kamalipayon, kasayon diha sa ilang mga alantoson aron nga sila mobati og kagaan, ug sa kataposan kalingkawasan.¹⁶

Karon mobalik kita sa atong mapasumbingayon nga backpack.

Ang paghinulsol, pinaagi sa Pag-ula ni Jesukristo, mao ang mopalingkawas nato gikan sa kabug-aton sa mga bato sa sala. Ug pinaagi niining nindot kaayo nga gasa, ang kaluoy sa Dios mipalingkawas kanato gikan sa bug-at ug imposible nga mga gipangayo sa kaangayan.¹⁷

Ang Pag-ula ni Jesukristo makapahimo usab nga posible alang kanato nga makadawat og kalig-on sa pagpasaylo, nga motugot kanato sa pagbutang sa kabug-at nga atong gipas-an tungod sa dili maayo nga pagtagad sa uban.¹⁸

Mao nga giunsa sa Manluluwas pagpalingkawas kanato gikan sa mga alantoson sa pagpuyo diha sa usa ka napukan nga kalibotan nga adunay mortal nga mga lawas nga ubos sa kaguol ug kasakit?

Kasagaran, Siya mobuhat niana nga klase sa kahupayan pinaagi kanato! Isip mga miyembro sa pakigsaad sa Iyang Simbahan, kita misaad nga “[mag]bangotan uban niadto nga nagbangotan” ug [mo]hupay niadtong nagkinahanglan sa kahupayan.”¹⁹ Tungod kay kita “[mo]ipon sa panon sa Dios” ug “pagatawgon nga iyang mga katawhan,” kita “andam sa pagtambayayong sa usag usa nga mga alantoson, nga sila mahimo nga magaan.”²⁰

Ang atong panalangin sa pakigsaad mao ang makig-uban ni Jesukristo sa paghatag og kahupayan, temporal ug espiritwal, ngadto sa tanan nga anak sa Dios. Kita mao ang agianan diin Siya mohatag og kahupayan.²¹

Ug busa, sama sa mga higala sa tawo nga paralitiko, kita “[mo]tabang sa maluyahon, [mopataas sa] mga kamot sa nawad-an og paglaom, ug [molig-on sa] mga tuhod nga mahuyang.”²² Kita “magtinabangay … sa usag usa nga mga alantoson, ug sa ingon motuman sa balaod ni Kristo.”²³ Kon ato kining buhaton, kita makaila Kaniya, mahimong sama Kaniya, ug makaplagan ang Iyang kahupayan.²⁴

Unsa man ang kahupayan?

Kini mao ang pagtangtang o pagpagaan sa usa ka butang nga sakit kaayo, makahasol, o bug-at nga pas-anon, o ang kalig-on sa paglahutay niini. Kini nagpasabot sa usa ka tawo nga mopuli sa dapit sa lain nga tawo. Kini mao ang legal nga pagtul-id sa usa ka sayop.²⁵ Ang Anglo-French nga pulong nagagikan sa Karaan nga French, ang pulong nga relever, o “pabangonon,” ug gikan sa Latin nga relevare, o “pabangonon pag-usab.”²⁶

Mga kaigsoonan, si Jesukristo mao ang kahupayan. Ako mopamatuod nga Siya mibangon pag-usab sa ikatulo nga adlaw ug, human nakatuman sa mahigugmaon ug walay kataposang Pag-ula, nagbarog nga bukas ang mga kamot, nagtanyag kanato sa kahigayonan nga mobangon pag-usab, maluwas, ug mahimaya ug mahimong sama Kaniya. Ang kahupayan nga Iyang gitanyag kanato walay kataposan.

Sama sa mga babaye nga gibisitahan sa anghel nianang unang buntag sa Pagkabanhaw, ako nangandoy nga “[moadto] dayon” ug uban sa “dakong kalipay” sa pagdala sa pulong nga Siya nabanhaw.²⁷ Sa ngalan sa atong Manluluwas, nga si Jesukristo, amen.