Te taime e fāri’i ai i tō ’outou ha’amaita’ira’a patereareha

Nā Elder Kazuhiko Yamashita

Nō te Hitu ’Ahuru

’Ia fāri’i ’outou i tā ’outou ha’amaita’ira’a, e ’ite ’outou ’e e putapū ho’i ’outou i te here o te Metua i te ao ra ’e o Iesu Mesia nō ’outou, e ’ite ’outou i tō rāua rōtahira’a i ni’a i te ta’ata tāta’itahi.

Inanahi ra, ’ua paraparau tō’u hoa ia Elder Randall K. Bennett, nō ni’a i te mau ha’amaita’ira’a patereareha. E a’ora’a maita’i roa ’e te fa’auru ia tātou pā’āto’a. E au mau taea‘e, e au mau tuahine, e fāri’i ānei ’outou ’ia paraparau ato’a atu vau nō ni’a i te mau ha’amaita’ira’a patereareha ? E te mau patereareha ē, e rahi mai paha te mau tītaura’a ha’amaita’ira’a patereareha, nō reira tē pure nei au ē, ’ia ha’amaita’i te Fatu ia ’outou ’a tāmau ai ’outou i te fa’arahi i tō ’outou pi’ira’a.

’Ia haere au i te mau ’āmuira’a titi, e fārerei iho ā vau i te patereareha o te titi rāua tāna vahine. E mea marū te mau patereareha, e mea ha’apa’o i te parau ’e e feiā fa’atere fa’ahiahia ho’i tei pi’ihia nā te Atua. E mau ’ohipa pae vārua nehenehe mau tā rātou e fa’ati’a mai. E ui au ia rātou e aha te fāito matahiti ha’eha’a roa ’e te pa’ari roa a’e tā rātou i hōro’a i te ha’amaita’ira’a. Tei pāhonohia mai, te mea ’āpī a’e e 11 matahiti ’e te mea pa’ari a’e e 93 matahiti.

’Ua fāri’i au i tō’u ha’amaita’ira’a patereareha ’ei melo ’āpī nō te ’Ēkālesia, i te 19ra’a o te matahiti, e piti matahiti i muri iho i tō’u bāpetizora’a. E pa’ari roa tō’u patereareha. I tomo ’oia i roto i te ’Ēkālesia i te matahiti 1916, e pionie ’oia nō te ’Ēkālesia i te fenua Tāpōnē. E tura rahi nō’u te fāri’ira’a i tō’u ha’amaita’ira’a patereareha mai roto mai i te hō’ē pipi fa’ahiahia nā te Fatu. E mea pa’ari ri’i ’ia hāro’aro’a i tāna parau tāpōne nō’u, e mana rahi rā tā’u i putapū.

’Ua parau mai te mau patereareha tā’u i fārerei ē, e rave rahi ta’ata e fāri’i rātou i tā rātou ha’amaita’ira’a patereareha nā mua noa atu i te tāvini i te hō’ē misiōni. E au mau tamāroa, e au mau tamāhine, e au mau metua, e au mau ’episekōpo, e ’ere te ha’amaita’ira’a patereareha nō te fa’aineinera’a noa nō te tāvini i te hō’ē misiōni. E nehenehe te mau melo ti’a mā tei bāpetizohia, ’ia fāri’i i tā rātou ha’amaita’ira’a patereareha ’ia ti’a te taime nō rātou.¹

E au mau melo ta’ata pa’ari ē, vetahi o ’outou tei ’ore ā i fāri’i i tā rātou ha’amaita’ira’a patereareha. ’A ha’amana’o, ’aita e ’ōti’a matahiti.

E melo itoito mau i roto i te ’Ēkālesia tō’u metua ho’ovai vahine, tei tāvini ’ei ’orometua Sōtaiete Tauturu ē tae noa atu tōna pohe, i te 91ra’a o te matahiti. ’Ua ’oto ri’i au ’aita ’oia i fāri’i i tāna ha’amaita’ira’a patereareha. E rave rahi fifi tā’u i fa’aruru i roto i tōna orara’a, ’e nō te mea ’aita e ta’ata tei mau i te autahu’ara’a i tōna ’utuāfare, ’aita ’oia i fāri’i rahi i te mau ha’amaita’ira’a o te autahu’ara’a. ’Āhani e ha’amaita’ira’a patereareha, e noa’a paha ïa tōna tāmāhanahanara’a i te taime e tītau-roa-hia.

’Outou te feiā pa’ari, mai te peu ’aita ā ’outou i fāri’i i tā ’outou ha’amaita’ira’a patereareha, ’eiaha e pe’ape’a ! E mea ta’a ’ē te pāpa’a ’ohipa pae vārua nō terā ’e terā ta’ata. Mai te mea e 35 ’aore rā e 85 matahiti tō ’outou ’e tē vai ra te hina’aro, ’a paraparau i tō ’outou ’episekōpo nō te fāri’i i tā ’outou ha’amaita’ira’a.

E te mau melo ’āpī o te ’Ēkālesia, ’ua fa’aro’o ānei ’outou i te parau nō te ha’amaita’ira’a patereareha ? ’Aita vau i fa’aro’o a’enei i te tomora’a vau i roto i te ’Ēkālesia, ’ua paraparau mai rā tō’u ’episekōpo iti nō ni’a i te ha’amaita’ira’a patereareha, ma te fa’aitoito iā’u ’ia fa’aineine nō te fāri’i i tā’u iho, i muri mai i te bāpetizora’a. E au mau melo ’āpī, e nehenehe ato’a ’outou e fāri’i i te hō’ē ha’amaita’ira’a patereareha. E tauturu te Fatu ia ’outou ’ia fa’aineine nō taua fāna’ora’a mo’a ra.

Hi’o ana’e e piti fā nō te ha’amaita’ira’a patereareha :

Tei roto i te ha’amaita’ira’a patereareha te parau a’o a te Fatu nō ’outou iho.²
E fa’a’ite te ha’amaita’ira’a patereareha ’o vai tō ’outou ’ōpū i roto i te ’utuāfare o ’Īserā’ela.

Tā ’outou ha’amaita’ira’a patereareha, e poro’i ïa nō ’ō mai i tō ’outou Metua i te ao ra, ’e e riro te reira i te fa’a’ite mai i te mau parau fafau ’e te mau parau a’o fa’auru, nō te arata’i ia ’outou i te roara’a o te orara’a. E’ita te ha’amaita’ira’a patereareha e tatara hu’ahu’a i tō ’outou tere i roto i te orara’a, e’ita ato’a e pāhono i tā ’outou mau uira’a ato’a. Mai te mea ’aita te reira e fa’ahiti i te parau nō te hō’ē ’ohipa faufa’a rahi i roto i te orara’a, ’eiaha e mana’o ē e’ita ’outou e fāna’o i te reira. Nā reira ato’a, ’aita e ha’apāpūra’a ē, e tupu te mau mea ato’a i roto i tā ’outou ha’amaita’ira’a i roto i teie nei orara’a. E mea mure ’ore te ha’amaita’ira’a patereareha, ’e mai te peu e ora ti’a mā ’outou, e hō-mai-hia mai tei parauhia i roto i teie orara’a, i roto i te orara’a nō muri iho.³

’Ia fāri’i ’outou i te fa’a’itera’a nō te ’ōpū, e ’ite ïa ’outou ē, nō roto mai ’outou i te ’utuāfare o ’Īserā’ela, e hua’ai ho’i nō Aberahama.⁴ Nō te māramarama i te aura’a o te reira, e rōtahi ïa i ni’a i te mau parau fafau a te Fatu i te ’utuāfare o ’Īserā’ela, nā roto ia Aberahama.

’Ua parauhia mai :

« E rahi roa tōna hua’ai » (hi’o Genese 17:5–6 ; Aberahama 2:9 ; 3:14).
« E fāri’i tōna hua’ai i te ’evanelia ’e i te autahu’ara’a (hi’o Aberahama 2:9).
« Nā roto i te ’ohipa a tōna hua’ai, « e ha’amaita’ihia ai te mau ’utuāfare ato’a o te fenua nei, ’oia i te mau ha’amaita’ira’a nō te ’Evanelia, ’oia ho’i te mau ha’amaita’ira’a nō te fa’aorara’a, ’oia te ora mure ’ore’ (Aberahama 2:11). »⁵

Tātou te mau melo o te ’Ēkālesia, e mau tamari’i tātou nō te fafaura’a.⁶ E fāri’i tātou i te mau ha’amaita’ira’a nō te fafaura’a a Aberahama. ’ia ha’apa’o tātou i te mau ture ’e te mau ’ōro’a o te ’evanelia.

E tauturu te fa’aineinera’a nō tō ’outou ha’amaita’ira’a patereareha ’ia fa’arahi i tō ’outou fa’aro’o i te Metua i te ao ra ’e ia Iesu Mesia. ’E ’ia fāri’i ’outou i tō ’outou ha’amaita’ira’a patereareha, ’e ’ia tai’o ’outou i te reira ma te feruri i te reira, e ti’a ia ’outou ’ia rōtahi pinepine atu ā i ni’a ia rāua.

’Ua parau te peresideni Thomas S. Monson : « Te Fatu i hōro’a i te Liahona ia Lehi ra, tē hōro’a ato’a nei ïa ia ’outou ’e iā’u nei i teie mahana, i te hō’ē hōro’a varavara ’e te faufa’a rā, nō te hōro’a i te ’avei’a i tō ’outou orara’a, nō te tāpa’o i te mau ataatara’a ’e nō te huti i te ’ē’a, e purūmu ataata ’ore ho’i—e ’ere i te hō’ē fenua i parauhia, i tō tātou rā ’utuāfare i te ra’i. »⁷

E au mau ’episekōpo, te mau metua, te mau peresideni pupu peresibutero ’e Sōtaiete Tauturu, te mau fa’atere misiōni pāroita, te mau taea’e ’e te mau tuahine aupuru, ’a fa’aitoito na i te feiā ’āpī tamāroa ’e tamāhine, te mau melo ta’ata pa’ari ’e te mau melo ’āpī ’aita ā i te fāri’i i tō rātou ha’amaita’ira’a patereareha, ’ia tītau i te arata’ira’a ’e te tauturu a te Fatu nō te fa’aineine ’ia rātou ’ia nā reira.

Pinepine au i te tai’o i tō’u ha’amaita’ira’a patereareha nā roto i te pure ; e noa’a noa mai te fa’aitoitora’a. Tē ’ite nei au e aha tā te Fatu e tīa’i ra iā’u, ’e ’ua tauturu mai te reiar ’ia tātarahapa ’e ’ia fa’aha’eha’a. ’Ia tai’o vau i te reira ’e ’ia feruri ho’i au, e hina’aro tō’u ïa vai ti’a mā nō te fāri’i i tō te reira mau ha’amaita’ira’a.

Mai te mau ’īrava pāpa’ira’a mo’a tā tātou e tai’o e rave rahi taime ’e e aura’a ’āpī nō tātou, e aura’a ’āpī ato’a tō te ha’amaita’ira’a patereareha i te terā taime ’e terā taime. E aura’a ta’a ’ē tō te reira nō’u, i te 30ra’a matahiti ’e i te 50ra’a matahiti. ’Aita te mau parau i taui, ’o tātou rā tē hi’o nei i te reira ma te huru ta’a ’ē.

’Ua parau te peresideni Dallin H. Oaks nō te ha’amaita’ira’a patereareha ē « e hōro’ahia te reira i raro a’e i te fa’aurura’a a te Vārua mo’a, ’ia tai’ohia ïa ’e ’ia ’apohia ïa te reira i raro a’e i te fa’aurura’a a te hō’ē ā Vārua. E ha’api’ihia te aura’a ’e te ta’a ’ē o te ha’amaita’ira’a patereareha, te a’o nā ni’a i te a’o, i te roara’a o te tau, nā roto i te hō’ē ā Vārua tei fa’auru [i te reira]. »⁸

Te mau taea’e ’e te mau tuahine, tē hōro’a nei au i tō’u ’itera’a pāpū ē, tē ora nei te Metua i te ao ra ’e tāna Tamaiti here ’e te Fānau tahi, ’o te Fatu ra Iesu Mesia. ’Ua here rāua ia tātou. E mau hōro’a mo’a te mau ha’amaita’ira’a patereareha nō ’ō mai ia rāua. ’Ia fāri’i ’outou i tā ’outou ha’amaita’ira’a, e ’ite ’outou ’e e putapū ho’i ’outou i tō rāua here ia ’outou, e ’ite ’outou i tō rāua rōtahira’a i ni’a i te ta’ata tāta’itahi.

’O te tahi fa’ahou ’ite nō Iesu Mesia, te Buka a Moromona. ’E ’ua māuruuru vau tē arata’ihia nei tātou e te hō’ē peropheta ora, te peresideni Russell M. Nelson.

’Ua māuruuru roa ho’i au nō tō tātou Fa’aora Iesu Mesia. I teie sābati Pāsa, e rōtahi au i ni’a iāna ’e tōna ti’afa’ahoura’a, ’e e ha’amori au iāna ma te ha’amāuruuru atu nō tāna tusia. ’Ua ’ite au ē, ’ua mamae hōhonu roa ’oia nō tōna here hōhonu ia tātou. ’Ua ’ite au ’ua ti’afa’ahou mai ’oia nō tōna here ia tātou. E mea mau ’oia. Tē fa’a’ite pāpū nei au i te reira i te i’oa o Iesu Mesia, ’āmene.