Ang Akong Hunahuna Mihupot niini nga Panumdoman Mahitungod ni Jesukristo
Samtang magpadayon kamong mabinantayon sa paghupot niini nga panumdoman ni Jesukristo, mosaad ko kaninyo dili lamang sa langitnong giya apan sa langitnong gahom.
Niining matahom nga panahon sa Pasko sa Pagkabanhaw, akong ipalanog ang pag-ampo niining gamahanang himno, “Giyahi, Kami Jehova.”1
Usa ka talagsaong istorya diha sa Basahon ni Mormon naghisgot mahitungod sa usa ka batan-ong lalaki gikan sa usa ka inila nga pamilya, nga ginganlan og Alma, kinsa gihulagway sa kasulatan isip usa ka dili matuohon nga tigsimba og dios-dios.2 Maayo siyang manabi ug daling makaagni, naggamit og mga bulatik aron sa pag-agni sa uban nga mosunod kaniya. Sa dakong katingala, may usa ka anghel nga mipakita kang Alma ug sa iyang mga higala. Natumba si Alma sa yuta ug hilabihan niya kaluya nga gialsa siya nga walay kusog ngadto sa panimalay sa iyang amahan. Nagpabilin siya nga maingon tang walay panimuot sulod sa tulo ka adlaw.3 Sa kadugayan, mipasabot siya nga samtang makita siya nga walay panimuot alang niadtong anaa sa iyang palibot, ang iyang hunahuna abtik kaayo ug ang iyang kalag nagbangotan, naghunahuna sa iyang kinabuhi nga wala magsunod sa mga sugo sa Dios. Iyang gihulagway ang iyang kaugalingon nga “gisamok sa panumdoman sa [iyang] daghan nga mga sala”4 ug “gisakit sa walay kataposan nga kahasol.”5
Sa iyang lawom nga kasagmuyo, nakahimumdom siya nga gitudloan bahin “sa pag-anhi sa usa ka Jesukristo, Anak sa Dios, aron motubos sa mga sala sa kalibotan.”6 Sunod mihimo siya niining makapahinuklog nga pamahayag: “Samtang ang akong hunahuna [mihupot] niini nga panumdoman, ako nangamuyo sulod sa akong kasingkasing: O Jesus, ikaw nga Anak sa Dios, malooy ka kanako.”7 Samtang mihangyo siya sa diosnon nga gahom sa Manluluwas, usa ka milagrosong butang ang nahitabo: “Sa diha nga ako naghunahuna niini,” miingon siya, “ako wala na mahinumdom sa akong mga kasakit.”8 Sa kalit lang mibati siya og kalinaw ug kahayag. “Wala nay labaw katalagsaon ug makapahimuot ingon sa akong hingpit nga kalipay,”9 mipahayag siya.
Si Alma “[mihupot]” niini nga panumdoman mahitungod ni Jesukristo. Kon atong gamiton ang mga pulong “mihupot” sa pisikal nga kahulogan, tingali moingon kita nga “Mihupot siya sa birha sa dihang hapit na siya mahulog,” gipasabot nga mikab-ot diha-diha dayon ug hugot nga migunit ngadto sa usa ka butang nga lig-ong nagtapot sa segurado nga pundasyon.
Sa sitwasyon ni Alma, ang iyang hunahuna maoy mikab-ot ug hugot nga migunit sa usa ka gamhanang kamatuoran mahitungod sa maulaong sakripisyo ni Jesukristo. Milihok sumala sa pagtuo niana nga kamatuoran, ug pinaagi sa gahom ug grasya sa Dios, giluwas siya gikan sa kasagmuyo ug napuno sa paglaom.
Samtang ang atong mga kasinatian mahimong dili sama ka talagsaon sa kang Alma, kini sa gihapon adunay mahangturong kahulogan. Ang atong mga hunahuna usab “[mihupot] sa maong panumdoman” ni Jesukristo ug sa Iyang manggiluy-on nga sakripisyo, ug ang atong mga kalag nakabati sa nagsunod nga kahayag ug kamaya.
Pagseguro sa Hunahuna Mahitungod ni Jesukristo
Ang akong pag-ampo niining panahon sa Pasko sa Pagkabanhaw mao nga atong hunahunaon og maayo ang paghulma, paglig-on, ug pagseguro niining labing mahinungdanong hunahuna mahitungod ni Jesukristo sulod sa mga lawak sa atong kalag,10 motugot niini nga madasigong modagayday ngadto sa atong alimpatakan, mogiya kanato sa unsay atong hunahunaon ug buhaton, ug kanunayng modala sa matam-is nga kamaya sa gugma sa Manluluwas.11
Ang pagpuno sa atong hunahuna sa gahom ni Jesukristo wala magpasabot nga Siya lamang ang atong hunahunaon. Apan nagpasabot kini nga ang tanan natong mga hunahuna ipahiuyon sa Iyang gugma, sa Iyang mga pagtulon-an, ug sa Iyang maulaong sakripisyo ug mahimayaong Pagkabanhaw. Si Jesus dili gayod mahimong hikalimtan, kay ang atong mga hunahuna mahitungod Kaniya kanunay nga anaa ug “ang tanan nga anaa [kanato nagsimba] kaniya”12 Mag-ampo kita ug ibalik sa atong hunahuna ang mga kasinatian nga nagpaduol kanato ngadto Kaniya. Hangopon nato sa atong hunahuna ang diosnong mga hulagway, balaang mga kasulatan, ug dinasig nga mga himno aron hinayhinay nga mapahiluna ang dili maihap nga mga hunahuna sa matag adlaw nga mohasmag sa atong nagkapuliki nga mga kinabuhi. Ang atong gugma Kaniya dili makapanalipod kanato gikan sa mga kaguol ug kasubo niining mortal nga kinabuhi, apan motugot kini kanato aron makalatas sa mga hagit pinaagi sa kalig-on nga labaw pa sa atong kaugalingon.
Hinumdomi, ikaw usa ka anak nga espiritu sa Langitnong Amahan. Sama sa gipasabot ni Apostol Pablo, “mga anak man kita sa Dios.”14 Nagpuyo kamo nga adunay inyong indibidwal nga kinaiya sa layo pa kaayo ang panahon nga moanhi sa yuta. Ang atong Langitnong Amahan mihimo og usa ka plano alang kanato aron moanhi sa yuta, ug mobalik ngadto Kaniya. Iyang gipadala ang Iyang Hinigugmang Anak aron pinaagi sa gahom sa Iyang walay kataposang Pag-ula ug Pagkabanhaw, mabuhi kita lapas sa lubnganan; ug ingon nga andam kitang mopakita og hugot nga pagtuo diha Kaniya ug maghinulsol sa atong mga sala,15 mapasaylo kita ug makadawat sa paglaom sa kinabuhing dayon.16
Paghatag og Talagsaong Atensiyon sa Atong Hunahuna ug Espiritu
Niining mortal nga kinabuhi, ang atong hunahuna ug espiritu nagkinahanglan og talagsaong atensiyon.17 Ang atong espiritu motugot kanato nga mabuhi, mopili, ug makaila sa maayo ug sa daotan.18 Ang atong espiritu makadawat sa pagpamatuod nga ang Dios mao ang atong Amahan, nga si Jesukristo mao ang Anak sa Dios, ug nga ang Ilang mga panudlo mao ang atong giya ngadto sa kalipay dinhi ug sa mahangturong kinabuhi lapas sa lubnganan.
Ang hunahuna ni Alma mihupot niini nga panumdoman mahitungod ni Jesukristo. Nakapausab kini sa iyang kinabuhi. Ang kinatibuk-ang komperensiya mao ang panahon sa pagsabot kon unsa ang gusto sa Ginoo nga atong buhaton ug mamahimong kita. Panahon usab kini sa pagpamalandong sa atong pag-uswag. Samtang ang akong mga tahas nagdalala kanako sa tibuok kalibotan, akong nakita ang nagtubo nga espirituwal nga kalig-on diha sa matarong, mahalaron nga mga miyembro sa Simbahan.
Lima ka tuig na ang milabay, gihangyo kita sa pagbutang sa Manluluwas sa mas taas nga dapit sa tanan natong buhaton pinaagi sa paggamit sa tinuod nga ngalan sa Ang Simbahan ni Jesukristo sa mga Santos sa Ulahing mga Adlaw.19 Naghisgot kita sa Iyang ngalan sa mas sinsero nga paagi.
Upat ka tuig na ang milabay, pinaagi sa pagpamubo sa oras sa atong miting sa sakramento, atong napausbaw ang atong pagpokus sa pag-ambit sa sakramento sa Ginoo. Mas naghunahuna kita mahitungod ni Jesukristo ug mas seryoso sa atong saad sa paghinumdom Kaniya.20
Pinaagi sa pagkahimulag sa tibuok kalibotan nga pandemya, ug sa tabang sa Dali, Sunod Kanako, ang mga pagtulun-an sa Manluluwas nahimong mas mahinungdanon sa atong mga panimalay, nagtabang kanato sa pagsimba sa Manluluwas atol sa semana.
Pinaagi sa pagsunod sa tambag ni Presidente Russell M. Nelson nga “paminaw Kaniya,”21 atong nahashasan ang atong abilidad sa pag-ila sa mga paghunghong sa Espiritu Santo ug sa pagkakita sa kamot sa Ginoo diha sa atong mga kinabuhi.
Pinaagi sa pahibalo ug sa paghuman sa daghan nga mga templo, mas nahimo kitang makanunayon sa pagsulod sa balay sa Ginoo ug sa pagdawat sa Iyang gisaad nga mga panalangin. Mas kusganon natong gibati ang dili hilabwan nga katahom sa atong Manluluwas ug Manunubos.
Si Presidente Nelson miingon:“Dili sayon o awtomatik nga mahimong [usa] ka gamhanang [disipulo]. Kinahanglang lig-on kitang nakatutok sa Manluluwas ug sa Iyang ebanghelyo. Nagkinahanglan og grabeng paningkamot sa pangisip ang pagtan-aw Kaniya sa matag hunahuna.”22
Pinaagi sa pagpunting sa atong atensiyon ngadto kang Jesukristo, ang tanang ubang butang nga nagpalibot kanato—samtang ania pa—makita pinaagi sa atong gugma alang Kaniya. Ang dili kaayo mahinungdanong makalipat nga mga butang mag-anam og kawala, ug atong mapalayo kanang mga butang nga dili angay sa Iyang kahayag ug kinaiya. Samtang magpadayon kamong mabinantayon sa paghupot niini nga panumdoman ni Jesukristo, mosalig Kaninya, ug mosunod sa Iyang mga sugo, mosaad ko kaninyo dili lamang sa langitnong giya apan sa langitnong gahom—gahom nga magdala og kusog sa inyong mga pakigsaad, kalinaw sa inyong mga kalisod, ug kamaya sa inyong mga panalangin.
Paghinumdom ni Jesukristo
Pipila ka semana na ang milabay, Si Kathy ug ako mibisita sa panimalay ni Matt ug Sarah Johnson. Sa bongbong adunay hulagway sa ilang bililhon nga pamilya, usa ka matahom nga hulagway sa Manluluwas, ug usa ka paghulagway sa templo.
Ang ilang upat ka anak nga mga babaye, si Maddy, Ruby, Claire, ug June, malipayong naghisgot kon unsa kadako ang ilang gugma sa ilang inahan.
Sa milabayng sobra sa usa ka tuig si Sarah mi-eskedyul og ma-Sabado nga kasabotan sa pamilya aron dungan nga motambong sa templo aron ang mga batang babaye makaapil sa mga bunyag sa mga sakop sa pamilya kinsa kanhi buhi.
Pagka Nobyembre sa miaging tuig, mi-eskedyul si Sarah og kasabotan sa pag-adto sa templo sa kataposang semana sa Huwebes imbis nga sa Sabado. “Hinaot nga OK ra ikaw niana,” gisultihan niya si Matt.
Nahibaloan nga adunay kanser si Sarah, apan naglaom ang mga doktor nga mabuhi pa siya og duha o tulo o daghan pang mga tuig. Atol sa miaging miting sa sakramento, mipaambit si Sarah sa iyang gamhanang pagpamatuod, nag-ingon nga bisan unsa pa ang mahitabo kaniya, gihigugma niya ang Manluluwas sa tibuok niyang kasingkasing, ug ang “kadaogan gipahinabo na” Niya. Samtang nagdagan ang Disyembre, kalit lang nga nagkahinay ang kahimsog ni Sarah, ug gidala siya sa ospital. Sa sayong buntag sa Huwebes, Disyembre 29, hilom niyang natapos ang iyang pagkamortal. Si Matt nag-uban ni Sarah sa tibuok gabii.
Samtang ang iyang kasingkasing nabuak ug hingpit nga nawad-an og espirituwal ug emosyonal nga kusog, mipauli siya, nagsubo uban sa iyang mga anak nga babaye. Sa paglingi ni Matt sa iyang telepoho, namatikdan niya ang dili kasagarang kasabotan sa pag-adto sa templo sa Huwebes nga gipahigayon ni Sarah alang nianang adlawa. Miingon si Matt, “Sa unang pagkakita nako niini, naghunahuna ko, dili ni mahitabo.”
Apan sa kalit lang ang hunahuna ni Matt mihupot niini nga panumdoman: “Buhi ang Manluluwas. Walay laing dapit diin palabihon namong moadto isip pamilya kay sa Iyang balaan nga balay.”
Si Matt, Maddy, Ruby, Claire, ug June miabot sa templo alang sa kasabotan sa pagtambong nga gi-eskedyul ni Sarah alang kanila. Samtang nag-agas ang mga luha sa iyang mga aping, gihimo ni Matt ang mga pagbunyag uban sa iyang mga anak nga mga babaye. Gibati nila sa kahiladman ang ilang gugma ug mahangturong pagkasuod ngadto ni Sarah, ug gibati nila ang hilabihang gugma ug makahupay nga kalinaw sa Manluluwas. Si Matt malumo nga mipakigbahin, “Samtang akong gibati ang lawom nga kaguol ug pagbangotan, nagsinggit ko sa kamaya, nasayod sa talagsaong plano sa akong Amahan alang sa kaluwasan.”
Niining panahon sa Pasko sa Pagkabanhaw, mopamatuod ko sa hingpit ug labing siguro nga kamatuoran sa dili ikatandi nga maulaong sakripisyo sa Manluluwas ug sa Iyang mahimayaon nga Pagkabanhaw. Samtang ang inyong hunahuna hugtanon ug sa hangtod mohupot niini nga panumdoman ni Jesukristo, ug samtang magpadayon kamo sa pagpunting ang inyong kinabuhi sa mas hingpit nga paagi ngadto sa Manluluwas, mosaad ko nga bation ninyo ang Iyang paglaom, Iyang kalinaw, ug Iyang gugma. Sa ngalan ni Jesukristo, amen.