Hinumdomi Unsa ang Labing Mahinungdanon
Ang labing mahinungdanon mao ang atong mga relasyon ngadto sa Langitnong Amahan ug sa Iyang Hinigugma nga Anak, atong mga pamilya, ug atong mga silingan, ug pagtugot sa Espiritu nga mogiya kanato.
Samtang atong hinumdoman niining hinapos sa semana ang madaogon nga pagsulod sa Manluluwas ngadto sa Jerusalem sa hapit na ang Iyang maulaong sakripisyo, nahinumdoman nako ang Iyang mga pulong sa paglaom ug kahupay: “Ako mao ang pagkabanhaw, ug ang kinabuhi: ang mosalig kanako bisan siya mamatay, mabuhi siya.”1
Gihigugma nako Siya. Nagtuo ako Kaniya. Mopamatuod ko nga Siya mao ang Pagkabanhaw ug ang Kinabuhi.
Kini nga pagpamatuod nakahupay ug nakalig-on kanako atol sa miaging upat ug tunga ka tuig sukad nga ang akong asawa, si Barbara, namatay. Gimingaw ko niya.
Kasagaran, mamalandong ko sa among mahangturong kaminyoon ug sa among gisaw-an nga kinabuhi.
Ako nang gipakigbahin sa una kon giunsa nako paghimamat si Barbara sa unang higayon ug sa unsang paagi kadto nga kasinatian nakatudlo nako sa paggamit sa kahanas sa “pagsukna [pag-follow-up]” nga akong nakat-onan sa akong misyon. Ako dayon siyang gisukna human sa una namong paghimamat kay gwapa siya, sikat, ug bisi kaayo ang iyang sosyal nga kalendaryo. Naigo dayon ang akong pagbati tungod kay dali siyang istoryahon ug mahigalaon. Gidayeg nako ang iyang kamaayo. Gibati nako nga siya ug ako para sa usag usa. Maorag ingon lang niana ka simple sa akong hunahuna.
Nag-deyt mi ni Barbara, ug ang among relasyon nagsugod sa paglambo, apan dili siya sigurado kon ang pagpakigminyo nako sakto ba para niya.
Dili pa igo nga nasayod ko; si Barbara kinahanglang masayod para sa iyang kaugalingon. Nasayod ko nga kon mogahin mi og panahon sa pagpuasa ug pag-ampo alang nianang butanga, makadawat si Barbara og kumpirmasyon gikan sa langit.
Migahin mi og usa ka hinapos sa semana nga wala mi mag-deyt aron magpuasa ug mag-ampo sa tinagsa aron masayod sa among kaugalingon mismo. Swerte kaayo para nako, nakadawat siya sa sama nga kompirmasyon nga akong nadawat. Ang sunod nga panghitabo, sama sa ilang giingon, dili na kinahanglang isulti pa.
Dihang namatay si Barbara, gibutang sa among mga anak diha sa iyang lapida ang pipila ka nga pagtulon-an nga gusto ni Barbara nga hinumdoman nila. Usa niana nga mga pagtulon-an mao “ang pinakamahinungdanon mao ang molungtad og dugay.”
Karong adlawa, akong ipakigbahin gikan sa akong kasingkasing ang pipila ka mga pagbati ug mga hunahuna kon unsa ang labing mahinungdanon.
Una, ang relasyon ngadto sa atong Langitnong Amahan ug sa Iyang Anak, si Ginoong Jesukristo, maoy labing importante. Kini nga relasyon labing mahinungdanon karon ug sa kahangtoran.
Ikaduha, ang mga relasyon sa pamilya maoy usa nianang mga butang nga labing mahinungdanon.
Sa tibuok nakong pagpangalagad, nakabisita ko og daghang mga indibidwal ug mga pamilya nga naapektohan sa makaguba nga kinaiyanhong mga katalagman. Daghan ang nawad-an og pinuy-anan, gigutom, ug nahadlok. Nagkinahanglan sila og medikal nga tabang, pagkaon, ug kapasilongan.
Nagkinahanglan usab sila sa ilang mga pamilya.
Akong nakita nga ang uban tingali wala makabaton sa mga panalangin sa suod nga pamilya, busa akong iapil ang kaliwat, mga higala, ug gani mga pamilya sa ward isip “pamilya.” Kini nga mga relasyon gikinahanglan kaayo alang sa emosyonal og pisikal nga kahimsog.
Kini nga mga relasyon makatanyag usab og gugma, kamaya, kalipay, ug pagbati nga nahisakop.
Ang pag-amuma niining importante nga mga relasyon usa ka pagpili. Ang pagpili nga mahimong kabahin sa usa ka pamilya nagkinahanglan og pasalig, gugma, pailob, komunikasyon, ug pagpasaylo.2 Tingali adunay mga panahon nga dili kita magkasinabot sa usag-usa, apan mahimo kitang magkasupakay nga dili maglain ang buot. Diha sa pagpangulitawo ug sa kaminyoon, dili kita basta lang mokalit og kahigugma o kalit lang nga mawad-an og gugma nga morag mga butang lamang kita nga itulod bisan asa diha sa chessboard. Mopili kita aron mohigugma ug mosuporta sa usag usa. Buhaton nato ang sama niini diha sa ubang mga relasyon sa pamilya ug sa mga higala kinsa sama ra sa atong pamilya.
Ang pamahayag sa pamilya nag-ingon nga “ang balaan nga plano sa kalipay makahimo sa mga relasyon sa pamilya nga magpadayon human sa kamatayon. Sagrado nga mga ordinansa ug mga pakigsaad nga anaa sa balaan nga mga templo makapahimo sa tagsa-tagsa nga makabalik ngadto sa atubangan sa Dios ug alang sa mga pamilya nga magkahiusa sa kahangtoran.”3
Laing butang nga labing mahinungdanon mao ang pagsunod sa mga pag-aghat sa Espiritu diha sa atong labing mahinungdanong mga relasyon ug sa atong mga paningkamot sa paghigugma sa atong mga silingan sama sa atong kaugalingon, lakip na sa atong pribado ug publiko nga pagpangalagad. Nakat-onan ko kining leksiyon sayo sa akong kinabuhi samtang nag-alagad isip usa ka bishop.
Gabii na kaayo sa usa ka tugnaw, daghang niyebe [snow] nga gabii sa tingtugnaw, padulong na kong mobiya sa opisina sa bishop dihang gibati nako ang kusog nga impresyon nga mobisita sa tigulang nga biyuda sa ward. Mitan-aw ko sa akong relo—alas 10:00 na sa gabii. Mirason ko nga atrasado na kaayo ang maong pagbisita. Ug gawas pa, daghan kaayong snow. Nakahukom ko nga bisitahon kining minahal nga sister sa sayo sa buntag kaysa tugawon siya sa maong lawom na kaayo nga oras. Mipauli ko ug natulog apan nag-alindasay ko sa tibuok gabii tungod kay ang espiritu nagsamok nako.
Sayo sa sunod nga buntag, mederetso ko og padagan sa sakyanan ngadto sa balay sa biyuda. Ang iyang anak nga babaye miabli sa pultahan ug naghilak nga nag-ingon, “Oh bishop, salamat sa imong pag-anhi. Namatay si Mama duha ka oras na ang milabay”—Nahugno ko. Dili gayod nako makalimtan ang mga pagbati sa akong kasingkasing. Mibakho ko. Kinsa ang labaw pa niining minahal nga biyuda nga angayang gunitan sa iyang bishop ang iyang kamot, hupayon siya, ug tingali hatagan siya og kataposang panalangin? Gipakyas nako kadto nga kahigayonan tungod kay akong gibaliwala kining kusganong pag-aghat gikan sa Espiritu.4
Mga kaigsoonan, batan-ong mga lalaki ug batan-ong mga babaye, ug mga bata sa Primary, ako mopamatuod nga ang pagsunod sa mga pag-aghat sa Espiritu maoy usa sa mga butang nga labing mahinungdanon sa tanan natong mga relasyon.
Sa kataposan, niining hinapos sa semana nga Dominggo sa Lukay, mopamatuod ko nga ang pagkakabig ngadto sa Ginoo, ang pagpamatuod mahitungod Kaniya, ug ang pagserbisyo Kaniya kauban usab sa mga butang nga labing mahinungdanon.
Ang hugot nga pagtuo kang Jesukristo mao ang pundasyon sa atong mga pagpamatuod. Ang pagpamatuod maoy usa ka saksi o kumpirmasyon sa mahangtorong kamatuoran nga natanom diha sa indibidwal nga mga kasingkasing ug mga kalag pinaagi sa Espiritu Santo. Ang pagpamatuod kang Jesukristo, natawo ug gilig-on pinaagi sa Espiritu, makausab sa mga kinabuhi—kini makausab sa atong pamaagi sa paghunahuna ug sa paagi sa atong pagpakabuhi. Ang pagpamatuod modala kanato paingon ngadto sa atong Langitnong Amahan ug sa Iyang balaan nga Anak.
Si Alma nagtudlo:
“Tan-awa, ako mopamatuod nganha kaninyo nga ako nasayod nga kini nga mga butang diin ako namulong mga tinuod. Ug giunsa ninyo pagdahom nga ako nasayod sa ilang kasiguroan?
“Tan-awa, ako moingon nganha kaninyo nga sila gihimo nga mabutyag ngari kanako pinaagi sa Balaang Espiritu sa Dios. Tan-awa, ako nagpuasa ug nag-ampo sa daghan nga mga adlaw nga ako unta masayod niini nga mga butang sa akong kaugalingon. Ug karon ako nasayod sa akong kaugalingon nga sila mga tinuod; kay ang Ginoong Dios mihimo [niini] nga makita ngari kanako pinaagi sa iyang Balaang Espiritu.”5
Ang pagbaton lamang og pagpamatuod dili igo. Samtang ang atong pagkakabig ngadto ni Jesukristo molambo, natural lang nga gusto kitang mopamatuod bahin Kaniya—sa Iyang kaayo, gugma, ug kabuotan.
Sa kasagaran diha sa atong mga tigom sa pagpamatuod sa mga Dominggo nga tingpuasa, atong madungog ang mga pulong nga “mapasalamaton ko” ug “gihigugma ko” kay sa madungog nato ang mga pulong nga “nasayod ko” ug “nagtuo ko.”
Dapiton ko kamo nga mas kanunayong mohatag sa inyong pagpamatuod ni Jesukristo. Ihatag ang inyong pagpamatuod sa unsay inyong nahibaloan ug gituhoan ug kon unsay inyong gibati, dili lang sa kon unsa ang inyong gipasalamatan. Pagpamatuod sa inyong kaugalingon nga mga kasinatian sa pagkaila ug paghigugma sa Manluluwas, sa iyang buhi nga mga pagtulon-an, ug sa Iyang makatubos ug makahatag og kasarang nga gahom diha sa inyong kinabuhi. Samtang mopamatuod kamo sa unsay inyong nahibaloan, gituhoan, ug gibati, ang Espiritu Santo mokompirma sa kamatuoran niadtong kinsa sinsero nga maminaw sa inyong pagpamatuod. Buhaton nila kini tungod kay nakakita sila kaninyo nga nahimong mga malinawon nga mga sumusunod ni Jesukristo. Makita nila kon unsay gipasabot sa pagkahimong Iyang disipulo. Mobati usab sila og ubang butang nga tingali wala nila mabati kaniadto. Ang lunsay nga pagpamatuod nagagikan sa usa ka kasingkasing nga nausab ug mahimong dad-on pinaagi sa gahom sa Espiritu Santo ngadto sa mga kasingkasing sa uban kinsa bukas nga modawat niini.
Kadtong kinsa mobati og talagsaong butang isip resulta sa inyong pagpamatuod tingali diha dayon mohangyo sa Ginoo pinaagi sa pag-ampo sa pagkompirma sa kamatuoran sa inyong pagpamatuod. Dayon makahibalo sila mismo sa ilang kaugalingon.
Mga kaigsoonan, ako mopamatuod ug mosaksi nganha kaninyo nga ako nasayod nga si Jesukristo mao ang Manluluwas ug Manunubos sa kalibotan. Buhi siya. Siya mao ang nabanhaw nga Anak sa Dios, ug kini mao ang Iyang Simbahan, gipangulohan sa Iyang propeta ug apostoles. Ako mopamatuod nga sa umaabot nga adlaw sa dihang mopadayon ako ngadto sa sunod nga kalibotan, nga unta buhaton ko kini uban sa akong lig-on kaayo nga pagpamatuod.
Sa akong pagpangalagad, akong nakat-onan nga ang labing mahinungdanon mao ang atong mga relasyon ngadto sa Langitnong Amahan ug sa Iyang Hinigugma nga Anak, atong mga pamilya, ug atong mga silingan, ug pagtugot sa Espiritu sa Ginoo nga mogiya kanato niana nga mga relasyon aron kita makapamatuod sa mga butang nga labing mahinungdanon ug molungtad sa labing taas nga panahon. Sa ngalan ni Jesukristo, amen.